Mi bon long 1983. Mi wanpela helti bebi, tasol taim mi gat 10 krismas, mi stat long pilim pen long olgeta hap long bodi bilong mi. Inap 2-pela yia bihain, mi kirap long wanpela moning na mi no inap muv. Maski mi taitim bun long muvim tupela lek bilong mi, mi no inap muv. Kirap long dispela de, mi no wokabaut moa. Dispela sik i mekim na mi stop long gro. Long nau, mi liklik yet wankain olsem wanpela liklik pikinini.

Sampela mun bihain long mi kisim sik na mi no inap lusim haus moa, tupela Witnes Bilong Jehova i kam visitim mi. Taim ol visita i kam, mi save hait, tasol dispela taim mi larim dispela tupela meri i toktok long mi. Taim ol i stori long Paradais, mi tingim samting mi bin harim taim mi gat 5-pela krismas. Long dispela taim, wanpela misineri nem bilong em Jethro, husat i save stap long Surinam, em i save kam long viles bilong mipela na mekim Baibel stadi wantaim papa bilong mi. Jethro i save mekim gutpela pasin long mi. Mi laikim em tru. Na tu, tumbuna papamama bilong mi i save kisim mi i go long ol miting bilong ol Witnes, we i save kamap long viles bilong mipela. So taim Florence, wanpela bilong dispela tupela meri i kam lukim mi long dispela de, i askim mi sapos mi laik kisim sampela save moa, mi tok yes.

Florence i kam bek wantaim man bilong em, Justus, na tupela i mekim Baibel stadi wantaim mi. Taim ol i luksave olsem mi no save long rit, ol i helpim mi long lain long rit. Bihain long sampela haptaim, mi yet i wok long rit. Wanpela taim, dispela tupela marit i tokim mi olsem ol i kisim asainmen long go autim tok long Surinam. Sori tru, i no gat wanpela long Orealla husat inap mekim yet Baibel stadi wantaim mi. Tasol mi amamas olsem Jehova i no lusim tingting long mi.

I no longtaim, wanpela painia nem bilong em Floyd i kam long Orealla, na em i bungim mi taim em i wok long autim tok long ol haus. Taim em i stori long mi long Baibel stadi, mi smail. Em i tok: “Wai na yu smail?” Mi tokim em olsem mi stadi pinis long dispela buklet God i Laik Yumi Mas Mekim Wanem? na mi kirap pinis long stadi long buk Save i Bringim Man Long Laip Oltaim. * Mi stori long risen na mi stop long stadi. Floyd i stadi wantaim mi na mitupela i pinisim buk Save, tasol bihain em tu i kisim asainmen long go mekim wok long narapela hap. Na mi no gat wanpela Baibel tisa gen.

 Tasol long 2004, Granville na Joshua, tupela spesel painia, i kisim asainmen long kam mekim wok autim tok long Orealla. Ol i autim tok long ol haus, na ol i bungim mi. Taim ol i askim mi sapos mi laik stadi, mi smail. Mi askim ol long stadi wantaim mi long buk Save kirap long sapta 1 na i go. Mi laik lukim sapos ol bai skulim mi long wankain samting em ol tisa bilong mi long pastaim i bin skulim mi long en. Granville i tokim mi olsem ol miting i save kamap long viles. Maski mi no bin lusim haus bilong mi klostu 10-pela yia, mi laik go long miting. So Granville i kam long haus bilong mi na putim mi long wanpela wilsia na pusim mi i go long Haus Kingdom.

Bihain, Granville i kirapim mi long insait long Skul Tiokratik Bilong Autim Tok. Em i tok: “Yu gat bagarap long bodi, tasol yu ken toktok. Wanpela taim, yu bai mekim pablik tok. Yu bai mekim.” Tok bilong em i strongim mi.

Mi kirap long insait long wok autim tok wantaim Granville. Tasol planti rot long viles i nogut na wilsia i no inap ron long en. So mi askim Granville long putim mi insait long wanpela wilbaro na pusim mi. Dispela i wok gut. Long Epril 2005, mi kisim baptais. Bihain long dispela, ol brata i trenim mi long lukautim litresa bilong kongrigesen na lukautim saun sistem long Haus Kingdom.

Sori tru, long 2007 papa bilong mi i pundaun i go aut long bot, na propela bilong bot i katim em na em i dai. Famili bilong mipela i bel hevi tru. Granville i beten wantaim mipela na soim sampela tok bilong Baibel bilong mekim isi bel bilong mipela. Bihain long tupela yia, mipela i bel hevi tru long narapela bikpela hevi i kamap—bot em Granville i stap long en i sink long nait na tupela de bihain, ol i painim bodi bilong em.

Liklik kongrigesen bilong mipela i no gat ol elda na i gat wanpela kongrigesen sevan tasol. Mi bel hevi tru olsem gutpela pren bilong mi Granville i dai. Em i save helpim mi long ol samting bilong bilip na ol samting bilong skin. Long fes miting i kamap bihain long Granville i dai, mi kisim asainmen long ritim ol paragraf long Wastaua Stadi. Mi ritim gut tupela fes paragraf, tasol bihain mi stat long krai na aiwara i wok yet long ron. Mi lusim pletfom na i go daun.

Mi stat long pilim amamas gen taim ol brata long narapela kongrigesen i kam helpim mipela long Orealla. Na tu, brens ofis i salim Kojo, wanpela spesel painia i kam. Mi amamas tru taim mama na liklik brata bilong mi i kirap long stadi na kisim baptais. Bihain, long Mas 2015, ol i makim mi long kamap kongrigesen sevan. Bihain long sampela haptaim, mi mekim fes pablik tok bilong mi. Long dispela de, mi aiwara na smail taim mi tingim tok bilong Granville sampela yia i go pinis olsem: “Wanpela taim, yu bai mekim pablik tok. Yu bai mekim.”

Long rot bilong ol program long JW Broadcasting^®, mi kisim skul long ol narapela brata na sista husat i karim wankain hevi olsem mi. Maski ol i gat bagarap long bodi, ol i mekim gut ol wok na ol i stap amamas. Na mi tu mi mekim sampela wok. Mi laik tru long yusim olgeta strong mi gat long mekim wok bilong Jehova, olsem na mi kirap mekim painia oltaim. Na mi kirap nogut long kisim wanpela gutpela nius long Septemba 2019! Mi kisim save olsem ol i makim mi long mekim wok olsem wanpela elda long kongrigesen bilong mi we i gat inap olsem 40 pablisa.

Mi tenkyu tru long ol gutpela brata na sista em ol i bin stadi wantaim mi na helpim mi long mekim wok bilong Jehova. Na moa yet, mi amamas tru olsem Jehova i no bin lusim tingting long mi.