1. Jehova i kirapim yumi long mekim wanem pasin?

JEHOVA i tingim gutpela pasin laikim olsem bikpela samting. (Hos. 6:6) Na em i kirapim ol wokman bilong em long holim wankain tingting olsem em. Long rot bilong profet Maika, God bilong yumi i kirapim yumi long “laikim gutpela pasin laikim.” (Mai. 6:8, ftn.) Tasol paslain long yumi ken mekim olsem, yumi mas save long gutpela pasin laikim i makim wanem samting.

2. Wanem sampela pasin i insait long gutpela pasin laikim?

² Gutpela pasin laikim i makim wanem samting? Dispela tok “gutpela pasin laikim” i stap inap olsem 230 taim long Nupela Taim Trenslesen Bilong Ol Skripsa Holi. Em i makim wanem samting? Hap “Dikseneri Bilong Baibel” long dispela Baibel, i stori long ol pasin i insait long gutpela pasin laikim, em “pasin bilong man i givim em yet long narapela, stap gut long narapela, na pas gut tru wantaim narapela i kirapim man long mekim dispela kain pasin laikim. Planti taim Baibel i yusim dispela tok taim em i stori long pasin laikim God i gat long ol manmeri, tasol em pasin laikim tu ol man i soim namel long ol yet.” Jehova em nambawan gutpela eksampel long mekim gutpela pasin laikim. Long dispela atikol, yumi bai stori long hau Jehova i save mekim gutpela pasin laikim long ol manmeri. Na long neks atikol, yumi bai stori long hau yumi ol manmeri bilong God i ken bihainim eksampel bilong Jehova long mekim gutpela pasin laikim long narapela narapela.

3. Olsem wanem Jehova i kamapim klia em yet long Moses?

³ Bihain liklik long lain Israel i lusim Isip, Jehova i kamapim klia nem bilong Em na ol pasin bilong em long Moses. Em i tok: “Jehova, Jehova, em God i gat pasin marimari na pasin sori, em i no save belhat kwik na i pulap tru long gutpela pasin laikim na pasin  i tru, em i save kamapim gutpela pasin laikim long planti tausen lain manmeri, na lusim rong na asua na sin bilong ol.” (Kis. 34:6, 7) Jehova i mekim dispela naispela tok na em i kamapim klia wanpela samting i insait long gutpela pasin laikim bilong em. Em wanem samting?

4-5. (a) Jehova i tok wanem long gutpela pasin laikim bilong em? (b) Yumi bai skelim wanem ol askim?

⁴ Jehova i tok em i save mekim gutpela pasin laikim, na tu, em i tok em “i pulap tru long gutpela pasin laikim.” Dispela tok i stap long Baibel 6-pela taim moa. (Nam. 14:18; Neh. 9:17; Sng. 86:15; 103:8; Jol. 2:13; Jna. 4:2) Long olgeta wan wan bilong ol dispela skripsa, dispela tok i makim Jehova tasol, na i no makim ol manmeri. Planti taim Jehova i mekim kain tok olsem long em yet long Baibel. Yumi luksave olsem gutpela pasin laikim em i bikpela samting long em. * Em as na King Devit i tok: “Jehova, gutpela pasin laikim bilong yu i bikpela tru, mak bilong en i go antap inap long heven . . . God, gutpela pasin laikim bilong yu i dia tumas! Aninit long sedo bilong ol wing bilong yu, ol man i save go na hait.” (Sng. 36:5, 7) Olsem Devit, yumi tu i save pilim tru gutpela pasin laikim bilong God?

⁵ Bilong yumi ken kliagut moa long gutpela pasin laikim i makim wanem samting, yumi bai skelim 2-pela askim: Jehova i save mekim gutpela pasin laikim long husat? Na taim Jehova i mekim gutpela pasin laikim long yumi, olsem wanem dispela i helpim yumi?

6. Jehova i save mekim gutpela pasin laikim long husat?

⁶ Jehova i save mekim gutpela pasin laikim long husat? Baibel i stori long sampela samting em yumi ken laikim, olsem “wok didiman,” “wain na oil,” “tok bilong givim skul,” “save,” na “savetingting.” (2 Sto. 26:10; Prov. 12:1; 21:17; 29:3) Tasol God i no save mekim gutpela pasin laikim long ol samting, nogat, em i mekim gutpela pasin laikim long ol manmeri tasol. Maski i olsem, Jehova i no save mekim gutpela pasin laikim long olgeta kain man, nogat. Em i save mekim dispela pasin long ol manmeri i pas gut wantaim em. God bilong yumi i save stap gut long ol pren bilong em. Em i tingting pinis long samting em bai mekim long ol, na em bai no inap givap long ol.

7. Olsem wanem Jehova i soim pasin laikim long olgeta manmeri?

⁷ Jehova i bin soim pasin laikim long olgeta manmeri. Jisas i bin tokim wanpela man, nem bilong em Nikodemus, olsem: “God i laikim tumas olgeta manmeri bilong graun, olsem na em i givim dispela Pikinini tru bilong em long ol bai olgeta man husat i bilip long em ol inap abrusim  bagarap na kisim laip oltaim.”—Jon 3:1, 16; Mat. 5:44, 45.

8-9. (a) Wai na Jehova i save mekim gutpela pasin laikim long ol wokman bilong em? (b) Yumi bai stori nau long wanem samting?

⁸ Olsem yumi stori pinis, Jehova i save mekim gutpela pasin laikim long ol manmeri i pas gut wantaim em—em ol wokman bilong em. Yumi luksave long dispela samting long tok em King Devit na profet Daniel i bin mekim. Olsem, Devit i tok: “Yu mas wok yet long soim gutpela pasin laikim bilong yu long ol man i save long yu.” “Gutpela pasin laikim bilong Jehova i save stap oltaim oltaim na em i save soim long ol man i pret long em.” Na Daniel i tok: “O Jehova, yu God tru, . . . yu save soim gutpela pasin laikim long ol man i laikim yu na i bihainim ol lo bilong yu.” (Sng. 36:10; 103:17; Dan. 9:4) Olsem ol dispela tok long Baibel i kamapim, Jehova i save mekim gutpela pasin laikim long ol wokman bilong em bikos ol i save long em, pret long em, laikim em, na ol i bihainim ol lo bilong em. Jehova i save mekim gutpela pasin laikim long ol manmeri bilong em, em ol lain i lotu tru long em.

⁹ Paslain long yumi kirap long lotuim Jehova, God i bin soim pasin laikim long yumi olgeta. (Sng. 104:14) Tasol taim yumi stat long lotuim em, yumi kisim helpim tu long gutpela pasin laikim bilong em. Jehova i tokim ol wokman bilong em olsem: “Gutpela pasin laikim bilong mi i no inap tekewe long yu.” (Ais. 54:10) Devit yet i bin ekspiriensim dispela samting, em i tok: “Jehova bai mekim gut long man i save stap gut long em.” (Sng. 4:3) Dispela i mas kirapim yumi long mekim wanem? Man bilong raitim song i tok: “Ol man i gat savetingting bai tingim gut ol dispela samting na ol bai skelim gut wanem ol rot Jehova i save kamapim gutpela pasin laikim bilong em.” (Sng. 107:43) Yumi tingim dispela tok bilong em, na nau yumi bai stori long 3-pela rot we ol wokman bilong Jehova i save kisim helpim long gutpela pasin laikim bilong em.

10. Olsem wanem yumi kisim helpim long gutpela pasin laikim bilong God i save stap oltaim? (Buk Song 31:7)

¹⁰Gutpela pasin laikim bilong God i save stap oltaim. Dispela tok i stap inap olsem 26 taim long Buk Song 136. Long ves 1, em i tok: “Tok tenkyu long Jehova, long wanem, em i gutpela; gutpela pasin laikim bilong em i save stap oltaim  oltaim.” (Sng. 136:1) Long ves 2 i go long ves 26, yumi lukim dispela tok “gutpela pasin laikim bilong em i save stap oltaim oltaim.” Taim yumi ritim ol narapela ves bilong dispela song, yumi kirap nogut long lukim planti rot em Jehova i mekim gutpela pasin laikim, na em i no save stop long mekim olsem. Dispela tok, “gutpela pasin laikim bilong em i save stap oltaim oltaim” i kirapim yumi long save olsem pasin bilong God long laikim ol manmeri bilong em i no save senis. Yumi amamas long save olsem Jehova i no save givap long laikim ol wokman bilong em! Taim em i stat long soim pasin laikim long ol man i lotuim em, em i no inap lusim ol, moa yet long taim ol i karim ol hevi. Hau dispela i helpim yumi: Yumi save olsem Jehova i pas gut wantaim yumi, na dispela i mekim yumi stap amamas na strongim yumi long karim ol hevi na wokabaut yet long rot i go long laip.—Ritim Buk Song 31:7

11. Olsem Buk Song 86:5 i kamapim, wanem samting i kirapim Jehova long fogivim yumi?

¹¹Gutpela pasin laikim bilong God i kirapim em long fogivim yumi. Taim Jehova i lukim olsem wanpela man husat i mekim sin, em i tanim bel na lusim pasin nogut em i mekim, gutpela pasin laikim bilong Jehova bai kirapim em long fogivim dispela man. Man bilong raitim song, Devit i tok long Jehova olsem: “I stret em i mekim save long yumi long ol sin bilong yumi, tasol em i no save mekim olsem, na em inap bekim pe i stret long ol rong bilong yumi, tasol em i no save mekim.” (Sng. 103:8-11) Devit i bin mekim bikpela rong na bel i kotim em tru. Tasol em i kisim skul olsem Jehova i “save redi long fogivim ol sin bilong [yumi].” Wanem samting i kirapim Jehova long fogivim yumi? Bekim i stap long Buk Song 86:5. (Ritim.) Yes, olsem Devit i tok long beten em i mekim, Jehova i save fogivim yumi bikos em i pulap tru long gutpela pasin laikim na em i mekim dispela pasin long ol man i askim em long fogivim ol.

12-13. Sapos bel i kotim yumi na yumi bel hevi long ol rong yumi mekim long bipo, wanem samting bai helpim yumi?

¹² Taim yumi mekim wanpela bikpela rong, yumi save bel hevi, na i stret yumi pilim olsem. Dispela inap kirapim yumi long askim God long fogivim yumi na mekim sampela senis long laip bilong yumi. Tasol sampela wokman bilong God i pilim hatwok long lusim pasin bilong bel hevi long ol rong ol i bin mekim bipo. Ol i ting Jehova i no inap tru long fogivim ol maski ol i askim  em long fogivim ol na ol i lusim ol pasin nogut bilong ol. Sapos yu holim dispela kain tingting, yu inap kisim stretpela tingting taim yu kliagut olsem Jehova i laik tru long mekim gutpela pasin laikim long yu.

¹³Hau dispela i helpim yumi: Maski yumi mekim ol popaia, yumi inap amamas long lotuim Jehova wantaim klinpela maus bilong bel. Yumi inap mekim olsem bikos “blut bilong Jisas, Pikinini bilong em, i rausim olgeta sin bilong yumi na mekim yumi i kamap klin.” (1 Jon 1:7) Sapos yu bel hevi long wanpela popaia yu bin mekim, tingim olsem Jehova i redi, yes, em i laik tru long fogivim wanpela sinman husat i tanim bel tru. Lukim tok Devit i mekim long gutpela pasin laikim bilong God na pasin bilong em long fogivim yumi. Em i tok: “Gutpela pasin laikim bilong em long ol manmeri i save pret long em i bikpela tru, olsem heven i stap antap tru long graun. Hap bilong sankamap i stap longwe tru long hap bilong san i go daun, olsem tasol em i save rausim ol sin bilong yumi i go longwe tru long yumi.” (Sng. 103:11, 12) Tru tumas, Jehova i save redi long “fogivim [man] olgeta.”—Ais. 55:7.

14. Devit i tok wanem long gutpela pasin laikim bilong God i save lukautim yumi?

¹⁴Gutpela pasin laikim bilong God i save lukautim yumi long sait bilong bilip. Devit i beten long Jehova, na em i tok: “Yu ples hait bilong mi; yu bai lukautim mi na ol pen na hevi i no ken daunim mi. Yu raunim mi long singaut bilong amamas long yu kisim bek mi. . . . Man i trastim Jehova, gutpela pasin laikim bilong em bai lukautim em.” (Sng. 32:7, 10) Long taim bilong ol man i raitim Baibel, i gat ol strongpela banis i raunim ol siti na i lukautim ol manmeri long ol birua bilong ol. Olsem tasol, gutpela pasin laikim bilong Jehova i olsem wanpela strongpela banis i lukautim yumi long ol samting we inap bagarapim pasin pren bilong yumi wantaim Em. Gutpela pasin laikim bilong Jehova i kirapim yumi long go klostu long em.—Jer. 31:3.

15. Olsem wanem gutpela pasin laikim bilong Jehova i olsem ples hait na strongpela banis?

¹⁵ Devit i yusim narapela tok piksa bilong stori long olsem wanem God i save lukautim ol manmeri bilong em. Em i tok: “Yu strongpela ples hait bilong mi, na yu God i save mekim gutpela pasin laikim long mi.” Devit i tok moa long Jehova olsem: “Em i save soim gutpela pasin laikim long mi na em i olsem strongpela banis bilong mi, na em i strongpela ples hait bilong mi na man bilong kisim bek mi, em i olsem hap plang bilong mi long pait na Man mi save go long en bilong hait.” (Sng. 59:17; 144:2) Wai na Devit i tok gutpela pasin laikim bilong Jehova i olsem ples hait na strongpela banis? Maski yumi stap long wanem hap bilong graun, sapos yumi stap olsem ol wokman bilong Jehova, em bai lukautim na banisim yumi na bai yumi inap pas gut yet wantaim Em. Dispela wankain tok i stap long Buk Song 91. Man bilong raitim dispela song i tok: “Mi bai tokim Jehova olsem: ‘Yu ples hait bilong mi na yu strongpela banis bilong mi.’” (Sng. 91:1-3, 9, 14) Moses i bin yusim wankain tok piksa i stori long ples hait. (Sng. 90:1, ftn.) Klostu long taim em i dai, Moses i kirapim yumi long tingim dispela naispela tok. Em i tok: “God em i wanpela ples hait bilong bipo bipo yet, oltaim oltaim han bilong em i save sapotim yu.” (Lo 33:27) Dispela tok “oltaim oltaim han bilong em i save sapotim yu” i helpim yumi long kisim wanem save long Jehova?

16. Long wanem 2-pela rot Jehova i save blesim yumi? (Buk Song 136:23)

¹⁶ Taim Jehova i stap olsem Ples Hait bilong yumi, yumi bai pilim seif. Tasol sampela taim, yumi inap bel hevi na i hatwok long daunim bel hevi bilong yumi. Long kain taim olsem, Jehova bai mekim wanem bilong helpim yumi? (Ritim Buk Song 136:23.) Em bai putim 2-pela han bilong em i kam aninit long yumi, na isi isi em  bai apim yumi, na helpim yumi long sanap gen. (Sng. 28:9; 94:18) Hau dispela i helpim yumi: Yumi save olsem oltaim yumi bai kisim helpim long God, na dispela i helpim yumi long tingim 2-pela rot em God i blesim yumi. Namba 1: Yumi gat gutpela ples hait maski yumi stap long wanem hap bilong graun. Namba 2: Gutpela Papa bilong yumi long heven i save tingim tru yumi.

17. God i soim gutpela pasin laikim long yumi, na dispela i kirapim yumi long mekim wanem? (Buk Song 33:18-22)

¹⁷ Olsem yumi bin stori pinis, taim yumi bungim wanpela hevi, yumi ken bilip tru olsem Jehova bai helpim yumi long pas gut yet wantaim em. (2 Kor. 4:7-9) Profet Jeremaia i tok: “Jehova i gat gutpela pasin laikim, olsem na yumi no bagarap olgeta, pasin marimari bilong em i no inap pinis.” (Kra. 3:22) Yumi ken bilip tru olsem Jehova bai mekim gutpela pasin laikim long yumi bikos man bilong raitim song i tok: “Ai bilong Jehova i save lukluk long ol manmeri i pret long em, em ol manmeri i wet long em i soim gutpela pasin laikim bilong em long ol.”—Ritim Buk Song 33:18-22.

18-19. (a) Yumi mas tingim wanem samting? (b) Yumi bai skelim wanem samting long neks atikol?

¹⁸ Yumi mas tingim wanem samting? Paslain long yumi stat long lotuim Jehova, em i bin mekim pasin laikim long yumi olgeta man. Tasol taim yumi stat long lotuim em, nau yumi kisim helpim long gutpela pasin laikim bilong em. Gutpela pasin laikim bilong Jehova i kirapim em long lukautim yumi long strongpela han bilong em. Oltaim em bai stap klostu long yumi na em bai inapim samting em i tingting pinis long mekim long yumi. Em i laik bai yumi mas i stap gut long em! (Sng. 46:1, 2, 7) Olsem na maski yumi karim wanem ol hevi, Jehova bai givim yumi strong yumi nidim bilong helpim yumi long stap gut yet long em.

¹⁹ Yumi luksave long hau Jehova i soim gutpela pasin laikim long ol wokman bilong em. Na em i laik bai yumi tu i soim gutpela pasin laikim long narapela narapela. Olsem wanem yumi ken mekim olsem? Neks atikol bai stori gut long dispela.