1-2. (a) Bai yumi skelim wanem ol askim long dispela atikol? (b) Wanem samting i soim olsem Jehova i laik tru long helpim yumi?

 JEHOVA i ken helpim yumi long karim ol hevi i painim yumi na long amamas yet long mekim wok bilong em. Long wanem ol rot em i save helpim yumi? Na olsem wanem yumi ken yusim gut ol helpim em Jehova i givim? Long dispela atikol, bai yumi painim bekim bilong ol dispela askim. Tasol paslain long yumi kisim bekim bilong ol dispela askim, yumi ken skelim dispela askim: Tru tru Jehova i redi long helpim yumi?

² Wanpela tok em aposel Pol i kolim long pas em i raitim long ol Hibru i ken helpim yumi long bekim dispela askim. Pol i tok: “Jehova em i helpim bilong mi; mi no inap pret. Ol man bai mekim wanem long mi?” (Hib. 13:6) Wanpela buk i stori long Baibel i tok dispela tok “helpim” em ol i yusim long dispela ves i makim olsem man i hariap long i go givim helpim long wanpela i singaut long kisim helpim. Piksaim olsem Jehova i hariap long i go helpim wanpela man i karim hevi. Yu bai wanbel long poin bilong dispela tok piksa olsem Jehova i redi—yes, em i laik tru—long stap olsem Helpim bilong yumi. Jehova i stap long sait bilong yumi, olsem na yumi ken amamas long sanap strong na karim ol hevi.

3. Wanem 3-pela rot Jehova i save helpim yumi long amamas long sanap strong na karim ol hevi?

³ Wanem sampela rot Jehova i save helpim yumi long amamas long sanap strong na karim ol hevi? Bilong bekim dispela askim, yumi ken lukim tok i stap long Buk Aisaia. Bilong wanem? Long wanem, planti tok profet em God i bin kirapim Aisaia long raitim, ol i stret long ol wokman bilong God long nau. Na tu, planti taim Aisaia i kolim ol tok long Jehova we em i isi long yumi kliagut long en. Olsem, yumi ken skelim ol tok i stap long Aisaia sapta 30. Long dispela sapta, Aisaia i kolim ol tok we em i isi long yumi piksaim long tingting ol samting, em i stori long hau Jehova i helpim yumi ol manmeri  bilong em long rot bilong (1) putim gut yau long ol beten bilong yumi na bekim ol beten bilong yumi, (2) stiaim yumi, na (3) givim yumi ol blesing long nau na long bihain. Yumi ken skelim gut dispela 3-pela rot em Jehova i save helpim yumi long en.

4. (a) Jehova i tok ol Juda long taim bilong Aisaia i gat wanem kain pasin, na Em i larim wanem samting i painim ol? (b) Jehova i tok wanem samting bai painim ol man i stap gut long em? (Aisaia 30:18, 19)

⁴ Long ol tok i stap long kirap bilong Aisaia sapta 30, Jehova i tok long lain Juda na em i tok ol i olsem “ol strongpela het pikinini man,” em ol i save “skruim sampela sin moa antap long sin bilong ol.” Em i tok moa olsem: “Ol i wanpela bikhetlain, . . . husat i no laik tru long harim lo bilong Jehova.” (Ais. 30:1, 9) Ol manmeri i no laik putim yau long Jehova, olsem na Aisaia i tok profet olsem Jehova bai larim taim nogut i painim ol. (Ais. 30:5, 17; Jer. 25:8-11) Na dispela samting i kamap, lain Babilon i kam kisim ol i go kalabus long Babilon. Tasol i gat sampela manmeri long lain Juda em ol i stap gut long Jehova, olsem na Aisaia i gat tok long gutpela samting i ken painim ol. Em i tokim ol olsem wanpela taim bai kamap we Jehova bai soim pasin helpim long ol. (Ritim Aisaia 30:18, 19.) Na tru tumas, dispela samting i bin kamap. Jehova i kisim bek ol long kalabus. Tasol sampela haptaim i bin lus paslain long Jehova i kisim bek ol. Dispela tok “Jehova i stap isi na wet i stap bilong soim pasin helpim long yupela” i makim olsem sampela haptaim i mas lus paslain long Jehova i ken kisim bek ol man i stap gut long em. Jehova i larim lain Israel i stap kalabus long Babilon inap 70 yia paslain long em i larim liklik hap lain i kam bek long Jerusalem. (Ais. 10:21; Jer. 29:10) Taim lain Israel i stap kalabus long Babilon, ol i wari na ol i krai, tasol taim ol i kam bek long Jerusalem, ol i krai bikos ol i amamas tru.

5. Aisaia 30:19 i mekim wanem tok bilong helpim yumi?

⁵ Long nau yumi ken larim ol dispela tok i mekim gut bel bilong yumi, em i tok: “Tru tumas, em bai harim krai bilong yu long kisim helpim na em bai soim pasin helpim long yu.” (Ais. 30:19) Aisaia i helpim yumi long save olsem Jehova i redi long putim gut yau long yumi taim yumi singaut long em, na Em bai hariap long bekim ol beten bilong yumi. Aisaia i tok moa olsem: “Taim em i harim singaut bilong yu, wantu em bai bekim.” Ol dispela naispela tok i kirapim yumi long tingim olsem Papa bilong yumi em i redi—yes, em i laik tru—long helpim ol man i singaut long em. Yumi save long dispela na dispela i kirapim yumi long amamas long sanap strong na karim ol hevi.

6. Olsem wanem tok bilong Aisaia i kamapim klia olsem Jehova i save putim yau long beten bilong olgeta wan wan wokman bilong em?

⁶ Dispela ves i kamapim wanem narapela tok we i ken strongim bel bilong yumi long sait bilong ol beten bilong yumi? Jehova i save putim gut yau long beten bilong yumi olgeta wan wan. Wai na yumi ken tok olsem? Long namba 1 hap bilong ol ves long Aisaia sapta 30, Baibel i kolim dispela tok “yupela” bilong makim lain Israel olgeta em Jehova i wok long toktok long ol. Tasol long ves 19, Baibel i kolim dispela tok “yu” bilong makim olsem Jehova i wok long toktok long olgeta wan wan. Aisaia i tok: “Yu bai no inap krai moa”; “tru tumas, . . . em bai soim pasin helpim long yu”; “taim em i harim singaut bilong yu, wantu em bai bekim.” Olsem Papa i gat pasin laikim, Jehova i no save tokim pikinini man o pikinini meri em bel hevi i daunim em olsem, “Yu mas kamap strong wankain olsem brata o sista bilong yu,” nogat. Em i save tingim tru yumi olgeta wan wan na em i save putim gut yau long beten bilong yumi wan wan.​—Sng. 116:1; Ais. 57:15.

7. Olsem wanem tok bilong Aisaia na Jisas i helpim yumi long luksave olsem oltaim yumi mas beten?

⁷ Taim yumi beten na tokim Jehova long wanpela samting em yumi wari na tingting planti long en, ating kwiktaim Jehova bai givim yumi strong bilong karim dispela hevi. Tasol sapos hevi bilong  yumi i no pinis hariap olsem yumi bin ting long en, ating yumi mas wok yet long askim Jehova planti taim long givim yumi strong bilong karim dispela hevi. Em i tokim yumi long mekim olsem. Yumi luksave long dispela long tok Aisaia i mekim, olsem: “No ken larim [Jehova] i malolo.” (Ais. 62:7) Wanem insait bilong dispela tok? Yumi mas beten oltaim long Jehova na mekim olsem planti taim, i olsem yumi no larim Jehova i malolo. Ol tok bilong Aisaia i kirapim yumi long tingim ol tok piksa bilong Jisas long beten i stap long Luk 11:8-10, 13. Long ol dispela ves, Jisas i kirapim yumi olsem taim yumi beten, yumi mas “strong long askim askim” na “wok yet long askim” long kisim holi spirit. Na tu, yumi ken beten askim Jehova long givim yumi ol stiatok yumi nidim bilong mekim ol gutpela disisen.

8. Olsem wanem tok bilong Aisaia 30:20, 21 i bin kamap tru long bipo?

⁸ Ritim Aisaia 30:20, 21. Taim ami bilong Babilon i kam banisim Jerusalem inap 1 na hap yia, ol manmeri i karim bikpela hevi tru insait long banis bilong Jerusalem. Ol i karim hevi long olgeta wan wan de, so ol dispela hevi i kamap olsem bret na wara long ol. Tasol olsem ves 20 na 21 i kamapim, Jehova i promisim lain Juda olsem sapos ol i tanim bel na senisim pasin bilong ol, em bai kisim bek ol. Aisaia i tok Jehova em i “Nambawan Bikpela Tisa” bilong ol, na Aisaia i tok promis long ol olsem Jehova bai skulim ol long lotuim Em long pasin em i orait long en. Ol dispela tok i bin kamap tru taim lain Juda i lusim kalabus long Babilon. Jehova i kamapim klia olsem em i Nambawan Bikpela Tisa bilong ol, em i stiaim ol manmeri bilong em na ol i mekim gut wok bilong kirapim gen lotu i tru. Jehova i stap olsem Nambawan Bikpela Tisa bilong yumi na dispela em i gutpela blesing tru yumi gat long nau.

9. Long nau, wanem wanpela rot yumi kisim ol stiatok i kam long Jehova?

⁹ Aisaia i mekim yet ol tok piksa, na em i tok yumi olsem ol sumatin em Jehova i wok yet long skulim long 2-pela rot. Wanpela rot em Aisaia i tok: “Yu bai lukim Nambawan Bikpela Tisa bilong yu long ai bilong yu yet.” Long dispela tok piksa, em i stori olsem dispela Tisa i sanap long fran bilong ol sumatin bilong em. Yumi amamas tru long kisim helpim long ol tok bilong Jehova long nau. Long wanem rot Jehova i wok long skulim yumi? Em i skulim yumi long rot bilong oganaisesen bilong em. Yumi tenkyu tru olsem long rot bilong dispela oganaisesen yumi save kisim ol stiatok i klia tru na isi long bihainim! Ol tok yumi kisim long rot bilong ol miting bilong kongrigesen, ol kibung, ol pablikesen, ol brodkas, na long planti narapela rot i helpim yumi long dispela taim nogut long amamas yet long sanap strong na karim ol hevi.

10. Long wanem rot yumi harim “wanpela nek baksait long [yumi]”?

 ¹⁰ Aisaia i stori long narapela rot em Jehova i save skulim yumi, em i tok: “Yu yet bai harim wanpela nek baksait long yu.” Profet Aisaia i tok piksa long Jehova olsem wanpela gutpela tisa husat i wokabaut baksait long ol sumatin bilong em, na em i wok long stiaim ol na tokim ol long wanem rot long bihainim. Long nau, yumi save harim nek bilong God baksait long yumi. Hau dispela samting i kamap? Holi spirit bilong God i kirapim ol man na ol i bin raitim Baibel long bipo tru, em longpela taim i go pinis. So taim yumi ritim Baibel, i olsem yumi wok long harim nek bilong God baksait long yumi.​—Ais. 51:4.

11. Bilong amamas long sanap strong na karim ol hevi na mekim yet wok bilong Jehova, yumi mas mekim wanem ol samting, na wai?

¹¹ Olsem wanem yumi ken kisim helpim long ol stiatok em Jehova i givim long rot bilong oganaisesen bilong em na long rot bilong Baibel? Aisaia i kolim 2-pela samting. Namba 1 samting, “dispela em rot.” Namba 2 samting, “wokabaut long en.” (Ais. 30:21) Yumi no ken save tasol long “rot,” nogat. Yumi mas “wokabaut long en.” Yumi kisim save long samting Jehova i laik yumi mas mekim long rot bilong tok bilong em long Baibel, em oganaisesen bilong em i eksplenim gut long yumi. Na tu, yumi kisim skul long hau yumi ken bihainim ol dispela tok yumi lainim. Bilong amamas long sanap strong na karim ol hevi na mekim yet wok bilong Jehova, yumi mas mekim dispela 2-pela samting wantaim. Taim yumi mekim olsem, long dispela taim tasol yumi ken save tru olsem Jehova bai blesim yumi.

12. Olsem Aisaia 30:23-26 i kamapim, long wanem rot Jehova bai blesim lain bilong em?

¹² Ritim Aisaia 30:23-26. Olsem wanem dispela tok profet i kamap tru long ol Juda em ol i lusim kalabus long Babilon na kam bek long graun bilong ol long Israel. Ol i kisim planti blesing tru long sait bilong bilip na long ol samting bilong skin. Jehova i blesim lain bilong em na ol i gat planti kaikai. Tasol bikpela samting moa, em i orait long ol na ol i kisim planti gutpela tok bilong strongim bilip bilong ol taim isi isi ol i wok long stretim bek lotu i tru. Ol gutpela blesing bilong bilip em lain bilong God i amamas long kisim long dispela taim i winim tru ol blesing ol i bin kisim long bipo. Olsem ves 26 i kamapim, Jehova i mekim save bilong tok i tru i kamap klia moa. (Ais. 60:2) Ol blesing Jehova i givim i helpim ol wokman bilong em long amamas na strongim bel long mekim yet wok bilong em “bikos bel bilong ol i stap gut.”​—Ais. 65:14.

13. Olsem wanem tok profet bilong stretim bek lotu i tru i kamap tru long nau?

¹³ Yu ting tok profet bilong stretim bek lotu i tru i stret long yumi long nau tu? Yes, ol dispela tok i stret long yumi long nau tu! Long wanem rot?  Kirap long 1919 na i kam, planti milion manmeri i bin lusim kalabus bilong Bikpela Babilon, em olgeta lotu giaman. God i bin stiaim ol i go long wanpela naispela ples winim Graun Bilong Promis bilong lain Israel. God i stiaim ol i go long paradais bilong bilip. (Ais. 51:3; 66:8) Paradais bilong bilip i makim wanem samting?

14. Paradais bilong bilip i makim wanem samting, na husat i stap long en long nau? (Lukim Mining Bilong Tok.)

¹⁴ Kirap long yia 1919 C.E. na i kam, ol Kristen God i bin makim i amamas long stap long paradais bilong bilip. b Long ol yia i kam bihain, ol Kristen em ol i bilip long kisim laip long graun, em “ol arapela sipsip,” ol tu i bin kam sindaun long dispela paradais bilong bilip na ol i bin amamas tru long kisim planti blesing i kam long Jehova.​—Jon 10:16; Ais. 25:6; 65:13.

15. Paradais bilong bilip i stap long wanem hap?

¹⁵ Long nau, paradais bilong bilip i stap long wanem hap? Ol man i lotuim Jehova ol i stap long olgeta hap bilong graun. Olsem na dispela paradais bilong bilip em ol i stap insait long en, em i stap long olgeta hap bilong graun. So maski yumi stap long wanem hap bilong graun long nau, yumi inap stap insait long dispela paradais bilong bilip taim yumi wok strong long sapotim lotu i tru.

16. Yumi ken mekim wanem bambai yumi wok yet long tingim naispela lukluk bilong dispela paradais bilong bilip?

¹⁶ Bilong stap yet insait long dispela paradais bilong bilip, yumi mas holimpas pasin bilong tenkyu tru olsem yumi insait long kongrigesen Kristen i stap long olgeta hap bilong graun. Yumi ken mekim olsem long wanem rot? Yumi mekim olsem long rot bilong tingim ol gutpela pasin bilong ol bratasista bilong yumi em ol lain i stap insait long dispela paradais bilong bilip, na yumi no ken tingim ol pasin kranki bilong ol. (Jon 17:20, 21) Wai na dispela em i bikpela samting? Tingim dispela tok piksa. Taim yumi go long wanpela naispela pak, yumi save olsem bai yumi lukim ol kain kain diwai. Olsem tasol, paradais bilong bilip insait long ol kongrigesen long nau i gat ol kain kain bratasista em ol i olsem ol diwai. (Ais. 44:4; 61:3) Yumi mas wok yet long tingim naispela lukluk bilong dispela pak, na yumi no ken tingim ol bagarap i stap long wan wan diwai i stap klostu long yumi. Yumi no ken larim ol pasin kranki bilong  yumi yet na ol pasin kranki bilong ol narapela insait long kongrigesen i pulim nabaut tingting bilong yumi na yumi no lukim naispela lukluk bilong dispela paradais bilong bilip—em pasin wanbel insait long ol kongrigesen Kristen long graun olgeta.

17. Yumi olgeta wan wan i ken mekim wanem bilong strongim pasin wanbel insait long kongrigesen?

¹⁷ Yumi olgeta wan wan i mas mekim wanem bambai yumi strongim pasin wanbel insait long kongrigesen? Yumi mas stap olsem man bilong mekim i dai kros. (Mat. 5:9; Rom 12:18) Long olgeta taim yumi mekim ol samting bilong strongim pasin wanbel wantaim ol narapela insait long kongrigesen, yumi mekim ol samting bilong helpim dispela paradais bilong bilip i luk nais yet. Oltaim yumi mas tingim olsem Jehova yet i bringim olgeta wan wan manmeri i kam insait long dispela paradais bilong bilip bilong mekim lotu i tru. (Jon 6:44) Piksaim long tingting olsem Jehova i amamas tru taim em i lukim yumi wok strong long strongim bel isi na pasin wanbel namel long yumi na ol bratasista—em ol wokman bilong em husat i dia tumas long em!​—Ais. 26:3; Hag. 2:7.

18. Yumi mas tingim tingim long bel wanem samting, na bilong wanem?

¹⁸ Olsem wanem yumi ol wokman bilong God i ken kisim gutpela helpim long ol blesing i kam long God? Yumi ken tingim gut ol tok yumi kisim save long en long Tok Bilong God na long ol buk na nius em Baibel i as bilong en. Taim yumi stadi na tingim tingim long bel ol tok, dispela bai helpim yumi long kisim ol gutpela pasin Kristen we inap kirapim yumi long “sori na laikim tumas ol arapela wanbilip wankain olsem brata i save laikim tumas brata” insait long kongrigesen. (Rom 12:10) Taim yumi tingim tingim ol blesing yumi kisim long nau, yumi strongim pasin pren bilong yumi wantaim Jehova. Na taim yumi tingim tingim long bel ol gutpela blesing Jehova i laik kamapim long bihain, dispela bai helpim yumi long bilip strong olsem yumi inap mekim wok bilong em inap oltaim. Olgeta dispela samting bai givim amamas long yumi long mekim wok bilong Jehova long nau.

19. (a) Olsem Aisaia 30:18 i kamapim, yumi ken save tru long wanem samting? (b) Wanem samting bai helpim yumi long amamas long sanap strong na karim ol hevi?

¹⁹ Jehova “bai kirap” bilong helpim yumi taim em i pinisim pasin nogut bilong dispela graun. (Ais. 30:18) Yumi ken save tru olsem Jehova—“em God bilong mekim stretpela kot”—i no inap larim dispela graun bilong Satan i stap longpela taim winim haptaim em i makim. (Ais. 25:9) Yumi no les kwik na yumi wetim dispela de bilong Jehova long kisim bek yumi bai kamap. Long dispela haptaim i stap yet, yumi tingting strong long wok yet long beten long Jehova, stadi na bihainim ol tok bilong em i stap long Baibel, na tingim tingim long bel ol gutpela blesing yumi kisim. Taim yumi mekim olsem, Jehova bai helpim yumi long amamas long sanap strong na karim ol hevi taim yumi wok yet long lotuim em.