1. Pol i kirapim ol Kristen long mekim wanem?

OL KRISTEN i stap insait long resis bilong kisim laip. Maski nau tasol yumi stat long ran o yumi ran long dispela resis inap planti yia pinis, yumi mas ran yet i go inap long pinis bilong en. Tok bilong aposel Pol long ol Kristen long Filipai inap strongim yumi long pinisim gut dispela resis. Sampela Kristen long Filipai i mekim wok bilong Jehova inap planti yia paslain long pas bilong Pol i go kamap long ol. Ol i ran gut long resis bilong laip, tasol Pol i kirapim ol long ran strong yet na no ken les kwik. Em i laik bai ol i bihainim eksampel bilong em na “ran strong i go bilong kamap long mak bilong kisim prais.”—Fili. 3:14.

2. Wai na yumi inap tok olsem tok bilong Pol i go kamap long Filipai long rait taim?

² Tok bilong Pol i go kamap long Filipai long rait taim. Kirap long taim kongrigesen i kamap nupela long hap, ol manmeri i birua long ol Kristen. God i kirapim Pol long “kam long Masedonia,” olsem na Pol na Sailas i go kamap long Filipai long 50 C.E. (Apo. 16:9) Ol i bungim Lidia. Em i wok long “putim yau i stap na Jehova i opim bel bilong em long kisim” gutnius. (Apo. 16:14) I no longtaim em i kisim baptais, na olgeta lain long haus bilong em tu i kisim baptais. Tasol Satan i stat long kamapim hevi. Ol man bilong taun i pulim Pol na Sailas i go long ai bilong ol majistret na sutim tok giaman olsem tupela i kirapim bikpela trabel long taun. Olsem na ol manmeri i paitim tupela nogut tru, putim tupela long kalabus, na bihain ol i tokim tupela long lusim taun. (Apo. 16:16-40) Yu ting tupela i givap? Nogat tru! Na olsem wanem long ol bratasista long nupela kongrigesen? Ol tu i sanap strong na ol i no givap! Ol i kisim strong taim ol i lukim gutpela eksampel bilong Pol na Sailas.

3. (a) Pol i luksave long wanem samting? (b) Yumi bai skelim wanem ol askim?

³ Pol i tingting strong olsem em i no inap givap. (2 Kor.  4:16) Tasol em i save olsem sapos em i laik pinisim gut resis bilong laip, orait em i mas putim tingting i go stret long prais em bai kisim. Yumi inap kisim wanem skul long eksampel bilong Pol? Wanem ol eksampel i soim olsem yumi inap sanap strong yet maski hevi i painim yumi? Sapos yumi bilip na wet long gutpela samting bai painim yumi bihain, hau bai dispela i helpim yumi long sanap strong yet na no ken givap?

4. Olsem wanem Pol inap mekim yet wok bilong God maski hevi i painim em?

⁴ Tingim ol samting Pol i wok long mekim taim em i raitim pas i go long ol Kristen long Filipai. Em i stap kalabus long haus long Rom. Em i no gat rot long i go autim tok. Maski i olsem, em i bisi long autim tok long ol lain i kam visitim em, na tu, em i raitim pas i go long ol kongrigesen i stap longwe. Long nau tu, planti Kristen i no inap go autim tok bikos ol i lapun o ol i gat sik, tasol ol i autim tok long ol lain i kam visitim ol. Na tu, ol i raitim pas long ol manmeri ol i no gat rot long bungim.

5. Olsem Filipai 3:12-14 i kamapim, wanem samting i helpim Pol long putim tingting i go stret long prais?

⁵ Pol i no larim wanpela samting i pulim tingting bilong em, olsem ol wok o rong em i bin mekim long bipo. Em i tok em i “lusim tingting long ol samting bilong bipo” na dispela i helpim em long “wok strong long kisim ol samting bai kamap bihain.” Long dispela rot, i olsem em i pinisim gut resis. (Ritim Filipai 3:12-14.) Wanem ol samting inap pulim tingting bilong Pol? Namba 1: Paslain long em i kamap Kristen, em i bin mekim planti wok bilong sapotim lotu Juda. Tasol em i tingim olgeta dispela wok olsem “pipia nating.” (Fili. 3:3-8) Namba 2: Bel bilong em i gat tok long pasin birua em i bin mekim long ol Kristen long pastaim, tasol em i no larim dispela i pasim em long mekim wok bilong God. Namba 3: Em i pilim olsem em i no inapim planti samting yet long wok bilong Jehova. Pol i mekim planti gutpela samting long wok autim tok maski ol birua i kalabusim em, paitim na stonim em, em i sot long klos na kaikai, na sip em i stap long en i bagarap long solwara. (2 Kor. 11:23-27) Maski Pol i mekim pinis planti wok na ol birua i mekim nogut tru long em, em i save olsem em i mas wok strong yet long mekim wok bilong God. Yumi tu mas bihainim pasin bilong em.

6. “Ol samting bilong bipo” i makim wanem ol samting?

⁶ Olsem wanem yumi inap bihainim eksampel bilong Pol long “lusim tingting long ol samting bilong bipo”? Ating sampela bilong yumi i mekim rong long bipo na bel bilong yumi gat tok long dispela, tasol yumi no ken larim dispela i daunim yumi. Yumi ken mekim stadi bilong yumi yet long ofa bilong Krais long baim bek yumi. Sapos yumi stadi, tingim tingim ol tok, na beten, dispela inap helpim yumi long daunim tingting kranki bilong yumi yet bikos yumi save olsem Jehova i fogivim pinis ol rong bilong yumi. Tingim narapela skul yumi inap kisim long Pol. Ating sampela bilong yumi i lusim gutpela wok mani na mekim wok bilong Kingdom. Sapos olsem, mobeta yumi lusim tingting long ol samting yumi lusim pinis na no ken mangalim gen ol dispela samting. (Nam. 11:4-6; Ekl. 7:10) “Ol samting bilong bipo” i makim ol wok bilong God yumi bin mekim, na i makim tu ol hevi i painim yumi. Taim yumi tingim gen hau Jehova i blesim na sambai long yumi insait long ol yia i go pinis, dispela bai kirapim yumi long i go  klostu moa long Papa bilong yumi. Tasol yumi no laik tru long holim tingting olsem yumi mekim pinis planti wok bilong God.—1 Kor. 15:58.

7. Olsem 1 Korin 9:24-27 i kamapim, yumi mas mekim wanem na bai yumi inap winim resis bilong laip? Stori long tok piksa.

⁷ Pol i pilim tru tok bilong Jisas: “Yupela i mas taitim bun tru.” (Luk 13:23, 24) Olsem Krais i bin mekim, Pol i save olsem em i mas taitim bun tru i go inap long pinis bilong resis. Olsem na em i tok laip bilong yumi ol Kristen i wankain long wanpela resis. (Ritim 1 Korin 9:24-27.) Taim man i ran long resis, em i save tingting long pinisim gut resis na em i no save larim wanpela samting i pulim tingting bilong em. Long nau, ol man bilong resis inap ran long strit i gat ol bisnis na ol narapela samting we inap pulim tingting. Yu ting man bilong resis bai stop na sanap klostu long windo bilong stua na skelim ol samting i stap insait? Em i no inap mekim olsem sapos em i laik winim resis! Long resis bilong laip, yumi tu mas abrusim ol samting we inap pulim tingting bilong yumi. Sapos yumi tingting long pinisim gut resis, na yumi taitim bun tru olsem Pol i bin mekim, yumi bai winim prais!

8. Yumi bai skelim wanem 3-pela hevi?

⁸ Yumi ken skelim 3-pela hevi we inap daunim yumi. Namba 1: Ol samting i no kamap kwik olsem yumi ting. Namba 2: Bodi i no gat strong moa. Namba 3: Ol hevi i stap longpela taim. Yumi bai skelim stori bilong ol narapela husat i karim ol kain hevi olsem, na dispela bai strongim yumi.—Fili. 3:17.

9. Sapos wanpela samting i no kamap kwik olsem yumi ting, dispela inap mekim wanem long yumi?

⁹ Ol samting i no kamap kwik olsem yumi ting. Yumi laik tru long lukim truim bilong ol blesing Jehova i bin tok promis long en. Taim profet Habakuk i tokaut long bikpela laik bilong em long lukim Jehova i pinisim ol pasin nogut long Juda, Jehova i tokim em long “wet i stap na [dispela samting] bai i kamap.” (Hab. 2:3) Sapos ol samting i no kamap kwik olsem yumi ting, dispela inap daunim laik bilong yumi long wet i stap. Yumi inap bel hevi. (Prov. 13:12) Kain  samting olsem i bin kamap long sampela bratasista klostu long yia 1914. Long dispela taim, planti Kristen em God i anointim, ol i ting olsem long 1914 ol bai kisim laip long heven. Tasol taim dispela samting i no kamap, ol i mekim wanem?

10. Tupela marit i mekim wanem taim ol samting i no kamap kwik olsem ol i ting?

¹⁰ Skelim eksampel bilong tupela Kristen. Brata Royal Spatz i kisim baptais long 1908 taim em i gat 20 krismas. Em i bilip tru olsem i no longtaim em bai kisim blesing bilong go long heven. Taim em i mekim plen long em bai marit long 1911, em i tokim Pearl, em sista em bai maritim, olsem: “Yu save long samting bai kamap long 1914. Sapos yumi laik marit, orait yumi mas hariap!” Taim 1914 i kamap, ol i no go long heven. Olsem na yu ting tupela i lusim resis bilong laip? Nogat. Tupela i no bin tingting tasol long blesing ol bai kisim. Ol i tingting moa long mekim ol samting em God i laik bai ol i mas mekim. Ol i holim wanpela tingting long sanap strong na ran yet long resis bilong laip. Royal na Pearl i mekim gut wok bilong God inap planti moa yia na bihain ol i pinisim wok bilong ol long graun na kisim laip long heven. Ating yu laik tru long lukim Jehova i stretim bek gutnem bilong em na kamapim klia biknem bilong em olsem nambawan bos, na truim olgeta tok promis bilong em. Yu ken bilip tru olsem ol dispela samting bai kamap long taim we Jehova yet i makim. Insait long haptaim i stap yet, yumi mas bisi long mekim wok bilong God, na taim ol samting i no kamap kwik olsem yumi ting, yumi no ken larim dispela i daunim yumi.

11-12. Wai na yumi mas wok strong yet long mekim wok bilong God maski bodi bilong yumi i no gat strong moa? Stori long wanpela eksampel.

¹¹ Bodi i no gat strong moa. Long pilai resis, bodi bilong man i mas stap strong na bai em inap ran gut. Tasol long resis bilong laip, man i no nidim strongpela bodi. Planti manmeri husat i stap long resis bilong laip, bodi bilong ol i no strong moa, tasol ol i givim bel tru long mekim yet wok bilong God. (2 Kor. 4:16) Brata Arthur Secord * i gat 88 krismas—em i mekim wok long Betel inap 55 yia olgeta na em i kamap lapun tru, na bodi bilong em i no gat strong moa. Wanpela nes i go long em na tok: “Brata Secord, yu bin yusim bodi bilong yu long mekim planti samting tru long wok bilong Jehova.” Tasol Arthur i no tingting tumas long ol wok em i bin mekim. Em i lukluk long nes, smail, na em i tok: “Yes, em tru. Tasol wok yumi mekim pinis, em i no bikpela samting. Bikpela samting moa em ol wok yumi mekim kirap long nau na i go.”

 ¹² Ating yu bin mekim wok bilong Jehova inap planti yia na nau sik i pasim rot bilong yu long mekim planti wok moa olsem yu mekim long bipo. Sapos olsem, orait yu no ken bel hevi. Yu ken bilip tru olsem Jehova i tingim tru gutpela wok yu mekim long bipo. (Hib. 6:10) Yumi no ken ting olsem skel bilong wok yumi mekim bai soim klia pasin laikim bilong yumi long Jehova, nogat. Pasin laikim bilong yumi bai kamap klia long tingting yumi holim na hau yumi yusim taim na strong bilong yumi long mekim wok. (Kol. 3:23) Jehova i save long skel bilong wok yumi inap mekim, na em i no ekspektim yumi long mekim bikpela wok moa winim skel bilong yumi.—Mak 12:43, 44.

13. Olsem wanem ekspiriens bilong Anatoly na Lidiya i kirapim yumi long wok strong yet maski planti hevi i bin painim yumi?

¹³ Ol hevi i stap longpela taim. Sampela wokman bilong Jehova i karim hevi long han bilong ol birua inap planti yia. Eksampel: Anatoly Melnik * i gat 12 krismas tasol taim ol birua i arestim papa bilong em, kalabusim em, na salim em i go long Saibiria, winim 7 tausen kilomita longwe long famili long Moldova. Wanpela yia bihain, ol birua i kalabusim tu Anatoly, mama bilong em, na bubu man na bubu meri bilong em, na salim ol tu i go long Saibiria. Bihain, rot i op long ol inap go long miting long narapela ples, tasol ol i mas wokabaut inap 30 kilomita long sno, na ples i kol nogut tru. Bihain, Brata Melnik i stap 3-pela yia long kalabus, longwe long meri bilong em, Lidiya, na pikinini gel bilong ol husat i gat 1-pela krismas. Maski ol bikpela hevi i painim Anatoly na famili bilong em inap planti yia, ol i mekim yet wok bilong God. Nau Anatoly i gat 82 krismas, na em i stap memba bilong Brens Komiti long wanpela hap bilong Sentral Esia. Olsem Anatoly na Lidiya, yumi mas mekim olgeta samting yumi inap mekim long wok bilong Jehova, na sanap strong yet olsem yumi bin mekim long bipo.—Gal. 6:9.

14. Pol i luksave olsem em i mas mekim wanem na bai em inap kamap long mak?

¹⁴ Pol i holim strongpela tingting olsem em bai pinisim gut resis na kamap long mak. God i bin anointim em long holi spirit, na em i bilip long kisim “singaut bilong i go antap.” Tasol em i luksave olsem em i mas wok yet long “ran strong” na bai em inap kamap long mak. (Fili. 3:14) Long pas  Pol i salim long ol Kristen long Filipai, em i kamapim wanpela tok piksa bilong helpim ol long putim tingting i go stret long mak.

15. Taim Pol i stori long tok piksa bilong i stap sitisen, hau na dispela i kirapim ol Kristen long Filipai long wok yet long “ran strong”?

¹⁵ Pol i kirapim ol Kristen long Filipai long tingim olsem ol bai kamap sitisen bilong heven. (Fili. 3:20) Wai na ol i mas tingim dispela samting? Long dispela taim bipo, ol man i laik tru long i stap sitisen bilong Rom. * Tasol em spesel tru long kamap sitisen bilong heven. Gavman bilong heven bai kamapim planti moa blesing em gavman bilong Rom i no inap tru long kamapim! Olsem na Pol i kirapim ol Kristen long Filipai long “stap yet olsem ol sitisen long pasin i stret long dispela gutnius bilong Krais.” (Fili. 1:27, ftn.) Long nau, ol Kristen God i anointim, ol i stap gutpela eksampel long pasin bilong wok strong long kamap long mak bilong kisim laip oltaim long heven.

16. Maski yumi bilip long kisim laip long heven o long graun, yumi mas wok yet long mekim wanem olsem Filipai 4:6, 7 i kirapim yumi long mekim?

¹⁶ Maski yumi bai kisim laip long heven o long paradais long graun, yumi mas wok strong yet long i go kamap long dispela mak. Maski sindaun bilong yumi i wanem kain, yumi no ken tru lukluk i go bek long ol samting yumi lusim pinis, na tu, yumi no ken larim wanpela samting i pasim yumi long mekim yet wok bilong Jehova. (Fili. 3:16) Ating yumi pilim olsem truim bilong ol tok promis i no kamap kwik olsem yumi bin ting, o bodi bilong yumi i no gat strong moa. Ating yumi karim sampela hevi inap planti yia pinis. Maski sindaun bilong yumi i wanem kain, yumi “no ken tingting planti long wanpela samting.” Beten long God na autim olgeta askim na wari long em, na em bai givim bel isi we i winim tru samting yumi inap tingim.—Ritim Filipai 4:6, 7.

17. Yumi bai skelim wanem samting long neks atikol?

¹⁷ Olsem man bilong resis i save ran strong moa taim em i kamap long laspela mak, yumi mas putim olgeta tingting bilong yumi i go long pinisim resis bilong laip. Sapos bodi bilong yumi i gat strong yet na i no gat hevi i pasim yumi, orait yumi mas taitim bun tru long mekim wok bilong God na bai yumi inap kamap long mak. Yumi mas mekim wanem na bai yumi inap ran strong yet na yumi no putim hevi long yumi yet? Neks atikol bai helpim yumi long putim ol mak i stret long yumi na “skelim gut wanem ol samting i bikpela samting moa.”—Fili. 1:9, 10.