1-2. Ol narapela inap mekim wanem ol pasin i no stret long yumi?

 JISAS i mekim tok piksa long wanpela wido i wok long askim askim wanpela jas long helpim em bikos em i wok long karim hevi bilong pasin i no stret wanpela i mekim long em. Tru tumas, planti disaipel bilong Jisas i pilim tru dispela stori em i kamapim bikos long dispela taim bipo, planti taim ol man i save mekim pasin i no stret long ol man nating. (Luk 18:​1-5) Long nau tu, yumi pilim tru dispela stori bikos yumi olgeta i save karim hevi long wanpela i mekim pasin i no stret long yumi.

² Long nau, pasin bilong heitim ol narapela lain, sindaun i no wankain, na pasin bilong daunim narapela i pulap, olsem na yumi no kirap nogut taim ol narapela i mekim pasin i no stret long yumi. (Ekl. 5:8) Tasol samting yumi no ekspektim em taim wanpela brata o sista Kristen i mekim pasin i no stret long yumi. Maski i olsem, kain samting inap kamap. Tasol dispela i no makim olsem ol bratasista bilong yumi i gat tingting long mekim pasin i no stret long yumi, nogat. Ol i sinman tasol. Yumi inap kisim planti skul long pasin Jisas i mekim taim ol birua i mekim pasin i no stret long em. Sapos yumi no les kwik long ol birua em ol i mekim pasin i no stret long yumi, orait yumi mas wok strong long no ken les kwik long ol wanbilip bilong yumi tu! Jehova i pilim olsem wanem taim wanpela insait long kongrigesen o ol narapela em ol i no wanbilip i mekim pasin i no stret long yumi? Yu ting em i save tingim yumi?

3. Yu ting Jehova i save tingim yumi taim yumi karim hevi bilong pasin i no stret, na bilong wanem?

³ Jehova i save tingim yumi tru taim ol narapela i mekim pasin i no stret long yumi. Baibel i tok: “Jehova i save laikim stretpela pasin.” (Sng. 37:28) Jisas i tokim yumi olsem “kwiktaim [Jehova] bai stretim  rong ol arapela i mekim” long yumi long taim stret bilong en. (Luk 18:​7, 8) Na klostu nau em bai pinisim olgeta pen na hevi yumi karim na olgeta kain pasin i no stret em ol man i mekim long yumi.—Sng. 72:​1, 2.

4. Jehova i givim wanem helpim long yumi long nau?

⁴ Yumi wet long lukim Jehova i pinisim olgeta pen na hevi long taim stret em i makim, tasol long nau yet em i wok long helpim yumi long karim hevi bilong pasin i no stret. (2 Pita 3:13) Em i mekim olsem long rot bilong skulim yumi long pasin yumi mas abrusim taim wanpela i mekim pasin i no stret long yumi. Long rot bilong gutpela eksampel bilong Jisas, Jehova i kamapim klia pasin yumi ken mekim taim wanpela i mekim pasin i no stret long yumi. Na tu, Jehova i givim yumi ol gutpela tok em yumi ken bihainim taim ol narapela i mekim pasin i no stret long yumi.

WAS GUT LONG PASIN YU MEKIM TAIM OL NARAPELA I MEKIM PASIN I NO STRET LONG YU

5. Wai na yumi mas was gut long pasin yumi mekim taim ol narapela i mekim pasin i no stret long yumi?

⁵ Yumi inap bel hevi tru taim wanpela i mekim pasin i no stret long yumi. (Ekl. 7:7) Ol gutpela wokman bilong Jehova olsem Jop na Habakuk i bin pilim olsem tu. (Jop 6:​2, 3; Hab. 1:​1-3) Em nomol long yumi bel hevi taim ol narapela i mekim pasin i no stret long yumi, tasol yumi mas was gut long pasin yumi mekim, nogut yumi mekim longlong pasin.

6. Yumi kisim wanem skul long stori bilong Apsalom? (Lukim tu piksa.)

⁶ Taim wanpela i mekim pasin i no stret long yumi, ating yumi laik bekim rong em i mekim long yumi. Tasol sapos yumi mekim olsem, dispela inap mekim hevi i go bikpela moa. Tingim stori bilong Apsalom, em pikinini man bilong King Devit. Em i belhat nogut tru bikos hap brata bilong em Amnon i reipim sista bilong ol Tamar. Lo Bilong Moses i tok sapos man i mekim kain pasin olsem, orait i stret long ol i mas kilim em i dai. (Wkp. 20:17) Yumi kliagut long as na Apsalom i belhat nogut tru, maski i olsem em i no gat rait long kilim i dai Amnon.—2 Sml. 13:​20-23, 28, 29.

7. Wanpela man bilong raitim song i pilim olsem wanem long pasin i no stret em i lukim?

⁷ Taim yumi lukim olsem ol man i mekim pasin i no stret i abrusim panismen, yumi inap pilim olsem i no gat gutpela samting inap kamap taim yumi mekim stretpela pasin. Tingim wanpela man bilong raitim song, em i lukim olsem laip bilong ol man nogut i wok long kamap gutpela moa, tasol ol stretpela man i karim hevi bilong pasin i no stret em ol dispela man nogut i mekim. Em i tok: “Ol man nogut i olsem, laip bilong ol i no gat hatwok long en.” (Sng. 73:12) Em i bel hevi tru long lukim  ol man i mekim pasin i no stret, na dispela i mekim na em i pilim olsem i no gat gutpela samting inap painim em taim em i mekim wok bilong Jehova. Olsem na em i tok: “Mi tingting planti long dispela samting, na mi traim long kliagut long as bilong en, tasol i hatwok long mi.” (Sng. 73:​14, 16) Em i tokaut olsem: “Klostu mi lusim stretpela rot. Na klostu mi pundaun.” (Sng. 73:2) Wankain samting i bin kamap long wanpela brata em yumi bai kolim em Alberto.

8. Wanpela brata i karim hevi bilong pasin i no stret na dispela i mekim wanem long em?

⁸ Sampela brata i sutim tok nating long Alberto olsem em i stilim mani bilong kongrigesen. Dispela i mekim na em i lusim wok elda bilong em, na tu, planti long kongrigesen i no rispektim em moa taim ol i harim dispela stori. Em i tok: “Mi belhat nogut tru na mi bel hevi tu.” Em i larim dispela bikpela bel hevi i mekim na isi isi em i lusim pasin bilong pas gut wantaim Jehova, na em i lusim ol miting na wok autim tok inap 5-pela yia. Dispela ekspiriens i kamapim klia samting inap kamap sapos yumi no bosim belhat bilong yumi taim wanpela i mekim pasin i no stret long yumi.

BIHAINIM PASIN JISAS I MEKIM TAIM OL NARAPELA I MEKIM PASIN I NO STRET LONG EM

9. Ol man i mekim wanem ol pasin i no stret long Jisas? (Lukim tu piksa.)

⁹ Jisas i stap gutpela piksa tru em yumi ken bihainim taim yumi karim hevi long pasin i no stret.  Em i karim hevi bilong pasin i no stret em famili bilong em yet na ol narapela i bin mekim long em. Ol wanfamili bilong em husat i no wanbilip, ol i sutim tok long em olsem tingting bilong em i paul pinis, na ol bikman bilong lotu i sutim tok long em olsem em i wok bung wantaim ol spirit nogut, na ol soldia bilong Rom i tok bilas long em, paitim em, na bihain ol i kilim em i dai. (Mak 3:​21, 22; 14:55; 15:​16-20, 35-37) Maski i olsem, Jisas i karim hevi bilong olgeta dispela pasin i no stret ol i mekim long em, na em i no bekim rong bilong ol. Yumi inap kisim wanem skul long eksampel bilong em?

10. Jisas i mekim wanem taim ol man i mekim pasin i no stret long em? (1 Pita 2:​21-23)

¹⁰ Ritim 1 Pita 2:​21-23. a Jisas i stap gutpela piksa tru em yumi ken bihainim taim wanpela i mekim pasin i no stret long yumi. Em i save long wanem taim i stret long pasim maus na wanem taim i stret long toktok. (Mat. 26:​62-64) Em i no mekim wanpela tok long sambai long em yet taim ol man i sutim ol tok giaman long em. (Mat. 11:19) Tasol long ol taim em i bekim tok bilong ol man i mekim nogut long em, em i no tok nogut long ol o mekim tok bilong bagarapim ol, nogat. Jisas i bosim gut bel bikos “em i putim ol samting long han bilong dispela Man husat i save skelim ol samting long stretpela pasin.” Jisas i save olsem tingting Jehova i gat long em i bikpela samting moa winim tingting ol man i gat long em. Em i bilip tru olsem Jehova bai pinisim ol pasin i no stret ol man i mekim long em long taim stret Em i makim.

11. Wanem sampela rot yumi ken bosim gut toktok bilong yumi? (Lukim tu ol piksa.)

¹¹ Yumi ken bihainim pasin bilong Jisas long rot bilong bosim gut toktok bilong yumi taim ol narapela i mekim pasin i no stret long yumi. Sampela taim i no gat wok long yumi mekim wanpela tok o wanpela samting sapos em liklik hevi tasol.  Yumi inap pasim maus tasol na bai yumi no mekim wanpela tok we inap mekim hevi i go bikpela. (Ekl. 3:7; Jems 1:​19, 20) Long ol narapela taim, ating i stret long yumi toktok bilong helpim wanpela husat i karim hevi bilong pasin i no stret em narapela i mekim long em, o yumi mas toktok bilong sambai long tok i tru. (Apo. 6:​1, 2) Sapos yumi toktok wantaim ol narapela long kain taim olsem, yumi mas mekim long pasin isi na pasin rispek.—1 Pita 3:15. b

12. Hau yumi ken putim yumi yet long han bilong “dispela Man husat i save skelim ol samting long stretpela pasin”?

¹² Narapela rot yumi ken bihainim pasin bilong Jisas em long putim yumi yet long han bilong “dispela Man husat i save skelim ol samting long stretpela pasin.” Taim ol narapela i kisim tingting kranki long yumi o ol i mekim pasin i no stret long yumi, yumi bilip olsem Jehova i save long samting tru tru i bin kamap. Dispela bai helpim yumi long sanap strong na karim hevi bilong pasin i no stret ol i mekim long yumi bikos yumi save olsem long taim stret Jehova bai stretim dispela hevi. Taim yumi putim ol samting long han bilong Jehova, yumi no larim pasin bilong belhat o bel kaskas i bagarapim bel na tingting bilong yumi. Ol dispela pasin inap kirapim yumi long mekim longlong pasin, lusim amamas bilong yumi, na bagarapim pasin pren bilong yumi wantaim Jehova.—Sng. 37:8.

13. Wanem samting i ken helpim yumi long wok yet long karim hevi bilong pasin i no stret?

¹³ Em tru olsem yumi no inap tru long bihainim gut eksampel bilong Jisas. Sampela taim yumi inap mekim ol pasin o toktok em bihain yumi rigret long en. (Jems 3:2) Na sampela taim ol pasin i no stret ol narapela i mekim long yumi, dispela inap bagarapim tru bel bilong yumi o lusim ol mak long skin bilong yumi na em samting yumi mas karim wantaim yumi long laip olgeta bilong yumi. Sapos kain samting i bin painim yu, orait yu ken save tru olsem Jehova i save gut tru long samting yu tingting long en na pilim long bel. Na Jisas i save long hau yu pilim bikos em tu i bin karim hevi long pasin i no stret em ol man i mekim long em. (Hib. 4:​15, 16) Jehova i larim stori bilong Jisas i stap long Baibel na bai yumi ken bihainim gutpela eksampel bilong em, na tu, Jehova i givim ol gutpela tok bilong helpim yumi long karim hevi bilong pasin i no stret. Yumi ken skelim 2-pela ves long Buk Rom we i ken helpim yumi.

“LARIM GOD I KAMAPIM BELHAT BILONG EM LONG OL MAN I MEKIM RONG”

14. Wanem insait bilong dispela tok “larim God i kamapim belhat bilong em long ol man i mekim rong”? (Rom 12:19)

¹⁴ Ritim Rom 12:19. Aposel Pol i kirapim ol Kristen long “larim God i kamapim belhat bilong em long ol man i mekim rong.” Hau yumi inap mekim olsem? Yumi inap mekim olsem taim yumi larim God i makim wanem taim na wanem rot em bai kamapim stretpela pasin bilong em. Wanpela brata nem bilong em John, bihain long em i karim hevi bilong pasin i no stret, em i tok: “Mi laik tru long mekim sampela samting bilong stretim dispela hevi, tasol mi wok strong tru long daunim dispela tingting. Tok bilong Rom 12:19 i helpim mi long wet long Jehova.”

15. Wai na em i gutpela long wet long Jehova long stretim hevi?

¹⁵ Gutpela samting i save kamap taim yumi wet long Jehova long stretim ol hevi. Taim yumi mekim olsem, yumi bai daunim presa na bel hevi em yumi inap pilim taim yumi yet i stretim ol dispela hevi. Jehova i laik helpim yumi. I olsem em i tok, ‘Lusim ol samting long han bilong mi; bai mi stretim dispela hevi.’ Sapos yumi bilip long tok promis bilong Jehova olsem “bai mi bekim,” yumi inap larim dispela hevi i go na bilip tru olsem em bai stretim dispela hevi long rot i gutpela moa winim rot yumi laik bihainim. John em yumi stori pinis long em, em i mekim olsem na dispela i bin helpim em. Em i tok: “Sapos mi wet long Jehova i stretim dispela hevi, em bai stretim hevi long rot i gutpela moa winim rot mi laik bihainim.”

 “WOK LONG MEKIM GUTPELA PASIN BAI YUPELA I KEN DAUNIM PASIN NOGUT”

16-17. Olsem wanem pasin bilong beten i ken helpim yumi long ‘wok long mekim gutpela pasin bai yumi ken daunim pasin nogut’? (Rom 12:21)

¹⁶ Ritim Rom 12:21. Pol i tokim ol Kristen tu olsem: “Yupela i mas wok long mekim gutpela pasin bai yupela i ken daunim pasin nogut.” Long Bikpela Tok Long Maunten, Jisas i tok: “Yupela i mas laikim yet ol birua bilong yupela na beten long ol man i save mekim nogut long yupela.” (Mat. 5:44) Jisas i bin mekim olsem. Ating yumi tingim bikpela pen na hevi Jisas i karim taim ol soldia bilong Rom i nilim em long diwai pos. Yumi ken piksaim long tingting bikpela pen Jisas i pilim taim ol man i rabisim em na semim em na mekim pasin i no stret long em.

¹⁷ Maski Jisas i karim bikpela pen na hevi, em i no larim dispela i daunim em. Em i no mekim tok olsem bagarap i mas painim ol dispela soldia, nogat. Em i beten olsem: “Papa, fogivim ol, ol i no save long samting ol i mekim.” (Luk 23:34) Taim yumi beten askim God long helpim ol lain i mekim pasin i no stret long yumi, dispela inap helpim yumi long lusim pasin bilong bel kaskas na belhat long ol, na tu, em inap senisim tingting yumi gat long ol.

18. Olsem wanem pasin bilong beten i helpim Alberto na John long karim hevi bilong pasin i no stret?

¹⁸ Tupela brata em yumi stori pinis long ol long dispela atikol, pasin bilong ol long beten i bin helpim ol long karim hevi bilong pasin i no stret ol i feisim. Alberto i tok: “Taim mi beten long Jehova, mi save beten tu long ol dispela brata em ol i bin rongim mi. Planti taim mi askim Jehova long helpim mi long lusim pasin bilong belhat long samting i bin kamap long mi.” Gutpela samting em olsem, nau Alberto i kirap gen long mekim wok bilong Jehova na em i stap gut long Em. John i tok: “Planti taim mi save beten long dispela brata i bin mekim mi bel hevi. Ol kain beten olsem i helpim mi long holim stretpela tingting long em na mi no jasim em. Na ol dispela beten mi mekim i helpim bel na tingting bilong mi long stap isi.”

19. Yumi mas mekim wanem taim yumi wet long pinis bilong dispela haptaim nogut bilong nau? (1 Pita 3:​8, 9)

¹⁹ Yumi bai karim yet ol hevi long ol man i mekim pasin i no stret long yumi paslain long haptaim nogut bilong nau i pinis. Maski yumi karim wanem hevi, oltaim yumi mas beten askim Jehova long helpim yumi. Na tu, yumi mas bihainim pasin Jisas i mekim taim ol man i mekim pasin i no stret long em na yumi mas wok yet long bihainim ol stiatok bilong Baibel. Taim yumi mekim olsem, yumi ken bilip tru olsem Jehova bai blesim yumi.—Ritim 1 Pita 3:​8, 9.