YU SAVE pilim hatwok long mekim pesenel Baibel stadi bilong yu? Sampela taim yumi olgeta i save pilim olsem. Tasol tingim ol narapela samting em yumi save mekim long olgeta taim, olsem waswas. Yumi save lusim sampela haptaim na strong long waswas, tasol yumi save pilim gut bihain long en! Taim yumi mekim pesenel stadi, i olsem yumi waswas na “klinim [yumi yet] long rot bilong wara, em tok bilong God.” (Efe. 5:26) Tingim sampela rot i ken helpim yumi long mekim olsem:

• Wokim wanpela sediul. Pesenel Baibel stadi em wanpela bilong “ol samting i bikpela samting moa” em ol Kristen i no ken lusim tingting long en. (Fili. 1:10) Bilong helpim yu long bihainim sediul bilong yu, yu ken raitim na putim long wanpela hap we yu inap lukim, olsem long wanpela notisbot o long dua bilong frisa. O yu ken setim alam long fon bilong yu long taim yu makim bilong mekim stadi.

• Makim haptaim na wei bilong stadi we i stret long yu. Em isi long yu putim tingting olgeta taim yu mekim stadi inap longpela haptaim o insait long sotpela haptaim? Yu yet i save gut long samting yu inap long mekim. Olsem na makim haptaim na wei bilong stadi we i stret long yu. Sapos taim bilong yu long stadi i kamap na yu pilim olsem yu no laik mekim stadi, orait yu ting yu ken makim olsem 10-pela minit tasol long stadi? Sapos yu makim liklik haptaim olsem long stadi, yu inap lainim planti samting moa winim sapos yu no bin mekim stadi. Na taim yu mekim olsem, dispela bai kirapim yu long lusim sampela moa haptaim long stadi moa yet.—Fili. 2:13.

• Makim ol topik paslain long yu stadi. Sapos yu sindaun na bihain tingting long wanem samting yu bai mekim stadi long en, ating yu no inap “yusim gut taim” bilong yu. (Efe. 5:16) I gutpela yu mekim lista bilong ol atikol o ol topik em yu laik mekim stadi long en. Taim yu tingim wanpela askim, orait raitim i go daun. Na long pinis bilong olgeta wan wan stadi bilong yu, yu ken raitim ol narapela aidia long lista bilong ol samting yu laik stadi long en.

• Redi long mekim senis. Traim long mekim sampela senis long sediul bilong yu, olsem hamas haptaim yu lusim long mekim stadi o wanem ol topik yu makim bilong stadi long en. Em i bikpela samting olsem yu stadi long olgeta taim, maski em long wanem taim, hamas haptaim yu lusim o wanem pablikesen yu stadi long en.

Yumi save kisim bikpela helpim tru taim yumi stadi oltaim. Yumi save pas gut moa wantaim Jehova, lain long bihainim savetingting, na kisim nupela strong.—Jos. 1:8.