1. Wai na Jisas i askim Jehova long lukautim ol disaipel bilong em?

 LONG nait paslain long Jisas i dai, em i mekim wanpela spesel askim long Papa bilong em long heven. Em i askim Jehova long lukautim ol disaipel bilong em. (Jon 17:15, 20) Tru tumas, oltaim Jehova i save was long ol wokman bilong em, na em i save lukautim ol na sambai long ol. Tasol Jisas i save olsem Satan bai birua nogut tru long ol disaipel bilong em. Na tu, Jisas i luksave olsem ol disaipel bilong em i mas kisim helpim i kam long Jehova bilong sakim ol traim bilong Satan.

2. Olsem Buk Song 33:18-20 i kamapim, wai na yumi no ken pret taim yumi bungim ol hevi?

² Graun bilong Satan long nau i putim planti presa long ol Kristen tru. Yumi save bungim ol hevi we inap mekim yumi bel hevi tru na dispela i save traim tu pasin bilong yumi long stap gut long Jehova. Tasol olsem yumi bai skelim long dispela atikol, yumi no ken pret long wanpela samting. Jehova i save was long yumi na em i lukim ol hevi yumi karim na em i redi oltaim long helpim yumi long karim ol dispela hevi. Yumi bai skelim tupela stori bilong Baibel i soim klia olsem Jehova i save “lukluk long ol manmeri i pret long em.”​—Ritim Buk Song 33:18-20.

3. Long wanem ol taim yumi inap pilim olsem yumi stap wanpis?

³ Yumi insait long bikpela lain manmeri i lotuim Jehova, tasol sampela taim yumi inap pilim olsem yumi stap wanpis. Olsem, ating ol yangpela inap pilim wanpis taim ol i stori long bilip bilong ol long ai bilong ol wanklas bilong ol, o taim ol i lusim kongrigesen bilong ol na go long nupela kongrigesen. Sampela bilong yumi inap pilim wari o yumi inap hatwok long daunim bel hevi bilong yumi, na yumi inap kisim tingting olsem yumi stap wanpis long karim ol dispela bel hevi bilong yumi. Ating yumi surik long tokim ol narapela long samting yumi pilim bikos yumi wari olsem ol i no inap kliagut long dispela samting. Na ating sampela taim yumi  inap tingting olsem tru tru ol narapela i save tingim yumi o nogat. Kain kain samting inap kamap na mekim yumi pilim wanpis na dispela inap mekim yumi pilim olsem yumi no gat helpim na yumi tingting planti. Jehova i no laik bai yumi pilim olsem. I gat wanem as na yumi tok olsem?   

4. Wai na profet Elaija i tok olsem “mi wanpela tasol i stap”?

⁴ Tingim stori bilong gutpela man Elaija. Jesebel i bin tok promis long kilim em i dai, olsem na em i bin ranawe inap 40 de. (1 Kin. 19:1-9) Em i go kamap long wanpela keiv na long dispela hap em i singaut long Jehova olsem: “Mi wanpela [profet] tasol i stap.” (1 Kin. 19:10) Tasol i gat ol narapela profet tu i stap long Israel. Olsem, Obadia i bin seivim 100 profet na Jesebel i no bin kilim ol i dai. (1 Kin. 18:7, 13) So wai na Elaija i pilim olsem em i stap wanpis? Em i ting olsem ol profet em Obadia i seivim ol em ol i dai pinis? Em pilim wanpis bikos ol narapela i no joinim em long lotuim Jehova bihain long samting i bin kamap long Maunten Kamel na i traim god Bal? Ating em i pilim olsem i no gat man i save long Jesebel i laik kilim em i dai, o ating em i pilim olsem i no gat man i tingim em? Dispela hap bilong Baibel i no stori long samting Elaija i pilim. Tasol samting yumi save long en em olsem, Jehova i kliagut long as na Elaija i pilim wanpis, na em i save long rot bilong helpim em.

5. Jehova i mekim wanem bilong helpim Elaija long luksave olsem em i no stap wanpis?

⁵ Jehova i mekim ol samting bilong helpim Elaija. Em i kirapim Elaija long toktok. Tupela taim em i askim Elaija: “Yu mekim wanem long hia?” (1 Kin. 19:9, 13) Long dispela tupela taim, Jehova i putim gut yau long Elaija taim em i autim tingting i stap long bel bilong em. Jehova i soim long Elaija olsem Em i stap long dispela hap na em i gat bikpela strong tru. Na tu, em i mekim gut bel bilong Elaija olsem planti Israel i stap gut yet long lotuim Em. (1 Kin. 19:11, 12, 18) Em i klia tru olsem Elaija i pilim bel isi taim em i autim ol tingting i stap long bel bilong em long Jehova na em i putim yau long bekim bilong Em. Jehova i givim sampela bikpela wok long Elaija. Em i askim Elaija long makim Hasael long stap king bilong Siria, na makim Jehu long stap king bilong Israel, na Elisa olsem profet. (1 Kin. 19:15, 16) Jehova i givim ol dispela wok long Elaija, na long  dispela rot em i helpim Elaija long putim tingting long ol gutpela samting. Na tu, God i givim em wanpela gutpela poroman, em Elisa. Olsem wanem yu inap kisim helpim i kam long Jehova taim yu pilim wanpis?

6. Yu ken beten long wanem ol samting taim yu pilim wanpis? (Buk Song 62:8)

⁶ Jehova i tokim yu long beten long em. Em i lukim hevi yu karim na em i mekim gut bel bilong yu olsem em i redi long harim beten bilong yu long olgeta kain taim. (1 Tes. 5:17) Em i save amamas long putim yau long ol wokman bilong em. (Prov. 15:8) Yu ken beten long wanem samting taim yu pilim wanpis? Kamapim ol tingting i stap long bel bilong yu long Jehova, wankain olsem Elaija i bin mekim. (Ritim Buk Song 62:8.) Tokim em long ol samting yu tingting planti long en na ol dispela samting i mekim yu pilim olsem wanem. Askim Jehova long helpim yu long daunim ol tingting i stap long bel bilong yu. Olsem, taim yu pilim wanpis na yu pret long autim tok long skul, askim Jehova long givim yu strongpela bel bambai yu ken autim tok. Yu ken askim em tu long givim yu savetingting yu nidim bambai yu ken autim gut bilip bilong yu. (Luk 21:14, 15) Sapos yu pilim bel hevi tru, askim Jehova long helpim yu long toktok wantaim wanpela strongpela Kristen long dispela samting. Yu ken askim Jehova long helpim dispela Kristen na bai em i ken kliagut long samting yu pilim. Kamapim bel na tingting bilong yu long Jehova, na lukim hau em i bekim ol beten bilong yu, na redi long kisim helpim i kam long ol narapela, na long dispela rot, yu bai lukim olsem yu no pilim wanpis moa.

7. Yu inap kisim wanem skul long stori bilong Mauricio?

⁷ Jehova i givim gutpela wok long yumi olgeta wan wan long mekim. Yu ken save tru olsem Jehova i lukim na em i tingim tru ol wok yu mekim bilong inapim ol asainmen bilong yu insait long kongrigesen na long wok autim tok. (Sng. 110:3) Taim yu bisi long mekim ol dispela wok, olsem wanem dispela inap helpim yu long taim yu pilim wanpis? Tingim stori bilong wanpela yangpela brata nem bilong em Mauricio. * Bihain tasol long Mauricio i kisim baptais, isi isi wanpela gutpela pren bilong em i wok long lusim tok i tru. Mauricio i tok: “Taim mi lukim em i wok long lusim tok i tru, dispela i mekim na mi gat tupela tingting olsem bai mi stap gut o nogat. Mi tingting, mi inap long truim dedikesen bilong mi na stap yet insait long lain famili bilong Jehova o nogat. Mi pilim wanpis na mi pilim olsem i no gat man i kliagut long samting mi pilim.” Wanem samting i helpim Mauricio? Em i tok: “Mi mekim bikpela wok moa bilong autim tok. Dispela i helpim mi long mi no ken tingim mi yet tasol na tingting oltaim long ol bel hevi bilong mi. Taim mi wok wantaim ol narapela long mekim wok autim tok, mi amamas na mi no pilim wanpis moa.” Maski yumi no inap bung wantaim ol narapela wanbilip long mekim wok autim tok, yumi kisim strong long rot bilong bung wantaim ol long  raitim pas na autim tok long rot bilong telefon. Wanem narapela samting i helpim Mauricio? Em i tok: “Mi bisi tru long mekim ol wok bilong mi insait long kongrigesen. Mi putim tingting olgeta long redim gut na givim ol skul tok bilong mi. Ol dispela asainmen i helpim mi long pilim olsem Jehova i tingim mi tru na ol narapela tu i tingim mi.”

8. Ol bikpela hevi inap mekim wanem long yumi?

⁸ Yumi ken save olsem yumi bai bungim ol hevi long dispela taim bilong las de. (2 Tim. 3:1) Tasol sampela taim ol bikpela hevi i kamap long taim yumi no ting long en na yumi kirap nogut long dispela. Wantu tasol yumi inap bungim bikpela hevi bilong mani, wanpela bikpela sik i kisim yumi, o wanpela yumi laikim tumas i dai. Long kain taim olsem, yumi inap bel hevi tru na pilim olsem hevi i laik daunim yumi, na moa yet long taim ol hevi i wok long kamap klostu klostu o planti hevi i kamap long wankain taim. Tasol tingim, Jehova i lukluk long yumi i stap na em bai helpim yumi long strongim bel na karim ol dispela hevi.

9. Stori long ol hevi em Jop i bin karim.

⁹ Tingim hau Jehova i bin helpim gutpela man Jop. Em i karim sampela bikpela hevi insait long sotpela haptaim tasol. Insait long wanpela de tasol, Jop i kisim save long ol samting nogut i kamap na i kilim i dai olgeta animal bilong em, ol wokman bilong em, na samting i nogut tru—dispela i kilim i dai olgeta pikinini bilong em. (Jop 1:13-19) Bihain tasol long dispela, taim Jop i wok yet long karim bikpela bel hevi long ol hevi i kamap, wanpela bikpela sik nogut tru i kisim em. (Jop 2:7) Ol hevi i painim em i nogut tru, olsem na Jop i singaut na i tok: “Mi les tru long laip bilong mi; mi no laik i stap laip moa.”​—Jop 7:16.

10. Jehova i mekim wanem bilong helpim Jop long karim ol hevi bilong em? (Lukim fran pes piksa.)

¹⁰ Jehova i wok long lukluk long Jop. Jehova i laikim tru Jop, olsem na Em i givim em ol samting em i nidim bilong karim ol hevi bilong em. Jehova i toktok long Jop na em i kirapim em long tingim bikpela savetingting bilong Em na pasin bilong Em long lukautim ol samting Em i wokim. Em i stori long planti ol strongpela animal. (Jop 38:1, 2; 39:9, 13, 19, 27; 40:15; 41:1, 2) Na tu, Jehova i yusim wanpela yangpela man nem bilong em Elihu long strongim na mekim gut bel bilong Jop. Elihu i mekim ol gutpela tok long Jop olsem oltaim Jehova i save givim gutpela pe long ol wokman bilong em taim ol i sanap strong na karim hevi. Tasol Jehova i kirapim Elihu tu long givim sampela tok bilong stretim Jop. Elihu i helpim Jop long em i no ken tingting tumas long em yet tasol, long wanem, yumi ol man i olsem liklik samting tasol long ai bilong Jehova, em Man Bilong Wokim heven na graun. (Jop 37:14) Na tu, Jehova i givim wanpela wok long Jop, long em i mas beten bilong helpim 3-pela pren bilong em husat i bin mekim sin. (Jop 42:8-10) Jehova i mekim wanem bilong sapotim yumi long nau taim yumi karim ol bikpela hevi?

11. Baibel i gat wanem ol tok bilong mekim gut bel bilong yumi taim yumi karim ol hevi?

¹¹ Jehova i no save toktok stret long yumi olsem em i mekim long Jop, tasol Em i save toktok wantaim yumi long rot bilong Baibel. (Rom 15:4) Em i mekim gut bel bilong yumi taim em i helpim yumi long bilip na wet long ol gutpela samting bai kamap bihain. Yumi ken skelim sampela tok bilong Baibel we i ken mekim gut bel bilong yumi taim yumi karim ol hevi. Long Baibel, Jehova i tokim yumi olsem i no gat wanpela samting, maski em ol bikpela hevi tu—“inap tekewe yumi long pasin laikim bilong [em].” (Rom 8:38, 39) Em i mekim gut bel bilong yumi tu olsem Em “i save stap klostu long ol manmeri i save singaut long em i helpim ol” long rot bilong beten. (Sng. 145:18) Jehova i tokim yumi olsem taim yumi bilip na wet long em, dispela bai helpim yumi long karim olgeta kain hevi, na tu, em bai helpim yumi  long stap amamas long taim bilong hevi. (1 Kor. 10:13; Jems 1:2, 12) Baibel i kirapim yumi tu long tingim olsem ol hevi bilong yumi ol i bilong sotpela taim tasol, taim yumi skelim wantaim planti gutpela blesing bilong stap oltaim oltaim em God i laik givim long yumi. (2 Kor. 4:16-18) Jehova i helpim yumi long bilip na wet long gutpela samting bai kamap taim em i pinisim tru as bilong olgeta pen na hevi em Satan, dispela Devil, na ol lain husat i save bihainim ol pasin nogut bilong em. (Sng. 37:10) Olsem wanem? Yu bin holim long tingting sampela gutpela tok bilong Baibel long helpim yu long sanap strong na karim hevi long bihain?

12. Jehova i laik bai yumi mekim wanem sapos yumi laik bai Tok bilong em i helpim yumi?

¹² Jehova i laik bai yumi makim taim bilong stadi long Baibel long olgeta taim na tingim gut ol tok yumi ritim. Taim yumi bihainim ol tok yumi kisim skul long en, bilip bilong yumi bai kamap strong moa na yumi bai go klostu long gutpela Papa bilong yumi long heven. Dispela bai givim yumi strong long karim ol hevi. Na tu, Jehova i save givim holi spirit bilong em long ol manmeri husat i save bilip long Tok bilong em. Na dispela spirit bai givim yumi “strong i winim strong bilong yumi ol man” long karim hevi.​—2 Kor. 4:7-10.

13. Olsem wanem ol samting bilong strongim bilip em yumi kisim long “gutpela wokboi i gat savetingting” i helpim yumi long karim ol hevi?

¹³ Jehova i helpim “gutpela wokboi i gat savetingting” long kamapim ol atikol, ol vidio, na ol musik bilong helpim yumi long kisim strongpela bilip na long pas gut wantaim em. (Mat. 24:45) Yumi mas mekim gutpela wok long ol dispela samting bilong strongim bilip em yumi kisim long taim stret bilong en. I no longtaim i go pinis, wanpela sista long Amerika i soim tenkyu bilong em long ol dispela gutpela tok bilong Baibel em i kisim. Em i tok: “Insait long dispela 40 yia mi mekim wok bilong Jehova, planti samting i bin kamap na i traim pasin bilong mi long stap gut long God.” Em i karim ol bikpela hevi olsem, wanpela spak draiva i kilim i dai tumbuna papa bilong em, tupela papa na mama bilong em i kisim bikpela sik na ol i dai, na inap tupela taim em i kisim sik kensa. Wanem samting i helpim em long sanap strong na karim hevi? Em i tok: “Oltaim Jehova i save lukautim mi. Ol gutpela tok bilong strongim bilip em i givim yumi long rot bilong gutpela wokboi i gat savetingting i bin helpim mi long karim hevi. Ol dispela samting i mekim na mi pilim wankain olsem Jop, em i tok: ‘I go inap long taim mi dai, mi no inap lusim pasin bilong mi long i stap gut long God!’”—Jop 27:5.

14. Long wanem rot Jehova i yusim ol wanbilip long sapotim yumi taim yumi karim ol bikpela hevi? (1 Tesalonaika 4:9)

 ¹⁴ Jehova i bin trenim gut lain bilong em long mekim pasin laikim na mekim gut bel bilong narapela narapela long taim bilong hevi. (2 Kor. 1:3, 4; ritim 1 Tesalonaika 4:9.) Wankain olsem Elihu, ol bratasista bilong yumi i redi oltaim long helpim yumi long stap gut long Jehova taim yumi karim ol bikpela hevi. (Apo. 14:22) Olsem, skelim hau kongrigesen bilong Diane i bin strongim em na helpim em long stap strong long bilip bihain long man bilong em i bin kisim wanpela bikpela sik. Em i tok: “Em hatwok tru. Tasol mipela i pilim tru strong na gutpela pasin laikim bilong Jehova insait long ol mun mipela i bin karim dispela hevi. Kongrigesen bilong mipela i bin mekim planti samting bilong helpim mipela. Ol i kam visitim mipela, ol i ringim mipela, na ol i holimpasim mipela na helpim mipela long sanap strong long karim hevi. Mi no save draivim kar, olsem na ol bratasista i mekim olgeta samting bambai mi ken go long ol miting na go autim tok taim rot i op long mekim olsem.” Em gutpela blesing tru long insait long dispela bikpela lain famili i lotuim Jehova!

15. I gat wanem as na yumi ken bilip tru olsem yumi ken karim ol hevi i painim yumi?

¹⁵ Yumi olgeta bai karim ol hevi. Tasol olsem yumi kisim save pinis, yumi no stap wanpis long karim ol hevi i painim yumi. Wankain olsem wanpela papa i gat pasin laikim, oltaim Jehova i save lukluk long yumi. Em i stap long sait bilong yumi, na em i redi long harim singaut bilong yumi long kisim helpim, na em i redi long sapotim yumi. (Ais. 43:2) Yumi bilip tru olsem yumi ken karim wanem ol hevi i painim yumi, long wanem, Jehova i givim yumi planti samting yumi nidim bilong sanap strong. Em i givim yumi ol gutpela presen olsem beten, Baibel, planti gutpela tok bilong strongim bilip, na bikpela lain brata i gat pasin laikim em ol i redi long helpim yumi long taim yumi nidim helpim.

16. Yumi ken mekim wanem samting bambai yumi ken stap yet aninit long lukaut bilong Jehova?

¹⁶ Yumi tenkyu tru olsem oltaim yumi gat Papa bilong yumi i stap long heven na oltaim em i save lukluk long yumi! “Yumi amamas long em.” (Sng. 33:21) Yumi ken soim Jehova olsem yumi tenkyu tru long pasin bilong em long lukautim yumi taim yumi yusim gut olgeta samting em i givim bilong helpim yumi. Yumi mas mekim sampela samting bambai yumi ken stap yet aninit long lukaut bilong God. Yumi ken tok olsem, sapos yumi wok yet long givim bes bilong yumi long Jehova na mekim ol samting i stret long ai bilong em, em bai was long yumi inap oltaim oltaim!​—1 Pita 3:12.