1. Jehova i opim rot long olgeta wan wan wokman bilong em inap mekim wanem?

JEHOVA i opim rot long olgeta wan wan wokman bilong em inap stap insait long kongrigesen bilong em. Maski yumi mekim narapela narapela wok, yumi dia tumas na yumi nidim narapela narapela. Aposel Pol i helpim yumi long luksave long dispela. Hau?

2. Olsem Efesus 4:16 i kamapim, wai na yumi mas tingim gut narapela narapela na wok gut wantaim?

² Olsem tim skripsa bilong dispela atikol i kamapim, Pol i tok yumi no inap tokim narapela wokman bilong Jehova olsem “mi no nidim yu.” (1 Kor. 12:21) Sapos yumi laik bai kongrigesen i stap bel isi, orait yumi mas tingim gut narapela narapela na wok gut wantaim. (Ritim Efesus 4:16.) Taim yumi stap wanbel na wok bung wantaim, kongrigesen bai kamap strong na pasin laikim bai strongim olgeta insait long kongrigesen.

3. Long dispela atikol, yumi bai stori long wanem ol samting?

³ Wanem sampela samting yumi ken mekim bilong soim rispek long ol Kristen insait long kongrigesen? Long dispela atikol, yumi bai stori long olsem wanem ol elda i ken soim rispek long ol narapela elda. Bihain, yumi bai stori long olsem  wanem yumi olgeta inap soim olsem yumi tingim tru ol singel bratasista. Na las tru, yumi bai stori long olsem wanem yumi inap soim olsem yumi tingim gut ol bratasista em ol i no save gut long tokples bilong yumi.

4. Olsem i stap long Rom 12:10, Pol i mekim wanem tok em ol elda i mas bihainim?

⁴ Holi spirit bilong Jehova i makim ol elda insait long kongrigesen. Olgeta wan wan i gat narapela narapela save na strong bilong mekim wok. (1 Kor. 12:17, 18) Ating sampela em ol nupela elda na ol i no gat planti ekspiriens. Ol narapela i no inap mekim planti wok bikos ol i lapun na ol i gat hevi long sait bilong helt. Maski i olsem, ol elda i no ken lukluk long narapela elda na tingting olsem “mi no nidim yu.” Mobeta olgeta wan wan elda i bihainim tok bilong Pol long Rom 12:10.—Ritim.

5. (a) Olsem wanem ol elda i soim olsem ol i rispektim ol narapela elda? (b) Wai na em i bikpela samting long ol i mas mekim olsem?

⁵ Ol elda i soim rispek long ol narapela elda taim ol i putim gut yau long tok bilong ol. Em i bikpela samting long ol elda i mekim olsem taim ol i bung wantaim long toktok long ol bikpela samting. Wai? Tingim tok i stap long Wastaua bilong Oktoba 1, 1988: “Ol elda i luksave olsem Krais inap yusim holi spirit long stiaim tingting bilong wanpela elda long kamapim stiatok bilong Baibel we inap helpim ol long stretim wanpela hevi o long mekim bikpela disisen. (Apo. 15:6-15) Holi spirit i save helpim olgeta elda, na i no wanpela elda tasol.”

6. (a) Olsem wanem ol elda inap wok gut wantaim long pasin wanbel? (b) Olsem wanem dispela bai helpim kongrigesen?

⁶ Sapos elda i rispektim ol narapela elda, em i no inap stap olsem fes man bilong toktok long olgeta miting bilong ol elda. Em bai larim ol narapela tu long toktok, na em i no inap pilim olsem oltaim tingting bilong em i stret. Em bai bihainim pasin daun taim em i kamapim tingting bilong em. Em bai putim gut yau long tingting  bilong ol narapela. Bikpela samting moa, em i laik tru long kamapim ol stiatok bilong Baibel na putim yau long daireksen i kam long “gutpela wokboi i gat savetingting.” (Mat. 24:45-47) Sapos ol elda i soim pasin laikim na pasin rispek taim ol i stap long miting bilong ol, holi spirit bilong God bai i stap, na em bai stiaim ol long mekim ol disisen we inap strongim kongrigesen.—Jems 3:17, 18.

7. Jisas i holim wanem tingting long ol lain i stap singel?

⁷ Long nau, ol kongrigesen i gat ol marit na ol famili. Na tu, i gat planti bratasista em ol i no marit. Yumi mas holim wanem tingting long ol lain i stap singel? Skelim tingting bilong Jisas long ol lain i stap singel. Taim Jisas i stap long graun, em i no marit. Em i stap singel na em i lusim taim na strong bilong em long mekim asainmen bilong em. Jisas i no putim lo olsem man i mas marit o stap singel, nogat. Em i tok sampela Kristen bai mekim disisen olsem ol i no inap marit. (Mat. 19:11, 12) Jisas i rispektim ol lain i no marit. Em i no holim tingting olsem ol i no gat nem o ol i sot long sampela samting.

8. Olsem 1 Korin 7:7-9 i kamapim, Pol i kirapim ol Kristen long skelim wanem samting?

⁸ Olsem Jisas, aposel Pol i stap singel na mekim wok lotu. Em i no tambuim ol Kristen long marit. Em i save olsem dispela em disisen bilong Kristen yet long mekim. Tasol em i kirapim ol Kristen long skelim sapos ol inap stap singel na mekim wok bilong Jehova. (Ritim 1 Korin 7:7-9.) Pol i no luk daun long ol Kristen i stap singel. Em i makim yangpela Timoti, em singel brata, long mekim ol bikpela wok. * (Fili. 2:19-22) Olsem na maski man i marit o em i stap singel, dispela i no makim olsem em i winim mak bilong mekim ol wok o em i no winim ol mak.—1 Kor. 7:32-35, 38.

9. Yumi mas holim wanem tingting long marit na pasin bilong i stap singel?

⁹ Jisas na Pol i no skulim ol Kristen olsem ol i mas marit o ol i mas stap singel, nogat. Olsem na yumi mas holim wanem tingting long marit na pasin bilong i stap singel? Wastaua bilong Oktoba 1, 2012, i bekim gut dispela askim na tok: “Marit na  singel, tupela wantaim em presen i kam long God. . .  Jehova i no tingim pasin bilong stap singel olsem samting bilong sem o bel hevi long en. Nogat.” Olsem na yumi mas rispektim ol singel bratasista insait long kongrigesen.

10. Olsem wanem yumi inap soim rispek long ol singel bratasista?

¹⁰ Olsem wanem yumi inap rispektim filings na laip bilong ol singel bratasista? Yumi mas tingim olsem sampela singel Kristen i mekim disisen olsem ol bai stap singel. Sampela arapela singel Kristen i laik marit, tasol ol i no painim poroman i stret long ol. Na sampela, ating poroman marit bilong ol i dai. Maski i gat wanem risen na ol i stap singel, yu ting i stret long askim ol long wai na ol i no marit o tokim ol olsem yumi laik helpim ol long painim poroman marit? Em tru olsem sampela singel Kristen inap askim yumi long helpim ol. Tasol sapos ol i no askim yumi long helpim ol, ol bai pilim olsem wanem sapos yumi laik helpim ol long painim poroman marit? (1 Tes. 4:11; 1 Tim. 5:13) Yumi ken skelim sampela tok bilong ol singel bratasista em ol i stap gut long God.

11-12. Olsem wanem yumi inap mekim ol singel lain i bel hevi?

¹¹ Wanpela sekit ovasia husat i stap singel na em i save mekim gut asainmen bilong em, em i pilim olsem i gat planti gutpela samting long i stap singel. Tasol em i tok, em i save bel hevi taim ol bratasista i askim em olsem: “Wai na yu no marit?” Wanpela singel brata long wanpela brens ofis i tok: “Sampela taim ol bratasista i mekim na mi bel hevi long mi stap singel. Dispela i mekim na mi tingim pasin bilong i stap singel olsem wanpela hevi, na i no olsem wanpela presen.”

¹² Wanpela singel sista long Betel i tok: “Sampela pablisa i ting olsem olgeta singel lain i wok long painim poroman marit, na ol i ting olsem taim ol singel i bung wantaim ol narapela, rot i op long ol inap painim poroman marit. Wanpela taim mi go long narapela hap bilong kantri long mekim wanpela asainmen, na mi kamap long nait long taim bilong miting. Mi bai stap wantaim wanpela sista, na em i tokim mi olsem i gat 2-pela brata long kongrigesen em ol i wankrismas bilong mi. Em i tok em i no plen long makim poroman marit bilong mi. Tasol taim mipela i go insait long Haus Kingdom, em i pulim mi i go bungim dispela 2-pela brata. Mi sem, na dispela 2-pela brata tu i sem.”

13. Wanem ol eksampel i strongim wanpela singel sista?

¹³ Narapela singel sista long Betel i tok: “Mi save long ol singel painia em ol i gat bikpela krismas na ol i holim stretpela tingting, daunim laik bilong ol yet, ol i belgut long wok ol i mekim, na ol i sapotim tru kongrigesen. Ol i stap singel, tasol ol i no pilim olsem ol i winim ol narapela, na tu, ol i no pilim olsem ol narapela i winim ol bikos ol i no gat poroman marit o famili.” Yu bai amamas tru long stap insait long kongrigesen we olgeta i rispektim yu na tingim yu. Yu no inap pilim olsem ol i sori o bel nogut long yu, o givim baksait long yu, o daunim yu. Yu save olsem ol i laikim yu.

14. Olsem wanem yumi inap soim olsem yumi rispektim ol singel bratasista?

¹⁴ Ol singel bratasista bai amamas tru sapos yumi tingim ol gutpela pasin bilong ol, na yumi no sori long ol bikos ol i stap  singel. Yumi mas pilim tru pasin bilong ol long stap gut long God. Long dispela rot, ol singel bratasista i no inap pilim olsem yumi tok: “Mi no nidim yu.” (1 Kor. 12:21) Ol bai save olsem yumi rispektim ol na yumi tingim ol insait long kongrigesen.

15. Sampela pablisa i mekim wanem ol senis na bai ol inap mekim bikpela wok moa long autim tok?

¹⁵ Long ol yia i go pinis, planti pablisa i putim mak long lainim narapela tokples na bai ol inap mekim bikpela wok moa long autim tok. Olsem na ol i mas mekim sampela senis. Ol i lusim kongrigesen i mekim tokples tru bilong ol na ol i go stap long kongrigesen i mekim narapela tokples na i sot tru long ol pablisa. (Apo. 16:9) Ol dispela Kristen yet i mekim disisen long helpim wok bilong Kingdom. Planti yia inap lus paslain long ol i save gut long nupela tokples, tasol ol i sapotim tru kongrigesen. Ol gutpela pasin bilong ol na ekspiriens bilong ol i strongim kongrigesen. Yumi tingim tru ol dispela bratasista husat i daunim tru laik bilong ol yet!

16. Ol elda i save skelim wanem samting taim ol i laik makim ol brata long kamap elda o kongrigesen sevan?

¹⁶ Maski sapos wanpela brata i no save gut long tokples bilong nupela kongrigesen, lain elda i no inap surik long mekim rekomendesen bilong dispela brata long kamap elda o kongrigesen sevan. Ol elda bai skelim sapos em i winim ol mak em Baibel i makim bilong kamap elda o kongrigesen sevan, na ol i no inap skelim em long save bilong em long mekim tokples.—1 Tim. 3:1-10, 12, 13; Tai. 1:5-9.

17. Ol famili i muv i go long narapela kantri i mas skelim wanem ol askim?

¹⁷ Sampela famili Kristen i muv i go long narapela kantri long abrusim ol hevi o painim wok mani. Olsem na ol pikinini bilong ol inap go long skul i yusim bikpela tokples bilong dispela kantri. Ol papamama tu i mas lainim dispela tokples na bai ol inap painim wok mani. Tasol olsem wanem sapos wanpela kongrigesen o grup i mekim tokples tru bilong ol? Dispela famili bai go long wanem kongrigesen? Ol bai go long kongrigesen i mekim bikpela tokples bilong kantri, o kongrigesen i mekim tokples tru bilong ol?

18. Olsem Galesia 6:5 i kamapim, olsem wanem yumi inap soim rispek long disisen em het bilong famili i mekim?

¹⁸ Het bilong famili i mas mekim disisen long wanem kongrigesen famili bilong em bai go long en. Olsem na em i mas skelim gut wanem disisen bai helpim famili. (Ritim Galesia 6:5.) Yumi mas rispektim disisen bilong em. Taim em i mekim pinis disisen, yumi mas wanbel na welkamim famili bilong em olsem wanfamili bilong yumi long kongrigesen.—Rom 15:7.

19. Ol het bilong famili i mas beten na skelim gut wanem samting?

 ¹⁹ Sampela famili i stap long kongrigesen i mekim tokples tru bilong papamama, tasol ol pikinini i no save gut long dispela tokples. Sapos dispela kongrigesen i stap long hap we ol man i mekim bikpela tokples bilong kantri, ol pikinini bai hatwok long kliagut long ol tok i kamap long miting na ol bai no inap kamap strong long bilip. Wai? Bikos ating ol pikinini i go long skul i yusim bikpela tokples bilong kantri na i no tokples tru bilong papamama. Long kain taim olsem, het bilong famili i mas beten na skelim samting papamama i mas mekim bilong helpim ol pikinini long i go klostu moa long Jehova na ol manmeri bilong em. Papamama i mas mekim disisen olsem: Ol bai helpim ol pikinini long save gut moa long tokples tru bilong ol, o famili bai muv i go long kongrigesen i yusim tokples em ol pikinini i kliagut long en. Het bilong famili bai mekim disisen long dispela samting, tasol em i mas makim kongrigesen we inap rispektim na tingim tru famili bilong em.

20. Olsem wanem yumi inap soim olsem yumi rispektim ol bratasista em ol i wok long lainim nupela tokples?

²⁰ Long planti kongrigesen, bai i gat ol bratasista em ol i traim bes long lainim nupela tokples. Ating ol i hatwok long kamapim stret tingting bilong ol taim ol i yusim nupela tokples. Yumi no ken tingim dispela, mobeta yumi tingim olsem ol i laikim tru Jehova na ol i laik mekim wok bilong em. Sapos yumi tingim ol dispela gutpela pasin, yumi bai tingim tru na rispektim ol dispela bratasista. Maski ol i no save gut long tokples bilong yumi, yumi no inap tok, “Mi no nidim yu.”

21-22. Yumi gat wanem gutpela blesing?

²¹ Jehova i givim gutpela blesing tru long yumi—em i opim rot na yumi inap stap insait long kongrigesen bilong em. Maski yumi man o meri, singel o marit, yangpela o lapun, o yumi save gut long wanpela tokples o nogat, yumi dia tru long ai bilong Jehova na long narapela narapela.—Rom 12:4, 5; Kol. 3:10, 11.

²² Yumi laik wok yet long bihainim ol gutpela skul yumi kisim long tok piksa bilong Pol long stap olsem wanpela bodi. Dispela bai helpim yumi long tingim planti samting moa yumi ken mekim bilong rispektim yumi yet, na rispektim tu ol narapela insait long kongrigesen bilong Jehova.