1. Husat i helpim long kamapim nupela kongrigesen long Filipai?

TAIM aposel Pol, Sailas, Luk, na Timoti i go kamap long Filipai, ol i bungim planti man husat i laik kisim save long tok bilong Kingdom. Dispela 4-pela brata i helpim long kamapim wanpela kongrigesen, na olgeta disaipel i stat long bung wantaim. Ating ol i bung long haus bilong Lidia, em bilipmeri i gat pasin helpim.—Apo. 16:40.

2. Nupela kongrigesen i bungim wanem hevi?

² I no longtaim dispela nupela kongrigesen i bungim hevi. Satan i kirapim ol birua long mekim ol samting bilong stopim wok autim tok bilong ol dispela Kristen. Ol birua i arestim Pol na Sailas, na paitim na kalabusim tupela. Taim tupela i lusim kalabus, tupela i visitim ol nupela disaipel na strongim ol. Bihain, Pol wantaim Sailas na Timoti i lusim taun Filipai, tasol Luk i stap bek long hap. Ol nupela bratasista i mekim wanem? Jehova i helpim ol long rot bilong holi spirit na ol i givim bel yet long mekim wok bilong God. (Fili. 2:12) Pol i amamas tru long ol!

3. Olsem Filipai 1:9-11 i kamapim, Pol i beten long wanem samting?

³ Inap olsem 10-pela yia bihain, Pol i raitim pas i go long kongrigesen long Filipai. Taim yu ritim dispela pas, yu inap luksave long pasin laikim bilong Pol long ol bratasista. Pol i tok: “Mi gat bikpela laik tru long lukim yupela olgeta, [na] dispela pasin bilong mi long laikim yupela tumas i wankain olsem Krais Jisas i kamapim.” (Fili. 1:8) Em i tokim ol olsem em i beten askim God long sambai long ol. Em i askim Jehova long helpim ol long mekim pasin laikim bilong ol i kamap bikpela moa, tingim ol samting i bikpela samting moa, stap klin tru, no ken pundaunim  ol narapela, na wok yet long mekim stretpela pasin. Ating yu bai wanbel olsem tok bilong Pol inap helpim yumi tu long nau. Olsem na yumi ken ritim pas Pol i raitim i go long ol Kristen long Filipai. (Ritim Filipai 1:9-11.) Yumi bai skelim ol poin em i kamapim na stori long olsem wanem yumi inap bihainim wan wan bilong ol dispela poin.

4. (a) Olsem 1 Jon 4:9, 10 i kamapim, olsem wanem Jehova i soim klia pasin laikim bilong em? (b) Yumi mas laikim God inap long wanem mak?

⁴ Jehova i soim bikpela pasin laikim taim em i salim Pikinini bilong em i kam long graun bilong dai na baim bek yumi long sin. (Ritim 1 Jon 4:9, 10.) Pasin laikim bilong God i kirapim yumi long laikim em. (Rom 5:8) Yumi mas laikim God inap long wanem mak? Jisas i bekim dispela askim taim em i tokim wanpela Farisi olsem: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.” (Mat. 22:36, 37) Yumi no laik givim hap bel tasol long laikim God, nogat. Pasin bilong yumi long laikim em i mas kamap strong moa long olgeta wan wan de. Pol i tokim ol Kristen olsem pasin laikim bilong ol i mas “kamap bikpela moa.” Yumi inap mekim wanem bilong strongim pasin bilong yumi long laikim God?

5. Olsem wanem pasin laikim bilong yumi inap kamap strong moa?

⁵ Yumi mas save long God bambai yumi inap laikim em. Baibel i tok: “Man i no mekim pasin laikim em i no kisim save long God, long wanem, God em i pasin laikim.” (1 Jon 4:8) Aposel Pol i kamapim klia olsem pasin bilong yumi long laikim God bai kamap strong moa taim yumi kisim “stretpela save na pasin bilong kliagut tru” long tingting bilong Em. (Fili. 1:9) Taim yumi stadi long Baibel long namba 1 taim, ating yumi kisim liklik save pinis long ol gutpela pasin bilong God na dispela i kirapim yumi long laikim em. Taim save bilong yumi long Jehova i kamap bikpela moa, pasin bilong yumi long laikim em tu i kamap strong moa. Olsem na pasin bilong stadi long Baibel na tingim tingim ol tok bilong en i stap olsem nambawan bikpela samting!—Fili. 2:16.

6. Olsem 1 Jon 4:11, 20, 21 i kamapim, yumi kisim wanem skul long pasin bilong laikim ol narapela?

⁶ Taim yumi tingim bikpela pasin laikim bilong God, dispela bai kirapim yumi long laikim ol bratasista. (Ritim 1 Jon 4:11, 20, 21.) Yumi inap ting olsem em isi long laikim ol bratasista bikos yumi lotuim Jehova na wok strong long bihainim ol gutpela pasin bilong em. Yumi bihainim eksampel bilong Jisas, em man i laikim yumi tru na givim laip bilong em long helpim yumi. Maski i olsem, sampela taim yumi inap pilim hatwok long bihainim lo bilong laikim tru narapela narapela. Yumi ken skelim wanpela eksampel long Filipai kongrigesen.

7. Yumi kisim wanem skul long tok kaunsel Pol i givim long Yuodia na Sintike?

⁷ Yuodia na Sintike i givim bel tru long “wok wantaim” aposel Pol. Tasol wanpela liklik hevi i mekim na tupela i no pas gut moa. Taim Pol i raitim pas i go long kongrigesen bilong Yuodia na Sintike, em i kolim stret nem bilong tupela na givim tok kaunsel long tupela i mas “kamap wanbel.” (Fili. 4:2, 3) Pol i tokim kongrigesen: “Long olgeta samting  yupela i mekim, yupela i mas sakim yet pasin bilong toktok planti na tok pait.” (Fili. 2:14) Dispela tok kaunsel bilong Pol i helpim Yuodia na Sintike na helpim tu kongrigesen long strongim pasin bilong laikim narapela narapela.

8. (a) Wanem samting inap pasim yumi long laikim ol bratasista? (b) Olsem wanem yumi inap daunim dispela hevi?

⁸ Sampela taim yumi pilim hatwok long laikim ol narapela bikos yumi mekim pasin em Yuodia na Sintike i bin mekim—yumi bisi tumas long popaia bilong ol narapela. Yumi olgeta i save mekim popaia. Sapos oltaim yumi tingim tasol popaia bilong ol narapela, dispela bai pasim yumi long laikim ol. Olsem, sapos wanpela pablisa i lusim tingting long helpim yumi long klinim Haus Kingdom, dispela inap mekim na yumi belhat liklik. Sapos yumi tingim gen olgeta popaia bilong dispela pablisa, belhat bilong yumi bai kamap bikpela moa na yumi no inap laikim em. Sapos kain samting olsem i kamap, tingim olsem: Jehova i lukim ol popaia bilong yumi na bilong dispela pablisa. Maski yumi mekim ol popaia, God i laikim yet dispela pablisa na em i laikim yumi tu. Olsem na yumi mas bihainim pasin laikim bilong Jehova na oltaim yumi mas tingim ol gutpela pasin bilong ol bratasista. Taim yumi wok strong long laikim ol bratasista, dispela bai strongim pasin wanbel namel long yumi.—Fili. 2:1, 2.

9. Pol i tingim wanem ol samting taim em i kirapim ol Kristen long skelim “ol samting i bikpela samting moa”?

⁹ Holi spirit i kirapim Pol long tokim ol Kristen long Filipai—na olgeta Kristen—long “skelim gut wanem ol samting i bikpela samting moa.” (Fili. 1:10) Ol dispela samting em bel isi na pasin wanbel insait long kongrigesen, wok bilong mekim holi nem bilong Jehova, na wok bilong inapim olgeta samting em i tingting pinis long mekim. (Mat. 6:9, 10; Jon 13:35) Taim yumi tingim ol dispela samting olsem ol bikpela samting tru, yumi soim klia olsem yumi laikim Jehova.

10. Yumi mas mekim wanem bambai yumi stap klin tru?

¹⁰ Pol i tok tu olsem yumi mas i “stap klin tru.” Dispela i no makim olsem yumi mas kamap gutpela olgeta. Yumi no inap stap klin tru wankain olsem God Jehova. Tasol Jehova bai tingim olsem yumi stap klin tru sapos yumi taitim bun long strongim pasin laikim na tingim ol samting i bikpela samting moa. Wanpela rot bilong soim pasin laikim em long abrusim pasin bilong pundaunim ol narapela.

11. Wai na yumi mas abrusim pasin bilong pundaunim ol narapela?

¹¹ Instraksen bilong abrusim pasin bilong pundaunim ol narapela i olsem wanpela tok lukaut. Yumi inap pundaunim ol narapela long wanem ol rot? Long rot bilong ol amamas yumi kisim, stail bilong klos yumi werim, o wok mani bilong yumi. Ating samting yumi mekim i no gat rong. Tasol sapos dispela samting i pundaunim wanpela pablisa, dispela em bikpela rong tru. Sapos yumi mekim kain rong olsem, Jisas i tok mobeta ol i pasim traipela ston long nek bilong yumi na tromoi yumi i go insait long solwara!—Mat. 18:6.

12. Yumi kisim wanem skul long eksampel bilong tupela painia?

¹² Tupela marit i mekim wok painia na  ol i bihainim tok lukaut bilong Jisas. Long kongrigesen bilong ol, i gat tupela marit em ol i baptais nupela—ol i kamap bikpela long ol famili we ol i strik tumas long planti samting. Tupela marit i baptais nupela i bilip olsem ol Kristen i no ken watsim ol muvi, maski em ol gutpela muvi. Tupela i kirap nogut taim ol i harim olsem dispela tupela painia i watsim wanpela muvi. Olsem na tupela painia i abrusim pasin bilong watsim muvi, na ol i larim sampela haptaim i lus i go inap long tupela marit i baptais nupela i trenim maus bilong bel long skelim wanem samting i stret na wanem samting i no stret. (Hib. 5:14) Toktok na pasin bilong dispela tupela painia i soim klia olsem ol i laikim tru nupela brata na sista bilong ol.—Rom 14:19-21; 1 Jon 3:18.

13. Olsem wanem yumi inap kirapim man long mekim rong?

¹³ Yumi inap pundaunim man sapos yumi yet i kirapim em long mekim rong. Dispela inap kamap olsem wanem? Skelim dispela stori. Inap longpela haptaim, Baibel sumatin i gat hevi long pasin bilong dring alkohol. Tasol bihain em inap daunim na kontrolim dispela laik. Em i luksave olsem em i mas sakim alkohol. Em i mekim planti senis long laip bilong em na em i kisim baptais. Bihain, wanpela brata invaitim em long wanpela bung, givim em alkohol na tok: “Yu kamap Kristen pinis; holi spirit bilong Jehova i stap wantaim yu. Wanpela pasin bilong holi spirit em pasin bilong bosim bel. Sapos yu bosim bel, yu ken dring liklik alkohol.” Tingim, dispela nupela  brata inap pundaun long sin sapos em i bihainim dispela tingting kranki!

14. Olsem wanem ol miting Kristen i helpim yumi long bihainim instraksen i stap long Filipai 1:10?

¹⁴ Ol miting Kristen i helpim yumi long bihainim instraksen i stap long Filipai 1:10. Namba 1: Ol program long miting i kirapim yumi long luksave long ol samting Jehova i tingim olsem bikpela samting moa. Namba 2: Yumi lain long bihainim ol skul yumi kisim bambai yumi inap stap klin tru. Namba 3: Yumi “kirapim [narapela narapela] long mekim pasin laikim na mekim ol gutpela wok.” (Hib. 10:24, 25) Taim ol bratasista i strongim yumi, pasin bilong yumi long laikim God na ol bratasista bai kamap bikpela moa. Taim yumi givim bel tru long laikim God na ol bratasista, yumi bai wok strong tru long abrusim ol samting we inap pundaunim ol narapela.

15. Yumi mas mekim wanem na bai “stretpela pasin i ken pulap” long yumi?

¹⁵ Pol i beten strong olsem “stretpela pasin i ken pulap” long ol Kristen long Filipai. (Fili. 1:11) Dispela “stretpela pasin” i makim pasin bilong laikim Jehova na ol manmeri bilong em. Em makim tu pasin bilong ol Kristen long autim bilip bilong ol na stori long samting ol i bilip na wet long en. Filipai 2:15 i tok ol manmeri bilong God i stap olsem “lait namel long ol [manmeri] long dispela graun.” Dispela tok i stret bikos Jisas i kolim ol disaipel olsem “lait bilong graun.” (Mat. 5:14-16) Na tu, em i tok ol i mas “kamapim ol disaipel” na “stap witnes . . . i go inap long olgeta hap bilong graun.” (Mat. 28:18-20; Apo. 1:8) Yumi mekim “stretpela pasin” taim yumi insait tru long sapotim dispela nambawan bikpela wok.

16. Olsem wanem tok bilong Filipai 1:12-14 i soim olsem yumi inap stap olsem lait long taim bilong hevi? (Lukim fran pes piksa.)

 ¹⁶ Maski wanem ol samting i kamap long yumi, yumi inap stap olsem lait namel long ol manmeri bilong dispela graun. Wanpela hevi inap kamap na i luk olsem em bai pasim rot bilong yumi long autim tok, tasol dispela wankain hevi inap opim rot bilong autim tok. Tingim aposel Pol; em i stap kalabus long haus long Rom taim em i raitim pas i go long kongrigesen long Filipai. Tasol sen i no pasim em long autim tok long ol gad na ol visita. Pol i givim bel tru long autim tok long taim bilong hevi, na dispela i strongim ol bratasista long “autim tok bilong God na ol i no pret.”—Ritim Filipai 1:12-14; 4:22.

17. Sampela bratasista i mekim wanem na ol inap autim tok yet long taim bilong hevi?

¹⁷ Planti bratasista i bihainim pasin bilong Pol long strongim bel long taim bilong hevi. Ol i stap long ol kantri we ol i no inap autim tok long pablik ples o long ol haus, olsem na ol i painim ol narapela rot bilong autim gutnius. (Mat. 10:16-20) Long wanpela kantri, wasman sekit i tokim ol pablisa long autim tok long teritori bilong ol yet: Ol wanblut, ol neiba, ol wanskul, ol wanwok, na ol pren. Insait long 2-pela yia, planti moa kongrigesen i kamap long dispela sekit. Ating yumi stap long kantri we i no gat tambu long wok autim tok. Tasol yumi inap kisim gutpela skul long ol bratasista bilong yumi: Oltaim yumi mas painim rot long autim tok, na bilip olsem Jehova bai strongim yumi long mekim yet dispela wok.—Fili. 2:13.

18. Yumi mas tingting strong long mekim wanem?

¹⁸ Yumi stap long taim nogut, olsem na yumi mas tingting strong long bihainim tok kaunsel Pol i kamapim long pas em i raitim long ol Kristen long Filipai. Yumi mas tingim ol samting i bikpela samting moa, stap klin tru, abrusim pasin bilong pundaunim ol narapela, na mekim ol stretpela pasin. Sapos yumi mekim olsem, pasin laikim bilong yumi bai kamap bikpela moa na yumi inap givim ona long Papa bilong yumi, Jehova.