1, 2. (a) Jisas i tingim wanem wok i stap olsem bikpela samting long laip bilong em? Bilong wanem? (b) Yumi mas mekim wanem bambai yumi stap olsem ol “wanwok bilong God”?

JISAS KRAIS em i wanpela kapenta na man bilong autim tok. (Mak 6:3; Rom 15:8) Em i save gut long mekim ol dispela wok. Jisas em kapenta, olsem na em i gat save long yusim ol tul bilong ol kapenta long katim na sapim diwai long wokim ol samting ol man i yusim long olgeta de. Olsem tisa bilong gutnius, Jisas i yusim gut save bilong em long Ol Skripsa long helpim ol manmeri long kliagut long tok i tru i stap long Tok Bilong God. (Mat. 7:28; Luk 24:32, 45) Taim Jisas i gat 30 krismas, em i lusim wok kapenta bikos em i save olsem wok bilong autim tok em i bikpela samting moa. Em i tok wok bilong tokaut long gutnius bilong Kingdom Bilong God em wanpela risen na God i salim em i kam long graun. (Mat. 20:28; Luk 3:23; 4:43) Jisas i tingim olsem wok autim tok i bikpela samting long laip bilong em, olsem na em i laik bai ol narapela tu i joinim em long mekim dispela wok.—Mat. 9:35-38.

² Ating yumi no mekim wok kapenta, tasol yumi ol manmeri bilong autim gutnius. Dispela wok em bikpela samting tru, olsem na God i stap wantaim yumi; yumi stap ol “wanwok bilong God.” (1 Kor. 3:9; 2 Kor. 6:4) Yumi save olsem “as bilong lo bilong [Jehova] em i tok tru tasol.” (Sng. 119:159, 160) Olsem na yumi laik “mekim ol tok i stret taim [yumi] autim na kamapim mining bilong tok i tru.” (Ritim 2 Timoti 2:15.) Taim yumi yusim Baibel, yumi wok yet long mekim save  bilong yumi long Baibel i kamap gutpela moa, em nambawan tul yumi save yusim long skulim ol manmeri long Jehova, Jisas, na Kingdom. Oganaisesen bilong Jehova i redim ol narapela tul we yumi mas lain long yusim gut na dispela bai helpim wok autim bilong yumi i kamap gutpela moa. Ol dispela tul i stap long Tul Boks Bilong Skulim Ol Man.

3. (a) Long nau yumi mas tingting strong long mekim wanem taim yumi autim tok? (b) Aposel 13:48 i kirapim yumi long mekim wanem?

³ Ating yu laik save, bilong wanem yumi kolim olsem Tul Boks Bilong Skulim Ol Man, na i no Tul Boks Bilong Autim Tok. Dispela tok “autim tok” i makim pasin bilong tokaut long wanpela tok; tasol dispela tok “skulim” i makim pasin bilong putim tok i go daun long bel na tingting bilong man bambai em i ken bihainim ol tok em i kisim save long en. Long dispela haptaim i stap yet bilong autim tok, yumi mas tingting strong long kirapim ol Baibel stadi na skulim ol manmeri long tok i tru. Dispela i makim olsem yumi mas wok strong long painim ol manmeri “em bel bilong ol i gutpela long kisim laip oltaim,” na helpim ol long bilip.—Ritim Aposel 13:44-48.

4. (a) Olsem wanem yumi inap save long ol manmeri em “bel bilong ol i gutpela long kisim laip oltaim”? (b) Olsem wanem yumi inap painim ol kain lain olsem?

⁴ Olsem wanem yumi inap save long ol manmeri em “bel bilong ol i gutpela long kisim laip oltaim”? Wankain olsem long taim bilong ol aposel, yumi inap painim ol dispela kain man taim yumi autim tok. Olsem na yumi mas mekim olsem Jisas i tokim yumi: “Wanem wanem bikpela taun o liklik taun yupela i go long en, yupela i mas painimaut gut wanem man i gutpela inap long yupela i go lukim em.” (Mat. 10:11) Yumi save olsem ol man em ol i gat tupela tingting, ol man i gat pasin antap, na ol man husat i no laik save long tok bilong God, ol bai no laik harim gutnius yumi autim. Yumi painim ol man em ol i gat onest pasin, pasin daun, na ol i hangre long tok i tru. Yumi ken tingim wok bilong painim ol dispela kain man i wankain long wok kapenta Jisas i mekim. Ating em i save painim ol diwai bilong wokim tebol samting, ol dua, hap plang bilong putim long sol, na ol narapela samting. Taim em i painim pinis wanpela gutpela diwai, em bai kisim tul boks na mekim wok long save em i gat long wokim ol dispela samting. Olsem tasol, yumi tu i mas wok strong long painim ol man i gat gutpela bel na kamapim ol disaipel.—Mat. 28:19, 20.

5. Yumi mas save long wanem samting long ol tul i stap long Tul Boks Bilong Skulim Ol Man? Stori long dispela. (Lukim piksa long kirap bilong stadi.)

⁵ Insait long tul boks i gat kain kain tul na wan wan i gat narapela narapela wok. Olsem, Jisas i bin yusim kain kain tul taim em i mekim wok kapenta. * Em i nidim ol tul bilong mesarim na putim mak long ol timba; katim, drilim, na seipim ol timba; stretim na levelim ol timba na joinim ol. Olsem tasol, ol tul i stap long Tul Boks Bilong Skulim Ol Man i gat wan wan wok bilong ol. Olsem na yumi ken skelim tul boks bilong yumi na lukim hau yumi inap yusim ol dispela gutpela tul yumi gat.

6, 7. (a) Yu bin yusim ol kontek kat olsem wanem? (b) Invatesen bilong miting i mekim wanem 2-pela wok?

⁶ Kontek Kat. Ol kontek kat i liklik, tasol yumi inap yusim ol long tokim ol narapela long yumi husat, na stiaim ol i go long jw.org Web-sait bambai ol inap kisim sampela save moa long yumi, na tu, ol inap rikwes long stadi long Baibel. Winim 4 handret tausen manmeri i bin go long jw.org na askim long mekim Baibel stadi, na long olgeta de planti handret manmeri moa i wok long askim long stadi long Baibel! Taim yu mekim wok bilong yu long olgeta wan wan de, yu ken kisim ol kontek kat i go wantaim yu bambai yu inap autim tok taim rot i op.

⁷ Invatesen. Invatesen bilong singautim man i kam long miting i save mekim 2-pela wok. Dispela  invatesen i tok: “Mipela i laik singautim yu long stadi long Baibel wantaim ol Witnes Bilong Jehova.” Na tu, invatesen i tok man inap stadi long rot bilong “ol pablik miting bilong mipela” “o wanpela bai skulim yu long Baibel.” Long dispela rot, invatesen i tokaut long yumi husat, na tu, em i singautim “ol man i hangre long kisim save long God” long stadi long Baibel. (Mat. 5:3) Maski ol man i laik stadi long Baibel o nogat, ol i ken kam long miting. Sapos ol i kam long miting, ol bai lukim pasin yumi bihainim na harim ol tok bilong Baibel em yumi stori long en.

8. Bilong wanem em i bikpela samting long man i kam long wanpela miting bilong yumi? Stori long wanpela eksampel.

⁸ Em i bikpela samting long invaitim ol man long kam long wanpela miting bilong yumi. Bilong wanem? Long wanem, ol bai luksave olsem long rot bilong ol miting, yumi kisim planti gutpela kaikai bilong strongim bilip bilong yumi, tasol Bikpela Babilon i stap hangre long sait bilong bilip. (Ais. 65:13) Ray na Linda em tupela marit long Amerika, na ol i luksave long dispela samting long ol yia i go pinis. Tupela i pilim olsem ol i mas i go long lotu. Ol i bilip long God na ol i luksave olsem ol i mas kisim kaikai bilong strongim bilip, olsem na ol i go long olgeta lotu i stap long taun. I gat planti haus lotu na kain kain bilip. Pastaim, ol i tingim 2-pela samting em ol i mas lukim long lotu em ol i laik joinim. Namba 1, ol i mas lainim wanpela tok bilong Baibel long taim bilong lotu. Namba 2, ol memba bilong dispela lotu i mas werim ol klos i soim olsem ol i lain tru bilong God. Insait long sampela yia, ol i go long olgeta lotu i stap long taun, tasol ol i bel hevi. Ol i no lainim wanpela samting, na ol lain i go pas long lotu i no pasim ol klos i stret long ol Kristen i mas werim. Bihain long ol i lusim laspela haus lotu na kam ausait, Linda i go bek long wok na Ray i go long haus. Taim Ray i draiv i go bek, em i lukim Haus Kingdom na em i tingting, ‘Mi mas go na lukim hau ol i save lotu.’ Tru tumas, dispela em narakain ekspiriens tru long Ray! Olgeta lain long Haus Kingdom i soim gutpela pasin na pasin pren na ol i bilas gut. Ray i sindaun long fran na em i laikim tru ol tok em i harim! Samting i kamap long Ray i stret wantaim tok bilong aposel Pol. Em i tok long man i kam long miting long festaim bai tok: “Tru tumas, God i stap namel long yupela.” (1 Kor. 14:23-25) Bihain long dispela, Ray i save go long olgeta Sande na em i save go long olgeta miting namel long wik. Linda tu i kirap long go long miting, na taim ol i winim pinis 70 krismas, ol i kirap stadi long Baibel na kisim baptais.

9, 10. (a) Bilong wanem em isi long yusim ol liklik nius taim yumi autim tok? (b) Stori long rot bilong yusim liklik nius Kingdom Bilong God Em Wanem Samting?

⁹ Ol Liklik Nius. Yumi gat 8-pela liklik nius na em isi long yumi inap yusim bilong kirapim tok. Ol i wokim ol dispela nius long 2013, olsem na kirap long dispela yia na i kam inap long nau, ol i prinim 5 bilion bilong ol dispela liklik nius! Wanpela gutpela samting long ol dispela liklik nius em olsem, taim yu save long rot bilong yusim wanpela, yu inap yusim olgeta dispela nius bikos yu bai bihainim wankain pasin long tilim ol. Olsem wanem yu inap yusim liklik nius long kirapim tok wantaim wanpela man?

¹⁰ Ating yu ken yusim liklik nius Kingdom Bilong God Em Wanem Samting? Soim man long askim i stap long fran na askim em: “Yu ting Kingdom Bilong God em wanem samting? Bai yu tok em . . . ?” Bihain, askim em long makim wanpela bilong 3-pela bekim em i ting i stret. No ken tokim em olsem bekim bilong em i stret o i no stret, opim liklik nius long hap “Baibel i Tok” na ritim ol skripsa i stap long nius, em Daniel 2:44 na Aisaia 9:6. Sapos man i amamas, orait stori liklik moa wantaim em. Bihain, go long laspela pes na soim em long askim i stap aninit long het tok “Samting Bilong Tingim”: “Sindaun bai wanem kain taim Kingdom Bilong God i mekim wok bos?” Dispela bai opim rot long yu inap go bek na stori wantaim em. Taim yu go bek, yu ken soim em long lesen 7  long buklet Gutpela Nius i Kam Long God!, em wanpela tul yumi save yusim bilong kirapim Baibel stadi.

11. (a) Wanem wok bilong nius Wastaua na Kirap!? (b) Yumi mas save long wanem samting taim yumi laik tilim ol magasin?

¹¹ Ol Magasin. Nius Wastaua na Kirap! em 2-pela magasin we ol i bin trensletim long planti tokples na tilim long klostu olgeta hap bilong graun! Yumi save tilim dispela tupela magasin long planti kantri, olsem na ol i raitim ol tok i stap long magasin long wei we ol manmeri long olgeta hap bai amamas long ritim. Yumi mas yusim ol magasin olsem tul bilong kirapim laik bilong ol manmeri long save long wanem samting i bikpela samting long i stap bilong ol. Yumi mas save gut long ol tok i stap insait long wan wan magasin na bai yumi save dispela magasin i stret long wanem kain ol man.

12. (a) Nius Kirap! i bilong helpim wanem lain? Wanem wok bilong en? (b) Wanem gutpela samting i kamap taim yu bin yusim dispela tul?

¹² Ol i wokim nius Kirap! long helpim ol manmeri husat i gat liklik save long tok bilong Baibel o ol i no save long tok bilong Baibel. Ating ol i no save long ol bilip Kristen, o ol i no trastim lotu, o ating ol i no save olsem Baibel i kamapim ol gutpela tok bilong stiaim yumi. Nambawan wok bilong nius Kirap! em long kirapim man long bilip olsem God i stap tru. (Rom 1:20; Hib. 11:6) Na tu, dispela nius i bilong helpim man long bilip olsem Baibel em “tok bilong God, na tru tru i olsem.” (1 Tes. 2:13) Taitol bilong 3-pela Kirap! bilong 2018 em: “Rot Bilong i Stap Amamas,” “12-pela Rot Bilong Famili i Stap Amamas,” na “Helpim Ol Man i Krai Sori.”

13. (a) Ol i wokim nius Wastaua bilong pablik long helpim husat? (b) Wanem gutpela samting i kamap taim yu yusim dispela tul?

¹³ Nius Wastaua bilong pablik i stori long ol samting bilong bilip. Ol i wokim dispela nius bilong helpim ol lain husat i rispektim God na ol tok bilong Baibel. Ol i save long sampela tok bilong Baibel, tasol ol i no gat stretpela save long ol tok Baibel i mekim. (Rom 10:2; 1 Tim. 2:3, 4) Ol taitol bilong 3-pela nius Wastaua! bilong 2018 i bekim ol dispela askim: “Yu Ting Baibel Inap Helpim Yumi Long Nau?,” “Wanem Samting Bai Painim Yumi Bihain?,” na “God i Save Tingim Yu?”

14. (a) Wanem wok bilong 4-pela vidio i stap long Tul Boks Bilong Skulim Ol Man? (b) Wanem gutpela samting i kamap taim yu soim ol vidio?

¹⁴ Ol Vidio. Long taim bilong Jisas, ol kapenta i save yusim ol tul bilong mekim wok long han tasol. Tasol nau ol kapenta i yusim ol tul i wok long pawa—ol so, ol dril, masin bilong sanpepa, masin bilong nil, na planti moa. Maski yumi gat ol buk na nius, yumi gat tu ol naispela vidio bilong soim long ol manmeri—4-pela bilong ol i stap long tul boks em: Wai na i Gutpela Long Stadi Long Baibel?, Mipela i Save Mekim Wanem Long Taim Bilong Baibel Stadi?, Wanem Samting i Save Kamap Long Haus Kingdom?, na Ol Witnes Bilong Jehova—Ol i Husat? Taim yu bungim man long namba 1 taim, i gutpela long soim ol vidio we i no winim 2 minit. I gutpela long soim ol longpela vidio long taim yu mekim gobek na long ol man husat i gat taim long harim tok. Ol dispela gutpela tul inap kirapim tingting bilong ol manmeri long stadi long Baibel na i go long ol miting.

15. Taim man i watsim vidio bilong yumi long tokples bilong em, dispela i mekim wanem long em? Stori long wanpela eksampel.

¹⁵ Tingim dispela ekspiriens. Wanpela sista i bungim wanpela meri husat i kam long Maikronisia na em i mekim tokples Yapese. Sista i soim em vidio Wai na i Gutpela Long Stadi Long Baibel? long tokples Yapese. Taim meri i lukim vidio, em i tok: “Dispela em tokples bilong mi. Mi hat long bilip! Pasin bilong em long toktok i soim olsem em tu i bilong ples bilong mi. Em i mekim tokples bilong mi!” Bihain long dispela, meri i tokim sista olsem em bai ritim na watsim olgeta samting long tokples  bilong em long jw.org. (Skelim Aposel 2:8, 11.) Tingim narapela ekspiriens. Wanpela sista long Amerika i salim link bilong dispela seim vidio long pikinini man bilong brata bilong em husat i stap long narapela kantri. Dispela vidio i stap long tokples bilong em. Pikinini man i watsim na em i salim e-mail na tok: “Dispela hap i soim wanpela man nogut i kontrolim graun i kirapim tingting bilong mi. Mi go long Web-sait na putim rikwes bilong Baibel stadi.” Em i stap long wanpela kantri we i gat tambu long wok bilong yumi!

16. Stori long wok bilong buklet: (a) Harim Tok Bilong God na Stap Oltaim. (b) Gutpela Nius i Kam Long God! (c) Husat i Mekim Laik Bilong Jehova Long Nau?

¹⁶ Ol Buklet. Olsem wanem yu inap skulim man long tok i tru sapos em i no save gut long rit o i no gat ol buk na nius long tokples bilong em? Yumi gat gutpela tul bilong helpim em, em buklet Harim Tok Bilong God na Stap Oltaim. * Wanpela gutpela tul bilong kirapim ol stadi em buklet Gutpela Nius i Kam Long God! Yu inap soim 14 narapela narapela askim i stap long laspela pes bilong buklet na larim em i makim 1-pela askim em i laik save long bekim bilong en. Yu ken kirapim stadi wantaim em long lesen em i makim. Olsem wanem? Yu bin mekim olsem taim yu mekim ol gobek? Narapela buklet i stap long tul boks em Husat i Mekim Laik Bilong Jehova Long Nau? Wok bilong dispela buklet em bilong stiaim Baibel sumatin i kam long oganaisesen. Sapos yu laik save moa long hau yu inap yusim dispela buklet, lukim Kristen Laip na Wok Autim Tok—Miting Wok Buk bilong Mas 2017.

17. (a) Wanem wok bilong ol buk bilong stadi? (b) Maski sumatin i winim ol mak bilong kisim baptais, em i mas wok yet long mekim wanem? Bilong wanem?

¹⁷ Ol Buk. Sapos yu kirapim stadi long wanpela buklet, orait yu yet i ken makim wanem taim yutupela bai senis na stadi long buk What Can the Bible Teach Us? Dispela buk bai helpim sumatin long kisim sampela save moa long ol bikpela tok i tru bilong Baibel. Sapos yupela i pinisim dispela buk na sumatin i wok long winim ol mak, orait stadi long buk How to Remain in God’s Love. Dispela buk bai skulim sumatin long bihainim ol stiatok bilong Baibel long ol samting em i mekim long wan wan de. Tingim, maski sumatin i kisim baptais, em i mas wok yet long stadi long dispela 2-pela buk inap long em i pinisim. Dispela bai helpim em long holimpas ol bilip em i lain pinis long en.—Ritim Kolosi 2:6, 7.

18. (a) 1 Timoti 4:16 i kirapim yumi long mekim wanem? Wanem gutpela samting i kamap? (b) Taim yumi mekim wok long Tul Boks Bilong Skulim Ol Man, yumi mas tingting strong long mekim wanem?

¹⁸ Yumi stap olsem ol Witnes Bilong Jehova, olsem na yumi gat wok long “autim tok i tru bilong gutnius” we inap helpim ol man long kisim laip oltaim. (Kol. 1:5; ritim 1 Timoti 4:16.) Olsem na oganaisesen i redim Tul Boks Bilong Skulim Ol Man na i gat ol tul em yumi inap yusim long mekim dispela wok. (Lukim “Tul Boks Bilong Skulim Ol Man.”) Yumi mas mekim gutpela wok long ol dispela tul. Wan wan pablisa i ken makim wanem litresa long tul boks ol i laik yusim bilong helpim man i gat laik long kisim save, na ol inap makim tu wanem taim ol i laik yusim dispela litresa. Yumi no tingting tasol long tilim ol litresa, nogat. Na tu, yumi no laik lusim litresa long ol man i no laik harim tok. Yumi laik kamapim disaipel long ol manmeri i gat onest pasin, pasin daun, na ol i hangre long tok i tru—em ol manmeri em “bel bilong ol i gutpela long kisim laip oltaim.”—Apo. 13:48; Mat. 28:19, 20.