Paslain long mi stori long wanem samting i bin painim mi long bihain, mi laik stori long hau mi bin kirap long mekim wok fultaim sevis.

Mi bon long Curaçao em wanpela naispela ailan bilong Karibian. Papa bilong mi em i bilong Surinam, tasol em i go wok na sindaun long dispela ailan. Sampela yia paslain long mi bon, em i wanpela bilong ol fes Witnes Bilong Jehova long kisim baptais long Curaçao. a Em i save stadi long Baibel wantaim mipela ol pikinini long olgeta wik, maski mipela i save givim hatwok long em. Taim mi gat 14 krismas, papa bilong mi i kisim mipela famili i go sindaun long Surinam bambai em i ken lukautim lapun mama bilong em.

Long Surinam, mi poromanim ol yangpela long kongrigesen em ol i givim bel tru long mekim wok bilong Jehova. Krismas bilong ol i antap liklik long krismas bilong mi na ol i mekim wok olsem painia oltaim. Taim ol i save stori long ol gutpela ekspiriens bilong ol long wok autim tok, pes bilong ol i lait na ol i save amamas tru. Bihain long ol miting, mi wantaim ol pren bilong mi, mipela i save stori long ol tok bilong Baibel, na sampela taim mipela i sindaun long nait na stori. Ol dispela pren i helpim mi long luksave long samting mi laik mekim long laip bilong mi, em long mekim wok bilong Jehova. So mi baptais taim mi gat 16 krismas. Bihain, taim mi gat 18 krismas mi kirap long mekim wok painia oltaim.

Mi kisim skul long planti samting taim mi wok painia, na dispela i bin helpim mi taim mi insait long fultaim sevis. Olsem, fes samting mi lainim em olsem, em i bikpela samting long trenim ol narapela. Taim mi stat long mekim wok painia, wanpela misineri nem bilong em Willem van Seijl i lusim haptaim long helpim mi. b Em i skulim mi long pasin bilong mekim gut ol tiokratik asainmen.  Long dispela taim, mi no luksave olsem mi nidim tru dispela trening. Long yia bihain, ol i makim mi long kamap spesel painia na bihain long en mi go pas long lukautim ol liklik grup i stap insait tru long bikbus bilong Surinam. Mi tenkyu tru long gutpela trening ol brata i givim long mi! Kirap long dispela taim na i kam, mi wok long bihainim pasin bilong ol na mi lusim haptaim long trenim ol narapela.

Namba tu skul mi kisim em long holim liklik samting tasol na oganaisim gut ol samting long laip. Long kirap bilong olgeta mun, mi wantaim spesel painia poroman bilong mi, mitupela i save wokim plen bilong ol kaikai samting mipela bai nidim long ol wik i kam. Bihain wanpela bilong mitupela i save raun inap longpela hap i go long biktaun long baim ol samting mipela i nidim. Mipela i mas spendim gut liklik alauens mipela i save kisim long olgeta mun na tilim gut kaikai samting mipela i baim na bai mipela i ken i gat inap kaikai insait long mun olgeta. Sapos kaikai bilong mipela i pinis taim mipela i stap long bikbus, sampela taim i gat ol man i helpim mipela, sampela taim nogat. Mi lain long taim mi yangpela yet olsem taim mi amamas long ol samting mi holim na oganaisim gut ol samting, dispela i helpim mi long putim tingting long wok bilong Jehova long laip olgeta bilong mi.

Namba tri samting mi lainim em pasin bilong skulim ol man long tok bilong God long tokples bilong ol yet. Taim mi liklik na i kam antap, mi save mekim tokples Dats, Inglis, Papiamento, na Sranantongo (ol i kolim tu olsem Sranan), em bikpela tokples bilong Surinam. Tasol long bikbus, mi luksave olsem ol man i putim gut yau long gutnius taim mipela i autim tok long tokples bilong ol asples. Mi pilim hatwok long mekim sampela bilong ol dispela tokples, kain olsem tokples Saramaccan, bikos long pasin bilong kolim ol tok. Tasol mi amamas olsem mi bin mekim olsem. Insait long ol yia, mi skulim planti manmeri moa long tok i tru bikos mi save mekim tokples bilong asples.

Tru sampela taim mi bin mekim ol popaia na mi pilim sem long dispela. Olsem, wanpela taim mi laik askim wanpela sumatin bilong Baibel husat i save mekim tokples Saramaccan long em i pilim olsem wanem bikos bel bilong em i wok long pen. Tasol tru tru, mi askim em sapos em i gat bel! Dispela askim bilong mi i semim em tru. Maski mi mekim kain popaia olsem, mi traim bes yet long mekim tokples bilong ol asples long ol asainmen bilong mi.

Long 1970, ol i makim mi long mekim wok wasman sekit. Long dispela yia, mi soim piksa slaid nem bilong en “Visitim Wol Hetkota Bilong Ol Witnes Bilong Jehova” long planti grup insait long bikbus. Bilong i go kamap long ol, mipela ol brata i save kalap long longpela kanu ol i wokim long diwai na ron antap long wara long bikbus. Antap long kanu mipela i putim jenereta, kontena fiul, ol kerosin lam, na ol ikwipmen bilong soim piksa slaid. Taim mipela i go kamap, mipela i save karim ol dispela ikwipmen i go long ples we mipela bai soim piksa slaid. Samting mi save tingim long ol dispela raun em olsem; ol manmeri long ol dispela longwe ples i save laikim tru ol dispela program. Mi amamas tru long helpim ol narapela long kisim save long Jehova na oganaisesen  bilong em long graun. Ol gutpela blesing mi kisim long sait bilong bilip i winim tru ol samting bilong skin mi lusim bilong mekim wok bilong Jehova.

Mi luksave olsem mi stap singel na em isi long mi mekim planti wok bilong Jehova, tasol mi pilim olsem mi mas i gat wanpela poroman marit. So mi beten strong na tokim Jehova stret olsem mi laikim wanpela meri husat bai amamas long raun na mekim wok fultaim sevis wantaim mi long bikbus. Wanpela yia bihain, mi prenim Ethel, wanpela spesel painia husat i givim bel tru long mekim wok bilong Jehova. Taim Ethel i liklik yet, em i laikim tru stori bilong aposel Pol na em i laik givim em yet long mekim wok autim tok olsem aposel Pol i bin mekim. Mitupela marit long Septemba 1971 na mitupela i mekim wok sekit wantaim olsem marit.

Famili bilong Ethel i no gat planti samting bilong skin, olsem na em i lain hariap long raun wantaim mi long mekim wok sekit long bikbus. Olsem, taim mipela i redi long visitim ol kongrigesen long namel bilong bikbus, mipela i save karim liklik samting tasol. Mipela i save wasim ol klos na waswas long ol bikpela wara. Mitupela lain tu long kaikai wanem ol kaikai em ol bratasista i redim bilong mipela, olsem ol iguana, ol piranha, o wanem narapela abus ol i kisim long bikbus o long wara. Taim i no gat plet, mipela i save kaikai antap long ol lip bilong banana. Taim i no gat spun o fok samting, mipela i kaikai wantaim pinga bilong mipela. Mitupela Ethel wantaim i lusim ol samting bilong skin bambai mitupela i mekim wok bilong Jehova, na dispela i helpim mipela long pas gut tru olsem 3-pela rop i pas strong wantaim. (Ekl. 4:12) Em ol nambawan gutpela ekspiriens tru mipela i kisim!

Ekspiriens mi kamapim long kirap bilong dispela atikol em samting i bin kamap long wanpela raun bilong mipela taim mipela i kam bek long wanpela ples long bikbus. Taim kanu i kamap long wara kalap, em i tanim na i go insait long wara, tasol bihain em i kam antap gen. Gutpela  tru olsem mipela i bin werim ol laip jaket na mipela i no pundaun i go insait long wara. Tasol wara i pulap long kanu bilong mipela. Mipela i kapsaitim ol kaikai i stap long sospen i go insait long wara na mipela i yusim ol dispela sospen long rausim wara long kanu.

Mipela i rausim olgeta kaikai bilong mipela, olsem na mipela i wok long kisim pis taim mipela i ron i go daun long wara. Tasol mipela i no kisim wanpela pis. So mipela i beten na askim Jehova long givim kaikai long mipela inap long dispela de. Bihain tasol long mipela i beten, wanpela brata i tromoi huk na em i kisim wanpela traipela pis na em inap stret long mipela 5-pela long kaikai long dispela nait na pulap.

Mitupela Ethel i mekim wok sekit inap 5-pela yia na mitupela i kisim wanpela gutpela blesing—mipela bai kamap papamama. Mi amamas long dispela gutpela nius, maski mi no save long wanem samting bai painim mipela long bihain. Mitupela Ethel i gat laik tru long stap yet long fultaim sevis sapos rot i op. Long 1976, pikinini man bilong mitupela Ethniël i bon. Inap 2 na hap yia bihain, namba 2 pikinini man bilong mitupela, Giovanni, i bon.

Long dispela taim, Surinam i sot long ol brata bilong mekim wok, olsem na brens i stretim rot long mi ken mekim yet wok sekit taim mipela i mekim bikpela long ol pikinini. Taim tupela pikinini i liklik yet, ol brata i asainim mipela long visitim ol sekit i no gat planti kongrigesen. Long kain taim, mi save lusim 2-pela wik long mun bilong mekim wok sekit na ol narapela wik bilong mun, mi save wok painia long kongrigesen ol i asainim mipela long en. Ethel na ol bois i save kam wantaim mi taim mi visitim ol kongrigesen i stap klostu long haus bilong mipela. Tasol taim mi go visitim ol kongrigesen long bikbus, mi wanpela tasol i save go.

Mi mas mekim gutpela plen bambai mi ken pinisim gut ol wok mi mas mekim. Mi save wok strong long mekim famili stadi long olgeta wik. Taim mi go visitim ol kongrigesen long bikbus, Ethel i save mekim famili stadi wantaim ol bois long haus. Planti taim mipela i save mekim ol samting wantaim olsem famili. Na tu, planti taim mitupela Ethel i mekim ol samting bilong kisim amamas wantaim ol bois, olsem pilai gem o go lukim ol ples. Planti taim mi save stap leit long nait na redim ol tiokratik asainmen bilong mi. Na Ethel i stap olsem gutpela meri em Provep 31:15 i stori long en. Em i save kirap paslain long tulait i bruk na redim ol samting bambai mipela i ken skelim teks na kisim kaikai bilong moning  wantaim olsem famili paslain long ol bois i go long skul. Mi amamas tru olsem mi gat naispela meri husat i save daunim laik bilong em yet na oltaim em i helpim mi long inapim ol wok Kristen bilong mi!

Mipela i mekim gut wok papamama long helpim ol bois bilong mipela long laikim Jehova na wok autim tok. Mipela i laik bai ol bois bilong mipela i insait long fultaim sevis, i no bikos em samting mipela i laik ol i mekim, nogat, em samting ol yet i mas makim bilong mekim. Oltaim mipela i save stori long amamas bilong fultaim sevis. Mipela i stori long ol hatwok bilong en, tasol bikpela samting mipela i save stori gut long hau Jehova i helpim na blesim mipela olsem famili. Na tu, oltaim mipela i save bung wantaim ol wanbilip Witnes em ol i putim wok bilong Jehova i stap namba 1 samting long laip bilong ol.

Jehova i givim mipela olgeta samting mipela i nidim taim mipela i mekim bikpela long ol bois bilong mipela. Na yes, oltaim mi mekim ol samting mi mas mekim bilong sapotim famili. Ekspiriens bilong mi olsem singel spesel painia long bikbus i skulim mi long plenim gut ol kaikai samting mipela i nidim. Maski mipela i givim bes bilong mipela, sampela taim mipela i no gat olgeta samting mipela i nidim. Long ol dispela taim, mi bilip olsem Jehova i sambai na helpim mipela. Olsem, long 1986 i go inap long 1992 samting, i gat pait i bin kamap insait long Surinam. Long ol dispela yia, i hatwok long kisim ol kaikai samting mipela i nidim. Maski i olsem, Jehova i givim mipela ol samting mipela i nidim.​—Mat. 6:32.

Long laip olgeta bilong mipela, oltaim Jehova i lukautim mipela na mekim mipela i stap amamas na belgut tru. Ol pikinini bilong mipela i stap olsem gutpela blesing tru bilong mipela, na mipela i amamas long mekim bikpela long ol na ol tu i mekim wok bilong Jehova. Mipela i amamas tru olsem ol tu i makim long insait long fultaim sevis. Ethniël na Giovanni i bin grediuet long ol skul tiokratik na nau tupela wantaim meri bilong tupela i mekim wok long brens ofis bilong Surinam.

Mitupela Ethel i lapun nau, tasol mipela i bisi yet long mekim wok bilong Jehova olsem ol spesel painia. Mipela i bisi tru na mi no painim yet taim bilong lain long swim! Tasol mi no gat wanpela rigret long laip bilong mi. Taim mi tingting i go bek, mi pilim olsem mi mekim gutpela disisen tru long insait long fultaim sevis taim mi yangpela yet na mi mekim dispela wok long laip olgeta bilong mi na dispela em wanpela bes disisen tru mi bin mekim.