STADI ATIKOL 33
SINGSING 130 Fogivim Narapela
Kongrigesen i Bihainim Tingting Jehova i Gat Long Ol Sinman
“Sapos man i mekim sin, yumi gat wanpela helpim i stap.” —1 JON 2:1.
SKUL YUMI BAI KISIM
Yumi bai kisim skul long pasin em kongrigesen long Korin bilong bipo i mekim taim wanpela man i bin mekim bikpela sin.
1. Jehova i laik bai olgeta man i mekim wanem?
JEHOVA i wokim ol manmeri long stap fri long makim wanem samting ol i laik mekim. Planti taim yu yusim dispela presen long mekim ol disisen. Nambawan bikpela disisen wanpela i ken mekim em long dediketim em yet long Jehova na insait long bikpela lain famili i lotuim em, em ol i stap long olgeta hap bilong graun. Jehova i laik bai olgeta man i mekim olsem. Bilong wanem? Bikos em i laikim ol manmeri na em i laik bai ol i stap amamas. Em i laik bai ol i stap pren bilong em na stap laip oltaim.—Lo 30:19, 20; Gal. 6:7, 8.
2. Jehova i pilim olsem wanem long ol man i mekim sin na ol i no tanim bel? (1 Jon 2:1)
2 Jehova i no save subim ol man long lotuim em. Em i larim wan wan man long makim wanem samting ol bai mekim. Olsem wanem sapos wanpela baptais Kristen i brukim lo bilong God na mekim wanpela bikpela sin? Sapos em i no tanim bel, ol i mas rausim em long kongrigesen. (1 Kor. 5:13) Maski em i raus, Jehova i laik tru long em i mas tanim bel na pas gut gen wantaim Em. Dispela em nambawan bikpela risen na Jehova i givim pe bilong baim bek man na bai rot i op long Em i ken fogivim ol sinman i tanim bel. (Ritim 1 Jon 2:1.) Jehova em God i gat pasin laikim, na em i laik helpim ol man i mekim sin long tanim bel.—Sek. 1:3; Rom 2:4; Jems 4:8.
3. Yumi bai stori long wanem samting long dispela atikol?
3 Jehova i laik bai yumi bihainim tingting em i gat long pasin bilong mekim sin na long ol man i mekim sin. Dispela atikol bai stori long rot yumi ken mekim olsem. Taim yu ritim dispela atikol, lukim (1) pasin kongrigesen long Korin i bin mekim taim wanpela man i mekim bikpela sin, (2) daireksen Pol i givim long kongrigesen taim man i mekim sin i tanim bel, na (3) hau dispela stori bilong Baibel i kamapim klia tingting Jehova i gat long ol Kristen i mekim bikpela sin.
PASIN KONGRIGESEN LONG KORIN I BIN MEKIM TAIM MAN I MEKIM BIKPELA SIN
4. Wanem samting i bin kamap long kongrigesen long Korin? (1 Korin 5:1, 2)
4 Ritim 1 Korin 5:1, 2. Long namba 3 misineri raun bilong Pol, em i harim wanpela nius nogut long nupela kongrigesen long Korin. Wanpela brata long kongrigesen i wok long mekim pasin pamuk wantaim meri bilong papa bilong em. Kain pasin olsem i nogut tru, na “ol manmeri i no bilip, ol yet i no save mekim dispela kain pasin pamuk”! Kongrigesen i orait tasol long dispela pasin, na tu, pasin ol i mekim i soim olsem ating ol i amamas long em. Ating sampela i ting dispela i kamapim klia pasin marimari bilong God na em i orait tasol long ol bikos ol i no gutpela olgeta. Tasol Jehova i no save orait long pasin bilong mekim sin namel long ol manmeri bilong em. Dispela man i mekim pasin bikhet na i no sem, na long dispela rot em i wok long bagarapim gutnem bilong kongrigesen. Na tu, em inap kirapim ol narapela Kristen insait long kongrigesen husat i save bung wantaim em long bihainim pasin bilong em. So Pol i tokim kongrigesen long mekim wanem?
5. Pol i tokim kongrigesen long mekim wanem, na tok bilong em i makim wanem samting? (1 Korin 5:13) (Lukim tu piksa.)
5 Ritim 1 Korin 5:13. Holi spirit i kirapim Pol long raitim pas na tokim ol long rausim dispela sinman i no tanim bel long kongrigesen. Ol Kristen insait long kongrigesen i mas mekim wanem pasin long dispela man? Pol i tokim ol long “lusim pasin bilong poroman” wantaim em. Na em i tok tu olsem ol i “no ken kaikai wantaim kain man olsem.” (1 Kor. 5:11) Bilong wanem? Long wanem, taim yumi sindaun na kaikai wantaim wanpela, em isi long yumi lusim bikpela haptaim long stori wantaim em. Wanem gutpela samting i kamap taim kongrigesen i stop long bung wantaim dispela man? Dispela i lukautim kongrigesen long pasin nogut bilong em. (1 Kor. 5:5-7) Na tu, taim ol i abrusim pasin bilong bung wantaim em, dispela inap helpim em long luksave olsem em i mekim pasin nogut tru long ai bilong Jehova, na em inap pilim sem na dispela inap kirapim em long tanim bel.
6. Pas bilong Pol i mekim wanem long kongrigesen na long dispela man i mekim sin?
6 Bihain long Pol i raitim dispela pas i go long ol Kristen long Korin, em i tingting planti long kongrigesen bai mekim wanem taim ol i kisim dispela pas. I no longtaim Taitus i bringim nius i kam long Pol na i mekim em i amamas. Kongrigesen i bihainim tok bilong pas Pol i raitim. (2 Kor. 7:6, 7) Ol i bihainim ol instraksen em i givim long ol. Na tu, sampela mun bihain long Pol i salim dispela pas, dispela man i bin mekim rong nau em i tanim bel na lusim rot bilong sin em i bihainim! Em i senisim tingting na pasin bilong em na em i kirap long bihainim ol stretpela lo bilong Jehova. (2 Kor. 7:8-11) Nau Pol bai kirapim kongrigesen long mekim wanem?
PASIN KONGRIGESEN I MAS MEKIM LONG SINMAN I TANIM BEL
7. Taim ol i rausim man i mekim sin long kongrigesen, dispela i kirapim em long mekim wanem? (2 Korin 2:5-8)
7 Ritim 2 Korin 2:5-8. Pol i tokim ol: “Strongpela tok em planti bilong yupela i bin givim long kain man olsem, em inap long em.” Tok bilong Pol i makim olsem bihain long ol i rausim dispela man i mekim sin long kongrigesen, em i luksave olsem em i mas tanim bel. Na bikos em i tanim bel pinis, i no gat wok moa long ol i mas wok yet long stretim em.—Hib. 12:11.
8. Bihain Pol i tokim kongrigesen long mekim wanem?
8 Pol i tokim kongrigesen olsem: “Yupela i mas redi long fogivim em na mekim isi bel” bilong dispela brata i mekim sin, na “soim em olsem yupela i laikim em tru.” Dispela man i tanim bel pinis, olsem na Pol i tok kongrigesen i mas kisim em i kam bek long lain bilong Jehova na ol i mas mekim sampela samting moa. Pol i laik bai kongrigesen i soim long toktok, tingting, na pasin bilong ol olsem tru tru ol i fogivim dispela man i tanim bel na ol i laikim em. Long dispela rot, ol i soim olsem ol i welkamim em i kam bek long kongrigesen.
9. Wai na sampela inap surik long fogivim dispela man i tanim bel pinis long rong em i mekim?
9 Yu ting sampela long kongrigesen i pilim hatwok long welkamim bek dispela sinman i bin tanim bel? Baibel i no stori long dispela, tasol kain samting inap kamap. Wai yumi tok olsem? Bikos pasin bilong em i bin nogutim kongrigesen olgeta na ating i semim sampela long kongrigesen tu. Sampela inap pilim olsem i no fea long kongrigesen i amamas long dispela man i kam bek taim ol i wok strong i stap long bihainim ol stretpela lo bilong Jehova. (Skelim Luk 15:28-30.) Tasol wai na em i bikpela samting long kongrigesen i mas soim pasin laikim tru long dispela brata i kam bek?
10-11. Wanem samting inap kamap sapos ol elda i no laik fogivim dispela sinman i tanim bel?
10 Tingim samting inap kamap sapos ol elda i no orait long kisim bek dispela man i tanim bel i kam bek insait long kongrigesen, o bihain long em i kam bek, kongrigesen i no laik mekim pasin laikim long em. Nogut em i “bel hevi tru na dispela i daunim em olgeta.” Em inap pilim olsem em i no inap mekim gen wok bilong Jehova. Na tu, em inap givap long mekim ol samting bilong stretim bek pasin pren bilong em wantaim Jehova.
11 Samting i nogut moa em sapos ol bratasista long kongrigesen i no laik fogivim dispela sinman i tanim bel, orait ol inap bagarapim pasin pren bilong ol yet wantaim Jehova. Bilong wanem yumi tok olsem? Long wanem, ol i no bihainim pasin bilong Jehova long fogivim ol man em ol i tanim bel pinis long ol rong ol i mekim, nogat, ol i kamapim hatpela pasin bilong Satan na pasin bilong em long i no marimari. I olsem ol i kamap tul long han bilong Devil we em inap yusim bilong bagarapim dispela man long sait bilong bilip.—2 Kor. 2:10, 11; Efe. 4:27.
12. Olsem wanem kongrigesen i ken bihainim pasin bilong Jehova?
12 Olsem wanem kongrigesen long Korin i ken bihainim pasin bilong Jehova, na i no pasin bilong Satan? Ol i mekim olsem taim ol i bihainim pasin em Jehova i save mekim long ol sinman i tanim bel. Lukim tok em sampela man bilong raitim Baibel i mekim long Jehova. Devit i tok long Jehova olsem: “Yu gutpela tru na yu save redi long fogivim ol sin bilong mipela.” (Sng. 86:5) Maika i tok: “Wanem God i olsem yu husat i save lusim rong na sin”? (Mai. 7:18) Na Aisaia i tok: “Man nogut i mas lusim pasin nogut bilong em na man i gat tingting nogut i mas rausim tingting nogut bilong em; em i mas kam bek long Jehova, em man husat bai marimari long em, em i mas kam bek long God bilong yumi, bikos em bai fogivim em olgeta.”—Ais. 55:7.
13. Taim sinman i tanim bel, wai na i stret long ol i no ken surikim taim bilong kisim em i kam bek insait long kongrigesen? (Lukim blok “ Wanem Taim Kongrigesen Long Korin i Kisim Bek Dispela Man?”)
13 Kongrigesen long Korin i mas bihainim pasin bilong Jehova long welkamim dispela man i tanim bel na i kam bek insait long kongrigesen na soim em olsem ol i laikim em tru. Taim ol i bihainim daireksen i kam long Pol long welkamim bek sinman i tanim bel, kongrigesen i soim olsem ol i “bihainim tok long olgeta samting.” (2 Kor. 2:9) Em tru olsem ol i rausim dispela man long kongrigesen sampela mun i go pinis, tasol em i kisim tok bilong stretim em na em i tanim bel pinis. Olsem na i no gat wok bilong surikim taim bilong kisim em i kam bek insait long kongrigesen.
BIHAINIM PASIN FEA NA PASIN MARIMARI BILONG JEHOVA
14-15. Yumi kisim wanem skul long hau ol i stretim dispela hevi i kamap long Korin? (2 Pita 3:9) (Lukim tu piksa.)
14 Baibel i stori long pasin ol i bihainim long stretim hevi i kamap long Korin, na em ol tok ol i bin raitim na lukautim gut “bilong skulim yumi.” (Rom 15:4) Long dispela stori, yumi kisim skul olsem Jehova i no save orait long ol manmeri bilong em i mekim ol bikpela sin. Sampela man inap ting olsem Jehova bai larim tasol wanpela man i mekim sin na i no tanim bel long stap yet insait long kongrigesen bikos em i God bilong mekim “pasin marimari.” Tasol pasin marimari bilong Jehova i no save wok olsem. Jehova i gat pasin marimari, tasol em i no save orait long olgeta kain pasin, na tu, ol lo bilong em long wanem pasin i stret na wanem pasin i no stret i no save senis. (Jut 4) Tingim, sapos Jehova i larim tasol man i mekim sin na i no tanim bel long stap yet insait long kongrigesen, dispela i no inap soim pasin marimari bilong em bikos dispela inap nogutim kongrigesen.—Prov. 13:20; 1 Kor. 15:33.
15 Maski i olsem, yumi kisim save olsem Jehova i no laik bai wanpela i kisim bagarap. Em i laik seivim ol man taim rot i op long mekim olsem. Em i soim pasin marimari bilong em long ol manmeri husat i tanim bel na ol i laik stretim bek pasin pren bilong ol wantaim em. (Ese. 33:11; ritim 2 Pita 3:9.) So taim dispela man long Korin i tanim bel na lusim rot bilong sin em i bihainim, Jehova i yusim Pol long tokim kongrigesen long fogivim dispela man na welkamim em bek insait long kongrigesen.
16. Yu pilim olsem wanem long hau ol i stretim dispela hevi i bin kamap long Korin?
16 Yumi stori long hau ol i stretim hevi i kamap long Korin na dispela i helpim yumi long luksave olsem Jehova i gat pasin laikim, stretpela pasin, na em i save mekim pasin fea. (Sng. 33:5) Dispela i kirapim yumi long preisim moa yet God bilong yumi, a? Yumi olgeta i sinman na yumi laik bai God i fogivim yumi. Olsem na yumi wan wan i ken tenkyu long Jehova i givim pe bilong baim bek man bambai Em i ken fogivim ol sin bilong yumi. Yumi amamas tru long save olsem Jehova i laikim tru ol manmeri bilong em na em i laik bai ol i stap amamas inap oltaim!
17. Bai yumi stori long wanem samting long ol atikol i kamap bihain?
17 Olsem wanem long pasin bilong stretim wanpela man i mekim sin long taim bilong yumi? Olsem wanem ol elda bilong kongrigesen inap bihainim pasin laikim bilong Jehova na helpim dispela man long tanim bel? Olgeta insait long kongrigesen i ken mekim wanem taim ol elda i mekim disisen long rausim o kisim bek wanpela brata o sista? Ol atikol i kamap bihain bai bekim ol dispela askim.
SINGSING 109 Laikim Tru Ol Arapela Long Bel Olgeta