Long nait paslain long Jisas i dai, em i tok ol aposel i no ken tingting long kisim biknem namel long ol wanbilip. Em i tok: “Ol king i bosim ol kantri, ol i save strong tumas long bosim ol manmeri, na ol lain i gat namba long bosim ol manmeri, ol i gat nem olsem ol manmeri bilong mekim gut long ol arapela. Tasol dispela i no ken i stap olsem pasin bilong yupela.”—Luk 22:25, 26.

Ol man i mekim gut long ol arapela, ol i husat? Ol koin, ol buk, na ol rait long ston i soim olsem em kastam bilong ol Grik na Rom long onarim ol man i gat biknem na kolim ol Yugetes—lain i gat nem long mekim gut long ol arapela. Ol i bin mekim ol gutpela wok bilong helpim ol manmeri.

Planti king i kisim dispela biknem. Sampela em ol king bilong Isip, olsem Tolemi Namba 3, na Tolemi Namba 8. Julius Sisar na Ogastus bilong Rom tu i bin kisim dispela nem. Narapela em King Herot bilong Judia. Herot i bin givim klos long ol tarangu lain, na bringim wit bilong narapela kantri i kam bilong helpim ol manmeri bilong em long taim bilong bikpela hangre.

Adolf Deissmann em man Jemani na em saveman bilong Baibel. Em i tok planti man long bipo i gat dispela nem, na “sapos man i laik lukim dispela nem long ol rait i stap long ol ston, kwiktaim em bai lukim planti tru, winim 100.”

Jisas i tokim ol disaipel olsem: “Dispela i no ken i stap olsem pasin bilong yupela.” Wanem mining bilong dispela tok? Yu ting tok bilong em i makim olsem ol i no ken helpim ol manmeri? Nogat tru. Jisas i toktok long risen bilong mekim gut long ol narapela.

Long taim bilong Jisas, ol maniman i laik bai ol manmeri i givim biknem long ol, olsem na ol i tromoi mani bilong sponsarim ol bikpela bung na gem, na ol i wokim ol pak na ol tempel. Ol i mekim olsem bikos ol i laik bai planti manmeri moa i onarim, luksave, na votim ol. Wanpela buk i tok: “Planti man i givim bel tru long helpim ol narapela, tasol astingting bilong ol em long holim biknem long wok politik.” Jisas i kirapim ol disaipel long abrusim pasin bilong inapim laik bilong ol yet long kisim biknem.

Sampela yia bihain, aposel Pol i strongim tok bilong Jisas. Em i raitim pas long ol wanbilip long Korin na i tok: “Olgeta wan wan i ken givim samting ol i pasim tok long bel long givim. Ol i no ken bel hevi na givim na narapela i no ken fosim ol long givim bikos God i save laikim tumas man husat i amamas long givim samting.”—2 Kor. 9:7.