1-2. (a) Sin em wanem samting, na hau yumi ken winim pait bilong daunim sin? (Lukim tu “Mining Bilong Tok.”) (b) Yumi bai skelim wanem samting long dispela atikol na long ol narapela atikol i stap long dispela Wastaua? (Lukim tu “Tok i Go Long Ol Rida” long dispela Wastaua.)

 OLSEM WANEM? Yu laik save long hau God Jehova i laikim yu? Hia em gutpela rot bilong yu ken kisim save long bekim bilong en: Yu ken stadi long samting em i mekim bilong seivim yu long sin na dai. Sin a em i wanpela birua nogut tru, na yu no inap long daunim dispela birua long strong bilong yu yet. Long olgeta de yumi save mekim sin, na yumi dai bikos yumi gat sin. (Rom 5:12) Tasol i gat gutpela nius. Jehova i ken helpim yumi long winim pait bilong daunim sin. Yumi ken bilip tru olsem yumi bai winim dispela pait!

² God Jehova i wok long helpim ol man long winim pait bilong daunim sin klostu 6,000 yia pinis. Wai em i mekim olsem? Bikos em i laikim yumi. Kirap long taim Jehova i wokim Adam na Iv, em i laikim ol manmeri, olsem na em i mekim bikpela samting bilong helpim yumi long winim pait bilong daunim sin. God i save olsem sin i save bringim dai i kam, na em i no laik bai yumi dai. Em i laik bai yumi stap laip oltaim. (Rom 6:23) Em i laik bai dispela samting i painim yu. Long dispela atikol, yumi bai skelim 3-pela askim: (1) Jehova i helpim ol man i gat sin long wetim wanem gutpela samting? (2) Hau ol man i gat sin long taim bilong Baibel i amamasim Jehova? (3) Jisas i mekim wanem bilong seivim ol man i gat sin?

 JEHOVA I HELPIM OL MAN I GAT SIN LONG WETIM WANEM GUTPELA SAMTING?

3. Hau na fes tumbuna papamama bilong yumi i kamap ol sinman?

³ Taim Jehova i wokim fes man na meri, em i laik bai tupela i stap amamas. Em i givim ol naispela ples bilong stap long en, presen bilong marit, na wanpela naispela asainmen. Ol i mas kamapim ol pikinini na i go sindaun long olgeta hap bilong graun, na mekim graun olgeta i kamap ples paradais wankain olsem gaden Iden. Em i givim ol wanpela lo tasol bilong bosim ol. Na em i givim tok lukaut long tupela olsem sapos ol i brukim dispela lo na long laik bilong ol yet ol i bikhet long em, sin bilong ol bai bringim ol i go long dai. Yumi save long samting i bin kamap. Wanpela spirit husat i no laikim God na i no laikim tupela, em i kirapim tupela long sakim tok bilong God na mekim sin. Adam na Iv i bihainim tok bilong em na ol i brukim lo bilong God. Ol i no trastim gutpela Papa bilong ol, na ol i mekim sin. Olsem yumi save, tok bilong Jehova i kamap tru. Kirap long dispela de na i go, ol i karim ol hevi long pasin bikhet ol i mekim: ol i kamap lapun na bihain ol i dai.—Stt. 1:​28, 29; 2:​8, 9, 16-18; 3:​1-6, 17-19, 24; 5:5.

4. Bilong wanem Jehova i heitim sin na em i helpim yumi long pait long daunim sin? (Rom 8:​20, 21)

⁴ Jehova i larim stori bilong Adam na Iv i stap long Baibel bilong helpim yumi. Dispela i helpim yumi long kliagut long risen na Jehova i heitim tru sin. Sin i mekim na yumi stap longwe long Papa bilong yumi, na dispela i bringim yumi i go long dai. (Ais. 59:2) Em as na Satan dispela ensel nogut husat i bin kamapim olgeta dispela hevi, em i laikim sin na em i wok strong tru long kirapim ol man long mekim sin. Ating em i ting olsem samting em i mekim long gaden Iden i mekim na em i win tru. Tasol em i no kliagut olsem Jehova i gat bikpela pasin laikim. God i no senisim samting em i tingting pinis long mekim long ol tumbuna pikinini bilong Adam na Iv. Em i laikim tru olgeta manmeri, olsem na em i hariap long mekim samting bilong olgeta manmeri i ken bilip na wetim gutpela samting. (Ritim Rom 8:​20, 21.) Jehova i save olsem sampela tumbuna pikinini bilong Adam na Iv bai laikim em na ol bai nidim helpim bilong em long pait bilong daunim sin. Na olsem Papa na Krieta bilong ol, em bai opim rot long ol i ken lusim kalabus bilong sin na i go klostu long em. Jehova bai mekim wanem bilong olgeta dispela samting i ken kamap?

5. Wanem namba 1 taim Jehova i helpim ol sinman long wetim gutpela samting i kamap bihain? Stori long dispela. (Stat 3:15)

⁵ Ritim Stat 3:15. Namba 1 taim Jehova i helpim ol sinman long wetim gutpela samting i kamap bihain em taim em i tokaut long samting bai painim Satan. God i tok profet olsem long rot bilong wanpela “pikinini,” em bai seivim ol manmeri. Dispela pikinini bai krungutim het bilong Satan, na em bai pinisim olgeta pasin nogut em Satan i bin kamapim kirap long gaden Iden. (1 Jon 3:8) Tasol dispela pikinini i mas karim pen na hevi bilong mekim olsem. Satan bai kaikaim lek bilong em na long dispela rot em bai dai. Na dispela bai mekim Jehova i bel hevi tru. Tasol Jehova i redi long karim dispela bel pen bikos long dispela rot tasol em inap seivim planti manmeri long sin na dai.

HAU OL MAN I GAT SIN LONG TAIM BILONG BAIBEL I AMAMASIM JEHOVA?

6. Ol bilipman olsem Abel na Noa i bin mekim wanem bilong go klostu long Jehova?

⁶ Inap planti handret yia bihain, isi isi Jehova i wok long kamapim klia hau ol man i gat sin i ken go klostu long em. Abel em namba 2 pikinini man bilong Adam na Iv, em i fes man long bilip long Jehova bihain long pasin bikhet i bin kamap long gaden Iden. Abel i laikim Jehova na em i laik amamasim Em na go klostu long em, olsem na em i givim ofa long em. Abel em i man bilong lukautim ol sipsip, so em i kisim sampela yangpela sipsip na em i kilim ol na givim olsem  ofa long Jehova. Jehova i pilim olsem wanem long ofa bilong em? Em i “amamas long Abel na ofa bilong em.” (Stt. 4:4) Jehova i orait long ol wankain ofa em ol narapela bilipman, kain olsem Noa, husat i laikim em na i trastim em i bin givim long em. (Stt. 8:​20, 21) Taim Jehova i orait long ol dispela ofa, em i kamapim klia olsem ol man i gat sin i ken mekim samting bilong amamasim em na go klostu long em. b

7. Yumi kisim wanem skul long pasin bilong Abraham long redi long givim pikinini bilong em yet olsem ofa?

⁷ Jehova i askim Abraham, em man i gat strongpela bilip, long mekim samting i hatwok tru long mekim—em long givim pikinini man bilong em Aisak olsem ofa. Abraham i pilim hatwok tru long mekim dispela samting Jehova i tokim em long mekim. Maski i olsem, em i redi long bihainim tok bilong Jehova na mekim olsem. Tasol klostu stret long taim Abraham i laik kilim Aisak i dai, God i stopim em long mekim olsem. Dispela eksampel i skulim olgeta bilipman na bilipmeri long wanpela bikpela tok i tru olsem, Jehova bai redi long givim Pikinini em i laikim tumas olsem ofa. Dispela i soim klia pasin bilong Jehova long laikim tru ol manmeri.—Stt. 22:​1-18.

8. Ol sakrifais em Lo i makim bilong givim i olsem piksa na i makim wanem samting? (Wok Pris 4:​27-29; 17:11)

⁸ Planti handret yia bihain, Lo em God i givim long lain Israel i tokaut olsem ol i mas mekim planti sakrifais bilong karamapim sin bilong ol manmeri bilong God. (Ritim Wok Pris 4:​27-29; 17:11.) Ol kain sakrifais i olsem piksa na i makim wanpela sakrifais i gutpela moa we bai seivim olgeta manmeri long sin. God i kirapim ol profet bilong em long tokaut olsem ol man bai mekim nogut long dispela promis pikinini, em Pikinini Bilong God, na ol bai kilim em i dai. Ol bai kilim em i dai olsem sipsip ol i bringim i go bilong mekim ofa. (Ais. 53:​1-12) Tingim dispela: Jehova i stretim rot bilong givim Pikinini em i laikim tumas olsem ofa bilong seivim olgeta manmeri, na yu tu, long sin na dai.

JISAS I MEKIM WANEM BILONG SEIVIM OL MAN I GAT SIN?

9. Jon Bilong Baptais i mekim wanem tok long Jisas? (Hibru 9:22; 10:​1-4, 12)

⁹ Long yia 29 C.E., wokman bilong God em Jon Bilong Baptais, em i lukim Jisas Bilong Nasaret i wokabaut i kam na em i tok: “Lukim, Pikinini Sipsip Bilong God husat i tekewe sin bilong olgeta manmeri!” (Jon 1:29) Ol dispela tok em i mekim i kamapim klia olsem Jisas em i dispela pikinini em God i bin tok profet long em inap longtaim i go pinis. Em bai givim laip bilong em olsem ofa olsem God i bin tok promis long en. Long dispela taim winim olgeta narapela taim bipo, ol sinman inap bilip na wetim gutpela samting i kamap bihain—ol inap winim pait bilong daunim sin.—Ritim Hibru 9:22; 10:​1-4, 12.

10. Hau na Jisas i soim olsem em i “kam bilong singautim” ol sinman?

¹⁰ Jisas i tingting strong long helpim ol manmeri em sin i daunim ol tru na em i invaitim ol long kamap ol disaipel bilong em. Em i save olsem sin em i as tru bilong ol pen na hevi ol manmeri i karim. Olsem na em i helpim ol manmeri em ol narapela i save long ol olsem ol sinman na meri. Em i mekim tok piksa, na em i tok: “Ol man i no gat sik ol i no save go lukim dokta, tasol ol sikman ol i save go lukim dokta.” Em i tok moa olsem: “Mi no kam bilong singautim ol stretpela man, nogat, mi kam bilong singautim ol sinman.” (Mat. 9:​12, 13) Jisas i bihainim dispela tok bilong em. Long pasin isi, em i fogivim ol sin bilong meri i wasim lek bilong em wantaim aiwara bilong em. (Luk 7:​37-50) Em i skulim meri Samaria long hulwara long ol bikpela tok i  tru, maski em i save olsem dispela meri i bin maritim planti man. (Jon 4:​7, 17-19, 25, 26) Na tu, God i givim strong long Jisas long pinisim samting nogut em sin i kamapim, em dai. Hau Jisas i bin mekim olsem? Em i mekim olsem taim em i kirapim bek ol man, ol meri, na ol pikinini i dai pinis.—Mat. 11:5.

11. Wai na ol sinman i pilim isi long toktok wantaim Jisas?

¹¹ Ol manmeri em ol i bin mekim ol bikpela sin, ol i pilim isi long toktok wantaim Jisas. Em i mekim pasin sori long ol na pilim hevi bilong ol. Ol i no pret long toktok wantaim em. (Luk 15:​1, 2) Na Jisas i tok amamas long ol na em i mekim gutpela pasin long ol bikos ol i soim olsem ol i bilip long em. (Luk 19:​1-10) Em i bihainim gut tru pasin marimari bilong Papa bilong em. (Jon 14:9) Long rot bilong toktok na pasin bilong Jisas, em i soim olsem Papa bilong em i gat pasin sori na pasin marimari na em i laikim tru ol manmeri na em i laik helpim ol long winim pait bilong daunim sin. Jisas i helpim ol sinman long i gat laik long senisim ol pasin bilong ol na kamap disaipel bilong em.—Luk 5:​27, 28.

12. Taim Jisas i skulim ol manmeri, em i stori olsem wanem long indai bilong em?

¹² Jisas i save long samting bai painim em long bihain. Inap planti taim em i tokim ol disaipel bilong em olsem wanpela bilong ol bai putim em long han bilong ol birua na ol bai kilim em i dai antap long diwai pos. (Mat. 17:22; 20:​18, 19) Em i save olsem ofa bilong em bai tekewe ol sin bilong olgeta manmeri, olsem Jon i bin tokaut long en na ol profet i bin tok profet long en. Na tu, Jisas i skulim ol disaipel bilong em olsem  bihain long em i givim laip bilong em olsem ofa, em bai “pulim kain kain man i kam” long em. (Jon 12:32) Ol sinman i ken amamasim Jehova long rot bilong bilip long Jisas olsem Bikpela bilong ol na bihainim lek mak bilong em. Sapos ol i mekim olsem, ol bai “no stap kalabus moa long sin.” (Rom 6:​14, 18, 22; Jon 8:32) Olsem na Jisas i strongim bel na em i redi long karim pen na hevi na dai.—Jon 10:​17, 18.

13. Hau Jisas i dai, na dai bilong em i skulim yumi long wanem samting long God Jehova? (Lukim tu piksa.)

¹³ Wanpela disaipel bilong Jisas i putim em long han bilong ol birua na ol i arestim em, toknogutim em, bagarapim gutnem bilong em, kotim em, na ol i givim bikpela pen long em. Ol soldia i kisim em i go long hap we ol bai kilim em i dai long en na ol i nilim em antap long diwai pos. Taim em i wok long karim olgeta dispela pen na hevi, i gat wanpela Man i pilim bikpela bel pen tru. Em God Jehova. Maski em i gat bikpela strong tru, em i holim bek strong bilong em na em i no mekim wanpela samting bilong helpim Pikinini bilong em. Wai em i mekim olsem? Wanem samting inap kirapim dispela Papa i gat pasin laikim long mekim olsem? Em pasin laikim tasol. Jisas i tok: “God i laikim tumas olgeta manmeri bilong graun, olsem na em i givim dispela Pikinini tru bilong em long ol bai olgeta man husat i bilip long em ol inap abrusim bagarap na kisim laip oltaim.”—Jon 3:16.

14. Ofa bilong Jisas i skulim yu long wanem samting?

¹⁴ Ofa bilong Jisas em i nambawan evidens i kamapim klia olsem Jehova i laikim tru ol tumbuna pikinini bilong Adam na Iv. Dispela i soim klia olsem Jehova i laikim yu tru. Em i givim Pikinini bilong em olsem ofa na em i redi long pilim bikpela bel pen tru bambai em i ken seivim yu long sin na dai. (1 Jon 4:​9, 10) Tru tumas, em i laik helpim yumi olgeta wan wan long pait long daunim sin, na winim dispela pait!

15. Yumi mas mekim wanem bilong kisim helpim long presen God i givim, em pe bilong baim bek man?

¹⁵ God i givim laip bilong Pikinini tru bilong em olsem ofa bilong baim bek ol man, na dispela presen i opim rot long em i ken fogivim ol sin bilong yumi. Tasol bilong God i ken fogivim yumi, yumi mas mekim wanpela samting. Em wanem samting? Jon Bilong Baptais na Jisas Krais i kamapim bekim bilong dispela askim, ol i tok: “Yupela tanim bel. Kingdom bilong heven i kam klostu pinis.” (Mat. 3:​1, 2; 4:17) So yumi mas tanim bel sapos yumi laik tru long winim pait bilong daunim sin na go klostu long gutpela Papa bilong yumi. Tasol yumi mas mekim wanem bilong tanim bel, na hau dispela i ken helpim yumi long winim pait bilong daunim sin? Neks stadi atikol bai bekim dispela askim.