1, 2. (a) Olsem wanem tok bilong Aisaia 60:22 i kamap tru long nau? (b) Oganaisesen bilong Jehova hia long graun i gat wanem nid?

“OL LAIN i liklik tru bai ol i kamap planti moa olsem ol manmeri bilong ol bikpela na strongpela kantri.” (Ais. 60:22) Dispela tok profet i wok long kamap tru long dispela haptaim bilong las de. Long sevis yia bilong 2015, inap 8,220,105 pablisa i autim tok long olgeta hap bilong graun! Olgeta wan wan Kristen i mas tingim tru laspela hap bilong dispela tok profet. Papa long heven i tok: “Mi Bikpela, mi tok, ol dispela samting bai i kamap hariap long taim mi makim pinis.” Ol pasindia long kar inap luksave olsem kar i wok long spit, na olsem tasol, yumi luksave olsem wok bilong kamapim disaipel i wok long kamap bikpela moa, i olsem dispela wok i spit moa. Dispela i kirapim yumi long mekim wanem? Yumi givim bel tru long autim tok bilong Kingdom? Planti bratasista i mekim wok painia oltaim na painia haptaim. Yumi amamas olsem planti pablisa i go autim tok long ol hap i sot tru long ol pablisa, na planti arapela pablisa i volantia long mekim ol narapela wok tiokratik.

² Yumi nidim planti moa wokman. Long olgeta yia, inap olsem 2 tausen nupela kongrigesen i save kamap. Sapos wanpela kongrigesen i nidim 5-pela elda, dispela i makim olsem long olgeta wan wan  yia, 10 tausen kongrigesen sevan i mas winim mak bilong mekim wok elda. Planti tausen brata i mas winim ol mak na mekim wok olsem kongrigesen sevan. Na tu, maski yumi brata o sista, i gat planti samting yumi mas mekim long “wok bilong Bikpela.”—1 Kor. 15:58.

3, 4. Ol Kristen i mas mekim wanem bambai ol inap mekim sampela moa wok insait long lotu i tru?

³ Ritim 1 Timoti 3:1. Tok Grik ol i tanim olsem “i laik kisim,” i makim olsem: Man i laik kisim wanpela samting, tasol dispela samting i stap longwe liklik, olsem na em i taitim han i go moa bilong kisim dispela samting. Aposel Pol i yusim dispela tok bilong soim klia olsem Kristen i mas wok hat bambai em inap winim ol mak long sait bilong bilip. Piksaim olsem wanpela brata i tingim wok em inap mekim insait long kongrigesen. Long nau em i no mekim wok olsem kongrigesen sevan, tasol em i luksave olsem em i mas bihainim ol pasin bilong God. Pastaim em i wok strong long winim ol mak bilong kamap kongrigesen sevan. Na tu, em i laik winim ol mak bambai bihain em inap kamap elda. Em i wok hat long winim ol mak na bai em inap mekim sampela moa wok insait long kongrigesen.

⁴ Ol bratasista husat i laik mekim wok painia, mekim wok long Betel, o volantia long sanapim ol Haus Kingdom, ol tu i mas wok strong long winim ol mak bilong mekim ol dispela wok. Yumi ken skelim ol tok em Baibel i mekim bilong kirapim ol Kristen long winim ol mak insait long lotu i tru.

5. Olsem wanem ol yangpela inap yusim strong bilong ol long mekim wok bilong Kingdom?

⁵ Ol yangpela i gat strong long mekim planti wok bilong lotuim Jehova. (Ritim Sindaun 20:29.) Sampela yangpela brata long Betel i mekim wok bilong prinim ol Baibel na ol pablikesen bilong Baibel. Planti yangpela bratasista i sanapim ol Haus Kingdom na mekim wok meintenens. Taim disasta i kamap, ol yangpela i wok bung wantaim ol narapela Witnes na ol i helpim ol lain i bungim hevi. Na tu, planti yangpela painia i bringim gutnius i go long ol manmeri long hap bilong ol, na ol manmeri i mekim ol narapela tokples.

6-8. (a) Wanpela yangpela man i mekim wanem na em i kisim stretpela tingting long wok bilong God? (b) Wanem gutpela samting i kamap? (c) Olsem wanem yumi inap “traim na lukim na . . . save olsem Bikpela i gutpela tru”?

⁶ Ating yu luksave olsem em i bikpela samting long yumi mas givim bel tru long mekim wok bilong God. Olsem wanem sapos yu pilim wankain olsem wanpela brata nem bilong em Aaron? Maski Aaron i kamap bikpela insait long tok i tru, em i tok: “Mi no kisim amamas long i go long ol miting na mekim wok autim tok.” Aaron i laik kisim amamas long mekim wok bilong God, tasol em i no save long wai na em i no amamas. Orait, em i mekim wanem?

⁷ Aaron i mekim sediul bilong em na em i makim taim bilong ritim Baibel, redim ol miting, na bekim tok long ol miting. Em i kirap long beten oltaim. Taim pasin bilong em long laikim Jehova i kamap bikpela moa, em i winim ol mak bilong mekim sampela wok moa. Kirap long dispela taim, Aaron i mekim wok painia, na helpim ol bratasista i kisim bagarap long taim bilong disasta, na em i go autim tok long narapela kantri. Long nau, Aaron i mekim wok long Betel na em i mekim tu wok elda. Em i pilim olsem wanem long ol wok em i mekim? Aaron i tok: “Mi ‘traim na lukim na save olsem God i gutpela tru.’ Em i blesim mi, olsem na mi pilim olsem mi gat dinau long em, na dispela i kirapim mi long mekim planti samting moa long wok bilong em, na em i blesim mi moa yet.”

⁸ Devit i tok: “Ol manmeri i bihainim Bikpela ol i no save sot long ol gutpela samting.” (Ritim Song 34:8-10.) Tru tumas, oltaim Jehova i save sambai long ol lain i givim bel tru long mekim wok bilong em. Taim yumi mekim  olgeta samting yumi inap mekim long wok bilong em, yumi yet bai “traim na lukim na . . . save olsem Bikpela i gutpela tru.” Taim yumi givim bel olgeta long lotuim God, yumi bai kisim bikpela amamas tru.

9, 10. Wai na em i bikpela samting long yu mas i gat pasin bilong wet?

⁹ Taim yu mekim ol samting bilong winim ol mak yu putim, yu mas i gat pasin bilong wet. (Mai. 7:7) Jehova i save sambai long ol wokman bilong em; em inap larim ol i wet inap sampela haptaim o wet inap long taim i stret bambai ol inap winim mak bilong mekim wanpela wok. God i promisim Abraham olsem em bai gat wanpela pikinini man, tasol Abraham i mas bilip na wet na em i no ken les kwik. (Hib. 6:12-15) Maski Abraham i wet inap planti yia paslain long Aisak i kamap, em i no les na Jehova i no lusim tingting long em.—Stt. 15:3, 4; 21:5.

¹⁰ Ol manmeri i save les long wet. (Snd. 13:12) Sapos yumi larim bel hevi i daunim yumi, dispela bai mekim yumi les long wet. Olsem na yumi mas yusim gut taim bilong yumi long mekim ol samting we bai helpim yumi long winim ol mak long sait bilong wok lotu. Yumi ken stori long 3-pela samting yumi ken mekim.

11. (a) Yumi ken wok strong long kisim wanem ol pasin bilong holi spirit? (b) Wai na yumi mas kisim ol dispela pasin?

¹¹ Kisim ol pasin bilong holi spirit. Taim yumi ritim Baibel na tingim tingim ol tok bilong en, yumi bai kisim save, stretpela tingting, savetingting, na pasin bilong skelim gut ol samting. Ol man i go pas long lotu i tru, ol i mas i gat ol dispela pasin. (Snd. 1:1-4; Tai. 1:7-9) Taim yumi ritim ol pablikesen bilong Baibel, yumi inap luksave long tingting bilong God long planti samting. Long olgeta de, yumi mas mekim disisen long sait bilong kisim amamas, pasin bilong bilas, sait bilong mani,  na pasin bilong bung wantaim ol narapela. Sapos yumi bihainim ol skul yumi kisim long Baibel, yumi inap mekim ol disisen we i amamasim Jehova.

12. Hau bai olgeta long kongrigesen inap soim olsem ol narapela inap trastim ol?

¹² Soim olsem ol narapela i ken trastim yu. Maski yumi brata o sista, yumi mas givim bel tru long mekim gut olgeta kain asainmen yumi kisim long wok lotu bilong yumi. Nehemia i bin mekim wok gavana, na em i mas makim sampela man long lain bilong God long mekim sampela bikpela wok. Nehemia i makim ol man i gat wanem kain pasin? Em i makim ol man husat i bihainim stretpela pasin na ol i stap aninit long God, na ol narapela inap trastim ol. (Neh. 7:2; 13:12, 13) Long nau tu, “bosboi i mas stap olsem man i save mekim tru wok bilong em.” (1 Kor. 4:2) Ol man inap luksave long ol gutpela wok em narapela i mekim.—Ritim 1 Timoti 5:25.

13. Hau bai yu inap bihainim eksampel bilong Josep taim ol narapela i mekim nogut long yu?

¹³ Larim Jehova i stretim yu. Yu ken mekim wanem sapos ol narapela i no mekim stretpela pasin long yu? Yu ken stretim kwik dispela hevi. Tasol sampela taim, sapos yu laik strongim sait bilong yu, dispela bai mekim hevi i kamap bikpela moa. Ol brata bilong Josep i mekim nogut long em, tasol em i no holim bel kros long ol. Bihain, ol man i sutim tok giaman long Josep na putim em long kalabus. Tasol Josep i larim Jehova i stiaim em long taim bilong hevi. Wanem samting i kamap? ‘Tok bilong God i soim olsem tok bilong Josep i tru.’ (Sng. 105:19) Ol dispela hevi i traim pasin bilong Josep, na dispela i redim em long kisim wanpela spesel asainmen. (Stt. 41:37-44; 45:4-8) Taim bikpela hevi i bungim yu, beten askim God long strongim yu na givim yu savetingting, na stiaim yu long bihainim pasin isi long toktok na olgeta narapela samting yu mekim. Jehova bai helpim yu.—Ritim 1 Pita 5:10.

14, 15. (a) Wai na oltaim yumi mas “tingim” pasin bilong yumi long autim tok? (b) Sapos yu no gat rot long bungim ol man long haus, orait yu ken bihainim wanem narapela rot bilong autim tok? (Lukim piksa long kirap bilong stadi na blok “ Yu Redi Long Autim Tok Long Narapela Rot?”)

¹⁴ Pol i tokim Timoti: “Yu mas mekim yet wok bilong rit long ai bilong ol man, na givim ol gutpela tok, na skulim ol man. Oltaim yu mas tingim ol samting yu mas mekim na tingim wok tisa bilong yu.” (1 Tim. 4:13, 16) Timoti i save gut pinis long pasin bilong autim gutnius bilong Kingdom. Maski i olsem, wok autim tok bilong em bai kamap gutpela moa sapos “oltaim” em i “tingim wok tisa” bilong em. Sapos em i laik bai ol man i pilim tok em i autim, orait em i mas senisim pasin bilong em long autim tok na bihainim pasin we bai kirapim tru tingting bilong ol manmeri. Yumi save autim tok bilong Kingdom, olsem na yumi tu i mas mekim wankain samting olsem Timoti i mekim.

¹⁵ Planti taim ol man i no save stap long haus taim yumi go long autim tok. Long sampela hap, yumi no inap go insait long ol traipela haus i gat planti flet, na tu, yumi no inap go insait long komiuniti i gat banis i raunim. Sapos i olsem long teritori bilong yu, orait yu ken tingim ol narapela rot bilong autim gutnius.

16. Wai na em gutpela long autim tok long pablik ples?

¹⁶ Ol pablik ples em gutpela hap tru bilong autim gutnius long planti manmeri. Planti Witnes i mekim olsem, na ol i kisim ol gutpela ekspiriens. Ol i makim taim bilong autim tok long ol kain hap olsem ol bas stop, ol maket, na long fran bilong ol stua. Pablisa i ken bihainim gutpela tingting na kirapim toktok. Em i ken stori long wanpela samting em i harim long nius, o tok amamas long ol pikinini bilong man em i laik autim tok long en, o askim em long wok em i save mekim. Taim tupela i stori, pablisa i ken kamapim wanpela poin bilong Baibel na kirapim man long kamapim  tingting bilong em. Taim man i kamapim tingting bilong em, dispela i opim rot bilong pablisa long stori moa wantaim em long tok bilong Baibel.

17, 18. (a) Hau bai yu inap daunim pasin bilong surik long autim tok long pablik ples? (b) Taim yu tingim pasin bilong Devit long litimapim nem bilong Jehova, hau bai dispela i helpim yu taim yu autim tok?

¹⁷ Sapos yu hatwok long autim tok long ol pablik ples, orait yu no ken givap. Eddie em wanpela painia long New York City, na em i surik long toktok wantaim ol man long pablik ples. Tasol bihain em i no surik moa long mekim dispela wok. Wanem samting i helpim em? Em i tok: “Long taim bilong famili lotu, mi na meri bilong mi i mekim wok painimaut long kisim save long ol tok mipela inap mekim taim ol man i sutim tok long mipela o kamapim tingting bilong ol. Na tu, mipela i kisim tingting bilong ol narapela pablisa.” Long nau, Eddie i amamas long autim tok long ol pablik ples.

¹⁸ Taim yu kisim sampela save moa long pasin bilong autim gutnius na yu no surik long mekim dispela wok, ol narapela bai luksave olsem yu wok long kamap strong moa long bilip. (Ritim 1 Timoti 4:15.) Yu bai litimapim nem bilong Papa bilong yumi long heven, wankain olsem Devit i bin mekim. Em i tok: “Bai mi tenkyu long God. Oltaim bai mi litimapim nem bilong en. Mi ting long God i bin helpim mi na mi amamas long em. Ol manmeri i karim hevi ol i ken harim dispela tok na ol i ken belgut tru.” (Sng. 34:1, 2) Wok autim tok bilong yu inap opim rot na ol manmeri husat i gat pasin daun, ol bai amamas long bihainim lotu i tru.

19. Wai na wokman bilong Jehova i ken amamas maski bikpela hevi i painim em?

¹⁹ Devit i tok: “Bikpela, olgeta samting yu bin wokim bai i litimapim nem bilong yu. Na ol manmeri bilong yu bai i tenkyu long yu. Bai ol i tok long biknem bilong yu i stap long olgeta ples yu bosim, na bai ol i stori long bikpela strong bilong yu. Olsem na bai olgeta manmeri i ken save long ol bikpela wok yu bin mekim. Na ol i ken save olsem yu stap strongpela king, na nem bilong yu i bikpela tru.” (Sng. 145:10-12) Olgeta Witnes Bilong Jehova i holim wankain tingting olsem Devit. Tasol olsem wanem sapos yu sik o yu lapun na yu no inap mekim bikpela wok bilong autim tok? Oltaim yu mas tingim olsem taim yu autim gutnius long ol lain i lukautim yu na ol narapela, wok bilong yu i litimapim nem bilong God. Sapos yu laik holimpas bilip bilong yu na long dispela risen ol i kalabusim yu, na rot i op na yu autim tok long ol narapela, dispela i save mekim Jehova i belgut. (Snd. 27:11) Sapos famili bilong yu i stap long ol narapela lotu, tasol yu bihainim yet sediul bilong yu long mekim wok lotu, dispela tu i save mekim God i amamas. (1 Pita 3:1-4) Maski sapos bikpela hevi i painim yu, i gat rot long yu inap litimapim nem bilong Jehova na kamap strong moa long bilip.

20, 21. Sapos yu mekim planti wok insait long oganaisesen bilong Jehova, hau bai yu inap helpim ol narapela?

²⁰ Jehova bai blesim yu sapos yu wok yet long kamap strong long bilip. Taim yu mekim sampela senis long sediul o laip bilong yu, yu inap mekim bikpela wok moa long autim tok bilong God. Na tu, taim yu daunim ol laik bilong yu yet na yu winim ol mak long sait bilong bilip, dispela bai helpim tru ol wanbilip bilong yu. Taim yu bihainim pasin daun na mekim ol wok bilong kongrigesen, ol arapela wokman bilong Jehova bai laikim yu, tok amamas long yu, na sambai long yu.

²¹ Maski yumi mekim wok bilong Jehova inap planti yia o inap sampela mun tasol, yumi olgeta inap winim ol mak na kamap strong moa long mekim wok lotu. Tasol olsem wanem ol Kristen i stap strong long bilip inap helpim ol nupela Kristen long winim ol mak na kamap strong moa long bilip? Yumi bai skelim dispela askim long neks stadi.