PLANTI bratasista em pastaim ol i go sindaun long ol kantri long Yurop na Amerika, nau ol i muv i go bek long kantri bilong ol yet. Ol i laikim tru Jehova na ol arapela manmeri, na dispela i kirapim ol long muv i go long ol kantri i sot tru long ol pablisa bilong Kingdom. (Mat. 22:37-39) Ol i redi long lusim wanem ol samting, na ol i kisim wanem ol blesing? Bilong painimaut, yumi ken ritim ol ekspiriens i kam long Kamarun long hap wes bilong Afrika.

Long 1998, wanpela brata nem bilong em Onésime, i lusim kantri bilong em Kamarun na i go long narapela kantri. Em i go stap long dispela narapela kantri inap 14 yia. Wanpela taim long miting Kristen, em i harim tok piksa em wanpela brata i mekim long wok autim tok. Brata i tok: “Sapos 2-pela pren i painim pis long narapela narapela hap, na wanpela i kisim planti pis moa winim narapela, orait dispela man i no kisim planti pis bai muv i go long hap we pren bilong em i wok long kisim planti pis long en, a?”

Dispela tok piksa i kirapim tru tingting bilong Onésime long go bek long Kamarun, em kantri we planti manmeri i laik stadi long Baibel, na bai em inap helpim ol pablisa long hap. Tasol em i tingting planti. Inap planti yia em i stap long narapela kantri, so em i tingting planti em bai inap lain gen long sindaun long kantri bilong em long Kamarun? Onésime i laik painimaut sapos em inap mekim olsem, so em i go stap long Kamarun inap 6-pela mun. Orait long 2012, em i muv i go bek long Kamarun.

Onésime i tok: “Mi mas lain gen long stap long ples i hot na lain gen long sindaun long ples. Long Haus Kingdom, mi mas lain gen long sindaun long ol hap plang.” Em i smail na tok moa olsem: “Tasol mi putim tingting olgeta long ol tok i kamap long miting, so mi no tingim tumas ol gutpela kusen sia bilong ol narapela Haus Kingdom.”

Long 2013, Onésime i maritim Géraldine, em i bin stap long Frans inap 9-pela yia na em tu i muv i go bek long Kamarun. Tupela i putim ol wok tiokratik i stap olsem nambawan bikpela samting long laip bilong ol, na tupela i kisim wanem ol blesing? Onésime i tok: “Mitupela wantaim i go long Skul Bilong Ol Kingdom Evanselis, na mipela i wok long Betel. Long las yia, 20 Baibel sumatin long kongrigesen bilong mipela i kisim baptais. Mi pilim olsem mi stap long gutpela ples tru bilong ‘kisim pis.’” (Mak 1:17, 18) Géraldine i tok: “Mi kisim planti moa blesing winim ol blesing mi bin tingim.”

Judith i go stap long Amerika, tasol em i gat laik tru long mekim bikpela wok moa bilong autim tok. Em i tok: “Mi save go long Kamarun long visitim ol famili bilong mi na taim mi laik lusim ol na kam bek, mi save krai bikos mi mas lusim ol lain em mi bin kirapim Baibel stadi wantaim ol.” Tasol Judith i holim tupela tingting long go bek long Kamarun.  Em i mekim wok mani i gat bikpela pe na dispela i opim rot long em inap baim ol haus sik bil bilong papa bilong em long Kamarun. Maski i olsem, Judith i trastim Jehova na em i muv i go bek long Kamarun. Em i tok em i misim sampela gutpela samting em i bin enjoim long taim em i stap long Amerika. Em i beten askim Jehova long helpim em long mekim ol senis, na em i kisim helpim taim wasman sekit na meri bilong em i bin strongim em.

Judith i tingim ol blesing em i kisim taim em i go bek long Kamarun, na em i tok: “Insait long 3-pela yia, mi amamas tru olsem mi inap helpim 4-pela sumatin long kamap ol disaipel.” Judith i kirap mekim wok olsem spesel painia. Long nau, em na man bilong em, Sam-Castel, i mekim wok sekit. Wanem samting i kamap long papa bilong Judith? Judith na famili bilong em i painim wanpela haus sik long narapela kantri, na dispela haus sik i redi long sponsarim operesen bilong papa bilong em. Gutpela tru olsem operesen bilong em i bin kamap gut.

Wanpela brata, nem bilong em Victor, i muv i go long Kanada. Em i ritim wanpela atikol long Wastaua i stori long bikpela ediukesen, na dispela i kirapim em long skelim gen disisen bilong em long sait bilong ediukesen. Em i stop long go long yunivesiti na em i kisim ol sotpela kos long teknikol skul. Em i tok: “Dispela i opim rot long mi inap kisim wok mani hariap, na mi inap mekim wok em longpela taim mi bin tingting long mekim—wok painia.” Bihain, Victor i maritim Caroline na tupela i go raun long Kamarun. Tupela i visitim brens ofis long Kamarun, na sampela brata i kirapim tupela long putim mak long helpim wok autim tok long Kamarun. Victor i tok: “Mipela i no painim wanpela risen long tok nogat, na mipela i holim liklik samting tasol, so rot i op long mitupela i orait long dispela invatesen.” Maski Caroline i gat sampela hevi long sait bilong helt, tupela i bihainim disisen bilong ol long muv.

Victor na Caroline i kirap mekim wok painia oltaim na bai ol inap helpim ol manmeri em ol i laik stadi long Baibel. Inap sampela haptaim, ol i yusim mani ol i bin seivim bilong lukautim ol yet. Bihain, tupela i go long Kanada na mekim wok mani inap sampela mun, olsem na rot i op long tupela inap go bek long Kamarun na mekim yet wok painia. Tupela i kisim wanem ol blesing? Tupela i go long Skul Bilong Ol Kingdom Evanselis, mekim wok olsem ol spesel painia, na nau tupela i mekim wok olsem ol konstraksen sevan. Victor i tok: “Mipela i lusim gutpela sindaun bilong mipela, tasol dispela i opim rot long mipela inap trastim Jehova na lukim em i sambai long mipela.”

Long 2002, Alain, wanpela yunivesiti sumatin long Jemani, i ritim liklik nius Ol Yangpela—Yupela Bai Mekim Wanem Long Laip Bilong Yupela? Ol tok em i ritim i kirapim em long putim ol nupela mak. Long 2006, em i go long Ministerial Trening Skul na em i kisim asainmen long go long Kamarun, em kantri em i bon long en.

Long Kamarun, Alain i wok mani pat-taim. Bihain, em i painim wok mani we pe i antap moa, tasol em i tingting planti olsem em bai no gat taim bilong mekim wok autim tok. So taim em i kisim invatesen long kamap spesel painia, em i tok orait na em i no holim tupela tingting. Bos bilong Alain i tok em bai apim pe bilong em, tasol Alain i no senisim disisen bilong em. Bihain, Alain i maritim Stéphanie, em i bin stap long Frans inap planti yia. Stéphanie i bungim wanem ol hevi taim em i muv i go long Kamarun?

Stéphanie i tok: “Mi bungim sampela liklik hevi long sait bilong helt, tasol mi save kisim ol  tritmen na dispela i bin helpim mi.” Dispela tupela marit i sanap strong na karim ol hevi, olsem na ol i kisim ol blesing. Alain i tok: “Taim mipela i go autim tok long Katé, em wanpela viles i stap longwe, mipela i bungim sampela manmeri em ol i laik stadi long Baibel. Bihain, mipela i mekim ol Baibel stadi wantaim ol long rot bilong fon. Tupela bilong ol dispela sumatin i kisim baptais, na 5-pela i kamap ol pablisa.” Stéphanie i tok: “Mipela i kisim bikpela amamas tru long helpim ol manmeri long winim ol mak na dediketim laip bilong ol long Jehova. Planti taim mipela i kisim dispela amamas taim mipela i autim tok long hia.” Long nau, Alain na Stéphanie i mekim wok sekit.

Gisèle i kisim baptais taim em i stap long medikal skul long Itali. Em i laikim stret simpol laip bilong tupela painia marit em ol i skulim em long ol tok bilong Baibel, na em i laik mekim bikpela wok moa bilong autim tok. So Gisèle i stap yet long skul na em i kirap long mekim wok painia oltaim.

Gisèle i gat laik tru long mekim bikpela wok moa bilong Jehova long Kamarun, tasol em i gat sampela wari. Em i tok: “Mi mas lusim ligol rait bilong mi olsem residen bilong Itali, na mi mas lusim tu ol pren na ol famili em ol i stap long Itali.” Maski i olsem, long Me 2016, Gisèle i muv i go bek long Kamarun. Sampela haptaim bihain, em i maritim Léonce, na brens ofis long Kamarun i rekomendim tupela long i go stap long Ayos, em wanpela taun we ol i nidim tru helpim bilong ol pablisa bilong Kingdom.

Laip long Ayos i olsem wanem? Gisèle i tok: “Planti taim i no gat pawa inap sampela wik, na mipela i no inap sasim ol mobail fon bilong mipela. Planti taim ol fon i of na stap nating. Mi lain long wokim paia na kukim kaikai, na long nait mipela i save pusim ol wilbaro na karim ol tos taim mipela i go pulimapim wara bikos long nait i no gat planti manmeri long wara.” Wanem samting i helpim tupela long sanap strong na karim ol hevi? Gisèle i tok: “Mipela i kisim helpim long holi spirit bilong Jehova, gutpela poroman marit, na ol tok bilong strongim mipela na wan wan taim ol famili na ol pren i save givim mani long sapotim mipela.”

Yu ting Gisèle i amamas olsem em i go bek long kantri bilong em? Em i tok: “Yes! Mi amamas tru. Long pastaim i bin gat sampela hatwok na mi bin bel hevi, tasol taim mipela i winim ol dispela hevi, mi na man bilong mi i pilim olsem mipela i mekim samting em mipela i mas mekim. Mipela i trastim Jehova na mipela i go klostu moa long em.” Léonce na Gisèle i go long Skul Bilong Ol Kingdom Evanselis, na nau ol i mekim wok olsem haptaim spesel painia.

Ol man bilong kisim pis ol i save strongim bel maski i gat ol hatwok na bai ol inap kisim planti pis, olsem tasol, ol lain em ol i muv i go bek long kantri bilong ol, ol i redi long daunim laik bilong ol na lusim sampela samting na bai ol inap helpim ol man i gat gutpela bel em ol i amamas long harim gutnius bilong Kingdom. Jehova i no inap lusim tingting long ol dispela pablisa em ol i givim bel long mekim wok na em i amamas long pasin bilong ol long laikim tru nem bilong em. (Neh. 5:19; Hib. 6:10) Sapos yu stap long narapela kantri na yu save olsem i gat bikpela nid long ol pablisa bilong Kingdom long helpim wok autim tok long kantri bilong yu, yu ting yu inap go bek na helpim dispela wok? Sapos yu mekim olsem, yu bai kisim planti blesing.—Prov. 10:22.