1. Jisas i mekim wanem tok long ol disaipel bilong em long Matyu 28:18-20?

BIHAIN long Jisas i kirap bek, em i kamap long ol disaipel bilong em long Galili. Em i laik tokim ol long wanpela bikpela samting. Em wanem samting? Tok bilong em i stap long Matyu 28:18-20.—Ritim.

2. Bai yumi skelim wanem ol askim?

² Dispela tok Jisas i mekim long kamapim disaipel em i stret long olgeta wan wan wokman bilong God long nau tu. Yumi ken skelim 3-pela askim long sait bilong dispela wok Jisas i bin givim long yumi. Namba 1, yumi mas skulim ol nupela disaipel long ol samting God i laik ol i mas mekim, na wanem narapela samting yumi mas mekim? Namba 2, olsem wanem olgeta pablisa insait long kongrigesen inap helpim ol Baibel stadi long kamap strong long bilip? Namba 3, olsem wanem yumi ken helpim ol wanbilip em ol i lusim wok autim tok long insait gen long wok bilong kamapim disaipel?

3. Jisas i tok yumi mas mekim wanem?

³ Tok bilong Jisas i klia. Yumi mas skulim ol man long ol samting em i tokim yumi long en. Tasol yumi mas tingim wanpela bikpela samting. Jisas i no tok: ‘Skulim ol long olgeta samting mi tokim yupela long mekim.’ Nogat. Em i tok: Skulim ol “long bihainim olgeta samting mi tokim yupela long mekim.” Bilong bihainim tok bilong Jisas, yumi mas skulim Baibel sumatin bilong yumi, na tu, yumi mas soim em hau long bihainim ol dispela tok. (Apo. 8:31) Bilong wanem yumi mas mekim olsem?

4. Olsem wanem yumi ken skulim wanpela Baibel sumatin long bihainim ol tok bilong Jisas? Stori long tok piksa.

 ⁴ Olsem wanem yumi ken skulim wanpela Baibel sumatin long bihainim ol tok bilong Jisas? Yumi ken stori long wanpela tok piksa i soim hau yumi inap mekim olsem. Sapos wanpela draiva i skulim sumatin long draivim kar, orait olsem wanem em i ken helpim em long bihainim ol lo bilong trafik? Pastaim, em i mas skulim sumatin long ol lo bilong trafik. Na em i mas mekim narapela samting bilong helpim sumatin long bihainim ol dispela lo. Em i mas go wantaim sumatin taim em i draivim kar long rot na stiaim em long hau em i ken bihainim ol dispela lo bilong trafik em i bin lainim. Yumi inap lainim wanem samting long dispela eksampel?

5. (a) Olsem Jon 14:15 na 1 Jon 2:3 i kamapim, yumi mas skulim ol Baibel sumatin bilong yumi long mekim wanem? (b) Stori long wanem ol rot yumi ken helpim ol sumatin bilong yumi.

⁵ Taim yumi mekim Baibel stadi wantaim ol narapela, yumi skulim ol long ol samting God i laik yumi mas mekim. Tasol yumi mas mekim sampela samting moa. Yumi mas skulim ol Baibel sumatin bilong yumi long bihainim ol samting ol i lainim long i stap bilong ol. (Ritim Jon 14:15; 1 Jon 2:3.) Olsem, yumi ken soim ol long hau ol i ken bihainim ol stiatok bilong Baibel long taim ol i stap long skul, long ples wok, o taim ol i kisim amamas. Yumi ken stori long ekspiriens bilong yumi yet long hau yumi bin bihainim ol stiatok bilong Baibel na dispela i lukautim yumi o helpim yumi long mekim gutpela disisen. Taim yumi stap wantaim ol sumatin, yumi ken beten askim Jehova long stiaim ol long rot bilong holi spirit.—Jon 16:13.

6. Yumi mas mekim wanem samting moa bilong skulim ol narapela long bihainim ol tok bilong Jisas?

⁶ Yumi mas mekim wanem samting moa bilong skulim ol narapela long bihainim ol tok bilong Jisas? Yumi mas helpim Baibel sumatin bilong yumi long i gat laik long kamapim disaipel. Ating sampela sumatin bai pret long insait long wok autim tok. So yumi mas kisim pasin bilong i no les kwik taim yumi helpim ol long kliagut long ol tok i tru bilong Baibel, na bai ol i ken pilim tru long bel na dispela bai kirapim ol long autim tok. Yumi mas mekim wanem bilong helpim ol sumatin long i gat laik long insait long wok bilong autim gutnius long ol narapela?

7. Olsem wanem yumi ken helpim sumatin long i gat laik long insait long wok bilong autim gutnius long ol narapela?

⁷ Yumi ken askim ol Baibel sumatin bilong yumi olsem: “Taim yu kisim save long gutnius bilong Kingdom dispela i helpim yu olsem wanem? Yu ting ol narapela tu i mas harim dispela gutnius? Yu ken mekim wanem bilong helpim ol?” (Prov. 3:27; Mat. 9:37, 38) Soim sumatin long ol liklik nius i stap long Ol Tul Bilong Skulim Man na larim em yet i makim nius em i ting i stret long ol wanblut, ol pren, na ol wanwok bilong em. Givim sampela bilong ol dispela liklik nius long sumatin. Mekim prektis bilong lainim em long hau em inap tilim wanpela liklik nius. Taim sumatin i kisim tok orait long kamap wanpela pablisa i no baptais, yumi mas autim tok wantaim em bilong helpim em.—Ekl. 4:9, 10; Luk 6:40.

8. Wai na em i bikpela samting long ol sumatin bilong yumi i kisim pasin bilong laikim tru God na ol narapela? (Lukim tu blok “ Helpim Ol Baibel Sumatin Long Strongim Pasin Bilong Ol Long Laikim God.”)

⁸ Tingim tok Jisas i mekim long yumi olsem yumi mas skulim ol narapela “long bihainim olgeta samting” em i tokim yumi long en. Tupela nambawan bikpela lo i insait long dispela—laikim God na laikim ol narapela—dispela  i kirapim yumi long autim tok na kamapim disaipel. (Mat. 22:37-39) Wai na yumi mas i gat pasin laikim? Nambawan bikpela risen na yumi autim tok em bikos yumi gat pasin laikim—yumi laikim God na yumi laikim ol narapela. Sori tru olsem sampela Baibel sumatin i pret long insait long wok autim tok. Tasol yumi ken mekim gut bel bilong kain sumatin olsem Jehova bai helpim ol na isi isi ol bai daunim pasin bilong pret long ol man. (Sng. 18:1-3; Prov. 29:25) Taim em i laikim God na laikim ol narapela, dispela bai helpim em long daunim pasin bilong pret long ol man na autim ol gutpela tok bilong Baibel long ol narapela. Blok i stap long dispela atikol bai stori long ol rot yumi ken bihainim bilong helpim sumatin long kisim pasin bilong laikim tru God. Na tu, kongrigesen inap mekim wanem bilong helpim ol nupela disaipel long kisim pasin bilong laikim tru ol narapela?

9. Long dispela tok piksa bilong sumatin i lain long draiv, long wanem rot em i lainim ol bikpela lesen?

⁹ Tingim gen tok piksa bilong sumatin i lain long draivim kar. Taim em i draiv na tisa i sindaun arere long em, long wanem rot em i wok long lain? Em i wok long lain taim em i putim yau long tisa bilong em na long wankain taim em i lukim hau ol narapela draiva i draiv. Olsem, tisa i soim em long hau wanpela draiva i giv-wei long narapela draiva na larim em i go paslain long em long rot. O em i soim em long hau wanpela draiva i daunim lait bilong kar so ol narapela draiva inap lukluk gut. Kain ol gutpela eksampel olsem i skulim sumatin long ol bikpela lesen em i ken bihainim taim em i draiv.

10. Wanem samting inap helpim Baibel sumatin long kamap strong long bilip?

¹⁰ Olsem tasol, Baibel sumatin husat i kirap long wokabaut long rot i go long laip, em bai kisim skul long tisa bilong em na kisim skul long eksampel bilong ol narapela wokman bilong Jehova. Olsem na wanem samting bai helpim gut Baibel sumatin long kamap strong long bilip? Em i mas go long ol miting Kristen. Bilong wanem? Taim em i go long ol miting Kristen em bai kisim sampela save moa long ol tok bilong Baibel, na dispela bai strongim bilip bilong em na helpim em long strongim pasin bilong em long laikim God. (Apo. 15:30-32) Na tu, long taim bilong miting, Baibel tisa i ken kisim sumatin i go bungim ol narapela bratasista em ol i gat wankain ekspiriens olsem em. Wanem ol eksampel bilong pasin laikim Kristen em sumatin inap lukim insait long kongrigesen? Skelim ol dispela eksampel.

11. (a) Sumatin inap lukim wanem ol eksampel insait long kongrigesen? (b) Olsem wanem dispela inap helpim sumatin?

¹¹ Wanpela Baibel sumatin husat i mama wanpis i lukim wanpela sista Kristen i gat wankain sindaun olsem em. Sumatin i pilim tru long bel hatwok bilong sista long wok strong long bringim ol liklik pikinini bilong em i kam long Haus Kingdom. Wanpela sumatin husat i hatwok long lusim pasin bilong smok i bungim wanpela pablisa husat i bin gat wankain hevi olsem em, tasol em i winim dispela hevi. Pablisa i tokim sumatin olsem pasin bilong em long laikim tru Jehova i kirapim em long bihainim ol tok bilong God. (2 Kor. 7:1; Fili. 4:13) Bihain long sumatin i harim stori bilong dispela pablisa, em i pilim olsem em inap tru long mekim wankain senis taim pablisa i tokim em olsem, “Yu tu ken lusim dispela pasin.” Wanpela yangpela meri husat i stadi long Baibel i lukim wanpela yangpela sista i amamas long i stap bilong em olsem wanpela Witnes. Baibel sumatin i lukim dispela yangpela sista i stap amamas na em i laik kisim sampela save moa long wanem samting i mekim sista i amamas.

12. Olsem wanem olgeta wan wan insait long kongrigesen i gat wok long helpim Baibel sumatin long kamap strong long bilip?

 ¹² Taim Baibel sumatin i save gut long narapela narapela pablisa, em bai kisim skul long eksampel bilong ol long olsem wanem em i ken bihainim tok bilong Krais long laikim God na laikim ol narapela. (Jon 13:35; 1 Tim. 4:12) Na tu, olsem yumi stori pinis, Baibel sumatin inap kisim skul long ol pablisa em ol i bin karim ol wankain hevi olsem em. Sumatin inap kisim skul long eksampel bilong ol olsem em tu inap mekim ol senis na kamap wanpela disaipel bilong Krais. (Lo 30:11) Olgeta wan wan insait long kongrigesen i ken helpim Baibel sumatin long narapela narapela rot bilong em i ken kamap strong long bilip. (Mat. 5:16) Yu save mekim wanem bilong helpim ol Baibel sumatin em ol i save kam long ol miting?

13-14. Jisas i mekim wanem pasin long ol disaipel bilong em taim ol i bel hevi?

¹³ Yumi laik helpim ol bratasista bilong yumi em ol i lusim wok autim tok long insait gen long wok autim tok na inapim dispela wok Krais i givim long yumi bilong kamapim ol disaipel. Pasin Jisas i mekim long ol disaipel bilong em taim ol i bel hevi i soim yumi long pasin yumi ken mekim long nau.

¹⁴ Taim Jisas i pinisim wok bilong em long graun, paslain tasol long ol i kilim em i dai, olgeta aposel i “lusim em na ranawe.” (Mak 14:50; Jon 16:32) Jisas i mekim wanem long ol aposel bilong em taim ol i bel hevi na ol i no gat strong moa? Bihain long Jisas i kirap bek, em i tokim sampela disaipel bilong em: “Yupela i no ken pret! Go na tokim ol brata bilong mi [olsem mi kirap bek pinis].” (Mat. 28:10a) Jisas i no lusim ol aposel bilong em. Maski ol i bin lusim em na ranawe, em i kolim ol olsem “ol brata bilong mi.” Olsem Jehova, Jisas i gat pasin marimari na pasin bilong fogivim narapela.—2 Kin. 13:23.

15. Yumi holim wanem tingting long ol lain em ol i lusim wok autim tok?

¹⁵ Olsem tasol, yumi save tingim tru ol lain em ol i lusim wok autim tok. Ol i brata na sista bilong yumi, na yumi laikim ol! Yumi tingim yet ol gutpela wok em ol dispela wanbilip i bin mekim long bipo—ating sampela i bin mekim wok inap planti yia. (Hib. 6:10) Yumi misim ol tru! (Luk 15:4-7) Olsem wanem yumi inap bihainim pasin bilong Jisas long soim olsem yumi tingim tru ol?

16. Olsem wanem yumi ken soim olsem yumi tingim ol bratasista bilong yumi em ol i lusim wok autim tok?

¹⁶ Invaitim ol long kam long ol miting. Wanpela rot Jisas i strongim ol disaipel bilong em husat i bin bel hevi em long invaitim ol long kam long wanpela bung. (Mat. 28:10b; 1 Kor. 15:6) Olsem tasol, long nau yumi ken strongim ol lain i lusim wok autim tok long kam long ol miting bilong kongrigesen sapos ol i no mekim olsem yet. Ating sampela taim yumi mas invaitim ol planti taim na bai ol i ken kam. I klia tru olsem Jisas i amamas taim ol disaipel bilong em i bihainim invatesen bilong em na kam long dispela bung.—Skelim Matyu 28:16 na Luk 15:6.

17. Yumi mas mekim wanem taim wanpela husat i bin lusim wok autim tok i kam long miting?

¹⁷ Welkamim ol. Jisas i go klostu long ol disaipel bilong em taim ol i kam bungim em; em i go pas long toktok wantaim ol. (Mat. 28:18) Bai yumi mekim wanem taim wanpela husat i bin lusim wok autim tok i kam long Haus Kingdom? Yumi mas go pas long bungim em na welkamim em. Ating bai yumi tingting planti long wanem tok yumi bai mekim. Tasol yumi no laik semim em, olsem na yumi ken tokim em olsem yumi amamas long lukim em.

18. Olsem wanem yumi ken strongim ol pablisa em ol i bin lusim wok autim tok?

 ¹⁸ Strongim ol. Ating ol disaipel bilong Jisas i pilim hatwok long inapim wok Jisas i givim long ol long autim tok long olgeta hap bilong graun. Jisas i strongim ol disaipel bilong em taim em i tok: “Mi stap wantaim yupela olgeta de.” (Mat. 28:20) Yu ting dispela tok i strongim ol disaipel? Yes. Bihain tasol long dispela, ol i bisi long “skulim ol manmeri na autim gutnius.” (Apo. 5:42) Ol pablisa i lusim wok autim tok, ol tu i nidim ol tok bilong strongim ol. Ating ol bai pilim hatwok long mekim gen wok autim tok. Yumi ken strongim ol olsem ol bai no inap mekim dispela wok ol yet. Taim ol i redi long go autim tok, yumi ken poromanim ol. Ol bai amamas long helpim bilong yumi taim ol i kirap gen long autim gutnius. Taim yumi tingim na mekim gutpela pasin long ol bratasista bilong yumi em ol i lusim wok autim tok, bai yumi lukim ol gutpela samting i kamap long kongrigesen bilong yumi.

19. Yumi laik mekim wanem na bilong wanem?

¹⁹ Yumi mas mekim wok bilong kamapim disaipel i go inap long wanem mak? I go inap long pinis bilong dispela taim. (Mat. 28:20; lukim Dikseneri, “Pinis bilong dispela taim.”) Olsem wanem? Yumi bai mekim dispela wok Jisas i givim long yumi i go inap long dispela taim? Yumi tingting strong long mekim olsem! Yumi amamas long givim taim, strong, na ol samting bilong yumi long painim ol man em “bel bilong ol i gutpela long kisim laip oltaim.” (Apo. 13:48) Taim yumi mekim olsem, yumi bihainim eksampel bilong Jisas. Em i tok: “Kaikai bilong mi em long mekim laik bilong man i bin salim mi i kam na long inapim wok em i givim long mi.” (Jon 4:34; 17:4) Yumi tu i laik mekim olsem. Yumi laik inapim wok em Jisas i givim long yumi. (Jon 20:21) Na yumi laik bai ol narapela, dispela i makim tu ol lain i lusim wok autim tok, long sanap strong na mekim yet dispela wok wantaim yumi.—Mat. 24:13.

20. Olsem Filipai 4:13 i kamapim, olsem wanem yumi ken inapim wok Jisas i givim long yumi?

²⁰ Em tru olsem bilong inapim dispela bikpela wok Jisas i givim long yumi, bai i gat hatwok bilong en. Tasol yumi no stap wanpis long mekim dispela wok. Jisas i tok promis olsem em bai stap wantaim yumi. Yumi insait long dispela wok bilong kamapim ol disaipel na yumi stap olsem “ol wanwok bilong God” na “ol disaipel bilong Krais.” (1 Kor. 3:9; 2 Kor. 2:17) Olsem na yumi ken inapim dispela wok. Em wanpela gutpela wok tru na yumi amamas long mekim dispela wok na helpim ol narapela tu long mekim dispela wok!—Ritim Filipai 4:13.