Paul: Mipela i amamas tru! Em Novemba 1985, na mipela i laik go long fes misineri asainmen bilong mipela long Laibiria, Wes Afrika. Balus bilong mipela i stop long Senegal. Anne i tok: “Wanpela moa aua tasol na bai yumi kamap long Laibiria!” Tasol wanpela toksave i kamap olsem: “Ol pasindia bilong Laibiria i mas lusim balus. Sampela man i pait long gavman long Laibiria, olsem na yumi no inap go long dispela hap.” Inap 10-pela de, mipela i stap wantaim ol misineri long Senegal, na mipela i harim nius long hevi i kamap long Laibiria olsem ol trak i karim bodi bilong ol daiman na gavman i putim ol strongpela kefiu, na sapos ol man i brukim ol dispela kefiu, ol bai sutim ol long gan na kilim ol i dai.

Anne: Mipela i save skelim gut ol samting paslain long mipela i wokim disisen. Taim mi liklik gel, ol i save tok long mi olsem Annie em meri bilong pret. Mi save pret tu long krosim rot! Tasol mipela i tingting strong long go long asainmen bilong mipela.

Paul: Mitupela Anne i kamap bikpela long seim ples long hap wes bilong Inglan. Oltaim papamama bilong mi na mama bilong Anne i save strongim mitupela long mekim wok painia, so mipela i kirap mekim wok painia bihain tasol long mipela i pinis long haiskul. Ol i sapotim laik bilong mipela long insait long fultaim sevis. Taim mi gat 19 krismas, mi go wok long Betel na Anne i joinim mi long wok long Betel bihain long mitupela i marit long 1982.

Anne: Mipela i laikim tru Betel, tasol em laik bilong mipela long bipo yet long mekim wok long ol ples i sot long ol man bilong autim tok. Long Betel, mipela i wok wantaim ol bratasista em pastaim ol i mekim wok misineri, na dispela i strongim laik bilong mipela long mekim olsem tu. Inap 3-pela yia, long olgeta nait mipela i save beten long dispela samting, so mipela i amamas tru olsem long 1985, mipela i kisim invatesen bilong go long namba 79 klas bilong Skul Gileat. Bihain, ol i asainim mipela long Laibiria, Wes Afrika.

Paul: Mipela i kalap long fes balus em ol i tok orait long em i ken go bek long Laibiria. Ol manmeri i pret nogut tru na ol kefiu i stap yet. Sapos wanpela kar i mekim bikpela nois, ol manmeri i save pret nogut tru na ranawe. Bilong helpim mipela long stap isi, long olgeta nait mitupela wantaim i save ritim sampela hap bilong Buk Song. Tasol mipela i laikim tru asainmen  bilong mipela. Anne i mekim wok misineri long fil, na mi wok long Betel wantaim John Charuk. a Em i gat bikpela ekspiriens na em i kliagut long sindaun bilong ol bratasista, olsem na mi lainim planti samting long em.

Anne: Wai na kwiktaim mipela i laikim tru asainmen bilong mipela long Laibiria? Bikos long ol bratasista. Ol i gat gutpela pasin na isi long toktok wantaim ol, na tu, ol i gat strongpela bilip. Mipela i pas gut wantaim ol na ol i kamap nupela famili bilong mipela. Ol gutpela edvais ol i givim mipela i strongim mipela long sait bilong bilip. Wok autim tok long Laibiria em nais tru. Ol man bilong haus i no save amamas sapos mipela i lusim ol hariap! Ol manmeri i save sanap long kona bilong ol strit na ol i toktok wantaim long tok bilong Baibel. Yu inap wokabaut tasol i go long ol na stori wantaim ol. Mipela i gat planti Baibel sumatin, olsem na i hatwok long stadi wantaim olgeta bilong ol. Yes, mipela i gat naispela teritori!

Paul: Long 1989, fopela yia bihain long kantri i stap bel isi na i no gat ol pait, bikpela senis tru i kamap taim ol man i birua na pait long gavman. Kirap long Julai 2, 1990, ol dispela man nogut i stat long bosim ples em Betel i stap long en. Inap 3-pela mun olgeta, mipela i no inap long kontektim ol lain i stap long ol narapela kantri, olsem famili bilong mipela na wol hetkota tu. Long olgeta hap, ol man i bikhet nabaut na pait, i gat hevi bilong kaikai i sot, na tu, ol man i bin reipim planti meri. Ol manmeri long kantri olgeta i karim ol dispela hevi inap 14 yia olgeta.

Anne: Ol lain bilong sampela traib i wok long pait na kilim i dai ol lain bilong ol narapela traib. Ol man bilong pait i werim ol narakain klos na ol i holim planti wepen na ol i raun long olgeta strit; ol i save brukim ol haus na go insait na kisim olgeta samting. Sampela i tingim pasin bilong kilim i dai ol man olsem ol man i kilim i dai ol kakaruk. Ol i hipim bodi bilong ol daiman long ol hap ol i mekim ol rot blok, na ol i mekim olsem tu klostu long Betel. Ol i kilim i dai ol Witnes em ol i holimpas bilip, na ol i kilim i dai tu tupela misineri bilong yumi.

Sampela Witnes inap lusim laip bilong ol bikos ol i haitim ol lain bilong ol narapela traib em ol birua i wok long painim ol bilong kilim ol i dai. Ol misineri na ol bratasista i wok long Betel i bin mekim olsem tu. Long Betel, sampela Witnes em ol i ranawe lusim haus bilong ol, ol i slip long ol rum i stap daunbilo na ol narapela i stap wantaim ol Betelait long ol rum i stap antap. Mipela i serim rum bilong mipela wantaim 7-pela narapela.

Paul: Long olgeta de, ol man bilong pait i save traim long kam insait long Betel bilong sekim olsem mipela i haitim ol manmeri o nogat. Long olgeta taim ol i mekim olsem, tupela brata long Betel i save go long geit i stap ausait long Betel bilong toktok wantaim ol man bilong pait, na tupela narapela i save sanap long windo na was i stap. Sapos tupela brata long geit i putim  han bilong ol long fran, dispela i makim olsem olgeta samting i orait. Tasol sapos ol i putim han bilong ol long baksait, dispela i makim olsem ol man bilong pait i belhat nogut tru, olsem na kwiktaim tupela i was i stap long windo i mas haitim ol pren bilong mipela.

Anne: Bihain long planti wik i lus, wanpela grup bilong ol man i pait i fosim ol yet i kam insait long Betel. Mi na wanpela sista i go insait long batrum na mi lokim dua; insait long batrum i gat wanpela kabot i gat liklik ples hait insait long en. Dispela sista i skwisim em yet i go insait long dispela ples hait. Ol man bilong pait i holim ol masin gan na ol i wokabaut long step na kam antap. Ol i belhat nogut tru na ol i paitim strong dua. Paul i tokim ol: “Meri bilong mi i yusim batrum.” Taim mi pasim dua bilong ples hait em sista i go insait long en, dua i mekim nois, na tu, mi stretim ol samting long kabot, olsem na sampela haptaim i lus long mekim olsem. Mi ting ol man bilong pait i save pinis long samting mi mekim na mi pret nogut tru na hanlek bilong mi i guria. Mi pret long opim dua. Mi beten long tingting na askim Jehova long helpim mi. Bihain mi opim dua na mi stap isi na gritim ol. Wanpela i subim em yet i kam insait long batrum na em i go na opim dua bilong kabot na sekim ol samting. Dispela man i no inap bilip olsem em i no painim wanpela samting. Bihain em na grup bilong em i sekim ol narapela rum na rum i stap antap klostu long rup tu. Tasol ol i no painim wanpela samting.

Paul: Inap planti mun, mipela i sot tru long kaikai. Tasol ol tok bilong Baibel i givim strong long mipela. Moning Wosip long Betel em olsem brekfas bilong mipela, na mipela i tenkyu tru olsem ol tok mipela i harim long Moning Wosip i strongim tru mipela.

Sapos kaikai tru na wara i pinis, orait mipela na ol pren mipela i haitim i mas lusim brens, na ol birua bai kilim ol i dai. Sampela taim Jehova i givim mipela ol samting mipela i sot long en long taim stret na long ol narakain rot. Jehova i lukautim mipela na helpim mipela long stap isi na no ken pret.

Hevi long kantri i go nogut moa, tasol tok i tru i strongim mipela. Planti taim ol bratasista i mas ranawe na bai ol man i no ken kilim ol i dai, tasol ol i holimpas bilip na stap isi na i no pret. Sampela i tok ol i karim hevi bilong woa na dispela i “redim ol long karim ol hevi long taim bilong traipela hevi tru.” Ol elda na ol yangpela brata i strongim bel na ol i mekim olgeta samting bilong helpim ol bratasista. Ol bratasista i ranawe i go stap long ol narapela ples, ol i pas gut wantaim na ol i kirap autim tok long ol dispela ples, na ol i yusim wanem wanem ol samting ol i painim long bikbus long wokim ol simpol Haus Kingdom we ol i mekim ol miting bilong ol. Long dispela taim nogut, pasin bilong go long miting na autim tok i strongim tru ol bratasista na i givim ol hop. Taim mipela i mekim rilif wok long tilim ol kaikai, klos, na ol narapela samting, planti bratasista i askim long ol beg bilong autim tok na i no ol klos, na dispela i strongim tru mipela. Planti man em ol i lukim na karim ol bikpela hevi, ol i putim yau long gutnius. Ol i kirap nogut long lukim olsem ol Witnes i stap amamas; ol i olsem lait i sain long ples i tudak. (Mat. 5:​14-16) Ol bratasista bilong yumi i holimpas bilip, na dispela i kirapim sampela man nogut bilong pait long kamap ol wanbilip bilong yumi.

Paul: Insait long 14 yia ol hevi bin stap, sampela taim mipela i mas lusim Laibiria, tripela taim inap sotpela haptaim na tupela taim inap wanpela yia olgeta. Tok em wanpela misineri sista i mekim i wankain long hau mipela i pilim, em i tok: “Long Gileat, ol i skulim mipela long givim bel olgeta long mekim asainmen bilong mipela, na mipela i bin mekim olsem. So taim mipela i mas lusim ol bratasista long dispela taim bilong hevi, lewa bilong mipela i bruk!” Tasol mipela i amamas olsem mipela i ken sapotim wok long Laibiria taim mipela i stap long ol kantri i stap klostu.

Anne: Long Me 1996, mipela fopela i ron long kar bilong brens na mipela i karim planti ol pepa na ol dokiumen bilong brens. Mipela i laik draiv inap olsem 16 kilomita i go long narapela sait bilong taun we i seif. Long dispela taim stret, ol man nogut i kam kirapim bikpela pait long ples mipela i stap long en. Ol man bilong pait i sut long gan i go antap long skai, ol i stopim mipela, pulim mipela 3-pela i kam ausait long kar, na draivim kar i go taim Paul i stap yet insait long kar. Mipela tripela i sanap i stap na mipela i paul. I no longtaim na Paul i wokabaut i kam namel long bikpela lain manmeri na blut i pundaun long poret bilong em. Pastaim mipela i ting ol i sutim em long gan, tasol mipela i luksave olsem sapos ol i bin mekim olsem, em bai no inap wokabaut! Wanpela man nogut i paitim em taim em i subim em i kam ausait long kar. Em i gat liklik kat tasol long poret bilong em.

Klostu long mipela, wanpela militeri trak i stap na i pulap long ol manmeri i pret nogut tru. So mipela i kalap long dispela trak, tasol i no gat spes so mipela i hangamap long sait bilong trak. Draiva i spit i go na klostu tru mipela i pundaun. Mipela i askim em long stop, tasol em i pret na em i no harim mipela. Mipela i holim strong sait bilong trak na mipela i no pundaun, tasol taim trak i stop na mipela i go daun, olgeta strong bilong mipela i pinis na hanlek bilong mipela i guria bikos mipela i pret nogut tru.

Paul: Mipela i no holim wanpela samting, mipela i gat tasol ol klos i doti na bruk em mipela i werim. Mipela i lukluk long narapela narapela na tingting olsem hau stret na mipela i stap laip yet. Mipela i slip long wanpela bikpela fil na klostu long en i gat wanpela helikopta em ol i sutim long gan inap planti taim na i gat ol mak bilong bulet long en. Long neks de, mipela i kalap long dispela helikopta na go long Siera Leon. Mipela i amamas tru olsem mipela i stap laip yet, tasol mipela i wari tru long ol bratasista.

Anne: Taim mipela i kamap long Betel long Freetown, Siera Leon, mipela i stap seif na ol brata i lukautim gut mipela. Tasol mi wok long tingim yet ol samting nogut i kamap long Laibiria. Long de taim, mi save pret olsem wanpela samting nogut bai kamap, na tu, tingting bilong mi i no klia. Olgeta samting mi lukim i olsem ol i no stap tru tru. Long nait, mi save tuhat wantaim na kirap na hanlek bilong mi i save guria na mi pret olsem wanpela samting nogut bai kamap. Mi save hatwok long pulim win. Paul i save holimpasim mi na beten wantaim mi. Mipela i save singim ol Kingdom song i go inap long mi no pret na guria moa. Mi pilim olsem mi wok long go longlong na mi no inap mekim moa wok olsem misineri.

Mi no inap lusim tingting long samting i kamap bihain. Long dispela wik, mipela i kisim tupela magasin. Wanpela em Awake! bilong Jun 8, 1996. Em i gat dispela atikol “Coping With Panic Attacks.” Nau mi kliagut long samting i painim mi. Narapela magasin em Wastaua bilong Me 15, 1996, em i gat dispela atikol “Ol i Kisim Strong Bilong Ol Long We?” Dispela Wastaua i gat piksa bilong wanpela bataflai em wing bilong en i bagarap. Dispela atikol i tok wankain olsem wanpela bataflai i ken wok yet long kaikai na flai maski ol wing bilong en i bagarap, holi spirit bilong Jehova i ken helpim yumi tu long wok yet long helpim ol narapela maski bel na tingting bilong yumi i bagarap tru. Ol dispela atikol em rot Jehova i strongim mi long taim stret mi nidim helpim. (Mat. 24:45) Mi save mekim wok painimaut long dispela topik na mi gat tu wanpela folda em mi save putim ol atikol i stori long dispela topik insait long en na dispela i bin helpim mi tru. Bihain long sampela haptaim i lus, isi isi mi no karim moa hevi bilong tingting planti na pret taim mi tingim ol hevi bilong bipo.

Paul: Sampela taim mipela i mas lusim Laibiria, tasol taim mipela i go bek, mipela i save amamas tru. Klostu long pinis bilong yia 2004, mipela i stap long asainmen bilong mipela klostu 20 yia olgeta. Woa i pinis. Na ol brata i wokim plen long mekim wok konstraksen long brens. Tasol mipela i kirap nogut taim ol i askim mipela long kisim nupela asainmen.

 Dispela em bikpela traim long mitupela. Mipela i pas gut tru wantaim ol bratasista, so hau bai mipela lusim ol na i go? Tasol mipela i luksave olsem taim mipela i lusim ol famili bilong mipela long go long Skul Gileat, mipela i bin putim mipela yet long han bilong Jehova na mipela i kisim planti blesing, so mipela i tok orait long mekim nupela asainmen. Ol i salim mipela i go long Gana, em kantri i stap klostu long Laibiria.

Anne: Mipela i krai planti taim mipela i lusim Laibiria. Mipela i kirap nogut taim Frank em wanpela brata i gat bikpela krismas na em i gat savetingting, em i tokim mipela: “Yupela i mas lusim tingting long mipela!” Na em i tok moa olsem: “Mipela i save yupela i no inap lusim tingting long mipela, tasol yupela i mas givim bel olgeta long mekim nupela asainmen bilong yupela. Dispela asainmen i kam long Jehova, so putim tingting olgeta long helpim ol bratasista long hap.” Tok bilong em i strongim mipela long redi long kisim ol nupela pren long kantri we planti i no save long mipela na olgeta samting i nupela long mipela.

Paul: Tasol i no longtaim na mipela i laikim tru ol bratasista long Gana. I gat planti Witnes tru i stap long hap! Mipela i kisim planti skul long pasin bilong ol bratasista long Gana long stap gut long Jehova na sanap strong long bilip. Mipela i mekim wok long Gana inap 13 yia na mipela i kisim narapela saprais. Ol brata i askim mipela long mekim wok long Is Afrika brens long Kenya. Mipela i misim tru ol pren bilong mipela long ol olpela asainmen bilong mipela, tasol i no longtaim na mipela i pas gut wantaim ol bratasista long Kenya. Na olsem Gana na Laibiria, i gat planti wok long mekim long Kenya.

Anne: Long ol yia i go pinis, mi bungim planti hevi na sampela taim pret i daunim mi tru. Taim ol bikpela hevi i kamap we yu inap lusim laip bilong yu, dispela inap mekim yu sik na yu inap tingting planti na pret nogut tru. Yumi no ekspektim Jehova long banisim yumi long ol dispela hevi, nogat. Long nau, sapos mi harim gan i pairap, bel bilong mi i no save stap isi na tupela han bilong mi i save dai. Tasol mi lain long kisim helpim long olgeta samting Jehova i givim bilong strongim yumi, dispela i makim tu helpim yumi kisim long ol bratasista bilong yumi. Na mi lukim olsem sapos yumi mekim pesenel stadi, beten, go long ol miting, na autim tok long olgeta taim, Jehova i ken helpim yumi long mekim yet asainmen bilong yumi.

Paul: Sampela inap askim olsem, “Yu laikim asainmen bilong yu?” Ol kantri inap luk nais, tasol hevi na taim nogut inap kamap insait long kantri. So mipela i laikim wanem samting moa winim ol kantri? Mipela i laikim tru ol bratasista i dia tumas em ol i famili bilong mipela. Maski yumi bilong narapela narapela bekgraun, yumi holim wankain tingting. Mipela i ting olsem Jehova i salim mipela i go bilong strongim ol, tasol tru tru ol i bin strongim mipela.

Long olgeta taim mipela i muv i go long nupela hap, mipela i lukim bikpela lain bratasista i stap na dispela em mirakel Jehova i wokim. Maski yumi stap long wanem hap, kongrigesen bilong yumi em famili bilong yumi, em ples yumi stap gut long en na pilim seif. Mipela i bilip tru olsem sapos yumi trastim Jehova long olgeta taim, em bai strongim yumi long karim ol hevi maski wanem samting i kamap.—Fili. 4:13.