1-2. (a) Wai na ol nupela marit i mas trastim Jehova? (Buk Song 37:3, 4) (b) Bai yumi stori long wanem samting long dispela atikol?

OLSEM WANEM? Yu redi nau long marit, o yu marit i no longtaim i go pinis? Sapos olsem, yu amamas na luk fowed long laip bilong yu wantaim poroman yu laikim tru. Tru, marit i gat ol hatwok bilong en, na i gat ol bikpela disisen yu mas mekim. Pasin yu bihainim bilong daunim ol dispela hatwok na ol disisen yu mekim bai mekim sampela samting long amamas bilong yutupela olsem marit insait long ol yia i kam. Sapos yu wetim Jehova i helpim yu, yu bai mekim ol gutpela disisen na marit bilong yu bai stap strong na stap amamas. Sapos yu no bihainim tingting bilong God, yu bai bungim ol hevi na dispela bai mekim na marit bilong yu i no inap stap amamas.—Ritim Buk Song 37:3, 4.

² Maski dispela atikol i bilong helpim ol nupela marit, em bai stori long ol hatwok em olgeta marit inap bungim. Na tu, em bai stori long skul yumi ken kisim long eksampel bilong ol gutpela bilipman na bilipmeri long Baibel. Ol dispela eksampel long Baibel bai skulim yumi long ol lesen yumi ken bihainim long ol samting long laip bilong yumi, na long marit tu. Yumi ken skelim tu stori bilong sampela marit Kristen long nau em yumi ken bihainim eksampel bilong ol.

3-4. Ol nupela marit inap bungim wanem ol hatwok?

³ Sampela inap kirapim tupela nupela marit long livim nomol laip. Olsem, ol papamama na ol narapela wanblut inap kirapim tupela long stat long kamapim pikinini hariap. O ol gutpela pren na ol wanfamili inap kirapim tupela nupela marit long baim haus na pulapim wantaim ol naispela samting.

⁴ Sapos tupela i no was gut, tupela inap baim planti samting long loun na nau ol i gat bikpela dinau long bekim. Bihain tupela i mas wok planti aua bilong bekim ol dispela dinau. Wok mani inap kisim haptaim em ol bai lusim long mekim pesenel Baibel stadi, famili lotu, na wok autim tok. Ating tupela i lusim ol miting bikos ol i mas wok bilong kisim ekstra mani o bilong ol i ken holim yet wok mani bilong ol. Dispela i mekim na nau ol i lus long mekim ol gutpela wok bilong Jehova.

5. Yu kisim wanem skul long stori bilong Klaus na Marisa?

⁵ Ol ekspiriens i soim olsem taim ol marit i putim tingting olgeta long bungim mani kago, ol i no save stap amamas. Skelim samting em tupela marit, Klaus na Marisa i lainim taim ol i mekim olsem. * Taim ol i marit nupela, tupela wantaim i wok mani fultaim bambai ol i ken gat gutpela sindaun. Tasol tru tru long bel, ol i no stap amamas tru. Klaus i tok: “Mipela i gat planti mani kago samting winim ol samting mipela i nidim, tasol long sait bilong bilip, mipela i no putim ol mak bilong winim. Tru tru, laip i pulap long planti hevi na i givim hatwok tru long mipela.” Ating yu tu i luksave olsem taim yu putim tingting olgeta long bungim mani kago, dispela i mekim na yu no stap amamas. Sapos olsem, no ken bel hevi. Taim yu skelim eksampel bilong ol narapela long dispela sait, dispela i ken helpim yu. Namba 1, yumi ken skelim samting em ol man marit i ken lainim long King Jehosafat.

6. Olsem savetok i stap long Provep 3:5, 6 i kamapim, King Jehosafat i mekim wanem bilong karim wanpela bikpela hevi?

⁶ Yupela ol man marit, sampela taim yupela i pilim olsem yupela gat planti wok tumas? Sapos olsem, yu ken kisim helpim long eksampel bilong King Jehosafat. Jehosafat em i king na em i gat wok long lukautim kantri olgeta long stap gut! Hau em i mekim dispela bikpela wok tru? Jehosafat i mekim ol wok em i mas mekim bilong lukautim ol manmeri i stap aninit long em. Em i strongim ol taun bilong Juda na em i bungim bikpela lain ami i gat winim 1,160,000 soldia long en. (2 Sto. 17:12-19) Tasol bihain, Jehosafat i bungim wanpela bikpela hevi. Bikpela lain ami bilong lain Amon, Moap, na ol man bilong ol ples maunten bilong Seir i tok long kam pait long em, long famili bilong em, na long ol manmeri bilong em. (2 Sto. 20:1, 2) Jehosafat i mekim wanem? Em i askim Jehova long helpim em na strongim em. Dispela samting em i mekim i stret wantaim savetok i stap long Provep 3:5, 6. (Ritim.) Long pasin daun,  Jehosafat i beten long Jehova na beten bilong em i stap long 2 Stori 20:5-12, na i kamapim klia pasin bilong em long trastim tru gutpela Papa bilong em long heven. Jehova i mekim wanem bilong bekim beten bilong Jehosafat?

7. Jehova i mekim wanem bilong bekim beten bilong Jehosafat?

⁷ Jehova i toktok long Jehosafat long rot bilong wanpela Livai, nem bilong em Jahasiel. Jehova i tok: “Yupela i mas kisim ples bilong yupela, na sanap tasol, na lukim Jehova i kisim bek yupela.” (2 Sto. 20:13-17) Dispela em i no hau ol i save mekim pait! Tasol ol dispela tok i no kam long wanpela man bilong graun, nogat, ol dispela tok i kam long Jehova. Jehosafat i trastim tru God bilong em na mekim olsem God i tokim em long en. Taim em na ol manmeri i go bilong bungim ol birua, em i no putim ol soldia long fran, nogat, em i putim ol man bilong singsing long fran—em ol man i no gat ol samting bilong pait. Jehova i truim tok promis em i mekim long Jehosafat; Em i daunim ami bilong ol birua.—2 Sto. 20:18-23.

8. Ol man marit i ken kisim wanem skul long eksampel bilong Jehosafat?

⁸ Yupela ol man marit, yupela i ken kisim skul long eksampel bilong Jehosafat. Yu gat wok long lukautim famili bilong yu, olsem na yu wok strong long protektim na sapotim famili bilong yu. Taim yu bungim ol hevi, yu inap pilim olsem yu gat ol samting inap long yu yet i ken karim ol hevi. Tasol sakim dispela laik bilong bilip long strong bilong yu yet. I gutpela yu beten long Jehova taim yu stap wanpis na askim em long helpim yu. Na tu, beten wantaim meri bilong yu. Na kisim ol tok i kam long Jehova long rot bilong stadi long Baibel na ol pablikesen bilong Baibel em oganaisesen bilong God i kamapim, na bihainim ol tok yu lainim. Ol narapela bai i no wanbel long ol disisen yu mekim em Baibel i as bilong en, na ating ol bai tokim yu olsem yu mekim longlong pasin. Ol inap tokim yu olsem mani na ol samting mani inap baim, ol i bilong lukautim gut famili bilong yu. Tasol tingim eksampel bilong Jehosafat. Em i trastim Jehova na mekim ol samting bilong soim klia dispela samting. Jehova i no bin lusim dispela man i stap gut long em, na em i no inap lusim yu tu. (Sng. 37:28; Hib. 13:5) Ol marit i ken mekim wanem na bai ol i ken stap amamas wantaim olsem marit?

9. Yumi ken tok wanem long profet Aisaia na meri bilong em?

⁹ Profet Aisaia na meri bilong em i putim tingting olgeta long mekim wok bilong Jehova. Aisaia em i profet, na ating meri bilong em tu i mekim wok profet, long wanem, Baibel i kolim em olsem “profet meri.” (Ais. 8:1-4) Olsem marit, i klia tru olsem Aisaia na meri bilong em i putim tingting olgeta long mekim wok bilong Jehova. Ol i stap gutpela eksampel tru long ol marit long nau!

10. Taim ol marit i stadi long ol tok profet bilong Baibel, olsem wanem dispela bai helpim ol long tingting strong long mekim bikpela wok moa bilong Jehova?

¹⁰ Ol marit long nau i ken bihainim pasin bilong Aisaia na meri bilong em long putim tingting olgeta long mekim olgeta kain wok bilong Jehova. Ol i ken strongim pasin bilong ol long trastim Jehova long rot bilong stadi wantaim long ol tok profet bilong Baibel, na lukim hau ol dispela tok profet i save kamap tru long olgeta taim. * (Tai. 1:2) Ol i ken tingim samting ol i mekim bilong truim sampela tok profet bilong Baibel. Olsem, ol i insait long truim dispela tok profet bilong Jisas olsem ol bai autim gutnius long olgeta hap bilong graun paslain long pinis  i kam. (Mat. 24:14) Taim tupela marit i save tru olsem truim bilong ol tok profet i wok long kamap tru, ol bai tingting strong moa long mekim planti wok moa bilong Jehova.

11. Prisila na Akwila i bin mekim wanem, na bilong wanem?

¹¹ Ol yangpela marit i ken kisim skul long Prisila na Akwila, em tupela marit Juda i save stap long biktaun Rom. Ol i harim gutnius i stori long Jisas na ol i kamap Kristen. I klia tru olsem ol i amamas long sindaun bilong ol. Tasol sori tru, laip bilong ol i senis olgeta taim Empera Klodius i tokaut olsem olgeta Juda i mas lusim Rom. Skelim samting dispela i mekim long Akwila na Prisila. Ol i mas lusim ples ol i save gut long en, na wokim nupela haus, na kirapim gen wok bisnis bilong wokim haus sel long nupela lokesen. Olsem wanem? Dispela nupela senis long sindaun bilong ol i mekim na ol i no givim bel olgeta long mekim wok bilong Kingdom? Ating yu save long bekim bilong dispela askim. Long nupela haus bilong ol long Korin, Akwila na Prisila i bung wantaim kongrigesen long dispela hap na ol i wok gut wantaim aposel Pol long strongim ol bratasista long hap. Bihain ol i go sindaun long ol narapela taun we i gat nid long ol man bilong autim tok. (Apo. 18:18-21; Rom 16:3-5) Tupela i amamas long mekim planti gutpela wok wantaim na laip bilong ol i gat as tru bilong en!

12. Wai na tupela marit i mas putim ol mak bilong bilip ol i laik winim?

¹² Ol marit long nau i ken bihainim pasin bilong Prisila na Akwila long rot bilong putim wok bilong Kingdom i stap nambawan. Gutpela taim bilong ol marit long toktok long ol mak ol i laik winim long laip bilong ol em taim ol i pren, paslain long ol i marit. Taim tupela marit i mekim ol disisen wantaim na wok strong long winim ol mak long sait bilong bilip, dispela i opim rot long ol inap kisim planti helpim i kam long Jehova. (Ekl. 4:9, 12) Skelim stori bilong Russell na Elizabeth. Russell i tok: “Long taim mitupela i pren, planti taim mipela i stori long ol mak bilong bilip mipela i laik winim.” Elizabeth i tok: “Mipela i stori long ol dispela samting, na bai bihain, taim mipela i mas mekim sampela bikpela disisen, mipela i laik bai ol disisen bilong mipela i no ken pasim mipela long  winim ol dispela mak.” Sindaun bilong Russell na Elizabeth i opim rot long ol inap muv i go stap long Maikronisia, na helpim wok autim tok long dispela hap i sot tru long ol pablisa.

13. Olsem Buk Song 28:7 i kamapim, wanem samting bai kamap taim yumi trastim Jehova?

¹³ Olsem Russell na Elizabeth, planti marit i mekim disisen long lusim bikpela haptaim long mekim wok autim tok na skulim ol man, na ol i no lusim bikpela haptaim nating long mekim ol narapela samting. Taim tupela marit i putim ol gutpela mak long wok bilong Jehova na wok wantaim long winim ol dispela mak, gutpela samting i save kamap long dispela. Ol bai lukim olsem Jehova i lukautim ol gut, na dispela bai strongim pasin bilong ol long trastim em, na ol bai stap amamas tru.—Ritim Buk Song 28:7.

14. Olsem wanem aposel Pita na meri bilong em i soim olsem ol i bilip long tok promis i stap long Matyu 6:25, 31-34?

¹⁴ Ol marit i ken kisim skul long eksampel bilong aposel Pita na meri bilong em. Winim 6-pela mun bihain long aposel Pita i bungim Jisas long namba 1 taim, Pita i mas mekim wanpela bikpela disisen. Pita i save mekim wok bisnis long kisim pis bilong lukautim famili bilong em. So taim Jisas i singautim Pita long kam bihainim em fultaim, Pita i mas skelim gut ol samting long sindaun bilong famili bilong em. (Luk 5:1-11) Pita i makim olsem em i laik go mekim wok autim tok wantaim Jisas. Em i mekim gutpela disisen! Na i gat gutpela risen na yumi ken tok olsem meri bilong Pita i sapotim disisen bilong em. Baibel i tok olsem bihain long Jisas i kirap bek, meri bilong Pita i bin raun wantaim Pita inap sampela haptaim. (1 Kor. 9:5) I klia tru olsem, pasin bilong em long stap gutpela meri marit Kristen i mekim na em i isi long Pita i mekim ol tok i go long ol man marit na ol meri marit Kristen. (1 Pita 3:1-7) Dispela i soim klia olsem Pita na meri bilong em i bilip long promis bilong Jehova olsem em bai lukautim ol sapos ol i putim Kingdom i stap nambawan samting long laip bilong ol.—Ritim Matyu 6:25, 31-34.

15. Yu lainim wanem samting long stori bilong Tiago na Esther?

¹⁵ Sapos yu bin marit inap sampela yia nau, olsem wanem yu ken kisim yet laik bilong mekim bikpela wok moa bilong Jehova? Wanpela rot em long lukim eksampel bilong ol narapela marit. Olsem, yu ken ritim ol atikol siris: “Ol i Amamas Long Givim Ol Yet.” Ol kain atikol olsem i bin helpim tupela marit long Brasil, em Tiago na Esther, long i gat laik tru long helpim wok long hap i sot long ol pablisa. Tiago i tok: “Taim mipela i ritim ol ekspiriens long hau Jehova i helpim ol wokman bilong em long nau, mipela tu i laik pilim han bilong Jehova i stiaim mipela na lukautim mipela.” Ol i muv i go sindaun long Paragwai, na ol i helpim wok autim tok long tokples Potugal kirap long 2014 i kam inap long nau. Esther i tok: “Wanpela ves mitupela i laikim tru em tok bilong Efesus 3:20. Planti taim, mipela i lukim truim bilong dispela tok long wok bilong Jehova mipela i mekim.” Long dispela pas i go long ol Efesus, aposel Pol i tok promis olsem Jehova bai givim yumi ol samting winim ol samting yumi askim long en. Dispela promis em i tru olgeta!

16. Ol yangpela marit i ken kisim edvais long husat taim ol i skelim gen ol mak ol i laik winim?

¹⁶ Ol yangpela marit long nau i ken kisim helpim long ekspiriens bilong ol narapela husat i lain long wetim Jehova i helpim ol. Sampela marit i bin lusim planti yia long mekim wok bilong Jehova fultaim. I gutpela yu askim ol long sampela edvais sapos yu pilim olsem yu laik  skelim gen ol mak yu putim bilong winim. Dispela em narapela rot bilong soim olsem yu trastim Jehova. (Prov. 22:17, 19) Ol elda i ken helpim ol yangpela marit long putim na winim ol mak bilong bilip.

17. (a) Wanem samting i kamap long Klaus na Marisa? (b) Yu kisim wanem skul long stori bilong ol?

¹⁷ Sampela taim, ol disisen bilong yumi i no inap kamapim ol gutpela samting olsem yumi ting long en. Tingim stori bilong Klaus na Marisa, em yumi stori long ol long kirap bilong dispela atikol. Ol i bin marit inap 3-pela yia, na bihain long en ol i lusim haus bilong ol na volantia long mekim wok konstraksen long Finlan brens. Tasol ol i kisim save olsem, ol i no kisim tok orait long stap long dispela hap winim 6-pela mun. Pastaim ol i hevi. Tasol bihain ol samting i senis, tupela i kisim invatesen bilong go long wanpela klas bilong lainim tokples Arab, nau ol i amamas long autim tok long tokples Arab long narapela kantri. Marisa i tingim bek na em i tok: “Mi bin pret long lusim haus na sindaun bilong mipela na trastim Jehova na lusim mipela yet long han bilong em. Tasol mi lukim olsem oltaim Jehova i lukautim mipela long ol rot mipela i no ting long en. Taim mi lukim dispela samting i kamap long mipela, pasin bilong mi long trastim Jehova i kamap strong moa.” Olsem dispela stori i kamapim, yu ken save tru olsem oltaim Jehova bai givim gutpela pe long yu taim yu trastim em tru.

18. Ol marit i ken mekim wanem bambai ol i ken wok yet long trastim Jehova?

¹⁸ Marit em presen i kam long Jehova. (Mat. 19:5, 6) Em i laik ol marit i amamas long dispela presen. (Prov. 5:18) Ol yangpela marit, skelim wanem samting yupela i mekim long laip bilong yupela. Yu mekim olgeta samting bilong soim olsem yu amamas long ol presen Jehova i givim long yu? Toktok wantaim Jehova long beten. Ritim Tok Bilong Em na painim ol stiatok i stret long sindaun bilong yu. Na bihainim ol edvais Jehova i givim long yu. Yu ken save tru olsem, sapos yu putim tingting olgeta long mekim wok bilong Jehova, marit bilong yu bai stap amamas na i gat as tru bilong en!