1, 2. (a) Jisas i tok wanem taim Pita i tokim em long marimari long em yet? (Lukim piksa long kirap bilong stadi.) (b) Bilong wanem Jisas i tok olsem?

OL DISAIPEL bilong Jisas i no bilipim tok ol i harim. Ol i bilip olsem Jisas bai strongim gen kingdom bilong Israel, tasol em i tok em bai karim pen na hevi na i dai. Aposel Pita i kamapim tingting bilong em na i tok: “Bikpela, marimari long yu yet, dispela samting i no ken kamap long yu.” Tasol Jisas i tok strong long em olsem: “Satan, yu go baksait long mi! Yu laik pasim rot bilong mi. Tingting bilong yu i no wankain olsem tingting bilong God, nogat, tingting bilong yu i wankain olsem tingting bilong ol man.”—Mat. 16:21-23; Apo. 1:6.

² Tok bilong Jisas i kamapim klia olsem tingting bilong God i no wankain long tingting bilong ol man bilong graun em ol i stap aninit long wok bos bilong Satan. (1 Jon 5:19) Pita i bihainim pasin bilong ol man bilong graun—ol i save tingim ol yet. Tasol Jisas i save olsem tingting bilong Papa bilong em i no wankain long  tingting bilong ol man bilong graun. Em i save olsem God i laik bai em i mas redi long karim pen na hevi na i dai. Tok Jisas i mekim long Pita i soim olsem em i sakim tingting bilong graun na em i laik bihainim tingting bilong Jehova.

3. Wai na i hatwok long sakim tingting bilong graun?

³ Olsem wanem long yumi? Yumi bihainim tingting bilong God o tingting bilong graun? Ating yumi bin senisim pasin bilong yumi na bihainim ol pasin bilong God. Tasol olsem wanem long tingting bilong yumi? Yumi wok long kisim tingting bilong Jehova? Yumi mas wok hat na bai yumi inap kisim tingting bilong em. Tasol yumi stap namel long ol manmeri nogut, olsem na yumi inap kisim tingting bilong graun. (Efe. 2:2) Na tu, ol man i tingting long inapim laik bilong ol yet, olsem na yumi tu inap kisim wankain laik. Yes, em tru olsem yumi mas wok hat na bai yumi inap kisim tingting bilong Jehova.

4. (a) Wanem samting bai kamap sapos yumi larim tingting bilong graun i stiaim tingting bilong yumi? (b) Dispela stadi bai helpim yumi olsem wanem?

⁴ Sapos yumi larim tingting bilong graun i stiaim yumi, yumi bai tingim yumi yet na yumi no laik bai ol narapela i stiaim yumi. (Mak 7:21, 22) Olsem na em i bikpela samting long yumi mas kisim “tingting bilong God,” na i no “tingting bilong ol man.” Dispela stadi bai stori long olsem wanem yumi inap kisim tingting bilong God. Yumi bai luksave olsem taim yumi larim tingting bilong Jehova i stiaim yumi, dispela i no inap kalabusim yumi, nogat, em bai helpim yumi. Na tu, yumi bai kisim save long ol samting yumi mas mekim bambai yumi no ken larim tingting bilong graun i stiaim yumi. Neks stadi bai stori long tingting bilong Jehova long sampela samting, na yumi bai kisim save long olsem wanem yumi inap bihainim tingting bilong em.

5. Bilong wanem sampela manmeri i no laik bai ol narapela i stiaim ol?

⁵ Sampela manmeri i no laik bai ol narapela i stiaim na senisim tingting bilong ol. Ol i tok, “Mi gat tingting bilong mi yet.” Ol i pilim olsem i stret long ol yet i mekim disisen bilong ol. Ol i no laik bai ol narapela i kontrolim ol. *

6. (a) Jehova i larim yumi i stap fri long mekim wanem? (b) Yu ting yumi stap fri long mekim olgeta kain samting?

⁶ Taim yumi larim tingting bilong Jehova i stiaim yumi, dispela i no makim olsem yumi mas daunim olgeta laik bilong yumi, nogat. Long 2 Korin 3:17, Baibel i tok: “Taim holi spirit bilong Jehova i stap, man i stap fri.” Yumi wan wan i stap fri long makim ol pasin yumi laik bihainim. Yumi yet inap makim ol samting yumi laik mekim. Jehova i larim yumi i stap fri long mekim ol dispela samting. Tasol pasin bilong yumi long i stap fri i gat mak bilong en. (Ritim 1 Pita 2:16.) Jehova i laik bai tingting bilong em i stiaim yumi long makim wanem samting i stret na wanem samting i no stret. Yu ting dispela i kalabusim, o helpim yumi?

7, 8. Olsem wanem na yumi inap tok ol lo bilong Jehova i no kalabusim yumi?

⁷ Tingim: Papamama i wok strong long skulim ol pikinini long bihainim ol gutpela pasin. Ating ol i skulim ol long bihainim onest pasin, mekim gut wok, na tingim gut ol narapela. Dispela i no makim olsem  papamama i tambuim tumas ol pikinini, nogat. Papamama i redim ol bambai ol inap lukautim ol yet taim ol i kamap bikpela. Taim ol pikinini i bikpela pinis na lusim papamama, ol bai stap fri long mekim ol disisen. Sapos ol i bihainim ol pasin em papamama i skulim ol long en, ol bai mekim ol gutpela disisen. Ol bai abrusim ol hevi we ol yet inap kamapim sapos ol i mekim ol rong disisen.

⁸ Jehova i olsem gutpela papa, na em i laik bai yumi stap amamas. (Ais. 48:17, 18) Olsem na em i putim ol lo bilong stiaim pasin yumi yet i bihainim na pasin yumi mekim long ol narapela. I olsem em i kirapim yumi long bihainim tingting na ol lo bilong em. Ol lo bilong em i no kalabusim yumi, nogat, ol i stiaim yumi long skelim gut ol samting paslain long yumi mekim disisen. (Sng. 92:5; Prov. 2:1-5; Ais. 55:9) Yumi inap mekim ol gutpela disisen na stap amamas, na pasin bilong yumi bai kamap gutpela moa. (Sng. 1:2, 3) Tru tumas, tingting bilong Jehova i gutpela na inap tru long helpim yumi!

9, 10. Olsem wanem tingting bilong Jehova i winim tingting bilong graun?

⁹ Ol lain i lotuim Jehova i laik bihainim tingting bilong em bikos tingting bilong em i nambawan tru na i winim tingting bilong graun. Ol man bilong graun i givim edvais long olgeta kain samting, olsem pasin yumi mas bihainim, rot bilong famili long pas gut wantaim, na kisim amamas long wok yumi mekim. Tasol planti edvais bilong ol i no stret wantaim tingting bilong Jehova. Ol i save kirapim ol narapela long litimapim nem bilong ol yet. Ol i orait long pasin pamuk. Ol i tok sapos ol marit i laik i stap amamas tru, orait i no gat rong long ol i seperet o divos taim liklik hevi i kamap insait long marit. Ol dispela kain edvais i no stret wantaim tok bilong Baibel. Tasol yu ting sampela edvais bilong ol inap helpim yumi?

¹⁰ Jisas i tok: “Stretpela pasin man i mekim i kamapim ples klia olsem em i gat savetingting.” (Mat. 11:19) Teknoloji i helpim sindaun bilong ol manmeri long olgeta hap bilong graun. Tasol em i no stretim ol bikpela hevi, olsem woa, pasin raskol, na pasin bilong birua long ol manmeri bilong narapela skin kala. Ol dispela hevi i mekim na ol manmeri i no stap amamas. Ol manmeri i no tingting tumas long bihainim stretpela pasin. Olsem na kain kain hevi i painim ol—ol famili i no stap amamas na ol i kisim ol bikpela sik. Tasol sampela manmeri i bihainim tingting bilong God, olsem na famili bilong ol i stap amamas, ol i bihainim klinpela pasin, helt bilong ol i gutpela, na ol i stap wanbel wantaim ol wanbilip long olgeta hap. (Ais. 2:4; Apo. 10:34, 35; 1 Kor. 6:9-11) Dispela i soim olsem tingting bilong Jehova i winim tingting tru bilong graun.

11. Moses i bihainim tingting bilong husat? Wanem gutpela samting i kamap?

¹¹ Baibel i stori long ol bilipman husat i luksave olsem tingting bilong Jehova i winim tingting bilong ol man. Moses i “kisim skul long olgeta gutpela save bilong ol Isip,” tasol em i askim God long givim em “savetingting.” (Apo. 7:22; Sng. 90:12) Na tu, em i tokim Jehova: “Plis skulim mi long pasin bilong yu.” (Kis. 33:13) Moses i bihainim tingting bilong Jehova na helpim long kamapim samting God i tingting pinis long mekim, olsem na Baibel i kolim em olsem man i gat strongpela bilip.—Hib. 11:24-27.

12. Aposel Pol i larim wanem ol tok i stiaim em?

¹² Aposel Pol em wanpela bikpela saveman, na em i save long 2-pela tokples. (Apo. 5:34; 21:37, 39; 22:2, 3) Maski i olsem,  em i sakim tingting bilong graun. Oltaim em i larim ol tok bilong Rait Holi i stiaim em. (Ritim Aposel 17:2; 1 Korin 2:6, 7, 13.) Olsem na wok autim tok bilong Pol i kamapim planti gutpela samting, na em i bilip long kisim blesing bilong laip oltaim.—2 Tim. 4:8.

13. Husat i gat wok long stiaim yumi long bihainim tingting bilong Jehova?

¹³ Tru tumas, tingting bilong God i winim tingting bilong ol man long graun. Taim yumi larim tingting bilong God i stiaim ol samting yumi mekim, yumi bai stap amamas tru. Tasol Jehova i no inap fosim yumi long bihainim tingting bilong em. “Gutpela wokboi” i no kontrolim tingting bilong yumi, na ol elda tu i no kontrolim tingting bilong yumi. (Mat. 24:45; 2 Kor. 1:24) Olgeta wan wan Kristen yet i gat wok long senisim tingting bilong ol na bihainim tingting bilong God. Hau bai yumi inap mekim olsem?

14, 15. (a) Yumi mas tingim tingim wanem samting bambai yumi inap bihainim tingting bilong Jehova? (b) Olsem Rom 12:2 i kamapim, bilong wanem yumi mas sakim ol tingting bilong graun? Stori long tok piksa.

¹⁴ Long Rom 12:2, Baibel i tok: “Yupela i no ken wokabaut moa long wankain pasin olsem ol man bilong dispela taim i save bihainim. Nogat. Yupela i mas kisim nupela tingting na bai pasin bilong yupela i senis. Olsem bai yupela i ken save tru long laik bilong God, em dispela laik em i gutpela, na em i orait, na i gutpela olgeta.” Maski wanem ol samting i stiaim tingting bilong yumi paslain long yumi kisim save long tok i tru, yumi inap senisim tingting bilong yumi na bihainim tingting bilong God. Em tru olsem famili bilong yumi na ol samting i painim yumi inap stiaim tingting bilong yumi. Tasol tingting bilong yumi i save senis oltaim. Ol samting yumi tingim na ol samting yumi tingting oltaim long en inap senisim tingting bilong yumi. Taim yumi tingim tingim wei bilong Jehova long tingim ol samting, yumi inap luksave olsem tingting bilong em i stret. Dispela bai kirapim yumi long larim tingting bilong em i stiaim yumi.

¹⁵ Sapos yumi laik bihainim tingting bilong Jehova, yumi “no ken wokabaut moa long wankain pasin olsem ol man bilong dispela taim i save bihainim.” Yumi no ken tingim moa ol samting em God i no orait long en. Yumi ken mekim tok piksa long kaikai. Ating wanpela man i laik lukautim helt bilong em, olsem na em i kisim ol kaikai i gutpela bilong helpim bodi. Tasol wanem samting bai kamap sapos oltaim em i kisim tu ol kaikai we inap nogutim bodi? Olsem tasol, maski yumi kisim tingting bilong Jehova, dispela i no inap helpim yumi sapos yumi kisim tu ol tingting nogut bilong graun.

16. Yumi no ken tingim o bilipim wanem kain ol tok?

¹⁶ Yu ting yumi inap abrusim olgeta tingting bilong graun? Nogat, long wanem, yumi stap long graun. Olsem na i no gat rot long yumi inap abrusim olgeta tingting bilong graun. (1 Kor. 5:9, 10) Taim yumi autim tok, yumi inap bungim ol man em bilip bilong ol i no stret wantaim tok bilong Baibel. Yumi no ken tingim o bilipim ol dispela kain tok. Olsem Jisas i bin mekim, yumi mas hariap long sakim tingting bilong Satan. Na tu, yumi inap mekim sampela samting bilong lukautim yumi yet bambai yumi no ken putim yau long tingting bilong graun.—Ritim Provep 4:23.

17. Yumi inap mekim wanem bambai yumi sakim tingting bilong graun?

¹⁷ Yumi mas bihainim savetingting taim yumi makim ol lain yumi laik poromanim.  Baibel i tok lukaut olsem sapos yumi laik poromanim ol manmeri husat i no lotuim Jehova, yumi inap bihainim tingting bilong ol. (Prov. 13:20; 1 Kor. 15:12, 32, 33) Yumi ken skelim tu ol samting yumi laik kisim amamas long en. Taim yumi sakim ol amamas we i sapotim bilip bilong evolusen, pasin bilong pait, o pasin pamuk, yumi abrusim ol tingting i “pasim rot bilong save bilong God.”—2 Kor. 10:5.

18, 19. (a) Bilong wanem yumi mas luksave na sakim tingting bilong graun? (b) Yumi mas givim wanem ol askim long yumi yet? Bilong wanem?

¹⁸ Sampela taim, tingting bilong graun i no inap stap ples klia. Olsem na i gutpela sapos yumi inap luksave na sakim. Ating wanpela nius ripot i sapotim tingting bilong wanpela lain politik. O wanpela stori i sapotim tingting bilong graun long namba na biknem ol man inap kisim. Sampela muvi na buk i kirapim ol man long pilim olsem i no gat rong long tingim ol yet na famili bilong ol. Tasol dispela pasin i no stret. Baibel i tok yumi yet na famili bilong yumi bai stap amamas sapos yumi laikim tru Jehova na i no laikim yumi yet tasol. (Mat. 22:36-39) Na tu, sampela buk na muvi bilong ol pikinini inap givim tingting olsem i no gat rong long pasin pamuk.

¹⁹ I no gat rong long mekim ol samting bilong kisim amamas. Tasol yumi mas askim yumi yet olsem: ‘Yumi inap luksave long ol tingting bilong graun maski ol i no stap ples klia? Yumi save putim sampela lo bilong stopim yumi yet na ol pikinini long lukim sampela kain program o ritim sampela kain buk na nius? Sapos pikinini i harim o lukim sampela samting i kamapim tingting bilong graun, yumi save helpim ol long luksave long tingting bilong Jehova?’ Taim yumi kliagut long olsem wanem tingting bilong God i narapela kain long tingting bilong graun, yumi no inap “wokabaut moa long wankain pasin olsem ol man bilong dispela taim.”

20. Wanem samting bai soim olsem yumi larim tingting bilong graun i stiaim yumi?

²⁰ Tingim, i gat 2-pela rot tasol long kisim ol tok bilong stiaim yumi—Jehova, na graun em Satan i bosim. Yumi larim husat i stiaim tingting bilong yumi? Sapos yumi kisim ol tok i kam long Jehova, i olsem yumi larim em i stiaim tingting bilong yumi. Tasol sapos yumi kisim ol tok i kam long dispela graun, i olsem yumi larim Satan i stiaim tingting bilong yumi. Sapos yumi kisim tingting bilong graun, dispela bai stiaim na kirapim yumi long inapim laik bilong yumi yet. Olsem na yumi mas skelim gut ol samting yumi tingting oltaim long en.

21. Neks stadi bai stori long wanem samting?

²¹ Olsem yumi stori pinis, sapos yumi laik bihainim tingting bilong Jehova, yumi no ken larim ol tingting nogut i stiaim yumi. Oltaim yumi mas kisim tingting bilong God na wok strong long bihainim. Neks stadi bai stori long dispela samting.