1. Olsem 1 Tesalonaika 5:11 i kamapim, yumi olgeta i insait long wanem wok?

 ATING kongrigesen bilong yu i bin sanapim o stretim wanpela Haus Kingdom. Sapos olsem, yu bai tingim yet fes miting yupela i mekim long dispela nupela Haus Kingdom. Yu bin tenkyu tru long Jehova. Ating yu amamas tru na aiwara i kam daun na i hatwok long yu singim song bilong kirapim miting. Ol Haus Kingdom yumi sanapim ol i strong tru na ol i givim preis long Jehova. Tasol yumi insait long narapela wok we i bringim bikpela moa preis long Jehova. Dispela wok i bikpela samting moa winim wok bilong sanapim ol haus. Em wok bilong strongim ol manmeri husat i kam long ol haus yumi bin sanapim bilong lotuim Jehova. Aposel Pol i tingim dispela taim em i raitim ol tok i stap long 1 Tesalonaika 5:11, em tim skripsa bilong yumi.​—Ritim.

2. Yumi bai stori long wanem samting long dispela atikol?

² Aposel Pol i stap gutpela piksa tru long pasin bilong strongim ol wanbilip. Em i pilim tru hevi bilong ol. Long dispela atikol, yumi bai stori long hau em i bin helpim ol bratasista long (1) sanap strong na karim ol hevi, (2) stap wanbel wantaim narapela narapela, na (3) strongim bilip bilong ol long Jehova. Yumi ken stori long hau yumi inap bihainim pasin bilong em na bai yumi ken strongim ol bratasista bilong yumi long nau.​—1 Kor. 11:1.

3. Pol i bin holim wanem stretpela tingting?

³ Pol i laikim tru ol wanbilip bilong em. Em i bin karim ol hevi, olsem na em i mekim pasin sori long ol wanbilip na em i pilim tru ol hevi bilong ol. Wanpela taim, Pol i sot long mani na em i mas mekim wok bilong lukautim em yet na ol pren bilong em. (Apo. 20:34) Em i man bilong samapim ol haus sel. Taim em i go kamap  long Korin, pastaim em i wok wantaim Akwila na Prisila, tupela tu i save samapim ol haus sel. Tasol long “olgeta sabat” em i save autim tok long ol Juda na ol Grik. Bihain, taim Sailas na Pol i kamap long Korin, “Pol i kirap lusim bikpela haptaim tru long autim tok.” (Apo. 18:2-5) Pol i no lusim tingting long nambawan bikpela samting long laip bilong em, em long mekim wok bilong Jehova. Pol i save givim bel long autim tok na lukautim em yet, olsem na em inap long strongim ol wanbilip bilong em. Em i kirapim ol long tingim olsem ol i no ken larim ol presa bilong laip na wok bilong lukautim famili i pasim ol long mekim “ol samting i bikpela samting moa,” em wok lotu bilong Jehova.​—Fili. 1:10.   

4. Pol na Timoti i mekim wanem bilong strongim ol wanbilip long karim hevi bilong pasin birua?

⁴ Bihain long ol i kirapim nupela kongrigesen long Tesalonaika, ol nupela Kristen i karim hevi bilong pasin birua. Taim bikpela lain em ol i birua long ol Kristen i no inap painim Pol na Sailas, ol i pulim “sampela brata i go long ol hetman bilong taun,” na ol i singaut olsem: “Olgeta dispela man i sakim lo bilong Sisar.” (Apo. 17:6, 7) Yu inap piksaim ol dispela nupela Kristen i pret nogut tru taim ol i luksave olsem ol man long dispela taun i birua long ol? Dispela inap mekim na ol i no givim bel long mekim wok bilong Jehova, tasol Pol i no laik bai dispela samting i kamap. Maski em wantaim Sailas i mas lusim Tesalonaika, ol i mekim ol samting na bai dispela nupela kongrigesen i stap gut. Pol i tokim ol Kristen long Tesalonaika olsem: “Mipela i salim Timoti i go, em brata bilong yumi . . . , bilong strongim yupela na mekim isi bel bilong yupela, na dispela bai helpim bilip bilong yupela. Nogut ol dispela hevi i mekim na wanpela i surik.” (1 Tes. 3:2, 3) Ating Timoti i bin karim hevi bilong pasin birua long asples bilong em long Listra. Em i bin lukim Pol i strongim ol Kristen long dispela ples. Timoti i luksave olsem Jehova i bin helpim ol Kristen long Listra, olsem na em i strongim ol nupela bratasista bilong em olsem God bai helpim ol tu.​—Apo. 14:8, 19-22; Hib. 12:2.

5. Olsem wanem Bryant i kisim helpim long wanpela elda?

⁵ Pol i mekim wanem samting moa bilong strongim ol wanbilip bilong em? Taim Pol na Barnabas i go bek long Listra, Aikoniam, na Antiok, tupela i “makim ol hetman long olgeta wan wan kongrigesen.” (Apo. 14:21-23) Ol dispela hetman i bin mekim isi bel bilong ol Kristen, wankain olsem ol elda long nau tu i save mekim. Lukim tok bilong wanpela brata em nem bilong em Bryant, em i tok: “Taim mi gat 15 krismas, papa i lusim mipela na mama i raus long kongrigesen. Mi pilim wanpis na mi bel hevi tru.” Wanem samting i helpim Bryant long sanap strong na karim dispela hevi? Em i tok: “Tony em wanpela elda, na em i save toktok wantaim mi long taim bilong ol miting na long ol narapela taim tu. Em i stori long mi long sampela em ol i bin karim ol hevi, tasol ol i stap amamas yet. Em i soim mi tok bilong Song 27:10 na planti taim em i stori long mi long eksampel bilong Hesekia, em i stap gut long mekim wok bilong God maski papa bilong em i no stap gutpela piksa long em.” Olsem wanem ol gutpela tok bilong dispela elda i bin helpim Bryant? Bryant i tok: “Tony i strongim mi na bihain mi insait long fultaim sevis.” Ol elda, luksave long ol wanbilip em yu inap helpim ol, wankain olsem Bryant ating ol i nidim ol “gutpela tok” bilong strongim ol.​—Prov. 12:25.

6. Olsem wanem Pol i yusim ol stori bilong ol narapela long strongim ol wanbilip bilong em?

⁶ Pol i tokim ol wanbilip olsem Jehova i bin strongim “bikpela lain manmeri i olsem bikpela klaut” long sanap strong na karim ol hevi, na long dispela rot ol i “stap olsem witnes.” (Hib. 12:1) Pol i save olsem stori bilong ol wokman  bilong God long pastaim em ol i bin sanap strong na karim olgeta kain hevi, dispela inap strongim bel bilong ol wanbilip na helpim ol long putim tingting i go long “taun bilong God i gat laip.” (Hib. 12:22) Na i wankain tu long nau. Taim yumi ritim stori long hau Jehova i bin helpim Gideon, Barak, Devit, Samuel na planti narapela, dispela i save strongim yumi tru! (Hib. 11:32-35) Na olsem wanem long eksampel bilong ol lain i holimpas bilip long nau? Long wol hetkota, planti taim mipela i kisim ol pas i kam long ol bratasista em bilip bilong ol i kamap strong taim ol i ritim laip stori bilong ol wokman bilong Jehova long nau em ol i holimpas bilip.

7. Yu lainim wanem samting long tok bilong Pol i stap long Rom 14:19-21?

⁷ Yumi strongim ol bratasista bilong yumi taim yumi mekim ol tok na ol pasin i strongim pasin wanbel long kongrigesen. Maski yumi gat narapela narapela tingting long sampela samting, yumi no larim dispela i brukim lain namel long yumi. Na yumi no strong long ol narapela i bihainim tingting bilong yumi sapos tingting ol i gat i no brukim ol stiatok bilong Baibel. Tingim wanpela eksampel. Ol kongrigesen long Rom i gat ol Kristen bilong lain Juda na bilong ol narapela lain. Taim Lo Bilong Moses i pinis, i no gat wok moa long ol Kristen i bihainim ol lo long sait bilong wanem kaikai i klin na wanem kaikai i no klin. (Mak 7:19) Kirap long dispela taim na i go, sampela Kristen bilong lain Juda i orait long kisim olgeta kain kaikai. Tasol ol narapela Kristen bilong lain Juda i pilim olsem i no stret long mekim olsem. Dispela i mekim na kongrigesen i bruk. Pol i kamapim klia olsem em i bikpela samting long stap wanbel wantaim, na em i tok: “I no gutpela long kaikai mit o dring wain o mekim wanpela samting i pundaunim brata bilong yu.” (Ritim Rom 14:19-21.) Long dispela rot, Pol i helpim ol wanbilip long luksave olsem ol kain tok pait olsem inap bagarapim bilip bilong ol Kristen na pinisim bel isi insait long kongrigesen. Na tu, Pol i redi long senisim pasin em i bihainim bambai em i no ken pundaunim ol narapela. (1 Kor. 9:19-22) Yumi tu i ken strongim ol narapela na holimpas pasin wanbel taim yumi no toktok planti long ol samting em wan wan man yet i gat rait long mekim disisen long en.

8. Pol i mekim wanem taim ol Kristen i no holim wankain tingting long wanpela bikpela samting?

⁸ Pol i stap gutpela piksa long yumi. Em i mekim ol samting bilong holimpas pasin wanbel wantaim ol narapela taim ol i no holim wankain tingting olsem bilong em long sampela bikpela samting. Olsem, long taim bilong ol aposel sampela long kongrigesen i strong olsem ol man bilong ol arapela lain i mas katim skin, ating ol i strong long mekim olsem bambai ol Juda i no ken sutim tok long ol. (Gal. 6:12) Pol i no wanbel long dispela tingting, tasol em i no strong long ol narapela i bihainim tingting bilong em, nogat. Long pasin daun, em i kisim edvais long ol aposel na ol hetman long Jerusalem. (Apo. 15:1, 2) Taim Pol i mekim olsem, em i helpim ol dispela Kristen long holimpas amamas bilong ol na strongim pasin wanbel insait long kongrigesen.​—Apo. 15:30, 31.

9. Hau yumi ken bihainim eksampel bilong Pol?

⁹ Sapos bikpela tok pait i kamap, orait yumi ken strongim pasin wanbel taim yumi kisim helpim i kam long ol man em Jehova i makim bilong lukautim kongrigesen. Planti taim, yumi ken painim ol tok bilong Baibel bilong stiaim yumi long ol pablikesen bilong yumi o long ol gaidlain em oganaisesen i kamapim. Sapos yumi tingting long bihainim ol dispela tok na yumi no strong long ol narapela i bihainim tingting bilong yumi, yumi bai strongim pasin wanbel insait long kongrigesen.

10. Pol i mekim wanem narapela samting bilong strongim pasin wanbel long kongrigesen?

 ¹⁰ Pol i strongim pasin wanbel taim em i stori long ol gutpela pasin bilong ol bratasista bilong em, na i no ol pasin kranki bilong ol. Olsem, long pinis bilong pas em i raitim long ol Kristen long Rom, em i kolim nem bilong planti Kristen na em i mekim ol gutpela tok long ol na stori long ol wok ol i save mekim. Yumi ken bihainim pasin bilong Pol taim yumi stori long ol gutpela pasin bilong ol bratasista bilong yumi. Taim yumi mekim olsem, yumi kirapim ol bratasista long pas gut wantaim narapela narapela, na dispela bai strongim pasin laikim insait long kongrigesen.

11. Hau yumi ken kamap wanbel gen wantaim ol narapela maski yumi no holim wankain tingting long sampela samting?

¹¹ Sampela taim ol strongpela Kristen inap tok pait o ating ol i no wanbel long sampela samting. Dispela samting i bin kamap long Pol na gutpela pren bilong em Barnabas. Tupela i tok pait long ol bai kisim Mak i go wantaim ol long neks misineri raun bilong ol o nogat. “Bikpela kros i kamap namel long tupela,” olsem na tupela i no raun moa wantaim. (Apo. 15:37-39) Tasol Pol wantaim Barnabas na Mak i stretim dispela hevi na ol i kamap wanbel gen. Long dispela rot, ol i soim olsem ol i tingim pasin wanbel na bel isi olsem samting i dia tumas insait long kongrigesen. Bihain Pol i mekim gutpela tok long Barnabas na Mak. (1 Kor. 9:6; Kol. 4:10) Sapos yumi gat hevi wantaim ol narapela insait long kongrigesen, orait yumi mas stretim dispela hevi na wok yet long tingim ol gutpela pasin bilong ol. Taim yumi mekim olsem, yumi bai strongim pasin wanbel na stap bel isi.​—Efe. 4:3.

12. Ol bratasista bilong yumi i bungim wanem ol hevi?

¹² Yumi strongim ol bratasista bilong yumi taim yumi strongim bilip bilong ol long Jehova. Sampela i karim hevi long ol wanblut i no wanbilip, ol wanwok, na ol wanskul i tok bilas long ol. Ol narapela i karim hevi bilong bikpela sik o ol i pilim hatwok long daunim pasin bilong bel hevi tru. Na tu, ol narapela i stap olsem ol baptais Kristen inap planti yia na inap longpela taim ol i wet long lukim dispela haptaim nogut bilong nau i pinis. Ol kain samting olsem inap traim bilip bilong ol Kristen long nau. Long taim bilong ol aposel, kongrigesen Kristen i bungim ol wankain hevi. Pol i mekim wanem bilong strongim ol bratasista bilong em?

13. Olsem wanem Pol i helpim ol Kristen em ol narapela i tok bilas long bilip bilong ol?

¹³ Pol i yusim Ol Skripsa long strongim bilip bilong ol bratasista. Olsem, ol Kristen bilong lain Juda inap pilim olsem ol i no save long wanem tok ol bai mekim long ol wanblut husat i no wanbilip em ol i sutim tok olsem lotu Juda i gutpela moa winim lotu Kristen. Tasol pas em Pol i bin raitim long ol Kristen long Hibru i bin strongim ol tru. (Hib. 1:5, 6; 2:2, 3; 9:24, 25) Pol i mekim ol strongpela tok bilong kirapim ol long wokim tingting. Ol dispela tok inap helpim ol long save long wanem tok ol bai mekim long ol wanblut i sutim tok long ol. Long nau, yumi ken helpim ol wanbilip long yusim ol pablikesen bilong Baibel long stori gut long as bilong bilip bilong ol taim ol narapela i tok bilas long ol. Na sapos ol narapela i tok bilas long ol yangpela bilong yumi long bilip bilong ol long kriesen, orait yumi ken helpim ol long painim ol infomesen long ol buklet Was Life Created? na The Origin of Life—Five Questions Worth Asking bilong soim risen na ol i bilip olsem i gat Krieta i stap.

14. Maski Pol i bisi tru long autim tok na skulim ol man, em i mekim wanem?

¹⁴ Pol i kirapim ol bratasista long soim pasin laikim long rot bilong mekim “ol gutpela wok.” (Hib. 10:24) Em i helpim ol bratasista bilong em long rot bilong ol tok na ol pasin em i mekim. Olsem, taim ol wanbilip long Judia i karim hevi  bilong bikpela hangre, Pol i helpim ol taim em i bringim ol samting ol i sot long en i go long ol. (Apo. 11:27-30) Maski Pol i bisi tru long autim tok na skulim ol man, oltaim em i painim ol rot bilong helpim ol lain em ol i sot long kaikai na klos samting. (Gal. 2:10) Taim em i mekim olsem, em i strongim ol wanbilip bilong em long save olsem Jehova bai lukautim ol. Long nau, taim yumi yusim taim, strong, na save bilong yumi long helpim ol bratasista bilong yumi em ol i karim hevi long ol disasta, yumi strongim bilip bilong ol. Na tu, yumi ken strongim bilip bilong ol long rot bilong givim donesen bilong helpim wok i kamap long olgeta hap. Long dispela rot na long ol narapela rot tu, yumi helpim ol bratasista long bilip olsem Jehova bai i no inap tru long lusim ol.

15-16. Yumi mas mekim wanem pasin long ol bratasista em ol i slek long bilip?

¹⁵ Pol i no givap long ol Kristen em ol i slek long bilip. Em i mekim pasin sori long ol na toktok wantaim ol long pasin isi na gutpela pasin. (Hib. 6:9; 10:39) Olsem, long pas em i raitim long ol Kristen long Hibru, planti taim em i yusim dispela tok “yumi.” Taim em i mekim olsem, em i soim olsem em tu i gat wok long bihainim ol tok em i raitim long pas bilong em. (Hib. 2:1, 3) Olsem Pol, yumi no givap long ol wanbilip em ol i slek long bilip, nogat. Yumi strongim ol taim yumi soim olsem yumi tingim ol tru. Long dispela rot, yumi kamapim klia olsem yumi laikim ol. Tru tumas, taim yumi mekim ol gutpela tok na toktok long pasin isi, yumi inap tru long strongim ol narapela.

¹⁶ Pol i tokim ol bratasista Kristen olsem Jehova i lukim ol gutpela wok ol i mekim. (Hib. 10:32-34) Yumi tu i ken mekim olsem taim yumi helpim wanbilip husat i slek long bilip. Yumi ken askim em long stori long hau em i kisim tok i tru, o kirapim em long tingim bek ol taim we em i bin pilim tru helpim bilong Jehova. Long wankain  taim, yumi ken tokim em olsem Jehova i no lusim tingting long ol gutpela wok em i mekim bilong soim olsem em i laikim Em na oltaim Em bai stap wantaim em. (Hib. 6:10; 13:5, 6) Taim yumi mekim ol kain gutpela tok long ol bratasista em ol i slek long bilip, yumi inap kirapim ol long i gat laik long mekim yet wok bilong Jehova.

17. Yumi ken wok yet long mekim wanem?

¹⁷ Wankain olsem wokman bilong konstraksen i save lain long mekim gut ol wok insait long sampela haptaim, yumi tu i ken lain long mekim gut wok bilong strongim narapela narapela. Yumi ken helpim ol narapela long sanap strong na karim ol hevi taim yumi stori long ol wokman bilong God long pastaim em ol i sanap strong na karim ol hevi. Yumi ken strongim pasin wanbel taim yumi stori long ol gutpela pasin bilong ol narapela, mekim dai kros taim tok pait i kamap, na kamap wanbel gen wantaim ol narapela maski yumi no holim wankain tingting long sampela samting. Na yumi ken wok yet long strongim bilip bilong ol bratasista taim yumi stori wantaim ol long ol bikpela tok i tru bilong Baibel, helpim ol long ol samting ol i sot long en, na sapotim ol lain em ol i slek long bilip.

18. Yu tingting strong long mekim wanem?

¹⁸ Ol bratasista i mekim wok bilong sanapim ol haus bilong lotuim Jehova, ol i stap amamas tru. Yumi tu i ken stap amamas tru taim yumi strongim bilip bilong ol bratasista bilong yumi. Ol haus yumi sanapim bai bagarap long bihain, tasol wok yumi mekim bilong strongim ol narapela bai stap oltaim oltaim! Yes, yumi olgeta i ken tingting strong long “wok yet long mekim isi bel bilong narapela narapela na strongim narapela narapela.”​—1 Tes. 5:11.