1, 2. (a) Jisas i holim wanem tingting long Lo Bilong God? (b) Olsem wanem ol saveman bilong lo na ol Farisi i no bihainim stret Lo?

JISAS i laikim Lo Bilong Moses. Man i stap nambawan tru long laip bilong Jisas i kamapim dispela Lo—em Papa bilong em, Jehova. Jisas i laikim tru lo bilong God olsem tok profet i stap long Song 40:8 i tok: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” Ol tok Jisas i autim na pasin bilong em i kamapim klia olsem Lo Bilong God i gutpela na i stret olgeta, na em inap helpim yumi taim yumi bihainim.—Mat. 5:17-19.

² Ating Jisas i bel hevi tru taim em i lukim olsem ol saveman bilong lo na ol Farisi i no bihainim stret Lo bilong Papa bilong em! Ol i strong long bihainim ol liklik liklik lo, olsem na Jisas i tok: “Yupela i save givim namba 10 hap bilong ol spais olsem mint na dil na kumin.” Bilong wanem Jisas i mekim dispela tok? Em i tok moa: “Yupela i no tingim ol bikpela tok bilong Lo, olsem stretpela pasin na pasin marimari na pasin bilong bilip.” (Mat. 23:23) Jisas i no olsem ol saveman bilong lo na ol Farisi, em i kliagut long risen na God i givim Lo. Dispela Lo i tokaut long ol pasin bilong God em ol manmeri i mas wok strong long bihainim.

3. Yumi bai skelim wanem ol askim long dispela stadi?

 ³ Yumi ol Kristen i no stap aninit long kontrak bilong Lo. (Rom 7:6) Maski i olsem, Jehova i larim dispela Lo i stap long Baibel bambai yumi inap kliagut na bihainim “ol bikpela tok bilong Lo,” em ol stretpela stiatok bilong Lo. Em i no laik bai yumi tingim tumas ol liklik samting long sait bilong Lo. Yumi inap kisim wanem skul long lo God i putim long ol Israel i mas makim ol taun bilong hait? Long stadi i kamap paslain, yumi kisim skul long ol samting ranaweman i mas mekim sapos em i popaia na kilim narapela. Na tu, yumi kisim skul long Jehova na olsem wanem yumi inap bihainim ol pasin bilong em. Dispela stadi bai bekim 3-pela askim: Olsem wanem ol taun bilong hait i kamapim klia pasin marimari bilong Jehova? Yumi kisim wanem skul long tingting God i gat long laip? Olsem wanem ol taun bilong hait i kamapim klia stretpela pasin bilong God? Taim yumi skelim bekim bilong ol dispela askim, luksave long olsem wanem yumi inap bihainim pasin bilong Papa bilong yumi long heven.—Ritim Efesus 5:1.

4, 5. (a) Ol i makim ol taun bilong hait long wanem hap? (b) Bilong wanem ol i makim ol taun long ol dispela hap? (c) Yumi kisim wanem skul long pasin bilong Jehova?

⁴ Sikspela taun bilong hait i stap long hap we i isi long ol man i ken ranawe i go long en. Jehova i tokim lain Israel long makim 3-pela taun long wanpela sait bilong wara Jordan, na 3-pela long narapela sait. Bilong wanem God i tokim ol long mekim olsem? Long wanem, man husat i popaia na kilim narapela i ken ranawe kwik i go long wanpela bilong ol dispela taun na hait. (Nam. 35:11-14) Ol i save stretim gut ol rot i go long ol dispela taun. (Lo 19:2, 3) Na tu, ol Juda i save sanapim ol sain pos bilong stiaim ol ranaweman i go long ol taun bilong hait. Long dispela rot, i no gat wok long ol i ranawe i go long narapela kantri we ol man inap pulim ol long lotuim ol god giaman.

⁵ Tingim: Jehova i givim lo olsem ol i mas kotim na kilim i dai man husat i kilim narapela long laik bilong em yet. Tasol God i marimari long ol man husat i popaia na kilim narapela, na em i stretim rot bilong lukautim ol! Wanpela man i tok: “God i mekim olgeta samting i isi moa bambai man i no hatwok. Dispela i kamapim klia olsem God i tingim tru ol narapela.” Jehova i no olsem wanpela Jas husat i redi long givim panismen long ol wokman bilong em, nogat. “Marimari i pulap long God.”—Efe. 2:4.

6. Olsem wanem pasin marimari bilong God i narapela kain long pasin bilong ol Farisi?

⁶ Ol Farisi i no gat pasin bilong marimari. Ol i bihainim kastam bilong ol na ol i no laik lusim rong bilong ol narapela winim 3-pela taim. Jisas i kamapim klia pasin ol i save mekim taim ol narapela i rongim ol. Em i stori long wanpela Farisi husat i beten olsem: “God, mi tenkyu olsem mi no olsem ol arapela man, em ol i man bilong stil, mekim pasin i no stret, na mekim pasin adaltri. Na tu, mi tenkyu olsem mi no olsem dispela takisman.” Takisman i daunim em yet na beten long God i ken marimari  long em. Tasol ol Farisi i no laik soim pasin marimari. Baibel i tok olsem ol i save “tingim ol arapela olsem ol i man nating.”—Luk 18:9-14.

7, 8. (a) Sapos wanpela i rongim yu, olsem wanem yu inap bihainim pasin bilong Jehova? (b) Olsem wanem pasin daun bai helpim man long fogivim ol narapela?

⁷ Yumi mas bihainim pasin bilong Jehova, na soim pasin sori long ol narapela. (Ritim Kolosi 3:13.) Wanpela rot bilong bihainim pasin bilong God em olsem, yumi mas redi long fogivim ol narapela. (Luk 17:3, 4) Askim yu yet: ‘Mi redi long fogivim ol narapela maski ol i rongim mi inap planti taim? Mi redi long kamapim pasin wanbel wantaim wanpela husat i rongim mi o mekim tok i bagarapim bel bilong mi?’

⁸ Yumi mas i gat pasin daun bambai yumi inap fogivim ol narapela. Ol Farisi i no mekim olsem bikos ol i tingim ol narapela olsem ol man nating. Yumi ol Kristen i mas daunim yumi yet na “tingim olsem ol arapela i winim” yumi, na dispela bai helpim yumi long fogivim ol narapela. (Fili. 2:3) Olsem wanem? Yu bai bihainim pasin bilong Jehova na mekim pasin daun? Oltaim redi long lusim rong bilong ol narapela. Yu mas redi long soim pasin marimari na sakim pasin bilong belhat kwik.—Sav. 7:8, 9.

9. Olsem wanem Jehova i helpim lain Israel long tingim laip olsem samting i holi?

⁹ Namba 1 wok bilong ol taun bilong hait em long helpim lain Israel bambai ol i no kilim narapela man na i gat asua long blut. (Lo 19:10) Jehova i heitim “pasin bilong kilim nating ol arapela man.” (Snd. 6:16, 17) Em tru olsem God i soim pasin marimari long ol man i popaia na kilim narapela. Maski i olsem, God em i holi na em i gat stretpela pasin, olsem na dispela man i mas kamap long kot. Em i mas i go lukim ol hetman na sapos ol hetman i skelim olsem em i bin popaia na kilim narapela, orait em i mas stap long taun bilong hait inap long hetpris i dai. Dispela inap makim olsem em i mas stap long hap long laip olgeta bilong em. Dispela lo God i givim i helpim lain Israel long tingim laip olsem samting i holi. Sapos ol i laik givim ona long Man i givim laip long ol, orait ol i mas abrusim pasin bilong kilim narapela man i dai maski ol i mekim long laik bilong ol yet o ol i popaia.

10. Jisas i tok wanem bilong soim olsem ol saveman bilong lo na ol Farisi i no tingim laip olsem bikpela samting?

¹⁰ Ol saveman bilong lo na ol Farisi i no bihainim pasin bilong Jehova, na ol i no tingim laip olsem bikpela samting. Jisas i tokim ol: “Yupela i tekewe ki bilong kisim save. Yupela yet i no go insait na ol man i laik i go insait, yupela i traim long stopim ol.” (Luk 11:52) Ol saveman bilong lo na ol Farisi i gat wok long helpim ol man long kliagut long Tok Bilong God na bai ol i ken bihainim rot i go long laip. Tasol ol i no helpim ol manmeri long bilip long “Nambawan Gopas Bilong Laip,” em Jisas, ol i stiaim ol i go long rot we ol inap lus long kisim laip oltaim. (Apo. 3:15) Ol dispela man i gat pasin antap na ol i tingim ol yet tasol, ol i no tingting long skulim ol manmeri long bihainim ol stretpela lo bilong God na kisim laip long bihain. Tru tumas, ol saveman bilong lo na ol Farisi i man nogut na ol i no gat pasin marimari!

11. (a) Olsem wanem aposel Pol i soim olsem em i tingim laip bilong ol manmeri olsem samting i dia tumas? (b) Wanem samting bai kirapim yumi long givim bel long mekim wok autim tok?

¹¹ Olsem wanem yumi inap bihainim pasin bilong  Jehova na i no pasin bilong ol saveman bilong lo na ol Farisi? Yumi mas rispektim laip em God i givim long yumi na tingim olsem em i gutpela presen. Aposel Pol i stap gutpela piksa em yumi ken bihainim. Em i givim bel tru long autim gutnius long olgeta manmeri, olsem na em i tok: “Mi no gat asua long blut bilong wanpela man.” (Ritim Aposel 20:26, 27.) Wanem samting i kirapim Pol long mekim olsem? Pol i laikim tru ol manmeri, na i no olsem bel i kotim em na em i autim tok. Em i tingim laip bilong ol manmeri i olsem samting i dia tumas. (1 Kor. 9:19-23) Yumi laik holim wankain tingting olsem bilong Jehova, em i “laik bai olgeta [manmeri] i tanim bel.” (2 Pita 3:9) Taim yumi gat pasin bilong marimari long ol narapela, dispela bai kirapim yumi long givim bel long mekim wok autim tok na kisim bikpela amamas.

12. Bilong wanem ol man i lotuim God i tingim seifti olsem bikpela samting?

¹² Yumi soim olsem yumi tingim laip olsem bikpela samting taim yumi tingim seifti long ol wok yumi mekim. Yumi mas draiv gut na lukautim yumi yet taim yumi mekim wok konstraksen, wok meintenens, o taim yumi wokabaut o ron long kar i go long miting o kibung. No ken larim wok, mani, o sediul i mekim na yumi no tingim seifti na helt bilong yumi olsem bikpela samting. Oltaim God bilong yumi i save mekim ol samting i gutpela na i stret. Olsem na yumi mas bihainim pasin bilong em. Ol elda i wok strong long tingim seifti bilong ol yet na seifti bilong ol bratasista husat i wok wantaim ol. (Snd. 22:3) Sapos wanpela elda i toktok wantaim yu long sait bilong seifti na ol lo bilong lukautim yu, orait yu mas redi long harim na bihainim dispela tok. (Gal. 6:1) Yumi mas holim wankain tingting olsem bilong Jehova na tingim laip olsem bikpela samting bambai yumi “no gat asua long kilim i dai man.”

13, 14. Olsem wanem ol hetman bilong lain Israel i kamapim stretpela pasin bilong Jehova?

¹³ Jehova i tokim ol hetman bilong lain Israel long bihainim stretpela pasin long mekim kot. Pastaim, ol hetman i mas painimaut gut long samting i bin kamap. Bihain, ol i mas skelim wanem ol samting i bin kamap na man i kilim narapela, painimaut gut wanem tingting bilong dispela man long hevi i kamap, na tu, ol i mas skelim ol pasin em i save mekim . Long dispela rot, ol inap save sapos ol bai soim pasin marimari long em o nogat. Ol i laik bihainim stretpela pasin bilong God long mekim kot, olsem na ol i mas skelim sapos dispela man i “gat kros” o “em i tromoi nating wanpela samting long [narapela man] na kilim em.” (Ritim Namba 35:20-24.) Sapos ol hetman i askim ol aiwitnes long stori long samting i kamap, orait i mas i gat 2-pela o 3-pela aiwitnes i stap bambai ol i ken kotim man.—Nam. 35:30.

¹⁴ Bihain long ol i skelim ol dispela samting, orait ol hetman bai painimaut gut long pasin bilong dispela man. Ol hetman i mas bihainim savetingting na skelim gut ol samting i bin kamap. Bikpela samting moa, ol i mas askim Jehova long givim holi spirit long ol bambai ol inap bihainim savetingting, pasin marimari, na stretpela pasin bilong God.—Kis. 34:6, 7.

15. Olsem wanem tingting Jisas i gat long ol sinman i narapela kain long tingting em ol Farisi i gat?

¹⁵ Ol Farisi i save tingim tasol popaia bilong man, na ol i no save painimaut gut wanem samting i stap long bel bilong man. Taim ol Farisi i lukim Jisas i go long wanpela kaikai i kamap long haus bilong Matyu, ol i askim ol disaipel olsem: “Bilong wanem tisa bilong yupela i save kaikai wantaim ol takisman na ol sinman?” Jisas i bekim tok olsem: “Ol man i no gat sik ol i no save go lukim dokta, tasol ol sikman ol i save go lukim dokta. Orait, go nau na kisim save long mining bilong dispela tok: ‘Mi no laikim sakrifais, mi laikim pasin marimari.’ Long wanem, mi no kam bilong singautim ol stretpela man, nogat, mi kam bilong singautim ol sinman.” (Mat. 9:9-13) Yu ting dispela i makim olsem Jisas i orait long ol man i mekim ol bikpela rong? Nogat tru. Tok bilong Jisas i kamapim klia olsem man i mas tanim bel long rong em i mekim. (Mat.  4:17) Jisas i luksave long bel na tingting bilong ol dispela “takisman na ol sinman.” Ol i no kam long haus bilong Matyu bilong kaikai tasol, nogat. “Planti bilong ol i bin kirap bihainim [Jisas].” (Mak 2:15) Sori tru olsem planti Farisi i no luksave olsem ol dispela kain man i wok strong long lusim ol pasin nogut bilong ol. Ol Farisi i no bihainim stretpela pasin na pasin marimari bilong God na ol i lukim ol dispela man olsem ol sinman, na tingim ol olsem samting nating.

16. Ol elda i stap long komiti bilong harim kot i mas mekim wanem?

¹⁶ Ol elda i mas bihainim pasin bilong Jehova, em Man husat i “laikim tumas stretpela pasin.” (Sng. 37:28) Pastaim, ol i mas “painimaut gut as bilong tok” bilong save sapos Kristen i bin mekim rong o nogat. Sapos Kristen i mekim bikpela rong, orait ol elda bai yusim ol stiatok bilong Baibel long stretim em. (Lo 13:12-14) Sapos ol elda i stap long komiti bilong harim kot, orait ol i mas skelim gut sapos Kristen husat i mekim bikpela rong i hevi long rong em i mekim na i tanim bel. Pasin bilong tanim bel i makim olsem man i mas rausim ol samting em i save tingim tingim long bel, na em i mas lusim ol pasin nogut em i save bihainim. Yumi man i no inap save long tingting tru bilong narapela, olsem na sampela taim i hatwok long save sapos man i tanim bel tru o nogat. (Rev. 3:3) Man i mekim rong i mas tanim bel tru bambai God i ken marimari long em. *

17, 18. Olsem wanem ol elda inap save sapos Kristen husat i mekim rong i tanim bel tru? (Lukim piksa long kirap bilong stadi.)

¹⁷ Ol elda i no inap lukim tingting tru i stap long bel bilong man olsem Jehova na Jisas i save mekim. Sapos yu wanpela elda, orait olsem wanem yu inap save olsem man i tanim bel tru? Pastaim, yu mas beten askim God long givim yu gutpela tingting na save. (1 Kin. 3:9) Bihain, skelim Tok Bilong God na ol buk na nius em gutpela wokboi i redim bambai yu inap luksave long olsem wanem “bel hevi bilong dispela graun” i narapela kain long “bel hevi i stret wantaim laik bilong God.” Sapos bel hevi bilong man i stret wantaim laik bilong God, orait dispela i makim olsem em i tanim bel tru. (2 Kor. 7:10, 11) Skelim ol tok Baibel i mekim long pasin bilong man i tanim bel tru na man husat i giaman olsem em i tanim bel. Painimaut long tok Baibel i mekim long laik bilong man i tanim bel, pasin bilong em, na tingting bilong em.

¹⁸ Ol elda i mas save gut long dispela man. Na tu, ol i mas tingim sindaun bilong em, risen na em i mekim wanpela samting, na ol hevi em i karim. Jisas i stap het bilong kongrigesen Kristen, na Baibel i tok profet long em olsem: “Long taim em i harim kot, em i no inap skelim man long ol toktok em i harim na long ol samting em i lukim long ai tasol. Nogat. Long stretpela pasin bilong skelim kot, em bai i harim wari bilong ol rabisman na em bai i helpim ol tarangu, ol arapela i daunim ol na mekim nogut long ol.” (Ais. 11:3, 4) Jisas i stap olsem wasman bilong ol elda, na em bai helpim ol long bihainim stretpela pasin bilong mekim kot. (Mat. 18:18-20) Yumi amamas tru olsem yumi gat ol gutpela elda husat i wok strong long mekim olsem. Yumi tok tenkyu long gutpela wok ol i mekim insait long kongrigesen bilong kamapim pasin marimari na stretpela pasin!

19. Yu kisim wanem skul long ol taun bilong hait?

¹⁹ Lo Bilong Moses i kamapim klia “astingting bilong save na tok i tru” bilong Jehova na ol stretpela lo bilong em. (Rom 2:20) Ol taun bilong hait i skulim ol elda long mekim kot long “stretpela pasin tasol,” na tu, ol dispela taun i skulim yumi olgeta long olsem wanem yumi inap “marimari long ol wanlain bilong [yumi] na helpim ol.” (Sek. 7:9) Yumi no stap moa aninit long kontrak bilong Lo. Tasol Jehova i no save senis, olsem na em i laik bai yumi mas bihainim yet stretpela pasin na pasin marimari. Yumi amamas tru olsem yumi lotuim God husat i wokim yumi olsem em yet. Yumi inap kamapim ol pasin bilong em na larim em i stap olsem ples hait bilong yumi!