1-2. (a) Olsem Efesus 6:16 i kamapim, wai na yumi mas holim “bilip olsem hap plang bilong pait”? (b) Yumi bai skelim wanem ol askim?

OLSEM WANEM? Yu gat “bilip olsem hap plang bilong pait”? (Ritim Efesus 6:16.) Ating yu gat. Hap plang i save lukautim gut bodi bilong yu, na olsem tasol, bilip i save banisim yu long pasin pamuk, pasin bilong kros pait, na ol narapela pasin nogut bilong dispela graun.

² Yumi stap long “taim bilong las de,” olsem na planti samting bai traim yet bilip bilong yumi. (2 Tim. 3:1) Olsem wanem yu inap skelim gut bilip bilong yu na mekim ol samting bilong strongim moa yet bilip? Yu ken mekim wanem na bai yu inap holim strong bilip? Yumi ken skelim ol bekim bilong ol dispela askim.

3. Ol soldia i save mekim wanem long ol hap plang bilong ol? Bilong wanem?

³ Long taim bilong ol man i raitim Baibel, ol soldia i save holim ol hap plang we ol i karamapim long skin bilong animal. Ol i save putim oil long ol dispela hap plang na bai skin bilong animal i ken i stap gut na ros i no ken kamap long ol ain bilong en. Sapos wanpela soldia i luksave olsem hap plang bilong em i bagarap, em i save stretim na bai oltaim em i stap redi long go long pait. Olsem wanem dispela eksampel i stret long yu?

4. (a) Wai na yu mas skelim bilip bilong yu? (b) Yu mas mekim wanem ol samting bilong skelim bilip?

⁴ Olsem ol soldia bilong taim bipo, oltaim yu mas skelim na stretim hap plang bilong yu na bai oltaim yu stap redi long insait long pait. Yumi ol Kristen i insait long pait bilong  bilip na ol birua bilong yumi em ol spirit nogut. (Efe. 6:10-12) Em wok bilong yu yet long strongim bilip bilong yu. Hau bai yu save olsem yu stap redi long karim hevi? Pastaim, yu mas beten askim God long helpim yu. Bihain, yu mas yusim Baibel long helpim yu long holim stretpela tingting long yu yet long wankain wei olsem God i tingim yu. (Hib. 4:12) Baibel i tok: “Trastim Jehova long bel olgeta bilong yu, na no ken bilip long save bilong yu yet.” (Prov. 3:5, 6) Orait nau, skelim sampela disisen yu mekim i no longtaim i go pinis. Olsem: Yu bin gat bikpela hevi bilong mani? Yu bin tingim promis bilong Jehova long Hibru 13:5, olsem: “Mi no inap tru long lusim yu, na mi no inap givim baksait long yu”? Dispela promis i bin strongim yu olsem Jehova bai helpim yu? Sapos i olsem, dispela i soim olsem yu lukautim gut bilip bilong yu.

5. Yu inap luksave long wanem samting taim yu skelim bilip bilong yu?

⁵ Ating yu bai kirap nogut taim yu luksave long sampela samting long bilip bilong yu. Yu inap luksave long sampela pasin kranki we i bin stap wantaim yu inap longpela haptaim. Eksampel: Yu inap luksave olsem pasin bilong tingting planti tumas, tok giaman, na pasin bilong bel hevi i bin bagarapim bilip bilong yu. Sapos dispela samting i kamap long yu, hau bai yu inap lukautim gut bilip na bai em i no ken bagarap?

6. I no gat rong long tingting planti long wanem ol samting?

⁶ Sampela taim, i no gat rong long yumi tingting planti. Eksampel: Yumi tingting planti long sampela samting bikos yumi laik amamasim Jehova na Jisas. (1 Kor. 7:32) Sapos yumi mekim bikpela rong, yumi bai tingting planti bikos dispela i bagarapim pasin bilong yumi long pas gut wantaim God. (Sng. 38:18) Na tu, yumi tingting planti long ol samting yumi ken mekim bilong amamasim poroman marit, na lukautim ol wanfamili, na ol wanbilip.—1 Kor. 7:33; 2 Kor. 11:28.

7. Olsem Provep 29:25 i kamapim, wai na yumi no ken pret long ol manmeri?

⁷ Sapos yumi tingting planti tumas, dispela inap bagarapim bilip bilong yumi. Nogut oltaim yumi tingting planti olsem yumi sot long klos na kaikai. (Mat. 6:31, 32) Olsem na yumi inap tingting tasol long bungim planti moa kago. Na tu, yumi inap kisim laik bilong bungim planti mani. Sapos yumi kisim pasin bilong bungim planti mani kago, dispela inap daunim bilip bilong yumi long Jehova na yumi no inap pas gut moa wantaim em. (Mak 4:19; 1 Tim. 6:10) O, yumi inap tingting planti tumas long narapela samting—yumi tingting planti tumas long hau yumi inap kirapim ol narapela long givim biknem long yumi. Ating yumi no laik bai ol manmeri i tok bilas o birua long yumi, olsem na yumi bai mekim ol samting em Jehova i no laikim. Sapos yumi no laik bai dispela samting i kamap long yumi, orait yumi mas askim Jehova long strongim bilip bilong yumi na bai yumi inap sanap strong na yumi no pret long ol manmeri i holim wanem tingting long yumi.—Ritim Provep 29:25; Luk 17:5.

8. Yumi mas mekim wanem taim ol man i autim ol tok giaman?

⁸ Satan, “papa bilong pasin giaman,” em i yusim ol man i stap aninit long kontrol bilong em long mekim planti moa tok giaman i daunim nem bilong Jehova na ol bratasista. (Jon 8:44) Ol apostet i save yusim ol websait, televisen, na ol vidio long mekim  ol tok giaman na paulim tok long oganaisesen bilong Jehova. Ol dispela tok giaman i olsem ol “spia paia bilong Satan.” (Efe. 6:16) Yumi mas mekim wanem sapos wanpela man i autim ol dispela tok giaman long yumi? Yumi mas sakim ol dispela tok! Wai? Bikos yumi bilip long Jehova na yumi trastim ol brata bilong yumi. Yumi no ken tru putim yau long ol apostet. Yumi no ken larim wanpela man o wanpela samting, o laik bilong painimaut ol samting, i kirapim yumi long tok pait wantaim ol apostet.

9. Sapos yumi bel hevi, dispela inap mekim wanem long yumi?

⁹ Bel hevi inap daunim bilip bilong yumi. Yumi olgeta i gat ol hevi bilong yumi yet. Tasol yumi no ken larim hevi i daunim yumi. Sampela taim yumi inap bel hevi. Tasol yumi no ken larim hevi i bosim tingting bilong yumi. Dispela inap pasim yumi long tingim ol gutpela blesing em Jehova i tok promis long givim. (Rev. 21:3, 4) Pasin bilong bel hevi inap pinisim strong bilong yumi na mekim yumi pilim olsem yumi laik givap. (Prov. 24:10) Tasol i gat rot bilong daunim bel hevi.

10. Yu kisim wanem skul long tok bilong wanpela sista?

¹⁰ Long Amerika, wanpela sista i lukautim man bilong em husat i sik, na long wankain taim dispela sista i mekim ol samting bilong strongim bilip bilong em yet. Em i raitim pas i go long hetkota na tok: “Ol samting i kamap long laip bilong mipela i putim hevi long mipela na i daunim mipela, tasol bilip bilong mipela i stap strong. Mi pilim tru ol tok mipela i kisim bilong strongim bilip na mekim gut bel bilong mipela. Mipela i nidim tru ol dispela gutpela edvais. Em i strongim mipela long mekim yet wok bilong God na sanap strong long karim ol hevi em Satan i kamapim.” Ol tok bilong dispela sista i soim olsem yumi inap daunim pasin bilong bel hevi! Yumi ken mekim wanem? Taim ol hevi i kamap, tingim olsem dispela em rot bilong Satan long traim yumi. Oltaim yumi mas tingim olsem Jehova bai mekim gut bel bilong yumi. Kisim gut ol kaikai em i givim long sait bilong bilip.

11. Sapos yumi laik skelim bilip bilong yumi, orait yumi mas givim wanem ol askim long yumi yet?

 ¹¹ Yu ting i gat sampela samting long bilip bilong yu em yu gat wok long stretim? Insait long ol mun i go pinis, yu bin mekim sampela samting bilong daunim pasin bilong tingting planti tumas? Yu bin sakim laik bilong tok pait wantaim ol apostet long ol tok giaman ol i kamapim? Yu bin daunim pasin bilong bel hevi? Sapos olsem, orait bilip bilong yu i stap strong. Tasol yumi mas lukaut bikos Satan i gat ol narapela tul bilong daunim yumi. Orait nau yumi ken skelim wanpela bilong ol dispela tul.

12. Sapos yumi bungim planti mani kago, dispela inap mekim wanem long yumi?

¹² Sapos yumi bungim planti mani kago, dispela inap pulim tingting bilong yumi na yumi no inap tingim gut bilip bilong yumi. Aposel Pol i tok: “Man i mekim wok soldia em i no save insait long ol kain kain wok bisnis bilong dispela laip, long wanem, em i laik bai dispela man husat i bin putim nem bilong em long kamap soldia i mas amamas long em.” (2 Tim. 2:4) I tambu long ol soldia bilong Rom long mekim ol narapela wok. Wanem samting inap kamap sapos soldia i sakim dispela lo?

13. Wai na ol soldia i no ken mekim wok bisnis?

¹³ Piksaim dispela samting. Long wanpela moning, ol soldia i mekim trening long pasin bilong yusim bainat, tasol wanpela soldia i no stap wantaim ol. Em i stap long wanpela haus kai long taun na em i wok long salim kaikai. Long apinun, ol soldia i lusim sampela haptaim long skelim ol tul bilong pait na sapim ol bainat bilong ol. Tasol soldia i gat haus kai i lusim haptaim bilong em long redim kaikai bilong salim long neks de. Long neks moning, ol birua i kam pait. Yu ting husat soldia bai mekim gut pait na ofisa bai amamas long em? Na yu laik bai husat i sanap klostu long yu—soldia husat i stap redi o soldia husat i larim ol narapela samting i pulim tingting bilong em?

14. Yumi stap olsem ol soldia bilong Krais, olsem na wanem samting i spesel tru long yumi?

¹⁴ Yumi tu laik stap olsem ol gutpela soldia,  na bikpela laik bilong yumi em olsem—yumi laik bai ol Komanda bilong yumi, em Jehova na Krais, i amamas long yumi. Dispela em spesel tru, olsem na yumi no ken larim ol narapela samting i pulim tingting bilong yumi. Yumi laik yusim taim na strong bilong yumi long mekim wok bilong Jehova na lukautim gut bilip na olgeta narapela pasin bilong holi spirit.

15. Pol i givim wanem tok lukaut long yumi? Bilong wanem?

¹⁵ Oltaim yumi mas stap redi na was i stap! Wai? Aposel Pol i tok lukaut olsem sapos “ol man i strong long kisim planti mani,” dispela inap “pulim ol na ol i lusim bilip.” (1 Tim. 6:9, 10) Dispela hap tok “pulim ol na ol i lusim” i makim olsem sapos yumi tingting tasol long bungim ol samting we yumi no nidim, dispela inap pulim tingting bilong yumi. Dispela bai mekim na yumi tingim “ol laik nogut na bihainim longlong tingting.” Yumi no ken kisim pasin bilong laikim ol dispela samting, nogat, yumi mas luksave olsem ol dispela samting inap bagarapim yumi.

16. Stori i stap long Mak 10:17-22 i mas kirapim yumi long tingim wanem ol askim?

¹⁶ Tingim olsem yumi gat mani long baim planti samting. Yu ting yumi mekim rong sapos yumi baim ol samting yumi laikim, tasol tru tru yumi no nidim? Nogat, yumi no mekim rong. Tasol tingim ol dispela askim:  Maski sapos yumi gat mani long baim ol samting, tru tru yumi gat taim long yusim na lukautim gut ol dispela samting? Nogut yumi stat long laikim tumas ol kago bilong yumi. Nogut yumi laikim tumas ol kago na yumi kamap olsem dispela yangpela man husat i sakim invatesen bilong Jisas long mekim bikpela wok moa long wok bilong God. (Ritim Mak 10:17-22.) Yumi no ken bungim planti mani kago. Mobeta yumi yusim taim na strong bilong yumi long mekim ol wok em God i laik bai yumi mekim!

17. Yumi no ken tru lusim tingting long wanem samting?

¹⁷ Yumi no ken tru lusim tingting olsem yumi stap insait long wanpela pait, na long olgeta wan wan de yumi mas stap redi long mekim gut dispela pait. (Rev. 12:17) Taim yumi mekim pait, ol narapela bratasista i no inap karim hap plang, o bilip, bilong yumi. Yumi yet i mas holim strong dispela hap plang, o bilip.

18. Wai na ol soldia long bipo i save holim strong ol hap plang bilong pait?

¹⁸ Long bipo, soldia i save kisim biknem taim em i strongim bel na pait. Tasol em bai sem nogut tru sapos em i no holim hap plang bilong pait taim em i go bek long ples. Tasitus em wanpela saveman bilong Rom, na em i tok: “Sapos soldia i no holim plang bilong pait taim em i pinis long pait, dispela i save daunim tru nem bilong em.” Dispela em wanpela risen na ol soldia i save holim strong hap plang bilong pait.

19. Olsem wanem yumi inap holim strong bilip olsem hap plang bilong pait?

¹⁹ Yumi bai holim strong bilip sapos yumi go oltaim long ol miting Kristen na tokim ol narapela long nem bilong Jehova na Kingdom bilong em. (Hib. 10:23-25) Na tu, yumi mas beten na ritim Tok Bilong God long olgeta de na bihainim ol stiatok bilong en long olgeta samting yumi mekim. (2 Tim. 3:16, 17) Long dispela rot, i no gat wanpela tul bilong Satan bai bagarapim yumi inap oltaim oltaim. (Ais. 54:17) “Bilip olsem hap plang bilong pait” bai lukautim yumi. Yumi bai sanap strong na strongim bel long wok bung wantaim ol bratasista bilong yumi. Yumi bai win long pait, na tu, yumi bai stap long sait bilong Jisas taim em i winim pait na daunim tru Satan na lain bilong em.—Rev. 17:14; 20:10.