OLSEM WANEM? Yu laik mekim wanpela wok long kongrigesen tasol sampela samting i pasim yu? Ating narapela long kongrigesen i mekim dispela wok. O ating em wanpela asainmen yu bin mekim long bipo. Tasol nau yu kamap lapun, helt i no gutpela, o hevi bilong mani o wok bilong lukautim famili i pasim yu. O ating ol senis i kamap insait long oganaisesen na yu no mekim moa wok em pastaim yu bin mekim. Taim kain samting olsem i kamap, yu inap pilim olsem yu no mekim gut olgeta samting yu laik mekim long wok bilong God. Dispela inap mekim yu bel hevi. Tasol yu ken mekim wanem na bai yu inap stap amamas yet na yu no kros na bel hevi?

Eksampel bilong Jon Bilong Baptais inap skulim yumi long olsem wanem yumi inap stap amamas yet. Jon i kisim ol gutpela blesing, tasol em i no save long ol samting bai kamap long em. Ating em i no ting haptaim em i lusim long kalabus bai bikpela moa winim haptaim em i lusim long autim tok. Maski i olsem, Jon i stap amamas yet, na em i amamas yet long laip olgeta bilong em. Wanem samting i helpim em? Hau bai yumi inap stap amamas yet taim ol senis i kamap?

Klostu long mun Epril bilong yia 29 C.E., Jon i kirap mekim wok bilong em long redim ol manmeri long wetim Mesaia. Em i tok: “Yupela tanim bel. Kingdom bilong heven i kam klostu pinis.” (Mat. 3:2; Luk 1:12-17) Planti manmeri i bihainim tok bilong Jon. Ol manmeri i kam long ol longwe longwe ples long harim tok bilong Jon, na planti bilong ol i tanim bel na kisim baptais. Jon i tokaut stret long ol hetman bilong lotu olsem bagarap bai painim ol sapos ol i no tanim bel. (Mat. 3:5-12) Klostu long mun Oktoba bilong yia 29 C.E., Jon i baptaisim Jisas na em i pilim olsem dispela em laspela bikpela wok em i mekim. Kirap long dispela taim, Jon i kirapim ol manmeri long bihainim Jisas, em Mesaia.—Jon 1:32-37.

Jisas i tingim wok Jon i bin mekim na em i tok: “Namel long olgeta man i kamap long graun, i no gat wanpela bilong ol i winim Jon Bilong Baptais.” (Mat. 11:11) Jon i amamas tru long ol blesing em i kisim. Wankain olsem Jon, planti manmeri long nau i kisim ol gutpela blesing. Tingim stori bilong  wanpela brata nem bilong em Terry. Em na meri bilong em Sandra i bin insait long fultaim sevis winim 50 yia. Terry i tok: “Mi bin kisim planti gutpela blesing. Mi mekim wok painia, wok long Betel, kamap spesel painia, mekim wok sekit, wok wasman distrik, na nau mipela i mekim gen wok olsem spesel painia.” Yumi save amamas taim yumi kisim asainmen long wok tiokratik. Tasol eksampel bilong Jon bai soim klia olsem yumi yet i mas mekim sampela samting bambai yumi inap stap amamas yet taim sindaun bilong yumi i senis.

Jon i stap amamas yet bikos em i laikim tru wok em i mekim. Bihain long Jisas i kisim baptais, namba bilong ol manmeri i bihainim Jon i go daun, na namba bilong ol manmeri i bihainim Jisas i go antap. Ol disaipel bilong Jon i tingting planti, olsem na ol i go long Jon na tok: “Lukim, em i wok long baptaisim ol man na olgeta manmeri i wok long i go long em.” (Jon 3:26) Jon i tok: “Man i gat meri bilong maritim, em dispela man husat bai marit. Tasol taim pren bilong man husat bai marit i sanap na harim nek bilong dispela man, em i gat bikpela amamas. Olsem na dispela amamas bilong mi i pulap.” (Jon 3:29) Jon i no mekim pasin resis, na tu, em i no holim tingting olsem wok bilong Jisas i daunim wok bilong em, nogat. Jon i stap amamas yet bikos em i laikim tru wok bilong em olsem “pren bilong man husat bai marit.”

Jon i holim stretpela tingting na dispela i helpim em long i stap amamas yet maski asainmen bilong em i gat hatwok. Jon i stap Nasarait kirap long taim em i bon, olsem na i tambu long em i dring wain. (Luk 1:15) Jon i no gat planti mani kago, olsem na Jisas i tok: “Jon i kam na em i no kaikai o dring.” Jisas na ol disaipel i no stap olsem ol Nasarait, olsem na laip bilong ol i wankain long laip bilong olgeta narapela manmeri. (Mat. 11:18, 19) Na tu, Jon i no wokim mirakel, tasol em i save olsem ol disaipel bilong Jisas—bipo sampela i stap disaipel bilong Jon—ol i kisim strong bilong wokim mirakel. (Mat. 10:1; Jon 10:41) Maski i olsem, Jon i no larim ol dispela samting i pulim tingting bilong em, nogat, em i bisi long mekim wok Jehova i givim long em.

Sapos yumi laikim tru asainmen bilong yumi long wok bilong Jehova, yumi inap stap amamas yet. Terry, yumi stori pinis long em, i tok: “Mi tingim tru olgeta wan wan asainmen mi kisim.” Em i tingim bek laip bilong em long fultaim sevis na em i tok: “Mi gat planti gutpela memori na mi no gat wanpela rigret.”

Yumi inap strongim amamas bilong yumi long mekim wok bilong God sapos yumi tingim tingim dispela olsem gutpela blesing: Yumi stap olsem “ol wanwok bilong God.” (1 Kor. 3:9) Taim man i polisim wanpela samting i dia tumas, dispela samting i no inap kamap ros. Olsem tasol, taim yumi tingim tingim blesing bilong mekim wok bilong God, dispela inap pasim ol tingting kranki long pinisim amamas bilong yumi. Yumi no inap skelim hatwok bilong yumi wantaim hatwok bilong ol narapela. Yumi no inap skelim wok bilong yumi wantaim wok bilong ol narapela na pilim olsem wok bilong yumi em samting nating.—Gal. 6:4.

Ating Jon i save olsem em i no inap mekim wok bilong God inap longpela taim, na ating em i no save long hau wok bilong em bai pinis. (Jon 3:30) Long 30 C.E., inap olsem 6-pela mun bihain long Jon i baptaisim Jisas, King Herot i kalabusim Jon. Tasol Jon i wok yet long autim tok. (Mak 6:17-20) Wanem samting i helpim em long i stap amamas yet? Em i tingim ol gutpela samting long wok bilong God.

Taim Jon i stap long kalabus, em i harim stori olsem wok autim tok bilong Jisas i go bikpela moa. (Mat. 11:2; Luk 7:18) Jon i bilip tru olsem Jisas em Mesaia, tasol ating em i tingting planti long hau Jisas bai truim olgeta samting em Rait Holi i stori long Mesaia bai mekim. Mesaia bai kamap king, olsem na Jon inap tingting olsem ating klostu nau Jisas bai  mekim dispela wok. Ating Jon i tingting tu olsem nogut Jisas bai helpim em long lusim kalabus. Jon i laik kliagut long wok bilong Jisas, olsem na em i salim 2-pela disaipel i go bilong askim Jisas: “Yu dispela Man i Mas i Kam, o mipela i mas wetim narapela?” (Luk 7:19) Taim 2-pela disaipel i kam bek, ating Jon i putim gut yau taim tupela i stori long ol samting Jisas i mekim. Jisas i wokim ol mirakel na oraitim ol man na em i salim tupela i go bek long tokim Jon olsem: “Ol aipas i lukluk, na ol lek nogut i wokabaut, na ol lepraman i kamap klin na ol yaupas i harim toktok, na ol man i dai pinis ol i kirap bek, na ol rabisman i kisim gutnius.”—Luk 7:20-22.

Ripot bilong 2-pela disaipel i strongim tru Jon. Ol samting i kamap i soim klia olsem Jisas i truim ol tok profet i makim Mesaia. Tasol dispela i no opim rot bilong Jon long lusim kalabus. Maski i olsem, Jon i save olsem wok bilong em yet i no lus nating. Olsem na em i stap amamas yet.

Olsem Jon, sapos yumi tingim tru wok bilong God, yumi bai amamas yet long sanap strong na yumi no inap les kwik. (Kol. 1:9-11) Olsem na yumi mas ritim Baibel na tingim tingim ol tok bilong en, na tingim olsem hatwok bilong yumi long wok bilong God i no inap lus nating. (1 Kor. 15:58) Sandra i tok: “Taim mi ritim wanpela sapta bilong Baibel long olgeta de, dispela i helpim mi long i go klostu moa long Jehova. Mi tingim tru wok bilong God, na mi no tingim mi yet.” Yumi ken tingim ol ripot bilong wok bilong Kingdom, na dispela inap helpim yumi long daunim pasin bilong tingim yumi yet, na yumi putim tingting i go long ol wok Jehova i mekim. Sandra i tok: “Ol JW Brodkasting bilong wan wan mun i helpim yumi long pilim olsem yumi pas gut moa wantaim oganaisesen, na yumi inap stap amamas yet long asainmen bilong yumi.”

Insait long sotpela haptaim we Jon Bilong Baptais i mekim wok, em i “kisim pasin na strong bilong Elaija.” Olsem Elaija, Jon tu em “man wankain olsem yumi.” (Luk 1:17; Jems 5:17) Sapos yumi bihainim pasin bilong Jon long laikim na tingim tru asainmen bilong yumi long wok bilong God, yumi tu inap stap amamas yet long wok bilong Kingdom, maski wanem ol senis i kamap.