1. Bilong wanem i stret long yumi mas lotuim Jehova wanpela tasol?

JEHOVA em i Krieta na Man Bilong Givim Laip, olsem na i stret yumi mas lotuim em wanpela tasol. (Rev. 4:11) Yumi mas was gut. Maski yumi laikim Jehova na rispektim em, ol narapela samting inap pulim yumi na yumi no lotuim em wanpela tasol. Yumi mas save gut long olsem wanem dispela hevi inap kamap. Pastaim yumi laik save long ol samting yumi mas mekim bilong soim olsem yumi lotuim Jehova wanpela tasol.

2. Olsem Kisim Bek 34:14 i kamapim, yumi bai mekim wanem sapos yumi lotuim Jehova wanpela tasol?

² Long Baibel, pasin bilong lotuim God wanpela tasol i makim olsem yumi mas laikim em tru. Taim yumi lotuim Jehova wanpela tasol, dispela i soim klia olsem yumi laikim em tru. Yumi no inap larim wanpela man o wanpela samting i pasim yumi long laikim tru God.—Ritim Kisim Bek 34:14.

3. Wanem samting i kirapim yumi long lotuim Jehova?

³ I gat as na yumi lotuim Jehova. Yumi bin kisim save long em na dispela i kirapim yumi long lotuim em. Yumi laikim tru ol gutpela pasin bilong em. Yumi kisim save long ol samting em i laikim na ol samting em i heitim, na yumi wanbel long tingting bilong em. Yumi kliagut long risen na em i wokim yumi, na yumi bihainim laik bilong em. Yumi amamas tru olsem em i opim rot long yumi inap kamap pren bilong em. (Sng. 25:14) Taim yumi kisim save long Krieta bilong  yumi, dispela i kirapim yumi long i go klostu moa long em.—Jems 4:8.

4. (a) Satan i yusim wanem samting long pulim tingting bilong yumi? (b) Yumi bai skelim wanem ol samting long dispela atikol?

⁴ Satan i bosim dispela graun, na em i yusim ol samting bilong graun long pulim tingting bilong yumi. (Efe. 2:1-3; 1 Jon 5:19) Em i laik bai ol narapela samting i pasim yumi long lotuim Jehova wanpela tasol. Yumi ken stori long 2-pela samting Satan inap yusim bilong pulim tingting bilong yumi. Namba 1: Em i kirapim laik bilong yumi long bungim planti mani kago. Namba 2: Em i laik kirapim yumi long makim ol amamas nogut.

5. Bilong wanem yumi mas sakim pasin bilong laikim tumas mani?

⁵ Yumi olgeta i laik bai yumi gat kaikai inap long yumi, ol klos bilong werim, na haus bilong stap long en. Tasol yumi mas sakim pasin bilong laikim tumas mani. Ol manmeri bilong graun i “laikim tumas mani” na ol samting ol inap baim long mani. (2 Tim. 3:2) Jisas i save olsem ol disaipel bilong em tu inap bihainim dispela pasin. Jisas i tok: “I no gat wanpela man inap stap wokboi bilong tupela bosman. Em bai laikim wanpela na i no laikim narapela, o em bai pas wantaim wanpela na les long narapela. Yupela i no inap stap wokboi bilong God na Mani wantaim.” (Mat. 6:24) Sapos man i lotuim Jehova, tasol em i lusim bikpela strong na haptaim bilong em long bungim planti mani kago, i olsem em i mekim wok bilong 2-pela bosman. Mani kago i mekim na em i no lotuim Jehova wanpela tasol.

6. Yumi kisim wanem skul long tok Jisas i givim long kongrigesen bilong Laodisia?

⁶ Klostu long yia 100 C.E., ol memba bilong kongrigesen long Laodisia i hambak na tok: “Mi gat planti samting na mi bin kisim planti samting na mi no sot  long wanpela samting.” Tasol long ai bilong Jehova na Jisas, ol i “stap nogut tru na tarangu tru,” na “rabis na aipas na skin nating.” I no gat rong long ol i gat planti mani kago, tasol Jisas i kaunselim ol bikos ol i laikim tumas mani kago na dispela i bagarapim pasin pren bilong ol wantaim Jehova. (Rev. 3:14-17) Sapos yumi luksave olsem yumi stat long kisim laik bilong bungim planti mani kago, orait kwiktaim yumi mas stretim tingting bilong yumi. (1 Tim. 6:7, 8) Sapos yumi no mekim olsem, yumi bai laikim tu ol narapela samting na Jehova bai i no orait long wok lotu bilong yumi. God “i laik yumi mas lotu long em wanpela tasol.” (Lo 4:24) Olsem wanem mani inap stap nambawan samting long laip bilong yumi?

7-9. Yu kisim wanem skul long stori bilong David?

⁷ Tingim stori bilong David, em wanpela elda long Amerika. Em i tok em i bin givim bel tru long wok mani bilong em. Em i kisim promosen insait long kampani, na long kantri em i stap long en, em i kisim biknem long wok em i mekim. David i tok: “Mi ting dispela promosen na biknem i olsem blesing i kam long Jehova.” Tasol yu ting dispela tingting i stret?

⁸ Sampela samting i kamap na David i luksave olsem wok bilong em i laik bagarapim pasin pren bilong em wantaim Jehova. Em i tok: “Long miting bilong kongrigesen na long taim bilong autim tok, mi save tingting tasol long ol hevi i kamap long ples wok. Mi kisim planti mani tru, tasol mi save taiet stret, na hevi i stat long kamap insait long marit.”

⁹ David i luksave olsem em i mas skelim gen wanem ol samting i stap bikpela samting long laip bilong em. Em i tok:  “Mi mekim disisen long stretim hevi bilong mi.” David i laik senisim sediul bilong em long wok, na em i tokim bos long dispela samting. Wanem samting i kamap? Bos i pinisim David long wok! David i mekim wanem? Em i tok: “Long neks de, mi pulimapim aplikesen bilong mekim wok painia haptaim.” David na meri bilong em i save mekim wok klina bilong helpim ol long sait bilong mani. Bihain liklik, David i kirap mekim wok painia oltaim, na meri bilong em tu i joinim em long wok painia. Wok klina em wok we planti manmeri i no laik mekim, tasol dispela i no bikpela samting long David na meri bilong em. Maski mani ol i kisim long dispela wok em liklik tru taim ol i skelim wantaim mani David i kisim long pastaim, olgeta mun ol i gat mani inap long baim ol samting ol i nidim. Ol i laik putim Jehova i stap namba 1 long laip bilong ol, na ol i luksave stret olsem God i save lukautim ol lain i putim Kingdom i stap namba 1.—Mat. 6:31-33.

10. Yumi mas lukaut long wanem samting?

¹⁰ Maski yumi gat liklik o planti mani kago, yumi mas lukaut. Yumi mas lukaut long wanem samting? Yumi no ken kisim pasin bilong laikim tumas mani kago. No ken larim wok mani i pasim yu long mekim wok bilong Jehova. Hau bai yu save sapos dispela samting i kamap long yu? Yu ken askim yu yet: ‘Mi save tingting oltaim long wok mani taim mi stap long miting o mekim wok autim tok? Mi save wari na tingting planti olsem nogut mi no gat planti mani bilong lukautim mi long bihain? Mani kago i putim hevi long mi na poroman marit? Mi redi long mekim wok em planti man i les long en bambai mi inap lusim bikpela haptaim moa long mekim wok bilong Jehova?’ (1 Tim. 6:9-12) Taim yumi givim ol dispela askim long yumi yet, tingim olsem Jehova i laikim yumi na em i mekim dispela tok promis long ol lain i lotuim em wanpela tasol: “Mi no inap tru long lusim yu, na mi no inap givim baksait long yu.” Olsem na aposel Pol i tok: “Long sindaun bilong yupela, yupela i no ken bihainim pasin bilong laikim tumas mani.”—Hib. 13:5, 6.

11. Ol amamas inap mekim wanem long man?

¹¹ Jehova i laik bai yumi enjoim laip bilong yumi, na ol amamas inap helpim yumi long mekim olsem. Baibel i tok: “I no gat wanpela gutpela samting em man  inap mekim, mobeta em i kaikai na dring na kisim amamas long hatwok bilong em.” (Ekl. 2:24) Tasol planti amamas bilong dispela graun inap bagarapim pasin bilong yumi long pas gut wantaim God. Ol dispela amamas i daunim stretpela pasin na kirapim ol manmeri long wanbel o laikim ol pasin em Baibel i tambuim.

12. Olsem 1 Korin 10:21, 22 i kamapim, wai na yumi mas skelim gut ol amamas?

¹² Yumi laik lotuim Jehova wanpela tasol, olsem na yumi no ken kaikai long “tebol bilong Jehova” na long “tebol bilong ol spirit nogut.” (Ritim 1 Korin 10:21, 22.) Sapos man i sindaun wantaim narapela na kaikai, dispela i soim olsem ol i stap pren. Sapos yumi makim ol amamas i gat pasin bilong pait, wok bilong ol spirit nogut, pasin pamuk, o ol narapela laik nogut, i olsem yumi kisim kaikai em ol birua bilong God i redim. Long dispela rot, yumi bagarapim yumi yet na pasin pren bilong yumi wantaim Jehova.

13-14. Olsem Jems 1:14, 15 i kamapim, wai na yumi mas sakim ol amamas nogut? Stori long tok piksa.

¹³ Olsem wanem ol amamas i wankain olsem kaikai? Taim yumi kaikai, yumi inap skelim wanem kaikai yumi laik kisim. Tasol taim yumi daunim pinis kaikai, bodi yet bai mekim wok long en na ol gutpela marasin long en bai strongim bodi. Gutpela kaikai bai lukautim helt bilong yumi; na kaikai nogut bai bagarapim helt. Yumi no inap luksave kwik long wok kaikai i mekim long bodi, nogat. Sampela haptaim bai lus na bihain yumi bai luksave.

¹⁴ Olsem tasol, taim yumi skelim amamas yumi kisim, yumi yet bai makim wanem samting yumi laik putim long tingting. Dispela bai stiaim bel na tingting bilong yumi. Gutpela amamas bai helpim yumi; amamas nogut bai bagarapim yumi. (Ritim Jems 1:14, 15.) Yumi no inap luksave kwik long hevi em ol amamas nogut i mekim long yumi. Olsem na Baibel i tok lukaut olsem: “No ken giamanim yu yet: Man i no inap trikim God. Samting man i planim, dispela samting tasol em bai kamautim; long wanem, man i larim ol laik nogut bilong bel i stiaim em, i olsem em i planim samting nogut. Na em bai kamautim kaikai nogut, em bai kisim bagarap long bodi bilong em i gat sin.” (Gal. 6:7, 8) Em i bikpela samting tru long yumi mas sakim olgeta amamas we i sapotim ol pasin em Jehova i heitim!—Sng. 97:10.

15. Jehova i givim wanem presen yumi inap kisim amamas long en?

¹⁵ Planti manmeri bilong Jehova i save amamas tru long watsim JW Brodkasting^®, em naispela Intenet televisen stesin bilong yumi. Marilyn em wanpela sista, na em i tok: “JW Brodkasting i helpim mi long holim stretpela tingting, na mi ken watsim olgeta program bilong en bikos olgeta i gutpela. Taim mi pilim wanpis o bel hevi, mi save painim tok bilong strongim mi o watsim Moning Wosip program. Dispela i helpim mi long pilim olsem mi stap klostu moa long Jehova na oganaisesen bilong em. JW Brodkasting i senisim tru laip bilong mi.” Olsem wanem? Yu kisim helpim long dispela presen i kam long Jehova? JW Brodkasting i gat program bilong olgeta wan wan mun, na tu, em i gat planti odio na vidio program na ol singsing bilong strongim yumi.

16-17. (a) Wai na yumi mas skelim gut haptaim yumi tromoim long kisim amamas? (b) Yumi ken mekim wanem ol samting bilong helpim yumi yet?

¹⁶ Yumi mas skelim gut wanem kain amamas yumi kisim, na hamas taim yumi tromoi long kisim amamas. Sapos yumi no was gut, yumi inap tromoi bikpela haptaim moa long kisim amamas na yumi lusim  liklik haptaim tasol long mekim wok bilong Jehova. Planti manmeri i pilim hatwok long kontrolim haptaim ol i tromoim long kisim amamas. Abigail em sista i gat 18 krismas, na em i tok: “Long pinis bilong de, mi save watsim TV na dispela i helpim mi long rileks. Tasol sapos mi no was gut, mi inap lusim planti aua long watsim TV.” Samuel em yangpela brata, na em i tok: “Mi save watsim planti sotpela vidio long Intenet. Pastaim mi save watsim wanpela vidio, na bihain mi kirap nogut olsem mi lusim 3-pela o 4-pela aua.”

¹⁷ Hau bai yu inap kontrolim hamas aua yu lusim long kisim amamas? Fes samting em yu mas painimaut hamas aua yu save lusim long kisim amamas. Traim long rekodim hamas aua yu lusim long kisim amamas insait long wanpela wik. Long kalenda bilong yu, raitim hamas aua yu lusim long watsim televisen, yusim Intenet, na pilaim gem long mobail fon. Sapos yu pilim olsem yu lusim bikpela haptaim tumas long kisim amamas, traim long mekim wanpela sediul. Yu mas tingim ol bikpela samting pastaim, na makim liklik haptaim bilong kisim amamas. Askim Jehova long helpim yu long bihainim sediul bilong yu. Long dispela rot, yu bai gat strong na bikpela haptaim long mekim pesenel Baibel stadi, famili lotu, go long ol miting bilong kongrigesen, na mekim wok bilong autim tok na skulim ol man. Na tu, bel i no inap kotim yu long hamas taim yu lusim long kisim amamas.

18-19. Olsem wanem yumi inap soim klia olsem yumi lotuim Jehova wanpela tasol?

¹⁸ Aposel Pita i stori long pinis bilong graun bilong Satan, na nupela taim bai kamap na em i tok: “Ol pren tru, yupela i wetim ol dispela samting, olsem na long ai bilong God yupela i mas wok strong tru long stap klin olgeta, na i stap olsem man i no gat rong, na stap bel isi.” (2 Pita 3:14) Taim yumi bihainim dispela skultok na wok strong long bihainim stretpela pasin na stap klin long sait bilong bilip, yumi soim klia olsem yumi lotuim Jehova wanpela tasol.

¹⁹ Satan na lain bilong em bai mekim yet ol samting bilong kirapim yumi long putim ol narapela samting i stap namba 1 long laip bilong yumi. (Luk 4:13) Maski wanem wanem samting i laik pulim yumi, yumi no ken larim wanpela samting o wanpela man i pasim yumi long laikim Jehova. Yumi tingting strong long lotuim Jehova wanpela tasol—i stret tru long em tasol i kisim biknem!