Yu Bihainim Tingting Bilong Jehova?
“Yupela i mas kisim nupela tingting na bai pasin bilong yupela i senis.”—ROM 12:2.
OL SINGSING: 56 [34], 123 [43]
1, 2. Taim yumi kamap strong long bilip, yumi luksave long wanem samting? Stori long dispela.
WANPELA liklik boi i kisim presen. Papamama i tokim em, “Tok tenkyu.” Em i tok tenkyu, tasol em i no pilim dispela tok long bel. Taim em i kamap bikpela, isi isi em i lain long pilim tingting bilong papamama na gutpela pasin ol narapela i mekim. Olsem na taim em i tok tenkyu, em i pilim tru dispela tok. Em i mekim olsem bikos em yet inap pilim gutpela pasin bilong ol narapela.
2 Olsem tasol, taim yumi kisim save long tok i tru long namba 1 taim, yumi luksave olsem yumi mas mekim ol samting Jehova i tokim yumi long mekim. Tasol taim yumi kamap strong moa long bilip, yumi kisim planti save moa long tingting bilong Jehova. Yumi kisim save long ol samting em i laikim, ol samting em i no laikim, na tingting em i gat long planti narapela samting. Taim yumi larim tingting bilong Jehova i stiaim pasin na disisen bilong yumi, yumi soim olsem yumi bihainim tingting bilong em.
3. Bilong wanem i hatwok liklik long bihainim tingting bilong Jehova?
3 Yumi amamas long lain long bihainim tingting bilong Jehova, tasol ating i hatwok liklik long mekim olsem. Tingting kranki bilong yumi yet inap pasim yumi. Ating i hatwok liklik long kliagut long tingting bilong Jehova long stretpela pasin, mani kago, wok autim tok, kisim blut, na ol narapela samting. Yumi inap mekim wanem? Olsem wanem yumi inap wok yet long bihainim tingting bilong God? Hau bai dispela i stiaim ol samting yumi mekim long nau na long bihain?
BIHAINIM TINGTING BILONG GOD
4. Yumi mas mekim wanem na bai yumi “kisim nupela tingting”?
4 Ritim Rom 12:2. Aposel Pol i stori long ol samting yumi mas mekim bambai yumi inap bihainim tingting bilong Jehova. Stadi i kamap paslain i soim olsem sapos yumi no laik “wokabaut moa long wankain pasin olsem ol man bilong dispela taim,” orait yumi mas sakim tingting na pasin bilong graun. Pol i tok yumi mas “kisim nupela tingting.” Yumi mas stadi gut long Tok Bilong God, tingim tingim long bel, senisim tingting bilong yumi, na bai yumi inap bihainim tingting bilong God.
5. Olsem wanem pasin bilong rit nating i no wankain long pasin bilong stadi?
5 Taim yumi stadi, dispela i no makim olsem yumi rit tasol na makim nating ol bekim, nogat. Yumi skelim gut ol tok i stori long Jehova, na ol pasin na tingting bilong em. Yumi laik kliagut long risen na God i tokim yumi long mekim sampela samting na tambuim yumi long mekim ol narapela samting. Na tu, yumi tingim ol senis yumi mas mekim long tingting na laip bilong yumi. Taim yumi lusim haptaim long mekim stadi bilong yumi yet, i no olsem yumi mas yusim dispela taim olgeta long mekim ol dispela samting, nogat. Yumi ken yusim haptaim long stadi na haptaim long tingim tingim na pilim tru ol samting yumi stadi long en.—Sng. 119:97; 1 Tim. 4:15.
6. Wanem gutpela samting inap kamap taim yumi tingim tingim Tok Bilong God?
6 Sapos yumi tingim tingim Tok Bilong God long olgeta taim, gutpela samting inap kamap. Yumi bai “save tru” olsem tingting bilong Jehova i gutpela olgeta. Yumi bai kisim pasin bilong em long skelim ol samting, na yumi bai wanbel long tingting bilong em. Yumi kisim “nupela tingting.” Isi isi, yumi lain long bihainim tingting bilong Jehova.
TINGTING I STIAIM PASIN
7, 8. (a) Jehova i gat wanem tingting long mani kago? (Lukim ol piksa long kirap bilong stadi.) (b) Sapos yumi bihainim tingting bilong em, wanem samting i mas i stap bikpela samting tru long laip bilong yumi?
7 Tingting i save kirapim man long mekim sampela samting. (Mak 7:21-23; Jems 2:17) Yumi ken skelim sampela eksampel. Namba 1: Ol Gutnius i helpim yumi long luksave long tingting bilong Jehova long mani kago. God yet i makim man na meri husat bai kamap papamama na lukautim Pikinini bilong em—dispela tupela marit i no gat planti mani kago. (Wkp. 12:8; Luk 2:24) Taim Jisas i bon, Maria i “slipim em insait long boks kaikai bilong animal, long wanem, i no gat spes bilong ol long haus pasindia.” (Luk 2:7) Sapos Jehova i laik, em inap opim olgeta kain rot na Pikinini bilong em inap kamap na stap long ol gutpela haus. Tasol dispela i no bikpela samting long tingting bilong God. Em i laik tru bai Jisas i kamap bikpela insait long famili em ol i tingim tru pasin bilong lotuim God.
8 Dispela stori i helpim yumi long luksave long tingting bilong Jehova long mani kago. Sampela papamama i strong long pikinini i kisim planti mani kago, na ol i no wari long em i stap olsem wanem long sait bilong bilip. Tasol long tingting bilong Jehova, em i bikpela samting tru long yumi mas lotuim em. Olsem wanem long yu? Yu bihainim tingting bilong Jehova? Ol samting yu mekim i soim olsem yu bihainim tingting bilong husat?—Ritim Hibru 13:5.
9, 10. Olsem wanem yumi inap soim olsem yumi bihainim tingting bilong Jehova na yumi no laik pundaunim ol narapela?
9 Namba 2: Yumi ken skelim tingting bilong God long ol man i gat pasin bilong pundaunim ol narapela. Jisas i tok: “Man i pundaunim wanpela bilong ol dispela man i no gat nem em ol i bilip long mi, mobeta ol i pasim wanpela ston bilong wilwilim wit long nek bilong em na tromoi em i go daun long solwara.” (Mak 9:42) Dispela tok i soim olsem God i heitim tru pasin bilong pundaunim narapela! Jisas i bihainim gut pasin bilong Papa, olsem na yumi luksave olsem Jehova i heitim tru ol man i gat pasin bilong pundaunim ol disaipel bilong Jisas.—Jon 14:9.
10 Olsem wanem? Yumi holim wankain tingting olsem Jehova na Jisas? Yumi bihainim tingting bilong tupela? Ol samting yumi mekim i soim olsem yumi bihainim tingting bilong husat? Ating yumi werim wanpela kain stail bilong klos o bilas we i bagarapim bel bilong ol narapela, o i mekim ol i bel kirap. Yumi no inap mekim olsem sapos yumi laikim tru ol wanbilip.—1 Tim. 2:9, 10.
11, 12. Taim yumi bosim bel na bihainim tingting bilong God long heitim ol pasin i no stret, hau bai dispela i stiaim yumi long abrusim ol pasin nogut?
11 Namba 3: Jehova i heitim ol pasin i no stret. (Ais. 61:8) God i save olsem yumi sinman, olsem na yumi save kisim sampela tingting kranki. Tasol em i kirapim yumi long heitim ol pasin nogut. (Ritim Buk Song 97:10.) Taim yumi tingim tingim risen bilong Jehova long heitim ol pasin nogut, yumi bai bihainim tingting bilong em na sakim ol pasin nogut.
12 Taim yumi bihainim tingting bilong Jehova long heitim pasin nogut, yumi bai luksave long ol pasin i no stret maski Baibel i no kolim dispela pasin. Long nau, planti man i bihainim stail bilong danis we i kirapim laik nogut long bel bilong narapela. Sampela inap tok i no gat rong long dispela kain danis, na ol i tok dispela i no wankain long man na meri i slip wantaim. * Tasol yu ting dispela kain danis i stret wantaim tingting bilong God, em Man i heitim tru olgeta kain pasin nogut? Yumi mas kisim pasin bilong bosim bel na heitim tru ol pasin em Jehova i heitim, na long dispela rot yumi inap abrusim ol pasin nogut.—Rom 12:9.
SKELIM OL DISISEN YU BAI MEKIM
13. Wai na yumi mas skelim gut olsem wanem yumi inap bihainim tingting bilong Jehova taim yumi mekim ol disisen?
13 Taim yumi stadi, yumi mas skelim gut olsem wanem yumi inap bihainim tingting bilong Jehova taim yumi mekim ol disisen. Olsem na taim sampela hevi i kamap, yumi bai stap redi long mekim gutpela disisen. (Prov. 22:3) Yumi ken skelim sampela eksampel i stap long Baibel.
14. Josep i sakim meri bilong Potifa, na dispela inap givim wanem skul long yumi?
14 Taim meri bilong Potifa i laik pulim Josep long slip wantaim em, kwiktaim Josep i sakim em. Josep i bihainim tingting bilong Jehova olsem ol poroman marit i mas i stap gut long narapela narapela. (Ritim Stat 39:8, 9.) Na tu, Josep i tokim meri bilong Potifa: “Wai bai mi mekim dispela pasin nogut tru na mekim sin long ai bilong God?” Josep i soim klia olsem em i bihainim tingting bilong God. Olsem wanem long yumi? Yu bai mekim wanem sapos wanpela wanwok i tok gris long yu? O olsem wanem sapos yu kisim mesis long fon na mesis i stori long pasin doti o soim poto bilong wanpela husat i werim ol klos i no haitim gut skin? * Yu bai sakim kwik ol dispela samting sapos yu kirap pinis long bihainim tingting bilong Jehova, na yu skelim pinis disisen yu bai mekim taim kain samting olsem i kamap.
15. Wankain olsem 3-pela Hibru, olsem wanem yumi inap sakim traim na stap gut yet long Jehova?
15 Tingim stori bilong 3-pela man Hibru, em Satrak, Mesak, na Abetnego. Ol i sanap strong na tokaut stret olsem ol i no inap tru long lotuim imis gol em King Nebukatnesar i bin sanapim. Tok bilong ol i soim klia olsem ol i tingim pinis ol samting ol i mas mekim bilong i stap gut long Jehova. (Kis. 20:4, 5; Dan. 3:4-6, 12, 16-18) Tingim olsem bos i askim yu long givim sampela mani bilong sapotim wanpela bung, tasol dispela bung i insait long lotu giaman. Yu bai mekim wanem? No ken wet i go inap long kain traim olsem i painim yu. Mobeta sapos long nau yet, yu skelim tingting bilong Jehova long ol kain samting olsem. Bihain, sapos kain traim olsem i kamap, yu bai save long tok na pasin yu mas mekim wankain olsem 3-pela man Hibru i bin mekim.
Yu mekim pinis wok painimaut, pulimapim pepa i tokaut long nem bilong man o meri husat inap mekim disisen bilong yu long sait bilong helt sapos yu yet i no inap long mekim, na toktok wantaim dokta bilong yu? (Lukim paragraf 16)
16. Taim yumi kliagut long tingting bilong Jehova, hau bai dispela i redim yumi paslain long taim bilong imejensi?
16 Sapos yumi kliagut long wai na em i bikpela samting long yumi mas i stap gut long God, dispela inap helpim yumi long taim bilong imejensi. Yumi ol Kristen i save olsem yumi no inap kisim blut o wanpela bilong 4-pela hap bilong en. Tasol i gat sampela rot bilong ol dokta long mekim wok long blut bilong yumi long taim bilong operesen samting. Dispela em disisen yumi wan wan i mas mekim na yumi mas larim ol stiatok bilong Jehova long Baibel i stiaim yumi. (Apo. 15:28, 29) I no savetingting long skelim ol dispela samting taim yu stap long haus sik. Ating yu pilim bikpela pen na ol narapela i putim presa long yu mas mekim disisen kwiktaim. Nau em taim bilong mekim wok painimaut, raitim ol tok long blut kat i tokaut long samting yu laik bai dokta i mekim, na toktok wantaim dokta bilong yu. *
17-19. (a) Bilong wanem em i bikpela samting long kisim save long tingting bilong Jehova long nau yet? (b) Wanem kain samting inap kamap na i gutpela sapos yumi redim pinis disisen bilong yumi?
17 Jisas i bekim kwik tok bilong Pita taim Pita i tok: “Bikpela, marimari long yu yet.” Dispela i soim olsem Jisas i skelim pinis ol samting God i laik bai em i mas mekim, na tu, em i skelim pinis ol tok em Rait Holi i mekim long laip na dai bilong em long graun. Olsem na em inap stap gut long God, na sanap strong na dai bilong helpim ol manmeri.—Ritim Matyu 16:21-23.
18 Long nau, God i laik bai lain bilong em i pas gut wantaim em na givim bel tru long mekim wok bilong em. (Mat. 6:33; 28:19, 20; Jems 4:8) Wankain olsem Pita i bin mekim long Jisas, sampela manmeri inap traim long kirapim yumi long lusim wok lotu bilong yumi. Olsem wanem sapos bos i laik givim yu promosen na em i laik apim pe bilong yu, tasol dispela bai pasim yu long mekim wok lotu? O olsem wanem sapos rot i op long yu inap go long narapela ples bambai yu inap kisim bikpela ediukesen? Long kain taim olsem, ating yu bai beten na mekim wok painimaut, kisim tingting bilong wanfamili na ol elda, na bihain yu mekim disisen. Tasol i gutpela moa sapos long nau yet yu kisim save long tingting bilong Jehova na larim tingting bilong em i stiaim disisen bilong yu. Bihain, sapos kain samting olsem i painim yu, yu no inap holim tupela tingting long disisen yu mas mekim. Yu save pinis long ol mak yu laik winim long sait bilong bilip, na yu strongim pinis tingting na yu redi tasol long bihainim disisen yu mekim pinis.
19 Ating yu inap tingim sampela narapela samting we inap kamap na kwiktaim yu mas mekim disisen. Em tru olsem yumi no inap save long olgeta samting we inap kamap. Tasol sapos yumi lusim sampela haptaim long kisim save long tingting bilong Jehova, na tingim tingim samting yumi lainim, yumi bai inap long tingim na bihainim save yumi bin kisim. Yumi mas save gut long tingting bilong Jehova, bihainim long laip bilong yumi, na luksave long olsem wanem tingting bilong em inap stiaim ol samting yumi mekim long nau na long bihain.
TINGTING BILONG JEHOVA NA LAIP YU BAI KISIM BIHAIN
20, 21. (a) Long nupela taim, yumi bai gat fridom long mekim wanem kain disisen? (b) Long nau, yumi mas mekim wanem na bai yumi stap amamas?
20 Yumi luk fowed long lukim nupela taim i kamap. Planti bilong yumi i laik kisim laip oltaim long ples paradais long graun. Taim Kingdom i bosim graun, olgeta hevi bilong nau bai pinis olgeta. Ol manmeri bai stap fri long mekim disisen bilong ol yet. Olgeta wan wan bai mekim ol disisen i stret wantaim laik bilong ol yet.
21 Tasol dispela i no makim olsem ol bai stap fri long mekim olgeta kain samting, nogat. Lo na tingting bilong Jehova bai stiaim ol long skelim wanem pasin i stret na wanem pasin i no stret. Ol manmeri bai stap amamas tru na bel isi bai pulap tru long olgeta hap bilong graun. (Sng. 37:11) Long nau tu, yumi inap stap amamas taim yumi bihainim tingting bilong Jehova.
^ par. 12 Dispela em stail bilong danis we “man o meri i pasim klos i no haitim gut skin na em i sindaun long lek bilong narapela na seksekim bodi bilong em yet.” Dispela kain danis inap kirapim man long mekim pasin pamuk, olsem na komiti bilong harim kot i mas skelim dispela samting. Sapos wanpela Kristen i insait long dispela kain danis, mobeta em i lukim ol elda na kisim helpim.—Jems 5:14, 15.
^ par. 14 Sekstim i makim pasin bilong yusim mobail fon long salim mesis, poto, o vidio i stori long maritpasin na pasin sem o soim piksa bilong man o meri i stap as nating o werim klos i no haitim sem o susu. Sapos Kristen i insait long dispela pasin, orait komiti bilong harim kot i mas sindaun wantaim em. Sampela yangpela aninit long 18 krismas i brukim lo na insait long pasin bilong sekstim ol narapela, olsem na polis i sasim ol olsem lain bilong mekim pasin sem. Sapos yu laik kisim sampela save moa, go long jw.org na ritim atikol “Young People Ask—What Should I Know About Sexting?” (Lukim BIBLE TEACHINGS > TEENAGERS.) O yu ken lukim atikol “Toktok Long Tineja Long Pasin Bilong Seks-Tekstim Narapela” long Kirap! bilong Novemba 2013, pes 4-5.
^ par. 16 Ol pablikesen bilong yumi i stori long ol stiatok bilong Baibel we i stret long dispela topik. Lukim buk How to Remain in God’s Love, pes 246-249.
