1. Dispela tok holimpas gutpela tingting i makim wanem samting? (2 Timoti 4:5)

 TAIM yumi bungim ol hevi, dispela inap traim pasin bilong yumi long stap gut long Jehova na long oganaisesen bilong em. Olsem wanem yumi ken winim ol dispela hevi? Yumi mas holimpas gutpela tingting, was i stap, na sanap strong long bilip. (Ritim 2 Timoti 4:5.) Yumi holimpas gutpela tingting long rot bilong stap isi, wokim gut tingting, na wok strong long holim wankain tingting olsem bilong Jehova long ol samting. Taim yumi mekim olsem, ol samting yumi pilim long bel i no inap stiaim tingting bilong yumi.

2. Yumi bai stori long wanem samting long dispela atikol?

² Long atikol i go pinis, yumi bin stori long 3-pela hevi em yumi inap bungim long han bilong ol lain em ol i no Witnes. Long dispela atikol, yumi bai stori long 3-pela hevi em yumi inap bungim insait long kongrigesen we inap traim pasin bilong yumi long stap gut long Jehova. Em (1) taim yumi pilim olsem wanpela wanbilip Kristen i rongim yumi, (2) taim yumi kisim tok bilong stretim yumi, na (3) taim yumi hatwok long bihainim ol senis insait long oganaisesen. Olsem wanem yumi inap holimpas gutpela tingting na stap gut yet long Jehova na long oganaisesen bilong em taim yumi bungim ol kain hevi olsem?

3. Yumi inap mekim wanem sapos yumi pilim olsem wanpela wanbilip Kristen i rongim yumi?

³ Olsem wanem? Wanpela taim yu bin pilim olsem wanpela wanbilip Kristen, ating wanpela i holim wok insait long kongrigesen i rongim yu? Ating dispela brata i no min long bagarapim bel bilong yu. (Rom 3:23; Jems 3:2) Maski i olsem, ating pasin bilong em i bagarapim bel bilong yu. Ating yu tingting planti long dispela samting na yu no slip gut long nait. Na ating yu inap tingting olsem,  ‘Sapos wanpela brata inap mekim kain pasin olsem, orait dispela em oganaisesen tru bilong God o nogat?’ Dispela em tingting Satan i laik bai yumi kisim. (2 Kor. 2:11) Kain tingting kranki olsem inap mekim yumi i go longwe long Jehova na long oganaisesen bilong em. Olsem na sapos yumi pilim olsem wanpela brata o sista i rongim yumi, orait hau yumi ken holimpas gutpela tingting na sakim tingting kranki?

4. (a) Hau Josep i holimpas gutpela tingting taim ol bikpela brata bilong em i rongim em? (b) Yumi inap kisim wanem skul long eksampel bilong em? (Stat 50:19-21)

⁴ No ken bel nogut. Taim Josep i tineja, ol bikpela brata bilong em i rongim em. Ol i heitim em, na sampela bilong ol i laik kilim em i dai. (Stt. 37:4, 18-22) I no longtaim, ol i salim em olsem wanpela wokboi nating. Kirap long dispela taim na i go, Josep i karim ol bikpela hevi inap olsem 13-pela yia. Ating Josep inap ting olsem Jehova i no laikim em. Na em inap kisim tingting olsem ating Jehova i lusim em pinis long dispela taim em i nidim tru helpim. Tasol Josep i no bel nogut. Em i holimpas gutpela tingting long rot bilong stap isi. Taim rot i op long Josep i bekim rong bilong ol brata bilong em, em i no mekim olsem, nogat. Em i mekim pasin laikim long ol na em i fogivim ol. (Stt. 45:4, 5) Josep i mekim kain pasin bikos em i wokim gut tingting. Em i no putim tingting long ol hevi bilong em, nogat. Em i tingim bikpela samting, em laik bilong Jehova. (Ritim Stat 50:19-21.) Yumi kisim wanem skul long dispela? Sapos wanpela i rongim yu, no ken bel nogut long Jehova o kisim tingting olsem em i lusim yu pinis, nogat. Yu mas tingim tingim long bel hau em i wok long helpim yu long sanap strong na karim dispela hevi. Na tu, taim ol narapela i rongim yu, mekim pasin laikim long ol na larim dispela i karamapim rong ol i mekim long yu.​—1 Pita 4:8.   

5. Olsem wanem Miqueas i holimpas gutpela tingting taim em i pilim olsem ol narapela i rongim em?

⁵ Tingim ekspiriens bilong wanpela elda long Saut Amerika, nem bilong em Miqueas. b Em i tingim wanpela taim we em i pilim olsem ol brata i mekim wok insait long kongrigesen i mekim hatpela pasin long em. Em i tok: “Mi no bin pilim dispela kain presa bipo. Mi pret nogut tru. Mi hatwok long slip long nait, na mi krai na mi pilim olsem mi no gat helpim.” Maski i olsem, Miqueas i holimpas gutpela tingting na wok strong long bosim ol samting em i pilim long bel. Planti taim em i beten na askim Jehova long givim em holi spirit na strong long karim dispela hevi. Na tu, em i mekim wok painimaut long ol pablikesen bilong yumi we inap helpim em. Yumi kisim wanem skul long dispela? Sapos yu pilim olsem wanpela brata o sista i rongim yu, stap isi na traim long bosim bel bilong yu na daunim ol tingting kranki em yu inap kisim. Ating yu no save long wanem samting tru i bin kirapim dispela brata o sista long mekim kain tok o pasin olsem. So toktok long Jehova long rot bilong beten, na askim em long helpim yu long holim wankain tingting olsem dispela brata o sista long samting i kamap. Taim yu mekim olsem, dispela inap helpim yu long tingim olsem dispela brata o sista i no min long rongim yu, na bai yu fogivim em. (Prov. 19:11) Tingim olsem, Jehova i save long hevi yu karim na em bai givim yu strong em yu nidim bilong sanap strong na karim dispela hevi.​—2 Sto. 16:9; Ekl. 5:8.

6. Wai na em i bikpela samting long yumi tingim olsem taim Jehova i stretim yumi, dispela i kamapim pasin laikim bilong em? (Hibru 12:5, 6, 11)

⁶ Taim Jehova i stretim yumi, dispela inap mekim bel bilong yumi i hevi tru. Tasol sapos yumi tingting tasol long pen dispela bel hevi i kamapim, yumi inap kisim tingting olsem i no stret long yumi kisim dispela tok kaunsel o em i strongpela tok tumas. Taim yumi mekim  olsem, dispela inap pasim yumi long luksave long wanpela bikpela samting—olsem dispela tok bilong stretim yumi i kamapim pasin laikim bilong Jehova long yumi. (Ritim Hibru 12:5, 6, 11.) Na sapos yumi larim ol samting yumi pilim long bel i bosim yumi, yumi opim rot long Satan i bagarapim tru bel na tingting bilong yumi. Em i laik bai yumi sakim tok bilong stretim yumi, na moa yet, em i laik bai yumi go longwe moa long Jehova na long kongrigesen. Sapos yu bin kisim tok bilong stretim yu, olsem wanem yu ken holimpas gutpela tingting?

7. (a) Olsem piksa i soim, long wanem rot Jehova i yusim Pita bihain long em i kisim tok bilong stretim em? (b) Yu kisim wanem skul long eksampel bilong Pita?

⁷ Kisim tok bilong stretim yu na mekim ol senis em yu mas mekim. Planti taim Jisas i stretim Pita long ai bilong ol narapela aposel. (Mak 8:33; Luk 22:31-34) Ating dispela i semim em tru! Tasol Pita i stap gut yet long Jisas. Em i kisim tok bilong stretim em na em i kisim skul long ol popaia bilong em. Olsem na Jehova i blesim pasin bilong Pita long stap gut long em na em i givim ol bikpela wok long em insait long kongrigesen. (Jon 21:15-17; Apo. 10:24-33; 1 Pita 1:1) Yumi kisim wanem skul long eksampel bilong Pita? Taim yumi no sem long kisim tok bilong stretim yumi na yumi bihainim dispela tok, na mekim ol senis em yumi mas mekim, dispela pasin i helpim yumi yet, na tu, em i helpim ol narapela. Taim yumi mekim olsem, yumi inap stap olsem gutpela tul long han bilong Jehova na ol brata bilong yumi.

8-9. (a) Pastaim Bernardo i pilim olsem wanem taim em i kisim tok bilong stretim em? (b) Wanem samting i helpim em long stretim tingting bilong em?

⁸ Tingim samting i kamap long Bernardo, em wanpela brata long Mosambik. Ol i pinisim em long wok elda bilong em. Pastaim Bernardo i pilim olsem wanem? Em i tok: “Mi bel nogut bikos mi no laikim tok mi kisim bilong stretim mi.” Em i tingting planti long ol narapela long kongrigesen inap i gat wanem tingting long em. Em i tok: “Sampela mun i lus long mi holim stretpela tingting long samting i kamap na long trastim gen Jehova na oganaisesen bilong em.” Wanem samting i helpim Bernardo long holim stretpela tingting?

⁹ Bernardo i stretim tingting bilong em. Em i tok: “Taim mi bin mekim wok elda, mi save yusim Hibru 12:7 long helpim ol narapela long holim stretpela tingting taim Jehova i stretim ol. Nau mi askim mi yet, ‘Husat i mas bihainim dispela skripsa?’ Olgeta wokman bilong Jehova, na mi tu.” Na Bernardo i mekim sampela samting  moa bilong strongim gen pasin bilong em long trastim Jehova na oganaisesen bilong Em. Em i kamap gutpela moa long pasin bilong em long ritim Baibel na tingim tingim gut ol tok long bel. Maski em i tingting planti yet long wanem tingting ol bratasista inap i gat long em, em i autim tok wantaim ol na insait long bekim tok long ol miting bilong kongrigesen. I no longtaim, ol i makim Bernardo long stap gen olsem wanpela elda. Olsem Bernardo, sapos yu bin kisim tok bilong stretim yu, no ken tingting tumas long sem yu pilim, redi long kisim dispela tok bilong stretim yu, na mekim ol senis em yu mas mekim. c (Prov. 8:33; 22:4) Taim yu mekim olsem, yu ken save tru olsem Jehova bai blesim pasin bilong yu long stap gut long em na long oganaisesen bilong em.

10. Wanem senis i kamap long oganaisesen na ating dispela i traim pasin bilong sampela man Israel long stap gut long God?

¹⁰ Taim ol senis i kamap insait long oganaisesen, dispela inap traim pasin bilong yumi long stap gut long God. Sapos yumi no was gut, yumi inap larim ol dispela senis i mekim yumi i go longwe long Jehova. Olsem, aninit long Lo Bilong Moses wanpela senis i kamap insait long oganaisesen na ating dispela i mekim sampela samting long ol Israel. Paslain long God i givim Lo long ol, ol het bilong famili i save mekim ol wok em ol pris i save mekim. Ol i save wokim ol alta na makim maus bilong famili bilong ol na mekim ofa long Jehova. (Stt. 8:20, 21; 12:7; 26:25; 35:1, 6, 7; Jop 1:5) Tasol taim God i kamapim Lo, ol het bilong famili i mas lusim dispela wok. Jehova i makim ol pris long lain famili bilong Aron long mekim ol sakrifais. Kirap long dispela taim na i go, sapos wanpela het bilong famili husat i no bilong lain famili bilong Aron i mekim wok olsem wanpela pris i save mekim, ol inap kilim em i dai. d (Wkp. 17:3-6, 8, 9) Yu ting dispela senis em wanpela risen na Kora, Datan, Abiram, na 250 hetman i salensim wok bos bilong Moses na Aron? (Nam. 16:1-3) Yumi no save. Tasol Kora na ol man i sapotim em, ol i no stap gut long Jehova. Sapos ol senis i kamap long oganaisesen na dispela i traim pasin bilong yu long stap gut long God, orait yu ken mekim wanem?

11. Yumi kisim wanem skul long eksampel bilong sampela Kohat bilong lain Livai?

¹¹ Sapotim gut ol senis i kamap insait long oganaisesen. Taim lain Israel i raun long ples drai nating, lain Kohat i mekim wanpela spesel wok tru. Long olgeta taim lain Israel i go wokim kem long narapela hap, sampela lain Kohat i save karim Bokis Kontrak i go pas long ol manmeri. (Nam. 3:29, 31; 10:33; Jos. 3:2-4) Em wanpela blesing tru! Tasol wok bilong ol i senis taim lain Israel i go sindaun long Graun Bilong Promis. Nau i no gat wok moa long ol i karim Bokis Kontrak. So long taim Solomon i mekim wok king, sampela lain Kohat i mekim wok olsem ol singa, ol wasman bilong geit, na ol narapela i mekim wok bilong lukautim ol bakstua. (1 Sto. 6:31-33; 26:1, 24) Baibel i no stori liklik olsem lain Kohat i komplein o ol i laik kisim wanpela wok i gat biknem bikos ol i bin mekim spesel wok tru long bipo, nogat. Yumi kisim wanem skul long dispela? Yumi mas givim bel tru long sapotim ol senis em oganaisesen bilong Jehova i mekim, dispela i makim tu sapos senis i kamap long asainmen bilong yu. Kisim amamas long wanem asainmen yu kisim. Tingim, asainmen bilong yu i  no mekim na Jehova i tingim yu olsem samting i dia tumas, nogat. Jehova i tingim pasin bilong yu long bihainim tok i bikpela samting moa winim olgeta kain asainmen.​—1 Sml. 15:22.

12. Zaina i pilim olsem wanem taim senis i kamap long asainmen bilong em long Betel?

¹² Tingim eksampel bilong Zaina, em wanpela sista long Midel Is, senis i kamap long asainmen bilong em na em i mas lusim asainmen em i laikim tru. Em i mekim wok long Betel winim 23 yia na nau em i mas go bek long fil na sapotim kongrigesen long autim tok. Em i tok: “Mi kirap nogut tru taim dispela senis i kamap long asainmen bilong mi. Mi pilim yusles na mi wok long askim mi yet, ‘Mi mekim wanem rong?’” Sori tru, sampela brata na sista long kongrigesen i mekim bel hevi bilong em i go bikpela moa taim ol i tokim em olsem: “Sapos yu bin mekim gut wok bilong yu, oganaisesen i no inap larim yu go.” Inap sampela haptaim, Zaina i bel hevi tru na long olgeta nait em i krai. Tasol em i tok: “Mi no larim dispela i mekim mi holim tupela tingting long oganaisesen o long pasin laikim bilong Jehova.” Olsem wanem Zaina i holimpas gutpela tingting?

13. Zaina i mekim wanem bilong daunim bel hevi bilong em?

¹³ Zaina i daunim bel hevi bilong em. Hau em i mekim olsem? Em i ritim ol atikol long ol pablikesen bilong yumi we i stori long hevi em i karim. Atikol “Yu Inap Daunim Bel Hevi!” long Wastaua bilong Februeri 1, 2001, i helpim em tru. Dispela atikol i stori long samting em Mak, em man bilong raitim Baibel, i pilim taim senis i kamap long asainmen bilong em. Zaina i tok: “Eksampel bilong Mak em olsem marasin mi nidim bilong daunim bel hevi bilong mi.” Na tu, Zaina i pas gut wantaim ol pren bilong em. Em i no stap em yet o pilim sore long em yet na larim dispela i daunim em, nogat. Em i tingim olsem holi spirit bilong Jehova i stiaim oganaisesen bilong Em, na ol man i go pas long en i tingim em tru. Tasol em i luksave tu olsem oganaisesen bilong God i mas mekim samting em i mas mekim bilong inapim wok bilong Jehova.

14. Vlado i hatwok long bihainim wanem senis i kamap long oganaisesen, na wanem samting i helpim em?

¹⁴ Vlado, em wanpela elda i gat 73 krismas na em i stap long Slovenia, em i pilim hatwok taim ol i bungim kongrigesen bilong em wantaim narapela kongrigesen, na Haus Kingdom we em i save go long en ol i pasim. Em i tok: “Mi no save wai na ol i pasim dispela gutpela Haus Kingdom. Mi pilim bel hevi bikos i no longtaim i go pinis mipela i bin stretim gen dispela Haus Kingdom.  Mi wanpela kapenta, na mi bin wokim sampela bilong ol sia na tebol samting insait long dispela Haus Kingdom. Na tu, dispela senis i mekim na mipela ol lapun pablisa i mas mekim planti senis, na dispela em i no isi.” Wanem samting i helpim Vlado long sapotim dispela daireksen? Em i tok: “Pasin bilong bihainim senis i kamap insait long oganaisesen bilong Jehova, oltaim dispela i save bringim ol blesing. Ol dispela senis i redim yumi long ol bikpela senis bai kamap long bihain.” Olsem wanem? Yu pilim hatwok long bihainim senis i kamap taim ol i bungim tupela kongrigesen wantaim o senis i kamap long asainmen bilong yu? Yu ken save tru olsem Jehova i kliagut long hau yu pilim. Taim yu sapotim gut kain ol senis olsem na stap gut long Jehova na long oganaisesen em i yusim, em bai blesim yu.​—Sng. 18:25.   

15. Hau yumi ken holimpas gutpela tingting taim yumi bungim ol hevi insait long kongrigesen?

¹⁵ Yumi wok long i go klostu moa long pinis bilong dispela haptaim, olsem na yumi ken save olsem yumi bai bungim ol hevi insait long kongrigesen. Ol dispela hevi inap traim pasin bilong yumi long stap gut long Jehova. So yumi mas holimpas gutpela tingting. Sapos yu pilim olsem wanpela wanbilip Kristen i rongim yu, no ken larim dispela i mekim yu bel nogut. Sapos yu kisim tok bilong stretim yu, no ken tingim sem yu pilim, redi long kisim ol dispela tok, na mekim ol senis em yu mas mekim. Na taim oganaisesen bilong Jehova i mekim ol senis we i mekim sampela samting long yu, redi long ekseptim ol dispela senis na givim bel olgeta long bihainim.

16. Olsem wanem yu ken wok yet long trastim Jehova na oganaisesen bilong em?

¹⁶ Yu ken wok yet long trastim Jehova na oganaisesen bilong em taim ol samting i traim pasin bilong yu long stap gut long God. Tasol bilong mekim olsem, yu mas holimpas gutpela tingting, dispela i makim olsem yu mas stap isi, wokim gut tingting, na holim wankain tingting olsem bilong Jehova long ol samting. Tingting strong long ritim na stadi gut long stori bilong ol man i stap long Baibel em ol i bin sanap strong na karim ol wankain hevi olsem yu, na tingim tingim long bel eksampel bilong ol. Beten na askim Jehova long helpim yu. Na no ken lusim pasin bilong pas gut wantaim kongrigesen. Taim yu mekim olsem, orait maski wanem samting i kamap, Satan i no inap mekim yu i go longwe long Jehova na long oganaisesen bilong Em.​—Jems 4:7.