“DEDI,” “PAPA,” “ANKOL.” Planti yangpela long Betel i save kolim mi olsem. Mi gat 89 krismas, olsem na mi amamas taim ol i kolim mi long ol dispela nem. Mi tingim ol dispela nem olsem presen Jehova i givim long mi long wok fultaim sevis mi mekim insait long 72 yia. Taim mi mekim wok bilong God, mi kisim planti ekspiriens, olsem na mi inap tokim ol dispela yangpela olsem, ‘Sapos yupela i sanap strong na mekim wok bilong Bikpela, em bai mekim gut long yupela.’—2 Sto. 15:7.

Papamama bilong mi i lusim Yukren na i go stap long Kanada. Ol i go stap long Rossburn, em wanpela taun long provins Manitoba. Mama i karim 8-pela bois na 8-pela gels, mipela i no gat twins. Mi namba 14 pikinini. Papa i laikim Baibel, na em i save ritim Baibel long mipela long olgeta Sande moning. Tasol em i tingim olsem ol lotu i tingting tasol long kisim mani, na ol i no tingting long helpim ol manmeri. Em i save tok pilai olsem, “Husat i bin givim mani long Jisas taim em i autim tok na skulim ol manmeri?”

Etpela bratasusa bilong mi—4-pela brata na 4-pela susa—i bin kisim tok i tru. Susa bilong mi, Rose, i mekim wok painia inap long em i dai. Klostu long taim em i dai, em i strongim mipela olgeta long bihainim Tok Bilong God, na em i tok: “Mi laik lukim yupela long nupela taim.” Pastaim brata bilong mi Ted i save autim tok long helpaia. Long olgeta Sande moning, em i save autim tok long redio na tok strong long ol manmeri olsem paia long hel bai kukim ol sinman inap oltaim. Tasol bihain, em i kamap wanpela gutpela wokman bilong Jehova na em i givim bel long autim tok.

Wanpela de long Jun 1944, mi kam bek long skul na mi lukim wanpela buklet i stap antap long tebol, nem bilong en The Coming World Regeneration. * Mi ritim fes pes, namba 2 pes, na mi no laik stop long ritim dispela buklet. Taim mi pinis long ritim buklet olgeta, mi mekim disisen olsem mi laik mekim wok bilong Jehova olsem Jisas i bin mekim.

Husat i bringim dispela buklet i kam? Steve em bikbrata bilong mi na em i tok 2-pela man i salim ol buk na buklet i kam long haus. Em i tok: “Mi baim dispela buklet bikos em 15 toea tasol.” Dispela 2-pela man i kam bek long Sande antap. Ol i tokim mipela olsem ol i Witnes Bilong Jehova, na ol i save yusim Baibel long bekim ol askim ol man i gat.  Mipela i amamas bikos taim papamama i mekim bikpela long mipela, ol i kirapim mipela long rispektim Tok Bilong God. Dispela 2-pela man i tokim mipela olsem klostu nau ol Witnes bai i gat wanpela kibung long Winnipeg, em taun susa bilong mi Elsie i stap long en. Mi mekim disisen long go long kibung.

Mi ron long baisikol i go long Winnipeg inap 320 kilomita samting. Paslain long mi go long Winnipeg, mi kamap long taun Kelwood, em ples dispela 2-pela Witnes husat i bin kam long haus bilong mipela i stap long en. Taim mi stap long dispela hap, mi go long wanpela miting na mi kliagut long kongrigesen em wanem samting. Na tu, mi luksave olsem olgeta man, meri, na ol yangpela i mas kamap tisa bilong skulim ol man long ol haus wankain olsem Jisas i bin mekim.

Mi bungim bikbrata bilong mi, Jack, long Winnipeg. Em i lusim Ontario na i kam long Winnipeg. Long fes de bilong kibung, wanpela brata i toksave olsem bai i gat baptais. Mi na Jack i kisim baptais long dispela kibung. Mitupela wantaim i tingting long mekim wok painia bihain tasol long mipela i kisim baptais. Bihain long kibung, Jack i kirap mekim wok painia. Mi gat 16 krismas, olsem na mi mas go bek long skul. Tasol long yia antap, mi tu i kirap mekim wok painia.

Mi kirap mekim wok painia wantaim Stan Nicolson long Souris, em wanpela taun bilong provins Manitoba. I no longtaim, mi luksave olsem wok painia i gat hatwok bilong en. Mipela i lukim olsem mani bilong mipela i wok long pinis, tasol mipela i wok yet long autim tok. Wanpela taim mipela autim tok long de olgeta, na mipela i hangre nogut tru taim mipela i kam bek long haus, tasol mipela i no gat mani. Mipela i kirap nogut tru long lukim wanpela bikpela beg kaikai i stap long dua! I kam inap long nau, mipela i no save husat i bringim dispela beg kaikai. Long dispela apinun, mipela i mekim save long kaikai. Mipela i kisim gutpela blesing bikos mipela i sanap strong! Long pinis bilong mun, weit bilong mi i go antap tru winim weit bilong mi long laip olgeta bilong mi.

Sampela mun bihain, mipela i kisim asainmen long i go long Gilbert Plains. Dispela ples i stap long hap not bilong Souris inap 240 kilomita. Long dispela taim, olgeta kongrigesen i gat wanpela sat i save stap long pletfom. Dispela sat i soim wok autim tok em kongrigesen i save mekim long olgeta wan wan mun. Taim wok autim tok i go daun insait long wanpela mun, mi givim tok long kongrigesen bilong kirapim ol bratasista long mekim gut wok autim tok. Bihain long miting, wanpela lapun painia sista em man bilong em i no Witnes i kam long mi na em i aiwara wantaim na i tok: “Mi traim bes, tasol mi mekim inap long skel bilong mi.” Mi tu mi aiwara na mi tok sori long em.

Olsem mi bin mekim, ol yangpela brata i gat strong inap mekim ol tok kranki, na bihain ol i bel hevi long tok ol i mekim. Tasol mi luksave olsem taim yu mekim popaia, no ken larim dispela i daunim yu. I gutpela long kisim skul long dispela popaia. Taim yu givim bel yet long mekim ol wok, yu bai kisim planti blesing.

Taim mi gat 21 krismas, mi go long namba 14 klas long Gileat na mi grediuet long Februeri 1950. Dispela em wanpela gutpela blesing tru! Klas bilong mi i gat 103 sumatin. Klostu 25 sumatin long dispela klas i go long Quebec long Kanada, em ples we planti i save mekim tokples Frans. Pasin bilong birua long ol Witnes i bikpela tru long dispela hap. Mi kisim asainmen bilong i go long Val-d’Or, em taun i stap long saut-west bilong Quebec, long dispela hap i gat ol gol main. Wanpela taim mipela ol bratasista i go autim tok long Val-Senneville, em wanpela viles i stap klostu. Pris bilong dispela hap i krosim mipela na em i tok ol bai paitim mipela sapos mipela i no lusim dispela hap. Em i mekim tok bilong pretim mipela, olsem na mi kotim dispela pris na em i mas baim kot. *

Dispela hevi wantaim pris na planti narapela tok pait i kamap we ol man i birua long yumi i insait long “Tok Pait i Kamap Long Quebec.” Misin Katolik  i bin bosim olgeta hap bilong provins Quebec winim 300 yia. Ol pris pasto na ol lain politik i birua long ol Witnes Bilong Jehova. Dispela em taim bilong hevi, na mipela i no planti. Maski i olsem, mipela i sanap strong yet. Ol lain i gat gutpela bel i putim gut yau. Mi stadi wantaim sampela manmeri na ol i kisim tok i tru. Mi bin stadi wantaim wanpela famili em ol i 10-pela insait long famili. Bihain famili olgeta i kirap mekim wok bilong Jehova. Pasin bilong ol long sanap strong i bin kirapim ol narapela long lusim lotu Katolik. Mipela i wok yet long autim tok, olsem na mipela i winim dispela tok pait!

Long 1956, mi kisim asainmen bilong i go long Haiti. Planti misineri long dispela kantri i hatwok long lainim tokples Frans, tasol ol manmeri i putim gut yau. Stanley Boggus em wanpela misineri, na em i tok: “Mipela i kirap nogut long lukim ol manmeri i mekim olgeta samting ol inap mekim bilong helpim mipela long stori gut.” Mi amamas bikos mi bin lainim tokples Frans long Quebec. Tasol bihain, mipela i luksave olsem planti asples bratasista i mekim tokples Kriol bilong Haiti. Olsem na sapos mipela ol misineri i laik helpim gut ol manmeri, mipela i mas lainim tokples bilong ol asples lain. Mipela i bin mekim olsem, na ol gutpela samting i kamap.

Narapela gutpela helpim mipela kisim em olsem, Gavening Bodi i tok orait long mipela i ken trensletim Wastaua na ol narapela pablikesen i go long tokples Kriol bilong Haiti. Long olgeta hap bilong Haiti, namba bilong ol manmeri i kam long ol miting i go antap tru. Kirap long 1950, i gat 99 pablisa long Haiti. Tasol long 1960, dispela namba i go antap winim 8 handret pablisa! Long dispela taim, mi kisim asainmen long wok long Betel. Long 1961, mi amamas long mekim wok tisa long Skul Bilong Wok Kingdom. Mipela i trenim 40 elda na ol painia salim. Kibung i kamap long Janueri 1962, na mipela i kirapim olgeta asples bratasista husat i winim mak long mekim bikpela wok moa long autim tok, na sampela i kamap painia salim. Dispela samting i kamap long taim stret bikos pasin birua i wok long kamap.

Long Janueri 23, 1962, bihain long kibung, ol i kam arestim mi na Andrew D’Amico long brens ofis na ol i kisim tu ol nius Kirap! bilong Janueri 8, 1962 long tokples Frans. Dispela Kirap! i kolim ol hap tok bilong ol niuspepa bilong Frans olsem, ol man long  Haiti i save insait long Vudu, em wok bilong ol spirit nogut. Sampela i no laik ritim dispela tok na ol i sutim tok olsem mipela i raitim dispela atikol long brens ofis. Sampela wik bihain, ol i salim ol misineri i go bek long ples bilong ol. * Tasol ol asples brata i bin kisim gutpela trening na ol i mekim gut tru wok bilong ol. Long nau, mi pilim wankain amamas ol i gat long ol i bin sanap strong na mekim ol samting bilong strongim bilip bilong ol. Nau ol i gat Baibel New World Translation of the Holy Scriptures long tokples Kriol bilong Haiti, em samting mipela i no bin ting em bai kamap tru.

Mipela i stap long Haiti, na mi kisim nupela asainmen long mekim wok misineri long Ripablik Bilong Sentral Afrika. Bihain mi mekim wok olsem wasman raun na wasman bilong brens.

Long dispela taim, ol i no yusim planti samting long wokim ol Haus Kingdom. Mi lain long bungim ol kunai gras na hau mi inap wokim rup bilong haus. Ol manmeri i save wokabaut i go i kam na ol i kirap nogut long lukim mi mekim dispela wok. Dispela i kirapim tu ol bratasista long givim bel moa long sanapim ol Haus Kingdom bilong ol yet na mekim wok meintenens. Ol lida bilong ol narapela lotu i tok bilas long mipela bikos haus lotu bilong ol i gat kapa long rup, tasol Haus Kingdom bilong mipela i no gat kapa. Tasol mipela i no givap, mipela i wok yet long yusim kunai gras long wokim rup bilong ol Haus Kingdom. Ol i stop long tok bilas long mipela taim traipela win na ren i kamap long biktaun Bangui. Strongpela win na ren i kamautim rup bilong wanpela haus lotu na tromoi i go daun long bikrot. Tasol rup bilong ol Haus Kingdom i no kamaut. Insait long 5-pela mun tasol, mipela i sanapim nupela brens ofis na wanpela misineri haus bilong stiaim wok bilong Kingdom long dispela kantri. *

Long 1976, gavman i tambuim wok bilong yumi long Ripablik Bilong Sentral Afrika, na mi kisim nupela asainmen long i go long N’Djamena, em biktaun bilong Sat. Tasol gutpela samting i kamap em olsem mi bungim Happy, em wanpela strongpela painia salim na em i bilong Kamarun. Mitupela i marit long Epril 1, 1978. Long dispela mun yet, woa i kamap, olsem na mipela na planti arapela i ranawe i go long hap-saut bilong kantri. Taim woa i pinis na mipela i kam bek, mipela i painimaut olsem wanpela lain soldia i yusim haus bilong mipela olsem hetkota bilong ol. Ol i kisim ol litresa na weding dres bilong Happy, na ol weding presen bilong mitupela. Tasol mipela i sanap strong yet na mekim wok. Mitupela i stap laip yet na mipela luk fowed long mekim sampela wok moa bilong Kingdom.

Tupela yia bihain, gavman bilong Ripablik Bilong Sentral Afrika i pinisim tambu long wok bilong yumi, olsem na mipela i go bek na mekim wok sekit. Mipela i stap long wanpela bas i gat bet ol i foldim, wanpela dram we inap holim 200 lita wara, frisa we i save yusim ges, na ges-stov. Sampela taim mipela i bungim ol hevi taim mipela i raun long ol narapela narapela ples. Wanpela taim mipela i stop inap 117 taim bambai ol polis i sekim mipela.

Ples i hot inap olsem 50 digri Selsias. Long taim bilong kibung, sampela taim i hatwok long painim wara bilong baptais. I gat sampela hap em wara i save ron long en, tasol i drai pinis. Olsem na ol brata i mas digim ol dispela hap na isi isi ol i bungim inap wara bilong baptaisim man. Planti taim ol i save pulimapim wara insait long dram na baptaisim man.

Long 1980, mipela i go stap long Naijiria. Mipela i stap 2 na hap yia na helpim ol bratasista long redim ol samting bilong sanapim nupela brens ofis. Ol brata i baim wanpela bakstua haus i gat 2-pela floa na ol i mas rausim dispela haus na sanapim long hap graun bilong mipela. Wanpela moning, mi klaim i go antap tru long dispela haus bilong helpim wok bilong rausim ol hap bilong haus. Klostu long  belo, mi wok long kam daun long seim rot. Tasol taim ol brata i rausim ol hap bilong haus, ol samting i no stap wankain olsem long pastaim. Olsem na mi pundaun i go daun. I luk olsem mi kisim bikpela bagarap, tasol bihain long mi kisim eksre na dokta i sekim mi, em i tokim Happy: “Yu no ken wari. Em i bagarapim sampela rop masol long bodi, em bai orait insait long wanpela wik samting.”

Long 1986, mipela i go long Kot Diwa na helpim wok sekit. Mipela i mekim wok sekit long ples i stap klostu, em Bekina Faso. Mi no bin ting olsem sampela yia bihain, Bekina bai stap olsem ples bilong mipela.

Mi lusim Kanada long 1956, tasol long 2003, inap olsem 47 yia bihain, mi na Happy i go bek long Betel long Kanada. Mipela i sitisen bilong Kanada, tasol mipela i pilim olsem mipela i bilong Afrika.

Long 2007, mi gat 79 krismas na mipela i go bek long Afrika! Mipela i kisim asainmen bilong i go long Bekina Faso, na mi mekim wok olsem memba bilong Kantri Komiti. Bihain, dispela ofis i kamap olsem Rimot Trenslesen Ofis, na em i stap aninit long lukaut bilong brens long Benin. Long Ogas 2013, mipela i go stap long Betel long Benin.

Maski nau mi no gat bikpela strong, wok autim tok em samting mi laikim tru. Insait long 3-pela yia nau, ol elda na meri bilong mi i sapotim mi na mi amamas long lukim 2-pela Baibel sumatin bilong mi, Gédéon na Frégis, i kisim baptais. Nau tupela i givim bel tru long mekim wok bilong Jehova.

Long nau, mi na meri bilong mi i go stap long brens long Saut Afrika, na Betel famili i save lukautim mi long sait bilong helt. Saut Afrika em namba 7 kantri long Afrika we mi bin raun na mekim wok bilong Kingdom. Bihain long Oktoba 2017, mipela i kisim narapela gutpela blesing. Mipela i go long dedikesen bilong wol hetkota long Warwick, New York. Mi no inap lusim tingting long dispela samting!

Long Yearbook bilong 1994, long pes 255, em i tok: “Long ol lain husat i sanap strong na mekim wok inap planti yia, mipela i laik kirapim yupela long tingim dispela tok: ‘Yupela i mas sanap strong na bai Bikpela i lukim wok bilong yupela na mekim gut long yupela.’—2 Sto. 15:7.” Mitupela Happy i tingting strong long bihainim dispela tok, na mipela i laik kirapim ol narapela tu long mekim wankain samting.