1. Aposel Pol i pilim olsem wanem long ol kongrigesen sevan?

 OL KONGRIGESEN sevan i save mekim bikpela wok insait long ol kongrigesen. I klia tru olsem aposel Pol i amamas long ol dispela brata i save mekim gut wok. Olsem, taim em i raitim pas i go long ol Kristen long Filipai, em i salim griting long ol kongrigesen sevan na long ol elda.—Fili. 1:1.

2. Wanpela brata nem bilong em Luis, em i pilim olsem wanem long asainmen bilong em olsem wanpela kongrigesen sevan?

² Planti baptais brata, maski ol i yangpela o lapun, ol i kisim bikpela amamas long mekim wok olsem ol kongrigesen sevan. Olsem, Devan i bin gat 18 krismas taim em i kirap mekim wok olsem kongrigesen sevan. Na wanpela brata nem bilong em Luis, em i kirap mekim wok olsem kongrigesen sevan taim em i gat 50 krismas samting. Em i kamapim tingting em planti i gat taim em i tok: “Mi amamas tru long mekim wok olsem kongrigesen sevan, moa yet taim mi tingim pasin laikim em olgeta insait long kongrigesen i mekim long mi!”

3. Yumi bai kisim bekim bilong wanem ol askim?

³ Sapos yu wanpela baptais brata na yu no mekim yet wok olsem wanpela kongrigesen sevan, orait yu ting yu ken putim dispela olsem wanpela mak yu laik winim? Wanem samting i ken kirapim yu long mekim olsem? Na Baibel i kolim wanem ol mak em yu mas winim bilong mekim dispela wok? Long dispela atikol, yumi bai kisim bekim bilong ol dispela askim. Tasol pastaim, yumi ken stori long wanem wok ol kongrigesen sevan i save mekim.

WANEM WOK BILONG OL KONGRIGESEN SEVAN?

4. Wanem wok bilong ol kongrigesen sevan? (Lukim tu piksa.)

⁴ Kongrigesen sevan em wanpela brata i baptais pinis na holi spirit i makim em long helpim ol elda long lukautim planti bikpela  wok insait long kongrigesen. Sampela kongrigesen sevan i save lukautim ol teritori na putim oda long ol litresa em ol pablisa i ken yusim long autim tok. Ol narapela i save lukautim wok bilong klinim na lukautim Haus Kingdom. Na tu, ol kongrigesen sevan i save mekim wok olsem ol atendan na lukautim ol samting bilong saun na vidio em ol i save yusim long taim bilong ol miting bilong kongrigesen. Planti wok em ol kongrigesen sevan i save mekim em bilong helpim ol narapela. Tasol bikpela samting moa, ol kongrigesen sevan i save tingim tru ol samting bilong bilip, ol i laikim tru Jehova, na ol i bihainim ol stretpela lo bilong em. Na ol i laikim tru ol bratasista Kristen bilong ol. (Mat. 22:​37-39) Wanpela baptais brata i ken mekim wanem bilong winim mak bilong kamap kongrigesen sevan?

5. Ol brata i ken mekim wanem bilong winim mak bilong kamap kongrigesen sevan?

⁵ Baibel i kolim ol mak em ol brata i mas winim bilong kamap ol kongrigesen sevan. (1 Tim. 3:​8-10, 12, 13) Yu ken winim mak bilong mekim dispela wok long rot bilong stadi gut long ol dispela mak em Baibel i kolim na wok strong long winim ol. Tasol pastaim, yu mas tingim gut risen na yu laik winim mak bilong mekim wok olsem kongrigesen sevan.

WAI NA YU LAIK WINIM MAK BILONG KAMAP KONGRIGESEN SEVAN?

6. Wanem samting i mas kirapim yu long mekim olgeta kain wok bilong helpim ol bratasista bilong yu? (Matyu 20:28; lukim tu piksa.)

⁶ Jisas Krais em i stap nambawan gutpela eksampel long yumi, em i laikim Papa bilong em na em i laikim ol manmeri, na dispela i kirapim em long helpim ol narapela. Pasin laikim i kirapim em long givim bel tru na em i daunim em yet na mekim ol samting bilong helpim ol narapela. (Ritim Matyu 20:28; Jon 13:​5, 14, 15) Sapos pasin laikim i kirapim yu long helpim ol narapela, Jehova bai blesim yu na helpim yu long winim mak yu putim bilong kamap wanpela kongrigesen sevan.—1 Kor. 16:14; 1 Pita 5:5.

7. Wai na i no stret long wanpela brata i kamap kongrigesen sevan bilong kisim biknem?

⁷ Long dispela graun, planti taim ol narapela i save givim biknem long ol man husat i save apim nem bilong ol yet. Dispela kain pasin i no stap insait long oganaisesen bilong Jehova. Wanpela brata husat i laikim ol narapela olsem Jisas i bin mekim, em i no save bosim ol narapela o apim nem bilong em yet. Sapos wanpela brata husat i laik kisim biknem i mekim wok olsem kongrigesen sevan, ating em i no inap mekim sampela  wok i no gat nem bilong lukautim ol sipsip bilong Jehova em ol i dia tumas long Em. Em inap tingim ol dispela wok olsem samting nating na i no stret long em i mekim. (Jon 10:12) Jehova i no inap blesim hatwok bilong wanpela husat i larim pasin antap o pasin bilong kisim biknem i stiaim wok em i mekim.—1 Kor. 10:​24, 33; 13:​4, 5.

8. Jisas i givim wanem tok kaunsel long ol aposel bilong em?

⁸ Sampela taim, ol gutpela pren bilong Jisas tu i laik winim mak bilong mekim sampela wok, tasol astingting bilong ol i no stret. Tingim samting em Jems na Jon i bin mekim, em tupela aposel bilong Jisas. Ol i askim Jisas long givim ol wok i gat namba insait long Kingdom bilong em. Jisas i no tok amamas long ol i laik kisim wok i gat namba, nogat. Em i tokim olgeta 12-pela aposel bilong em olsem: “Man i laik kamap bikman namel long yupela, em i mas stap wokman bilong yupela. Na man i laik stap fes namel long yupela, em i mas stap wokboi bilong olgeta.” (Mak 10:​35-37, 43, 44) Ol brata em astingting bilong ol long winim mak em bikos ol i laik helpim ol narapela, ol bai stap olsem blesing insait long kongrigesen.—1 Tes. 2:8.

HAU YU INAP STRONGIM LAIK BILONG WINIM DISPELA MAK?

9. Hau yu ken strongim laik bilong yu long winim mak bilong kamap kongrigesen sevan?

⁹ Tru tumas, yu laikim Jehova na yu laik helpim ol narapela. Tasol ating yu no gat laik long mekim ol wok em ol kongrigesen sevan i mas mekim. Hau yu ken strongim laik bilong yu long mekim ol dispela wok? Tingim amamas em yu inap kisim taim yu mekim ol wok bilong helpim ol bratasista bilong yu. Jisas i tok: “Amamas bilong givim samting i winim amamas bilong kisim samting.” (Apo. 20:35) Em yet i bihainim dispela stiatok. Em i kisim amamas tru long mekim ol wok bilong helpim ol narapela, na yu tu inap kisim kain amamas olsem.

10. Olsem wanem Jisas i soim olsem em i amamas long helpim ol narapela? (Mak 6:​31-34)

¹⁰ Tingim wanpela eksampel i soim olsem Jisas i amamas long helpim ol narapela. (Ritim Mak 6:​31-34.) Wanpela taim, Jisas na ol aposel bilong em i taiet. Ol i wok long i go long wanpela hap i no gat man na bai ol i ken malolo. Tasol bikpela lain manmeri i go kamap long dispela hap paslain long ol bikos ol i laik bai Jisas i skulim ol. Jisas inap tok nogat long skulim ol. Bikos Jisas na ol pren bilong em “ol i no gat taim bilong kaikai.” O Jisas inap skulim ol long wanpela o tupela tok i tru na salim ol i go. Tasol em i gat pasin laikim, olsem na em i “kirap skulim ol long planti samting.” Na em i wok yet long skulim ol i go inap long “apinun.” (Mak 6:35) Em i mekim olsem bikos em i “sori tru long ol,” na i no bikos em wok em i mas mekim, nogat. Em i laik skulim ol bikos em i laikim ol. Jisas i kisim bikpela amamas tru taim em i helpim ol narapela.

11. Jisas i mekim wanem bilong helpim ol manmeri i putim yau long em? (Lukim tu piksa.)

¹¹ Taim Jisas i autim tok long bikpela lain manmeri, em i skulim ol na em i mekim sampela samting moa. Em i helpim ol tu long ol samting bilong skin em ol i nidim. Em i wokim mirakel na givim kaikai long ol na em i tokim ol disaipel bilong em long tilim ol dispela kaikai long ol manmeri. (Mak 6:41) Taim em i mekim olsem, em i skulim ol disaipel bilong em long hau ol i ken helpim ol narapela. Na tu, em i soim ol olsem ol wok ol i mekim bilong helpim ol narapela—olsem ol wok em ol kongrigesen sevan i save mekim—ol i bikpela wok. Piksaim long tingting bikpela amamas ol aposel i kisim long wok wantaim Jisas long tilim ol dispela kaikai long ol manmeri, na “olgeta i kaikai na ol i pulap”! (Mak 6:42) Tasol dispela em i no fes taim Jisas i putim laik bilong ol narapela i go pas long laik bilong em yet, nogat. Taim em i stap long graun, em i yusim laip olgeta bilong em long helpim ol manmeri. (Mat. 4:23; 8:16) Jisas i kisim bikpela amamas long  skulim ol narapela na long daunim em yet na helpim ol long ol samting ol i nidim. Tru tumas, yu tu bai kisim kain amamas olsem taim yu daunim laik bilong yu yet na winim mak bilong kamap kongrigesen sevan.

12. Wai na yumi no ken ting olsem i no gat wanpela samting yumi inap mekim bilong helpim kongrigesen?

¹² Sapos yu pilim olsem yu no gat gutpela save bilong mekim wanpela wok, orait yu no ken bel hevi. Yu gat ol gutpela pasin na dispela inap opim rot long yu inap helpim gut kongrigesen. Yu ken kisim helpim taim yu beten na ritim tok bilong Pol i stap long 1 Korin 12:​12-30. Tok bilong Pol i kamapim klia olsem wankain olsem olgeta narapela wokman bilong Jehova, yu dia tumas long kongrigesen na kongrigesen i nidim yu. Long nau yet, sapos yu no winim mak bilong kamap wanpela kongrigesen sevan, orait no ken larim dispela i daunim yu. Mekim ol samting yu inap mekim long wok bilong Jehova na helpim ol bratasista bilong yu. Tingim olsem, ol elda bai tingim save na strong bilong yu na ol bai givim ol asainmen i stret long yu.—Rom 12:​4-8.

13. Planti bilong ol mak em ol brata i mas winim bilong kamap kongrigesen sevan, ol i stret tu long husat?

¹³ Tingim wanpela moa risen na yu mas winim mak bilong kamap kongrigesen sevan: Planti bilong ol dispela mak em ol brata i mas winim bilong kamap kongrigesen sevan, ol i stret tu long olgeta Kristen i mas winim. Olgeta Kristen i mas pas gut wantaim Jehova, kisim amamas long pasin bilong givim samting, na stap gutpela eksampel long i stap bilong ol olsem ol Kristen. Wanpela brata i ken mekim wanem samting stret bilong winim mak bilong kamap kongrigesen sevan?

HAU LONG WINIM MAK BILONG KAMAP KONGRIGESEN SEVAN

14. Dispela tok “mekim pasin we ol arapela i ken rispektim ol” i makim wanem? (1 Timoti 3:​8-10, 12)

¹⁴ Yumi ken stori long sampela mak em ol brata i mas winim bilong kamap kongrigesen sevan olsem i stap long 1 Timoti 3:​8-10, 12. (Ritim.) Ol kongrigesen sevan i mas “mekim pasin we ol arapela i ken rispektim ol.” Dispela i no makim olsem oltaim yu mas siries na yu no ken lap o tok pilai wantaim ol narapela, nogat. (Ekl. 3:​1, 4) Tasol em i makim olsem yu mas givim bel tru long inapim ol wok bilong yu. Sapos yu gat gutnem olsem man em ol narapela i ken trastim na kisim helpim long em, orait olgeta insait long kongrigesen bai rispektim yu.

15. Ol dispela tok “no ken i stap olsem man bilong tupela maus” na “no ken i stap olsem man i save mekim ol samting long pasin gridi bilong helpim em yet” i makim wanem?

¹⁵ Dispela tok “no ken i stap olsem man bilong  tupela maus” i makim olsem yu gat onest pasin na ol narapela i ken trastim yu. Yu save truim tok bilong yu na yu no save giamanim ol narapela. (Prov. 3:32) Na dispela tok “no ken i stap olsem man i save mekim ol samting long pasin gridi bilong helpim em yet” i makim olsem yu save mekim onest pasin long ol wok bisnis bilong yu wantaim ol narapela na long taim yu lukautim mani em ol bratasista i givim olsem donesen. Yu no inap mekim pasin gridi na yusim ol pren bilong yu insait long kongrigesen long kisim mani.

16. (a) Dispela tok “no ken i stap olsem man bilong dring planti tumas wain” i makim wanem? (b) Dispela tok “maus bilong bel bilong ol i mas i stap klin” i makim wanem?

¹⁶ Dispela tok “no ken i stap olsem man bilong dring planti tumas wain” i makim olsem yu no ken dring planti alkohol o i gat nem olsem man bilong dring planti. Dispela tok “maus bilong bel bilong ol i mas i stap klin” i makim olsem yu save bihainim ol lo bilong Jehova long i stap bilong yu. Maski yu no gutpela olgeta, yu kisim bel isi bikos yu pas gut wantaim God.

17. Dispela tok “traim wok bilong ol bai yupela i ken save olsem ol i fit long mekim wok o nogat” i makim wanem? (1 Timoti 3:10; lukim tu piksa.)

¹⁷ Dispela tok “traim wok bilong ol bai yupela i ken save olsem ol i fit long mekim wok o nogat” i makim olsem yu soim pinis olsem ol narapela i ken trastim yu long mekim gut ol wok. Olsem na taim ol elda i givim yu wanpela asainmen, bihainim gut ol instraksen ol i givim na ol gaidlain i kam long oganaisesen. Yu mas kliagut long wanem ol samting yu mas mekim bilong inapim dispela asainmen na wanem taim yu mas pinisim. Taim yu givim bel long mekim gut ol asainmen bilong yu, ol narapela insait long kongrigesen bai luksave long dispela na ol bai amamas long gutpela wok bilong yu. Ol elda, redi long trenim ol baptais brata. (Ritim 1 Timoti 3:10.) I gat ol baptais brata long kongrigesen bilong yu em ol i tineja o ol i no winim yet 13 krismas? Ol i gat pasin bilong mekim gut pesenel stadi na redim ol miting? Oltaim ol i save bekim tok long ol miting na insait long wok autim tok? Sapos olsem, orait givim ol asainmen long ol we i stret long krismas na sindaun bilong ol. Long dispela rot, yupela i “traim wok bilong ol [dispela yangpela brata] bai yupela i ken save olsem ol i fit long mekim wok o nogat.” Na taim ol i gat 18 o 19 krismas samting, ol inap winim mak long mekim wok olsem ol kongrigesen sevan.

18. Dispela tok stap olsem man “ol arapela i no inap sutim tok” long yu i makim wanem?

¹⁸ Dispela tok stap olsem man “ol arapela i no inap sutim tok” long yu i makim olsem ol narapela i no inap sutim tok long yu olsem yu mekim  wanpela bikpela sin. Tasol sampela taim, ol narapela inap sutim tok giaman long ol Kristen. Ol narapela i bin sutim ol tok giaman long Jisas, na em i tok profet olsem ol disaipel bilong em bai bungim wankain hevi olsem. (Jon 15:20) Tasol sapos yu wok yet long bihainim stretpela pasin olsem Jisas i bin mekim, yu bai gat gutnem insait long kongrigesen.—Mat. 11:19.

19. Dispela tok olsem stap “man bilong wanpela meri tasol” i makim wanem?

¹⁹ “Man bilong wanpela meri tasol.” Sapos yu marit, orait yu mas bihainim lo bilong Jehova long sait bilong marit—wanpela man na wanpela meri tasol insait long marit. (Mat. 19:​3-9) Kristen man i no ken tru mekim pasin pamuk. (Hib. 13:4) Tasol i gat sampela samting moa yu mas mekim. Yu mas stap gut long meri bilong yu, no ken aigris long ol narapela meri.—Jop 31:1.

20. Olsem wanem wanpela man inap “bosim gut” ol wanhaus bilong em?

²⁰ “Ol i mas bosim gut ol pikinini bilong ol na ol wanhaus bilong ol.” Sapos yu wanpela het bilong famili, yu mas tingim gut wok bilong yu olsem em i bikpela samting. Mekim famili lotu long olgeta taim. Autim tok wantaim olgeta wan wan insait long famili bilong yu planti taim sapos yu inap mekim olsem. Helpim ol pikinini bilong yu long kisim pasin bilong pas gut wantaim Jehova. (Efe. 6:4) Man husat i save lukautim gut famili bilong em, em i soim olsem em inap lukautim gut kongrigesen.—Skelim 1 Timoti 3:5.

21. Yu ken mekim wanem sapos yu no mekim yet wok olsem wanpela kongrigesen sevan?

²¹ Ol brata, sapos yupela i no mekim yet wok olsem kongrigesen sevan, orait plis beten na skelim gut ol tok i stap long dispela atikol. Stadi gut long ol mak em ol kongrigesen sevan i mas winim na wok strong long winim ol dispela mak. Tingim pasin bilong yu long laikim Jehova na ol bratasista bilong yu. Strongim laik bilong yu long helpim ol. (1 Pita 4:​8, 10) Kisim amamas long helpim ol bratasista bilong yu long kongrigesen. Jehova i ken blesim ol hatwok yu mekim long winim mak bilong mekim wok olsem wanpela kongrigesen sevan!—Fili. 2:13.