1. Wai na yumi ken kisim skul long ol lapun?

 YUMI olgeta i nidim ol stiatok bilong mekim ol bikpela disisen long laip bilong yumi. Yumi ken kisim ol dispela stiatok long rot bilong ol elda na ol narapela Kristen em ol i strong long bilip. Sapos ol i gat bikpela krismas moa winim krismas bilong yumi, yumi no ken sakim edvais ol i givim na ting ol dispela edvais i bilong bipo. Jehova i laik yumi mas kisim skul long ol lapun. Ol i stap laip longpela taim moa winim yumi, na ol i gat bikpela ekspiriens, ol i kliagut moa long ol samting, na ol i gat savetingting.—Jop 12:12.

2. Dispela atikol bai stori long wanem samting?

² Long taim bilong Baibel, Jehova i bin yusim ol lapun i stap gut long em bilong givim ol tok bilong strongim na stiaim lain bilong em. Tingim ol eksampel olsem, Moses, Devit, na aposel Jon. Ol i stap laip long narapela narapela haptaim, na sindaun bilong ol i no wankain. Taim ol i kamap lapun tru na klostu ol bai dai, ol i givim ol gutpela edvais long ol yangpela. Olgeta wan wan bilong ol dispela bilipman i tok olsem pasin bilong bihainim tok bilong God em i bikpela samting. Jehova i lukautim tok bilong ol i stap long Baibel bilong helpim yumi long nau. Maski yumi yangpela o lapun, yumi ken kisim gutpela helpim long rot bilong skelim gen ol tok kaunsel ol i givim. (Rom 15:4; 2 Tim. 3:16) Long dispela atikol, yumi bai stori long ol laspela tok em dispela 3-pela man i bin mekim na skul yumi ken kisim long tok bilong ol.

“EM BAI LARIM YUPELA I STAP LONGPELA TAIM”

3. Long wanem ol rot Moses i mekim wok bilong God?

³ Moses i givim bel olgeta long mekim wok bilong Jehova. Em i mekim wok olsem wanpela profet, wanpela jas, wanpela komanda, na man bilong raitim stori bilong ol samting i kamap long bipo. Moses i gat planti ekspiriens long laip! Em i lidim lain Israel long lusim wok kalabus long Isip, na em i bin lukim planti mirakel Jehova i wokim. Jehova i yusim em long raitim fes 5-pela buk bilong  Baibel, na Buk Song 90, na ating Buk Song 91 tu. Na i luk olsem em i raitim tu Buk Jop.

4. Moses i strongim husat, na bilong wanem?

⁴ Paslain liklik long Moses i dai long taim em i gat 120 krismas, em i singautim lain Israel i kam bung na em i givim ol tok bilong kirapim ol long tingim gen ol samting ol i bin lukim na ekspiriensim. Sampela bilong ol dispela manmeri i putim yau long em, ol i bin stap yangpela yet taim ol i lukim planti sain na ol mirakel Jehova i bin wokim, na tu, ol i lukim Jehova i mekim save long lain Isip. (Kis. 7:​3, 4) Ol i bin wokabaut namel long Solwara Retsi taim Jehova i brukim solwara i go long tupela hap na ol i lukim Jehova i bagarapim na pinisim lain ami bilong Fero. (Kis. 14:​29-31) Taim ol i raun long ples drai nating, ol i lukim Jehova i lukautim ol na givim ol samting ol i nidim. (Lo 8:​3, 4) Nau lain Israel i redi long i go insait long Graun Bilong Promis, olsem na Moses i yusim dispela haptaim long strongim ol. a

5. Olsem wanem ol tok bilong Moses i stap long Lo 30:​19, 20 i mekim gut bel bilong lain Israel?

⁵ Moses i tok wanem? (Ritim Lo 30:​19, 20.) Klostu nau i gat gutpela samting bai painim lain Israel. Jehova bai blesim lain Israel na ol bai stap longpela taim long dispela graun em i promis long givim long ol. Na em naispela graun tru we i kamapim planti gutpela kaikai! Moses i tok long dispela graun olsem: “Em graun i gat ol gutpela strongpela taun yupela yet i no bin wokim, ol haus i pulap long olgeta kain gutpela samting em yupela yet i no bin hatwok long bungim, na ol hulwara em yupela yet i no bin wokim, na ol gaden wain na ol diwai oliv em yupela yet i no bin planim.”—Lo 6:​10, 11.

6. Wai na God i larim ol narapela kantri i daunim lain Israel?

⁶ Moses i givim tu tok lukaut long lain Israel. Em i tokim ol olsem sapos ol i laik stap yet long dispela gutpela graun tru, orait ol i mas wok yet long bihainim ol lo bilong Jehova. Moses i kirapim ol long “makim rot bilong laip” long rot bilong bihainim ol tok bilong Jehova na “pas gut tru long em.” Tasol lain Israel i sakim Jehova. So inap sampela haptaim bihain, God i larim ol Asiria i kam pait na daunim ol, na bihain Babilon i kam daunim ol na kisim ol i go kalabus.—2 Kin. 17:​6-8, 13, 14; 2 Sto. 36:​15-17, 20.

7. Yumi inap kisim wanem skul long tok bilong Moses? (Lukim tu piksa.)

⁷ Yumi inap kisim wanem skul? Pasin bilong bihainim tok i save lukautim laip bilong yumi. Wankain olsem lain Israel em klostu tru ol i go insait long Graun Bilong Promis, yumi tu i stap long haptaim we klostu tru yumi bai go insait long nupela taim God i promis long kamapim, na yumi bai lukim graun i kamap Paradais. (Ais. 35:1; Luk 23:43) Satan na ol spirit nogut bilong em bai i no stap moa. (Rev. 20:​2, 3) Lotu giaman bai i no inap pulim ol manmeri i go longwe long Jehova olsem long bipo. (Rev. 17:16) Ol gavman bilong graun bai no inap mekim nogut moa long ol man i stap aninit long ol. (Rev. 19:​19, 20) Na ol bikhetman bai i no stap long Paradais. (Sng. 37:​10, 11) Ol manmeri long olgeta hap bai bihainim ol stretpela lo bilong Jehova, em ol lo we i save strongim pasin wanbel na bel isi. Dispela bai mekim na ol bai laikim tru na trastim tru narapela narapela. (Ais. 11:9) Em gutpela samting tru yumi ken bilip na wet long en! Na tu, sapos yumi wok yet long bihainim ol tok bilong Jehova, yumi bai stap laip long Paradais long graun inap planti handret yia na i go inap oltaim oltaim.—Sng. 37:29; Jon 3:16.

8. Olsem wanem tok promis bilong laip oltaim i bin helpim wanpela husat i mekim wok misineri inap longpela taim? (Jut 20, 21)

⁸ Sapos oltaim yumi save tingim tok promis  bilong God long givim yumi laip oltaim, orait yumi bai pas gut yet wantaim em maski yumi bungim wanem ol hevi. (Ritim Jut 20, 21.) Na tu, dispela tok promis i ken helpim yumi long wok strong long daunim ol pasin kranki bilong yumi. Wanpela brata husat i mekim wok misineri long Afrika inap longpela taim, em i wok strong long daunim wanpela pasin kranki bilong em, em i tok: “Mi luksave olsem mi no inap stap oltaim long Paradais sapos mi no bihainim tok bilong Jehova, na dispela i helpim mi long wok strong long daunim pasin kranki bilong mi na beten strong long Jehova long helpim mi. Em i helpim mi na mi daunim dispela pasin.”

“OLGETA WOK YU MEKIM BAI KAMAP GUTPELA”

9. Devit i bungim wanem ol hevi long laip bilong em?

⁹ Devit em wanpela gutpela king tru. Em wanpela man bilong mekim musik, raitim poem, wanpela strongpela soldia, na wanpela profet. Em i bin bungim planti hevi. Inap sampela yia, em i bin stap olsem ranaweman na em i wok long ranawe long jeles King Sol. Bihain long Devit i kamap king, em i tingim laip bilong em na em i mas ranawe gen bikos pikinini man bilong em Apsalom i traim long stilim wok king bilong em. Maski i gat planti hatwok long laip bilong Devit na sampela pasin em i mekim i no stret, em i stap gut long God i go inap long em i dai. Jehova i tok long em olsem: “Em man i save mekim ol samting i stret wantaim ol tingting i stap long bel bilong mi.” So i stret yumi mas putim yau long ol edvais bilong Devit!—Apo. 13:22; 1 Kin. 15:5.

10. Wai na Devit i givim tok kaunsel long pikinini man bilong em Solomon em man bai kisim wok king bilong em?

¹⁰ Tingim tok kaunsel Devit i givim long pikinini man bilong em Solomon em man bai kisim wok king bilong em. Jehova i bin makim dispela yangpela man long wok yet long strongim lotu i tru na wokim tempel bilong givim ona long God. (1 Sto. 22:5) Solomon inap bungim ol hatwok. Devit i tok wanem long em? Yumi ken skelim.

11. (a) Olsem 1 King 2:​2, 3 i kamapim, Devit i givim wanem tok long Solomon? (b) Wanem samting i kamap taim Solomon i bihainim ol dispela tok? (Lukim tu piksa.)

¹¹ Devit i tok wanem? (Ritim 1 King 2:​2, 3.) Devit i tokim pikinini man bilong em olsem sapos em i bihainim tok bilong Jehova, olgeta wok em i mekim bai kamap gutpela. Na inap planti yia, Solomon i amamas olsem ol wok em i mekim i kamap gutpela. (1 Sto. 29:​23-25) Em i wokim wanpela naispela tempel i gat biknem tru, na em i raitim sampela buk bilong Baibel. Em i kisim biknem tru long gutpela savetingting na mani kago bilong em. (1 Kin. 4:34) Tasol olsem Devit i bin tok, olgeta wok samting Solomon i mekim bai kamap gutpela sapos em i bihainim tok bilong God Jehova. Sori tru, taim Solomon i kamap lapun em i kirap long lotuim ol narapela God. Jehova i no orait moa long Solomon, na Solomon i no gat moa savetingting bilong bosim ol manmeri long stretpela pasin na pasin i fea.—1 Kin. 11:​9, 10; 12:4.

12. Yumi inap kisim wanem skul long tok bilong Devit?

 ¹² Yumi inap kisim wanem skul? Pasin bilong bihainim tok i save kamapim gutpela samting. (Sng. 1:​1-3) Jehova i no tok promis long givim yumi planti mani kago na glori wankain olsem em i mekim long Solomon. Tasol taim yumi bihainim tok bilong God, em bai givim yumi savetingting em yumi nidim bilong mekim ol gutpela disisen. (Prov. 2:​6, 7; Jems 1:5) Ol stiatok bilong em i ken stiaim yumi long mekim gutpela disisen long ol samting olsem wok mani, ediukesen, ol amamas, na mani. Taim yumi bihainim ol stiatok bilong God, dispela bai lukautim pasin pren bilong yumi wantaim em na yumi inap stap laip oltaim long bihain. (Prov. 2:​10, 11) Yumi bai i gat ol gutpela pren. Na yumi bai i gat ol stiatok bilong helpim yumi long stap amamas wantaim famili bilong yumi.

13. Wanem samting i helpim Carmen long mekim gutpela disisen long laip bilong em?

¹³ Carmen i save stap long Mosambik, em i ting olsem bikpela ediukesen bai helpim em long stap gut. Em i skul long wanpela yunivesiti bilong kamap akitek. Em i tok: “Mi laikim ol samting mi lainim long skul. Tasol dispela i kisim bikpela haptaim na strong bilong mi. Mi save stap long skul kirap long 7:30 a.m. long moning i go inap long 6:00 p.m. long apinun. I hatwok long mi go long ol miting na mi no pas gut moa wantaim Jehova. Insait tru long bel bilong mi, mi luksave olsem mi traim long mekim wok bilong tupela bosman.” (Mat. 6:24) Em i beten long dispela samting na em i mekim ol wok painimaut long ol pablikesen bilong yumi. Em i tok: “Mi kisim ol gutpela edvais long ol brata i gat strongpela bilip na long mama bilong mi, na mi wokim disisen long lusim yunivesiti na mekim wok bilong Jehova fultaim. Dispela i helpim mi long mekim ol gutpela disisen long laip bilong mi na mi no rigret.”

14. Wanem bikpela tok em Moses na Devit i bin mekim?

¹⁴ Moses na Devit i laikim tru Jehova na ol i pilim olsem em i bikpela samting long bihainim tok bilong em. Long laspela tok bilong ol, ol i strongim ol man i putim yau long ol long bihainim eksampel bilong ol long pas gut wantaim Jehova em God bilong ol. Na tu, tupela i givim tok lukaut olsem ol manmeri husat i lusim Jehova, Em bai i no orait moa long ol na ol bai i no inap kisim ol blesing em i promis long givim long ol. Edvais ol i givim i bikpela samting long yumi long nau tu. Planti handret yia bihain, narapela wokman  bilong Jehova i soim olsem em i bikpela samting long stap gut yet long God.

“BIKPELA AMAMAS TRU”

15. Aposel Jon i ekspiriensim wanem samting long laip bilong em?

¹⁵ Jon em wanpela aposel Jisas Krais i save laikim tru. (Mat. 10:2; Jon 19:26) Jon i poromanim Jisas long mekim wok autim tok, em i lukim ol mirakel Jisas i wokim, na em i stap wantaim Jisas long taim bilong hevi. Em i lukluk i stap taim ol man i kilim Jisas i dai, na em i lukim em bihain long em i kirap bek. Jon i lukim lotu Kristen i go bikpela long taim bilong em—pastaim ol i stap olsem liklik grup bilong ol man i stap gut long God na bihain ol i go bikpela na “autim dispela gutnius long olgeta hap bilong graun aninit long skai.”—Kol. 1:23.

16. Ol pas Jon i raitim i helpim husat?

¹⁶ Taim Jon i kamap lapun tru, em i kisim gutpela blesing long raitim sampela tok moa bilong Baibel. “Jisas Krais i kamapim wanpela tok hait” long em na em i raitim ol dispela tok long Buk Revelesen. (Rev. 1:1) Jon i raitim wanpela Gutnius bilong Baibel em Buk Jon. Na tu, holi spirit i kirapim em long raitim 3-pela pas moa. Em i raitim namba 3 pas bilong em i go long wanpela gutpela Kristen, nem bilong em Gaius, em i stap olsem pikinini bilong Jon long sait bilong bilip. (3 Jon 1) Ating long dispela taim, i gat planti Kristen em Jon i tingim ol olsem ol pikinini bilong em long sait bilong bilip. Ol tok em dispela bilipman i bin raitim i strongim ol disaipel bilong Jisas i kam inap long taim bilong yumi long nau.

17. Olsem 3 Jon 4 i kamapim, wanem samting i save kamapim bikpela amamas?

¹⁷ Jon i raitim wanem tok? (Ritim 3 Jon 4.) Jon i tok long amamas em ol man i save kisim long pasin bilong bihainim tok bilong God. Long taim Jon i raitim namba 3 pas bilong em, sampela manmeri i bin skulim ol narapela long ol tok giaman na ol i wok long brukim lain. Tasol planti i “wokabaut yet long tok i tru.” Ol i bihainim tok bilong Jehova na “wok yet long bihainim ol lo bilong em.” (2 Jon 4, 6) Pasin bilong ol dispela Kristen long stap gut long God i bringim bikpela amamas long Jon na long Jehova tu.—Prov. 27:11.

18. Yumi inap kisim wanem skul long tok bilong Jon?

¹⁸ Yumi inap kisim wanem skul? Pasin bilong stap gut long God i save kamapim amamas. (1 Jon 5:3) Olsem, yumi save amamas taim yumi save olsem yumi mekim Jehova i amamas. Em i save amamas long lukim yumi sakim ol traim bilong dispela graun na bihainim yet tok i tru. (Prov. 23:15) Ol ensel long heven tu i save amamas taim ol i lukim yumi mekim olsem. (Luk 15:10) Yumi  tu i ken amamas taim yumi lukim ol narapela i stap gut long God, moa yet long taim ol i bungim ol hevi na ol traim. (2 Tes. 1:4) Na taim God i pinisim dispela haptaim bilong nau, yumi bai amamas tru long save olsem yumi bin stap gut long Jehova long dispela graun em Satan i bin bosim.

19. Wanpela sista nem bilong em Rachel i tok wanem long pasin bilong skulim ol narapela long tok i tru? (Lukim tu piksa.)

¹⁹ Yumi save amamas tru taim yumi skulim ol narapela long tok i tru. Rachel em wanpela sista i save stap long Dominiken Ripablik, em i pilim olsem pasin bilong skulim ol narapela long gutpela God bilong yumi em wanpela naispela blesing tru. Em i tingim ol manmeri em i bin helpim ol long kirap lotuim Jehova, na em i tok: “Mi save kisim bikpela amamas tru taim mi lukim ol manmeri mi skulim ol i kirap long laikim Jehova, trastim em, na mekim ol senis long laip bilong ol bilong amamasim Jehova. Dispela bikpela amamas mi pilim i winim tru olgeta hatwok na sakrifais mi mekim bilong skulim ol.”

KISIM HELPIM LONG OL LASPELA TOK BILONG OL BILIPMAN

20. Wanem ol samting long Moses, Devit, na Jon i wankain long yumi long nau?

²⁰ Ol haptaim we Moses, Devit, na Jon i stap long en na sindaun bilong ol i no wankain long yumi. Tasol i gat planti samting long ol i wankain long yumi. Ol i mekim wok bilong God tru na yumi tu i mekim olsem. Yumi beten long Jehova, trastim em, na larim em i stiaim yumi wankain olsem ol i bin mekim. Na wankain olsem ol dispela bilipman bilong bipo, yumi save tru olsem Jehova i save blesim ol manmeri husat i bihainim tok bilong em.

21. Ol manmeri i bihainim ol tok bilong ol bilipman olsem Moses, Devit, na Jon, ol bai kisim wanem ol blesing?

²¹ Yumi ken bihainim ol tok bilong ol dispela bilipman long rot bilong bihainim ol lo bilong Jehova. Taim yumi mekim olsem, olgeta wok samting yumi mekim bai kamap gutpela. Yumi bai stap laip na “stap longpela taim,” yes stap laip oltaim oltaim! (Lo 30:20) Na yumi bai amamas tru long mekim ol samting bilong amamasim gutpela Papa bilong yumi long heven, em Man i save truim olgeta tok promis bilong em long ol rot we yumi hatwok long tingim o piksaim long tingting.—Efe. 3:20.