1. Jehova inap mekim wanem bilong inapim ol samting em i tingting pinis long mekim?

JEHOVA inap mekim olgeta kain wok bilong inapim ol samting em i tingting pinis long mekim. Eksampel: Jehova em i Tisa, Man Bilong Mekim Isi Bel, Man Bilong Autim Gutnius, na em inap mekim planti wok moa. (Ais. 48:17; 2 Kor. 7:6; Gal. 3:8) Maski i olsem, planti taim em i yusim ol man bilong graun long inapim samting em i laik mekim. (Mat. 24:14; 28:19, 20; 2 Kor. 1:3, 4) Jehova inap givim yumi savetingting na strong long mekim olgeta kain wok bilong inapim samting em i laik mekim. Dispela i stret wantaim mining i stap long nem bilong Jehova, olsem sampela saveman i tok.

2. (a) Wai na sampela taim yumi inap pilim olsem Jehova i no yusim yumi long mekim wok? (b) Yumi bai stori long wanem ol samting?

² Yumi olgeta i laik bai Jehova i yusim yumi long mekim laik bilong em, tasol sampela Kristen inap pilim olsem Jehova i no yusim ol long mekim wok. Wai? Bikos ol i pilim olsem krismas, sindaun, na save bilong ol i pasim ol long mekim wok. Ol narapela inap belgut olsem ol i mekim wok inap long skel bilong ol na i no gat nid long mekim sampela wok moa. Long dispela atikol, yumi bai stori long hau Jehova inap givim ol samting yumi nidim bilong inapim samting em i laik mekim. Yumi bai skelim tu ol stori bilong Baibel we Jehova i kirapim ol wokman na wokmeri bilong em long kisim laik bilong mekim wok na em i bin strongim ol. Yumi bai stori tu long hau yumi inap larim Jehova i yusim yumi long mekim wok.

3. Olsem Filipai 2:13 i kamapim, hau bai Jehova inap kirapim laik bilong yumi long mekim wok?

³ Ritim Filipai 2:13. * Jehova inap kirapim laik bilong yumi long mekim wok. Hau bai em inap mekim olsem? Ating kongrigesen i nidim sampela helpim. O, ol elda i ritim pas i kam long brens ofis i tokaut olsem narapela kongrigesen i nidim helpim. Yumi inap askim yumi yet olsem, ‘Hau bai mi inap givim helpim?’ O ating yumi kisim bikpela asainmen na yumi pilim olsem yumi no inap mekim gut dispela wok. O ating yumi ritim sampela tok bilong Baibel na yumi tingting, ‘Hau bai dispela tok inap stiaim mi long helpim ol narapela?’ Jehova i no inap fosim yumi long mekim wok. Tasol taim em i lukim olsem yumi redi long skelim hau yumi inap givim helpim, em inap kirapim laik bilong yumi long mekim wok.

4. Hau bai Jehova inap givim yumi strong long mekim wok?

⁴ Jehova inap givim yumi strong long mekim wok. (Ais. 40:29) Em inap yusim holi spirit long mekim save bilong yumi i kamap gutpela moa. (Kis. 35:30-35) Jehova inap yusim oganaisesen bilong em long skulim yumi long mekim wok. Sapos yu no klia tumas long hau yu bai mekim wanpela asainmen, askim ol narapela long helpim yu. Na tu, askim gutpela Papa bilong yumi long heven long givim yu “strong i winim strong bilong yumi ol man.” (2 Kor. 4:7; Luk 11:13) Baibel i gat stori bilong planti man na meri em Jehova i bin kirapim laik bilong ol long mekim wok na em i bin strongim ol. Taim yumi skelim stori bilong sampela bilong ol, traim long tingim ol rot we Jehova inap yusim yu long mekim wok.

5. Yumi inap kisim wanem skul long stori bilong Moses?

⁵ Jehova i makim Moses long kisim bek lain Israel. Tasol wanem taim Jehova i yusim em long mekim dispela wok? Em tru olsem Moses i bin “kisim skul long olgeta gutpela save bilong ol Isip.” Tasol yu ting dispela i mekim na em i pilim olsem em i redi long kisim bek lain Israel? (Apo. 7:22-25) Nogat. Jehova i yusim Moses bihain long em i helpim Moses long kisim pasin daun na pasin isi. (Apo. 7:30, 34-36) Jehova i strongim bel bilong Moses na em i go toktok long king bilong Isip, em man i gat bikpela strong na namba. (Kis. 9:13-19) Yumi kisim wanem skul long stori bilong Moses? Jehova i save yusim ol manmeri em ol i bihainim ol pasin bilong em na askim em long strongim ol long mekim wok.—Fili. 4:13.

6. Yumi kisim wanem skul long pasin bilong Jehova long yusim Barsilai long helpim King Devit?

⁶ Sampela handret yia bihain, Jehova i yusim Barsilai long helpim King Devit. Devit na ol manmeri i ranawe long Apsalom, pikinini man bilong Devit, na ol i “hangre na nek i drai.” Long dispela taim, Barsilai em lapun pinis, na tu, em inap lusim laip bilong em, tasol em i helpim Devit na ol lain i stap wantaim em. Barsilai i no holim tingting olsem em i lapun pinis na Jehova i no inap yusim em, nogat. Em i helpim ol wokman bilong God long ol samting ol i nidim. (2 Sml. 17:27-29) Yumi kisim wanem skul long dispela stori? Maski yumi gat hamas krismas, Jehova inap yusim yumi long givim kaikai na klos samting bilong helpim ol wanbilip i stap long kantri yumi stap long en o narapela kantri. (Prov. 3:27, 28;  19:17) Yumi inap givim kontribiusen bilong sapotim wok bilong Kingdom long olgeta hap bilong graun, na long dispela rot ol bratasista inap kisim helpim long taim bilong hevi.—2 Kor. 8:14, 15; 9:11.

7. (a) Jehova i yusim Simeon long mekim wanem? (b) Olsem wanem stori bilong Simeon i strongim yumi?

⁷ Simeon em wanpela bilipman i gat bikpela krismas na em i stap long Jerusalem. Jehova i tok promis olsem Simeon bai lukim Mesaia paslain long em i dai. Ating dispela promis i strongim tru Simeon bikos em i wet inap planti yia long lukim Mesaia. Simeon i bilip na sanap strong, olsem na God i blesim em. Wanpela taim, “holi spirit i stiaim” Simeon long go insait long tempel. Em i lukim bebi Jisas, na Jehova i yusim Simeon long mekim wanpela tok profet long dispela pikinini husat bai kamap Krais. (Luk 2:25-35) Ating Simeon i no stap laip na lukim Jisas i kirapim wok autim tok long graun, tasol em i amamas olsem God i yusim em long mekim tok profet, na em bai kisim planti blesing long bihain! Long nupela taim, dispela bilipman bai lukim hau wok king bilong Jisas i kamapim blesing long olgeta famili long graun. (Stt. 22:18) Yumi tu i ken amamas long olgeta kain wok Jehova i givim long yumi.

8. Olsem wanem Jehova inap yusim yumi long wankain pasin olsem em i bin yusim Barnabas?

⁸ Long taim bilong ol aposel, Josep i amamas long larim Jehova i yusim em long mekim wok. (Apo. 4:36, 37) Josep i gat pasin bilong mekim isi bel bilong ol narapela, olsem na ol aposel i kolim em Barnabas, mining bilong en, “Pikinini Bilong Mekim Isi Bel.” Bihain long Sol i kamap Kristen, planti wanbilip i pret long bung wantaim em bikos bipo em i save birua long ol kongrigesen. Tasol Barnabas i helpim Sol, na ating Sol i amamas tru long pasin helpim bilong em. (Apo. 9:21, 26-28) Bihain, ol elda long Jerusalem i harim olsem ol wanbilip i stap longwe long Antiok bilong Siria i nidim tok bilong strongim ol. Ol elda i salim husat? Barnabas! Ol elda i mekim stretpela disisen. Barnabas i “kirapim olgeta long ol i mas strong long stap gut long Bikpela.” (Apo. 11:22-24) Long nau tu, Jehova inap helpim yumi long “mekim isi bel” bilong ol wanbilip. God inap helpim yumi long mekim isi bel bilong ol lain em wanpela ol i laikim tru i dai. O, God inap kirapim yumi long visitim o ringim wanpela husat i sik o bel hevi, na yumi inap mekim ol tok bilong strongim em. Olsem wanem? Yu bai larim Jehova i yusim yu long wankain pasin olsem em i bin yusim Barnabas?—1 Tes. 5:14.

9. Yumi kisim wanem skul long samting Jehova i mekim bilong helpim Vasily long kamap gutpela wasman?

⁹ Jehova i helpim wanpela brata, nem bilong em Vasily, long kamap gutpela wasman. Taim Vasily i gat 26 krismas, ol brata i makim em long mekim wok elda. Em i pret bikos em i pilim olsem em i no gat save long helpim kongrigesen long kamap strong long sait bilong bilip, na moa yet em ol lain i karim ol bikpela hevi. Tasol em i kisim trening long ol brata i mekim wok elda inap planti yia, na tu, em i kisim trening long Skul Bilong Wok Kingdom. Vasily i wok strong long mekim gut wok. Olsem, em i mekim lista bilong ol mak em i laik winim. Taim em i winim ol dispela mak, isi isi em i daunim pasin bilong pret. Vasily i tok: “Pastaim mi pret long mekim dispela wok, tasol nau mi kisim bikpela amamas long en. Taim Jehova i helpim mi long painim skripsa i stret long mekim isi bel bilong wanpela brata o sista long kongrigesen, dispela i save mekim mi amamas tru.” Ol brata, sapos  yupela i bihainim wankain pasin olsem Vasily na larim Jehova i yusim yupela, em inap givim yupela save long mekim ol bikpela wok insait long kongrigesen.

10. (a) Abigel i mekim wanem? (b) Yu kisim wanem skul long stori bilong Abigel?

¹⁰ Devit na lain bilong em i nidim helpim bikos King Sol i ronim ol. Lain bilong Devit i askim Nabal long givim sampela kaikai long ol—Nabal em maniman bilong lain Israel. Ol i no surik long askim bikos ol i bin lukautim ol sipsip bilong em long ples drai nating. Tasol Nabal i tingim em yet tasol na em i no laik givim wanpela samting long ol. Devit i belhat nogut tru na em i laik i go kilim olgeta man i stap long haus bilong Nabal. (1 Sml. 25:3-13, 22) Tasol meri bilong Nabal, em Abigel, em i luk nais tru na em i gat savetingting. Em i strongim bel na i go nildaun long lek bilong Devit na pasim em long bekim rong na kapsaitim blut bilong narapela. Em i bihainim savetingting na tokim Devit long putim dispela hevi long han bilong Jehova. Devit i pilim tru ol savetok na gutpela pasin bilong Abigel. Devit i luksave olsem Jehova i salim Abigel i go bilong helpim em. (1 Sml. 25:23-28, 32-34) Abigel i kisim ol pasin we i opim rot long Jehova inap yusim em. Olsem tasol, sapos ol sista i bihainim savetingting na skelim gut ol samting, Jehova inap yusim ol long strongim famili bilong ol na ol narapela insait long kongrigesen.—Prov. 24:3; Tai. 2:3-5.

11. (a) Ol pikinini meri bilong Salum i mekim wanem? (a) Husat i bihainim pasin bilong ol long nau?

¹¹ Planti handret yia bihain, Jehova i yusim ol pikinini meri bilong Salum long insait long wok bilong sanapim gen banis bilong Jerusalem. (Neh. 2:20; 3:12) Maski Salum em wanpela hetman, ol pikinini bilong em i redi long mekim dispela bikpela wok we inap putim hevi long ol. (Neh. 4:15-18) Pasin bilong ol dispela pikinini meri i narapela kain tru long pasin bilong ol man long taun Tekoa, em “ol i no laik daunim ol yet na mekim ol wok”! (Neh. 3:5) Ol pikinini meri bilong Salum i amamas tru taim wok i pinis insait long 52 de tasol! (Neh. 6:15) Long taim bilong yumi, ol sista i amamas na redi long mekim wok holi—kain olsem wok konstraksen na meintenens long ol bilding em yumi dediketim long Jehova. Ol inap mekim gut ol dispela wok bikos ol i yusim gut save ol i gat, na ol i gat laik tru long mekim wok, na ol i stap gut long God.

12. Olsem wanem Jehova inap yusim yumi long wankain pasin olsem em i bin yusim Tabita?

¹² Jehova i kirapim Tabita long “mekim planti samting bilong helpim ol arapela na oltaim em i save givim ol samting,” na moa yet long ol wido. (Apo. 9:36) Olsem na planti manmeri i krai sori taim em i dai. Tasol ol i amamas tru taim aposel Pita i kirapim em bek. (Apo. 9:39-41) Yumi kisim wanem skul long stori bilong Tabita? Maski yumi yangpela o lapun, man o meri, yumi olgeta inap mekim sampela samting bilong helpim ol bratasista.—Hib. 13:16.

13. (a) Olsem wanem Jehova i yusim Ruth? (b) Ruth i tok wanem?

¹³ Ruth em wanpela sista husat i gat pasin bilong sem, na em i laik mekim wok misineri. Taim em i liklik meri, em i save hariap hariap long i go long ol haus na tilim ol liklik nius. Em i tok: “Mi amamas tru long mekim dispela wok.” Tasol em i pilim hatwok tru long toktok wantaim ol manmeri na tokim ol long Kingdom Bilong God. Maski i olsem, Ruth i gat 18 krismas taim em i kamap painia oltaim. Long  1946, em i go long Wastaua Baibel Skul Bilong Gileat na bihain em i go mekim wok misineri long Hawaii na Japan. Jehova i yusim em long narakain rot tru long autim gutnius long ol dispela kantri. Bihain long Ruth i mekim wok misineri inap olsem 80 yia, em i tok: “Jehova i bin strongim mi. Em i helpim mi long daunim pasin bilong sem. Mi bilip tru olsem Jehova inap yusim olgeta kain man husat i trastim em.”

14. Olsem Kolosi 1:29 i kamapim, yumi mas mekim wanem sapos yumi laik bai Jehova i yusim yumi?

¹⁴ Kirap long bipo na i kam inap long nau, Jehova i yusim ol wokman bilong em long mekim planti kain kain wok. Em bai yusim yu long mekim wanem kain wok? Yu inap mekim olgeta kain wok sapos yu yet i redi long mekim wok. (Ritim Kolosi 1:29.) Sapos yu redi, Jehova inap yusim yu long givim bel tru long autim gutnius, mekim gut wok tisa, mekim isi bel bilong ol narapela, stap gutpela pren, o mekim wanpela kain wok bilong inapim samting em i laik mekim.

15. Olsem 1 Timoti 4:12, 15 i kamapim, ol yangpela brata long nau i mas askim Jehova long helpim ol long mekim wanem?

¹⁵ Olsem wanem long yupela ol yangpela brata em klostu nau yupela bai kamap bikpela man? I gat bikpela nid long ol man long mekim planti wok moa olsem kongrigesen sevan. Long planti kongrigesen, namba bilong ol elda i winim namba bilong ol kongrigesen sevan. Olsem wanem? Sampela bilong yupela ol yangpela brata inap kisim laik bilong mekim planti wok moa insait long kongrigesen? Sampela taim ol brata i save tok, “Mi amamas long stap olsem pablisa tasol.” Sapos yu holim kain tingting olsem, orait askim Jehova long kirapim laik bilong yu long winim mak bilong kamap kongrigesen sevan na strongim yu long mekim wok bilong em. (Ekl. 12:1) Mipela i nidim helpim bilong yu!—Ritim 1 Timoti 4:12, 15.

16. Yumi mas askim Jehova long mekim wanem? Bilong wanem?

¹⁶ Jehova inap yusim yu long mekim olgeta kain wok bilong inapim samting em i laik mekim. Olsem na askim em long kirapim laik bilong yu long mekim wok, na strongim yu. Maski yu yangpela o lapun, yusim taim, strong, na mani o save bilong yu long onarim Jehova. (Ekl. 9:10) Sapos yu pret o yu pilim olsem yu no gat bikpela save o strong long mekim wok, no ken larim dispela i pasim yu long mekim bikpela wok moa long wok bilong Jehova. Yumi olgeta i gat gutpela blesing tru long mekim wok inap long skel bilong yumi long onarim Papa bilong yumi!