1. Hau yumi save olsem Jehova i laik stap klostu long yumi?

 JEHOVA i singautim yumi long i go klostu long em. (Jems 4:8) Em i laik stap God bilong yumi, Papa bilong yumi, na Pren bilong yumi. Em i save bekim ol beten bilong yumi na helpim yumi long taim bilong ol hevi. Na em i yusim oganaisesen bilong em long skulim yumi na lukautim yumi. Tasol yumi mas mekim wanem bilong i go klostu long Jehova?

2. Hau yu inap i go klostu long Jehova?

² Yumi ken go i klostu long Jehova long rot bilong beten long em na ritim Tok bilong em na tingim tingim long bel ol dispela tok. Taim yumi mekim olsem, yumi laikim em moa yet na pilim tru ol gutpela samting em i mekim bilong helpim yumi. Na dispela i kirapim yumi long bihainim tok bilong em na preisim em, em samting i stret long em i kisim. (Rev. 4:11) Taim yumi wok long kisim planti save moa long Jehova, dispela bai strongim pasin bilong yumi long trastim em na oganaisesen em i bin kamapim bilong helpim yumi.

3. (a) Olsem wanem Satan i traim long pasim yumi long mekim wok bilong Jehova? (b) Wanem samting bai helpim yumi na bai yumi no lusim God bilong yumi na oganaisesen bilong em? (Buk Song 31:13, 14)

³ Satan i laik pasim yumi long mekim wok bilong Jehova, moa yet taim yumi bungim ol hevi. Hau em i mekim olsem? Em i mekim ol samting bilong traim yumi bambai isi isi yumi lusim pasin bilong trastim Jehova na oganaisesen bilong em. Tasol yumi ken sakim ol traim bilong em. Taim bilip bilong yumi i stap strong na pasin bilong yumi long trastim Jehova i strong tru, yumi no inap lusim God bilong yumi na oganaisesen bilong em.​—Ritim Buk Song 31:13, 14.

4. Yumi bai stori long wanem samting long dispela atikol?

 ⁴ Long dispela atikol, yumi bai stori long 3-pela hevi em yumi karim long han bilong ol lain em ol i no stap insait long kongrigesen. Wan wan bilong ol dispela hevi inap daunim pasin bilong yumi long trastim Jehova na oganaisesen bilong em. Olsem wanem ol dispela hevi inap pasim yumi long mekim wok bilong Jehova? Yumi ken mekim wanem bilong sakim ol traim bilong Satan?

5. Olsem wanem ol hevi inap daunim pasin bilong yumi long trastim Jehova na oganaisesen bilong em?

⁵ Sampela taim yumi bungim ol hevi, olsem famili i birua long yumi o kampani i pinisim yumi long wok. Olsem wanem ol kain hevi olsem inap daunim pasin bilong yumi long trastim oganaisesen bilong Jehova na pasim yumi long mekim wok bilong em? Taim yumi karim ol hevi inap longpela taim, yumi inap pilim olsem i no gat rot bilong stretim ol hevi na yumi bel hevi tru. Long kain taim olsem, Satan i painim ol rot bilong kirapim yumi long holim tupela tingting long pasin bilong Jehova long laikim yumi. Satan i laik bai yumi ting olsem Jehova o oganaisesen bilong em i as bilong ol pen na hevi yumi karim. Wankain samting i bin painim sampela manmeri bilong lain Israel long Isip. Pastaim ol i bilip olsem Jehova i makim Moses na Aron long kisim bek ol long wok sleiv. (Kis. 4:29-31) Tasol bihain taim Fero i mekim laip bilong ol i go hatwok moa, ol i sutim tok olsem em asua bilong Moses na Aron na ol i karim ol hevi. Ol i tokim tupela: “Yutupela i mekim na Fero na ol wokman bilong em i heitim mipela, na yutupela i putim bainat long han bilong ol bilong kilim mipela i dai.” (Kis. 5:19-21) Ol i sutim tok long ol gutpela wokman bilong God. Sori tru long dispela! Sapos yu karim ol hevi inap longpela taim tru, hau yu ken strongim yet pasin bilong yu long trastim Jehova na oganaisesen bilong em?

6. Yumi kisim wanem skul long profet Habakuk long hau long karim ol hevi? (Habakuk 3:17-19)

⁶ Beten long Jehova na autim olgeta wari bilong yu long em, na larim em i helpim yu. Profet Habakuk i bungim planti hevi. Wanpela taim em i gat tupela tingting olsem Jehova i tingim em, o nogat. So em i beten long Jehova na autim olgeta wari bilong em. Em i tok: “Jehova, hamas taim mi wok long singaut long yu helpim mi, tasol yu no save harim? . . . Wai na yu larim pasin bilong daunim ol narapela i stap yet?” (Hab. 1:2, 3) Jehova i bekim beten bilong dispela wokman bilong em husat i autim olgeta wari bilong em long Jehova. (Hab. 2:2, 3) Bihain long em i tingim tingim hau Jehova i bin seivim lain bilong em, Habakuk i kisim bek amamas bilong em. Em i bilip tru olsem Jehova i tingim em na em bai helpim em long sanap strong na karim olgeta kain hevi. (Ritim Habakuk 3:17-19.) Yumi kisim wanem skul long dispela? Taim yu bungim ol hevi, beten long Jehova na autim olgeta wari bilong yu long em. Na larim em i helpim yu. Taim yu mekim olsem, yu ken save tru olsem Jehova bai givim strong yu nidim bilong karim ol hevi. Na taim yu lukim olsem Jehova i helpim yu, pasin bilong yu long bilip long em bai kamap strong tru.

7. (a) Wanpela wanblut bilong Shirley i laik kirapim em long kisim wanem tingting? (b) Wanem samting i helpim em long no ken lusim pasin bilong trastim Jehova?

⁷ Mekim yet ol samting bilong stap klostu long Jehova. Tingim olsem wanem dispela i bin helpim Shirley, em wanpela sista long Papua Niugini, taim em i karim ol hevi. b Famili bilong Shirley i no gat planti samting bilong skin, na sampela taim ol i sot long kaikai. Wanpela wanblut i laik daunim pasin bilong Shirley long trastim Jehova. Em i tokim Shirley olsem: “Yu  tok holi spirit bilong God i helpim yu, tasol hau em i helpim yu? Famili bilong yu i no kisim planti samting bilong skin. Yu westim taim bilong yu long autim tok.” Shirley i tok: “Mi askim mi yet: ‘Tru tru God i tingim mipela o nogat?’ So wantu mi beten long Jehova na autim olgeta tingting bilong mi long em. Mi no lusim pasin bilong ritim Baibel na ol narapela pablikesen bilong yumi, na mi wok yet long autim tok na go long ol miting.” Na em i luksave olsem Jehova i wok long lukautim famili bilong em. Famili bilong em i no stap hangre, na ol i stap amamas. Shirley i tok: “Mi pilim olsem Jehova i wok long bekim ol beten bilong mi.” (1 Tim. 6:6-8) Sapos yu mekim yet ol samting bilong stap klostu long Jehova, yu tu i no inap larim ol hevi o pasin bilong i gat tupela tingting i pasim yu long mekim wok bilong Jehova.

8. Wanem samting inap kamap long ol brata i go pas long mekim wok long oganaisesen bilong Jehova?

⁸ Long rot bilong ol nius ripot na ol sosel netwok, ol birua bilong yumi i spredim ol tok giaman long ol brata i go pas long mekim wok insait long oganaisesen bilong Jehova. (Sng. 31:13) Ol man i arestim sampela brata na sasim ol olsem ol kriminal. Ol Kristen long taim bilong ol aposel i bungim wankain hevi taim ol man i sutim tok giaman long aposel Pol na arestim em. Ol Kristen i bin mekim wanem?

9. Sampela Kristen i bin mekim wanem taim aposel Pol i stap kalabus?

⁹ Sampela Kristen long taim bilong ol aposel i stop long helpim aposel Pol taim em i stap kalabus long Rom. (2 Tim. 1:8, 15) Bilong wanem ol i mekim olsem? Yu ting ol i sem long Pol bikos ol manmeri i tingim em olsem wanpela kriminal? (2 Tim. 2:8, 9) O yu ting ol i pret olsem ol man bai mekim nogut long ol tu? Yumi no save long risen na ol i stop long helpim Pol, tasol tingim samting Pol i bin pilim. Em i bin karim planti hevi na em i redi long lusim laip bilong em bilong helpim ol. (Apo. 20:18-21; 2 Kor. 1:8) Yumi no laik bihainim pasin bilong ol Kristen em ol i lusim Pol long taim em i nidim stret helpim bilong ol! Yumi mas tingim wanem samting taim ol man i mekim nogut long ol brata i go pas?

10. Yumi mas tingim wanem samting taim ol man i mekim nogut long ol brata i go pas, na bilong wanem?

 ¹⁰ Tingim risen ol man i mekim nogut long yumi na husat i as bilong dispela hevi. Long 2 Timoti 3:12, Baibel i tok: “Olgeta man husat i laik bihainim pasin bilong givim bel tru long God olsem ol disaipel bilong Krais Jisas, ol man bai mekim nogut long ol tu.” Olsem na yumi no kirap nogut taim Satan i birua long ol brata i go pas long mekim wok. Em i mekim olsem na bai ol brata i lusim pasin bilong stap gut long God, na tu, em i laik pretim yumi.​—1 Pita 5:8.

11. Yumi kisim wanem skul long eksampel bilong Onesiforus? (2 Timoti 1:16-18)

¹¹ Wok yet long sapotim ol wanbilip na stap gut long ol. (Ritim 2 Timoti 1:16-18.) Wanpela Kristen long taim bilong ol aposel, nem bilong em Onesiforus, em i no bin mekim wankain pasin em ol narapela Kristen i mekim taim Pol i go kalabus. “Em i no sem long [Pol i] stap kalabusman,” nogat. Onesiforus i wok long painim Pol, na taim em i painim pinis Pol, em i painim ol rot bilong helpim em. Ol man inap kilim i dai Onesiforus bikos em i helpim Pol. Yumi kisim wanem skul long dispela? Yumi no ken larim pasin bilong pret long ol man i mekim yumi surik o pasim yumi long sapotim ol wanbilip bilong yumi em ol man i mekim nogut long ol. Yumi mas sambai long ol na helpim ol. (Prov. 17:17) Ol i nidim pasin laikim bilong yumi na sapot bilong yumi.

12. Yumi kisim wanem skul long ol bratasista bilong yumi long Rasia?

¹² Tingim olsem wanem ol bratasista bilong yumi long Rasia i helpim ol wanbilip em ol i stap kalabus. Taim sampela wanbilip i mas sanap long ai bilong kot, planti bratasista i go long haus kot bilong sapotim ol. Yumi kisim wanem skul long dispela? Taim ol man i mekim ol tok bilong bagarapim gutnem bilong ol brata i go pas, na ol i arestim ol na mekim nogut long ol, yumi no ken pret. Yumi mas tingim ol long beten bilong yumi, lukautim ol wanfamili bilong ol, na painim ol narapela rot bilong soim olsem yumi sapotim ol.​—Apo. 12:5; 2 Kor. 1:10, 11.

13. Olsem wanem pasin bilong tok bilas inap daunim pasin bilong yumi long trastim Jehova na oganaisesen bilong em?

¹³ Ol wanfamili i no Witnes, ol wanwok, na ol wanskul inap tok bilas long yumi bikos yumi autim tok o yumi bihainim ol stretpela lo bilong Jehova. (1 Pita 4:4) Ating ol bai tok: “Yu gat ol gutpela pasin, tasol lotu bilong yu i strik tumas na yupela i bihainim ol pasin bilong bipo.” Sampela inap sutim tok long yumi long pasin yumi mekim long ol lain em ol i raus long kongrigesen, ol inap tok: “Hau na yu tok yu save mekim pasin laikim?” Ol kain tok olsem inap mekim na yumi gat tupela tingting. Yumi inap stat long tingting olsem: ‘Ating Jehova i ekspektim mi long mekim samting i hatwok long mi mekim? Ating oganaisesen bilong em i strik tumas?’ Sapos yu bungim kain hevi olsem, orait hau yu inap stap klostu yet long Jehova na oganaisesen bilong em?

14. Yumi mas mekim wanem taim ol narapela i tok bilas long yumi bihainim ol lo bilong Jehova? (Buk Song 119:50-52)

¹⁴ Tingting strong long bihainim ol lo bilong Jehova. Jop em man husat i bihainim ol lo bilong Jehova maski ol narapela i tok bilas long em i mekim olsem. Wanpela pren giaman bilong Jop i traim long kirapim Jop long ting olsem em i no bikpela samting long God sapos Jop i bihainim ol lo bilong Em o nogat. (Jop 4:17, 18; 22:3) Tasol Jop i sakim ol kain tok giaman olsem. Em i save olsem ol lo bilong Jehova long wanem samting i rait na wanem samting i rong i stretpela olgeta, na em i tingting  strong long bihainim ol dispela lo. Em i no larim ol narapela i tekewe pasin bilong em long stap gut long God. (Jop 27:5, 6) Yumi kisim wanem skul long dispela? No ken larim pasin bilong ol man long tok bilas i mekim na yu gat tupela tingting long ol lo bilong Jehova. Tingim ol samting i kamap long laip bilong yu. Ating yu luksave olsem oltaim ol lo bilong Jehova i stretpela olgeta na taim yu bihainim ol dispela lo, ol i bin helpim yu tru, a? Yu mas tingting strong long sapotim oganaisesen bilong God we i strongim ol dispela lo. Taim yu mekim olsem, maski ol man i tok bilas long yu, dispela i no inap pasim yu long mekim wok bilong Jehova.​—Ritim Buk Song 119:50-52.   

15. Wai na ol narapela i tok bilas long Brizit?

¹⁵ Tingim ekspiriens bilong Brizit, em wanpela sista long India. Ol wanfamili bilong em i tok bilas long em bikos long bilip bilong em. Bihain long em i kisim baptais long 1997, man bilong em husat i no Witnes i lusim wok mani bilong em. So em i mekim disisen olsem em wantaim Brizit na ol pikinini meri bilong ol bai go stap wantaim papamama bilong em, ol i stap long narapela biktaun. Tasol Brizit i bungim ol narapela bikpela hevi. Man bilong em i no wok, olsem na Brizit i mas wok fultaim na sapotim famili bilong em. Na tu, kongrigesen em i stap klostu long en i longwe inap olsem 350 kilomita. Sori tru, famili bilong man bilong em i birua long Brizit bikos long bilip bilong em. Pasin birua bilong ol i go nogut tru, olsem na famili bilong Brizit i muv i go stap long narapela hap. Bihain, samting em i no tingim i kamap, man bilong em i dai. Na bihain, wanpela pikinini meri bilong em i dai long sik kensa taim em i gat 12 krismas tasol. Ol samting i go nogut moa taim ol wanblut bilong Brizit i tok em asua bilong em na ol dispela hevi i kamap. Ol i tok sapos em i no bin kamap wanpela Witnes Bilong Jehova, olgeta dispela hevi bai i no inap kamap. Maski i olsem, Brizit i trastim Jehova na em i pas gut yet wantaim oganaisesen bilong em.

16. Brizit i kisim wanem ol blesing taim em i stap klostu long Jehova na oganaisesen bilong em?

¹⁶ Brizit i stap longwe tru long kongrigesen,  olsem na wanpela wasman sekit i kirapim em long autim tok long ples em i stap long en na long mekim ol miting long haus bilong em yet. Pastaim em i pilim hatwok long mekim olsem. Tasol em i bihainim dispela edvais. Em i autim gutnius long ol narapela, mekim ol miting long haus bilong em, na oltaim em i lusim haptaim long mekim famili lotu wantaim ol pikinini meri bilong em. Wanem samting i kamap? Brizit i kirapim planti Baibel stadi na sampela sumatin bilong em i kisim baptais. Long 2005, em i stat long mekim wok olsem painia oltaim. Em i trastim Jehova na stap gut long oganaisesen bilong Jehova, olsem na Brizit i kisim gutpela pe. Ol pikinini meri bilong em i stap gut long mekim wok bilong Jehova, na nau i gat 2-pela kongrigesen long hap em i stap long en! Brizit i bilip tru olsem Jehova i strongim em long karim ol hevi na sanap strong maski ol wanfamili i tok bilas long em.

17. Yumi mas tingting strong long mekim wanem?

¹⁷ Satan i laik bai yumi ting olsem Jehova i save lusim yumi long taim bilong ol hevi na sapos yumi sapotim oganaisesen bilong Jehova, dispela bai putim planti hevi moa long yumi. Satan i laik bai yumi pret taim ol man i bagarapim gutnem bilong ol brata i go pas, na mekim nogut long ol na kalabusim ol. Na em i kirapim ol man long tok bilas long yumi bikos em i laik daunim pasin bilong yumi long trastim ol lo bilong Jehova na oganaisesen bilong em. Tasol yumi save gut long ol trik bilong Satan, olsem na em i no inap giamanim yumi. (2 Kor. 2:11) Yu mas tingting strong long sakim ol tok giaman bilong Satan na stap gut yet long Jehova na oganaisesen bilong em. Tingim dispela, Jehova bai i no inap tru long lusim yu. (Sng. 28:7) Olsem na yu no ken larim wanpela samting i pasim yu long mekim wok bilong Em!​—Rom 8:35-39.

18. Bai yumi stori long wanem samting long neks atikol?

¹⁸ Long dispela atikol, yumi stori long ol hevi yumi karim long han bilong ol lain em ol i no stap insait long kongrigesen. Tasol ol hevi yumi bungim insait long kongrigesen, dispela tu inap traim pasin bilong yumi long trastim Jehova na oganaisesen bilong em. Olsem wanem yumi inap karim ol dispela hevi? Yumi bai stori long dispela long neks atikol.