1-3. (a) Yumi mas holim wanem tingting long tok i tru bilong Baibel? Stori long dispela. (Lukim ol piksa long kirap bilong stadi.) (b) Yumi bai skelim wanem ol askim long dispela stadi?

PLANTI kastama i save baim ol samting, na bihain ol i save bringim i go bek long man i salim samting na ol i kisim bek mani. Long sampela kantri, taim ol kastama i baim ol samting long stua, ol i save givim bek klostu 9 pesen bilong ol samting ol i baim. Taim ol i baim long Intenet, ol i save givim bek winim 30 pesen bilong ol samting ol i baim. Ating ol dispela samting i gat sampela bagarap, o stail bilong en i no stret o i no inapim laik bilong kastama. Olsem na ol i senisim na kisim narapela samting o ol i askim long kisim bek mani.

² Ating yumi baim sampela samting long stua, na bihain yumi bringim i go bek na yumi askim long kisim bek mani. Olsem tasol, yumi bin “baim” “stretpela save” bilong tok i tru i stap long Baibel. Yumi no ken tru givim bek o “salim” dispela save. (Ritim Provep 23:23; 1 Tim. 2:4) Olsem yumi bin skelim long stadi i kamap paslain, yumi lusim bikpela haptaim long kisim save long tok i tru. Na tu, ating yumi bin lusim gutpela wok mani, mekim sampela senis long ol lain yumi poromanim, senisim tingting na pasin bilong yumi, o yumi lusim ol kastam na ol pasin em Baibel i tambuim. Yumi bin mekim ol dispela samting bambai yumi inap baim tok i  tru, na ol blesing yumi kisim i winim tru ol samting yumi bin lusim.

³ Jisas i mekim tok piksa we i kamapim klia tingting bilong yumi long tok bilong Baibel. Em i laik skulim ol manmeri olsem tok i tru bilong Kingdom em samting i dia tumas, olsem na em i mekim tok piksa long wanpela bisnisman i painim ol gutpela pel. Em i lukim wanpela pel i dia tumas, olsem na kwiktaim “em i go salim” olgeta samting em i gat bambai em inap baim dispela pel. (Mat. 13:45, 46) Olsem tasol, yumi kisim save pinis long tok i tru—tok i tru i stori long Kingdom Bilong God na olgeta narapela samting yumi lainim long Baibel. Dispela tok i tru i stap olsem samting i dia tumas long yumi, olsem na long laik bilong yumi yet, kwiktaim yumi bin lusim ol narapela samting bambai yumi inap kisim dispela tok. Sapos yumi laikim dispela tok i tru, yumi bai i no inap tru long “salim.” Tasol sori tru olsem sampela manmeri bilong God i no tingim tok i tru olsem samting i dia tumas, olsem na ol i salim. Yumi no ken tru larim dispela samting i kamap long yumi! Sapos yumi tingim tok i tru olsem samting i dia tumas na yumi no inap tru long salim, orait yumi mas bihainim tok bilong Baibel long “wokabaut yet long tok i tru.” (Ritim 3 Jon 2-4.) Dispela i makim olsem tok i tru i mas i stap nambawan bikpela samting long laip bilong yumi, na yumi mas larim dispela tok i stiaim olgeta samting yumi mekim. Yumi ken skelim ol dispela askim: Bilong wanem sampela man i “salim” tok i tru? Olsem wanem ol i “salim” tok i tru? Olsem wanem yumi inap abrusim wankain popaia? Yumi mas mekim wanem bilong strongim tingting bilong yumi long “wokabaut yet long tok i tru”?

4. Long taim bilong Jisas, bilong wanem sampela manmeri i “salim” tok i tru?

⁴ Long taim bilong Jisas, sampela man i amamas long bihainim ol tok em i skulim ol long en, tasol i no longtaim na ol i lusim pasin bilong wokabaut long tok i tru. Bihain long Jisas i wokim mirakel na givim kaikai long bikpela lain manmeri, ol i bihainim em i go long hapsait bilong Raunwara Galili. Tok bilong em i mekim ol i kirap nogut. Em i tok: “Sapos yupela i no kaikai bodi bilong Pikinini bilong man na dringim blut bilong em, orait yupela bai i no gat laip i stap long yupela.” Ol manmeri i no kliagut long tok bilong Jisas, tasol ol i no askim em long eksplenim long ol. Ol i tok: “Em i mekim wanem kain tok? Husat inap putim yau long dispela tok?” Olsem na “planti disaipel i lusim em na ol i go bek long ol samting bipo ol i save mekim, na ol i no wokabaut moa wantaim em.”—Jon 6:53-66.

5, 6. (a) Bilong wanem sampela i lusim tok i tru? (b) Wanem samting inap kamap na isi isi man i lusim tok i tru?

⁵ Sori tru olsem long nau, sampela manmeri i lusim tok i tru. Sampela i no amamas long ol senis i kamap long save bilong yumi long tok bilong Baibel, na sampela i no amamas long toktok o pasin bilong wanpela brata. Sampela narapela i bel hevi taim ol elda i yusim tok bilong Baibel long stretim ol, o ating ol i bel kros long narapela wanbilip. Ating ol narapela i joinim ol apostet na ol birua husat i mekim ol tok giaman bilong paulim bilip bilong yumi. Olsem na long laik bilong ol yet, ol i “lusim” Jehova na kongrigesen. (Hib. 3:12-14) Sapos ol i bin holim stretpela tingting, ol bai bilip na stap gut yet long Jisas, wankain olsem aposel Pita i bin mekim! Taim Jisas i askim ol aposel sapos ol i laik lusim em na go, kwiktaim Pita i tok: “Bikpela, bai mipela i go long husat? Ol tok bilong yu i bringim man i go long laip oltaim.”—Jon 6:67-69.

⁶ Isi isi sampela i lusim tok i tru na ating ol i no luksave long dispela samting. Ol i olsem bot i trip isi isi na lusim nambis. Baibel i tok,  “isi isi [ol i] lusim bilip.” (Hib. 2:1) Sampela man i lusim tok i tru long laik bilong ol yet. Tasol sampela i no luksave olsem ol i wok long bagarapim pasin bilong ol long pas gut wantaim Jehova. Yumi ken mekim wanem na bai yumi inap wokabaut yet long tok i tru?

7. Yumi mas mekim wanem bambai yumi no ken salim tok i tru?

⁷ Sapos yumi laik wokabaut long tok i tru, yumi mas harim tok bilong Jehova na bihainim olgeta dispela tok. Tok i tru i mas stap nambawan bikpela samting long laip bilong yumi na yumi mas bihainim ol stiatok bilong Baibel. King Devit i beten long Jehova na tok: “Mi bai bihainim tok i tru bilong yu.” (Sng. 86:11) Devit i strongim tingting long mekim olsem. Yumi tu i mas strongim tingting long wokabaut yet long tok i tru. Sapos nogat, yumi inap kisim tupela tingting long ol samting yumi bin lusim bilong baim tok i tru, na yumi inap tingting long kisim bek sampela samting yumi bin lusim. Yumi mas lukautim gut na holimpas tok i tru. Yumi luksave olsem yumi no inap makim wanem ol tok i tru yumi laikim na wanem ol tok i tru yumi no laikim. Yumi mas wokabaut long “olgeta tok i tru.” (Jon 16:13, BB) Yumi bai stori long 5-pela samting yumi bin lusim bilong baim tok i tru. Taim yumi skelim ol dispela samting, dispela bai strongim yumi na yumi no inap tingting long kisim bek ol samting yumi bin lusim, maski em liklik samting tasol.—Mat. 6:19.

8. Sapos Kristen i no mekim gutpela wok long taim bilong em, hau bai dispela i mekim na em i trip i go longwe long tok i tru? Stori long wanpela ekspiriens.

⁸ Taim. Yumi mas yusim gut taim bilong yumi bambai yumi no inap trip i go longwe long tok i tru. Sapos yumi no was gut, yumi inap lusim bikpela haptaim long kisim amamas, mekim ol samting yumi laikim, yusim Intenet, o watsim televisen. I no gat rong long mekim ol dispela samting, tasol ol inap pulim taim em pastaim yumi yusim long mekim pesenel stadi na ol narapela samting bilong wok lotu. Tingim ekspiriens bilong Emma, * em wanpela sista. Em i laikim tru ol hos kirap long taim em i yangpela yet, olsem na planti taim em i save raidim hos. Bihain, em i pilim olsem em i lusim bikpela haptaim tumas long raidim hos. Olsem na em i mekim sampela senis, na em i no lusim bikpela haptaim tumas bilong kisim amamas. Em i kisim helpim long stori bilong Cory Wells—pastaim Cory i insait long spots bilong raidim hos. * Long nau, Emma i amamas long lusim bikpela haptaim moa long mekim wok lotu na bung wantaim ol wanbilip na ol pren. Em i pilim olsem em i pas gut moa wantaim Jehova, na em i stap bel isi bikos em i save olsem em i yusim taim bilong em long mekim gutpela wok.

9. Olsem wanem pasin bilong bungim mani kago inap mekim na sampela i lusim wok lotu?

⁹ Mani kago. Sapos yumi laik wokabaut yet long tok i tru, orait mani kago i no ken i stap nambawan bikpela samting long laip bilong yumi. Taim yumi kisim save long tok i tru, wok lotu i stap nambawan bikpela samting winim mani kago. Yumi amamas long lusim pasin bilong bungim mani kago bambai yumi inap wokabaut long tok i tru. Tasol sampela haptaim i lus na yumi lukim olsem ol narapela i baim ol nupela fon, teblet, kar, o haus. Yumi inap pilim olsem yumi tu i mas i gat ol dispela samting. Ating yumi no amamas moa long ol samting yumi gat pinis, na yumi tingting long bungim planti moa mani kago na yumi lusim wok lotu. Demas i bin laikim tumas “ol samting bilong dispela taim nau,” olsem na em i lusim aposel Pol na wok misineri em i bin mekim. (2 Tim. 4:10) Baibel  i no kolim stret risen bilong Demas long lusim Pol. Ating em i laikim tumas mani kago winim wok lotu, o em i laik inapim laik bilong em yet long sampela samting. Yumi no laik tru long kisim gen laik bilong bungim mani kago na larim dispela i pasim yumi long laikim tok i tru.

10. Yumi mas sakim wanem presa bambai yumi inap wokabaut yet long tok i tru?

¹⁰ Ol wanblut na ol pren. Sapos yumi laik wokabaut yet long tok i tru, yumi no ken larim ol narapela i putim presa long yumi na yumi bihainim ol. Taim yumi stat long wokabaut long tok i tru, sampela senis i kamap long pasin bilong yumi long pas gut wantaim ol wanblut na ol pren husat i no Witnes. Sampela i amamas, tasol ol narapela i birua long yumi. (1 Pita 4:4) Yumi laik pas gut wantaim ol wanblut, mekim gut long ol, na amamasim ol, tasol yumi no ken larim dispela i kirapim yumi long brukim ol lo bilong Baibel. Yumi bai wok yet long mekim ol samting bilong i stap bel isi wantaim ol. Tok lukaut i stap long 1 Korin 15:33 i kirapim yumi long pas gut wantaim ol manmeri i laikim Jehova.

11. Olsem wanem yumi inap abrusim ol pasin em Baibel i tambuim?

¹¹ Tingting na pasin i no stret. Olgeta lain husat i wokabaut long tok i tru, ol i mas i stap holi. (Ais. 35:8; ritim 1 Pita 1:14-16.) Taim yumi kam insait long tok i tru, yumi olgeta i bin mekim ol senis bambai yumi inap bihainim ol stretpela lo bilong Baibel. Sampela i bin mekim ol bikpela senis. Maski yumi mekim ol bikpela senis o nogat, yumi no ken tru lusim ol pasin i klin na holi na bihainim olkain pasin pamuk na pasin doti bilong dispela graun. Olsem wanem yumi inap abrusim pasin pamuk? Yumi mas tingim bikpela pe Jehova i givim bilong baim bek yumi na mekim yumi kamap holi—Em i givim samting i dia tumas, em blut bilong Pikinini bilong em, Jisas Krais. (1 Pita 1:18, 19) Sapos yumi laik i stap klin yet long ai bilong Jehova, orait oltaim yumi mas tingim na pilim tru ofa bilong Jisas long baim bek yumi.

12, 13. (a) Bilong wanem em i bikpela samting long holim wankain tingting olsem Jehova long ol bikpela de? (b) Yumi bai skelim wanem samting long neks paragraf?

¹² Ol kastam na ol pasin em Baibel i tambuim. Ating ol wanblut, ol wanwok, na ol wanskul i fosim yumi long insait long sampela selebresen olsem betde na pablik holide. Olsem wanem yumi inap sakim presa bilong insait long ol kastam na ol holide we i no onarim Jehova? Yumi inap mekim olsem sapos yumi kliagut long tingting bilong Jehova long ol dispela kastam na holide. Yumi ken skelim gen ol pablikesen bilong yumi we i stori long risen bilong sampela de long i stap olsem holide. Taim yumi kliagut long ol risen na Baibel i tambuim ol kain selebresen olsem, dispela bai strongim tingting bilong yumi olsem yumi wokabaut long rot “em Bikpela i orait long en.” (Efe. 5:10) Sapos yumi trastim Jehova na tok i tru bilong Baibel, dispela bai lukautim yumi na yumi no inap “pret na guria long man.”—Prov. 29:25.

¹³ Yumi kirap pinis long wokabaut long tok i tru, na yumi inap wokabaut yet long dispela rot i go inap oltaim oltaim. Olsem wanem yumi inap strongim tingting bilong yumi long wokabaut yet long tok i tru? Yumi ken skelim 3-pela rot.

14. (a) Sapos yumi wok yet long stadi na tingim tingim ol tok i stap long Baibel, hau bai dispela i helpim yumi? (b) Bilong wanem yumi mas kisim savetingting, tok bilong skulim yumi, na pasin bilong kliagut long ol samting?

¹⁴ Namba 1: Wok yet long stadi na tingim tingim ol gutpela tok i tru i stap long Baibel. I olsem yu baim tok i tru bikos yu lusim sampela haptaim long stadi. Taim yu mekim olsem, yu bai laikim moa yet ol dispela tok na yu bai strongim tingting olsem yu no inap tru  long salim tok i tru. Provep 23:23 i tok yumi mas baim tok i tru, na tu, yumi mas baim “savetingting, tok bilong skulim [yumi] na pasin bilong kliagut long ol samting.” Yumi kisim save, tasol yumi mas mekim sampela samting moa. Yumi mas bihainim tok i tru long laip bilong yumi. Taim yumi kliagut long ol samting, yumi bai luksave olsem olgeta tok bilong Jehova i stret na i sapotim narapela narapela. Savetingting bai kirapim yumi long mekim wok long save yumi kisim pinis. Sampela taim, tok i tru i stretim yumi na soim yumi long sampela pasin yumi mas senisim. Oltaim yumi mas larim tok i tru i stiaim yumi. Tok i tru em samting i dia tumas na i winim tru silva.—Prov. 8:10.

15. Olsem wanem belt bilong tok i tru i lukautim yumi?

¹⁵ Namba 2: Yumi mas tingting strong long bihainim tok i tru long olgeta de. Pasim tok i tru olsem yu save pasim belt. (Efe. 6:14) Long taim bipo, soldia i save pasim belt bilong lukautim bel, lewa, na kidni bilong em. Em i mas pasim strong belt na dispela bai lukautim em. Sapos em i no pasim strong, em inap kisim bagarap. Taim yumi pasim strong tok i tru olsem belt, hau bai dispela i lukautim yumi? Tok i tru bai stiaim yumi long abrusim ol tingting kranki na yumi bai mekim ol gutpela disisen. Taim hevi o traim i painim yumi, tok i tru bai strongim tingting bilong yumi long bihainim stretpela pasin. Soldia i no inap tru long lusim belt bilong em na go long pait. Olsem tasol, yumi mas strongim tingting olsem yumi no inap tru long slekim o lusim belt bilong tok i tru. Yumi mas mekim olgeta samting yumi inap mekim bilong bihainim tok i tru; i olsem yumi pasim strong belt bilong tok i tru. Narapela wok bilong belt bilong soldia em olsem, em i save hangamapim bainat long en. Nau yumi ken stori long narapela rot bilong strongim tingting bilong yumi long wokabaut yet long tok i tru.

16. Taim yumi skulim ol narapela long tok i tru bilong Baibel, hau bai dispela i strongim tingting bilong yumi long wokabaut yet long tok i tru?

¹⁶ Namba 3: Givim bel olgeta long skulim ol man long tok i tru bilong Baibel. Long dispela rot, i olsem yu holim strong bainat bilong holi spirit, em “tok bilong God.” (Efe. 6:17) Yumi olgeta i ken wok strong long kamap ol gutpela tisa, na stap olsem “wokman i skulim na eksplenim gut tok i tru.” (2 Tim. 2:15) Taim yumi yusim Baibel long helpim ol narapela long lusim ol bilip giaman na kisim tok i tru, yumi putim tok bilong God i go daun long bel na tingting bilong yumi. Taim yumi mekim olsem, yumi strongim tingting bilong yumi long wokabaut yet long tok i tru.

17. Bilong wanem tok i tru em samting i dia tumas long yu?

¹⁷ Tok i tru em wanpela gutpela presen i kam long Jehova. Dispela presen i opim rot long yumi inap kisim wanpela samting we i dia tumas—yumi inap pas gut wantaim Papa bilong yumi long heven. Yumi kisim planti save pinis long tok i tru, tasol i gat planti moa samting em yumi no save yet long en! God i tok promis olsem yumi inap kisim laip oltaim, na dispela tu em wanpela tok i tru yumi baim pinis. Olsem na yumi mas lukautim gut tok i tru olsem wanpela pel i dia tumas. Wok yet long lusim ol narapela samting na bai yu inap “baim tok i tru na no ken salim.” Sapos yu mekim olsem, yu bai mekim wankain samting olsem Devit i kolim long tok promis bilong em long Jehova, em i tok: “Mi bai bihainim tok i tru bilong yu.”—Sng. 86:11.