Jehova i givim strong long ol dispela manmeri bilong autim tok. Namba bilong ol kolpota o painia i bin 225, tasol long dispela yia namba i go antap long 350. Na em fes taim we winim 8,000 pablisa i bin salim ripot bilong wok autim tok bilong ol i go long hetkota. Jehova i blesim tru wok bilong ol na planti man moa i harim tok.

Long Mas 21, 1920, Joseph F. Rutherford em man i stap gopas bilong ol Sumatin Bilong Baibel long dispela taim, em i mekim dispela tok “Planti Milion Man i Stap Nau Ol i No Ken i Dai.” Ol Sumatin Bilong Baibel i mekim olgeta samting ol inap mekim bilong singautim ol manmeri long i kam long dispela bung. Ol i rentim wanpela traipela tieta long New York City na ol i tilim 320,000 invatesen.

Planti manmeri tru i kam long bung. Winim 5,000 manmeri i pulapim dispela tieta olgeta na ol i mas salim 7,000 manmeri i go bek long haus bilong ol. Nius The Watch Tower i kolim dispela bung olsem “wanpela bilong ol bikpela bung tru em ol International Bible Students i bin mekim.”

Ol Sumatin Bilong Baibel i bin mekim dispela tokaut olsem “planti milion man i stap nau ol i no ken i dai,” dispela i mekim na planti man i save long ol. Long dispela taim, ol i no bin kliagut olsem wok bilong autim gutnius bilong Kingdom i mas i go long olgeta hap bilong graun. Tasol ol i givim bel tru long mekim dispela wok. Ida Olmstead husat i bin kirap long go long ol miting long 1902, i tok: “Mipela i save olsem ol manmeri bai kisim planti gutpela blesing long bihain, na mipela i autim dispela tok long ol manmeri mipela i bungim long wok autim tok.”

Ol brata long Betel i prinim sampela buk na nius bambai mipela i no ken sot long ol samting bilong strongim bilip. Ol i baim ol masin samting na putim long wanpela haus ol i rentim long 35 Myrtle Avenue, Brooklyn, New York, dispela haus i stap long wankain strit bilong haus Betel.

Leo Pelle na Walter Kessler i kam wok long Betel long Janueri 1920. Walter i tok: “Taim mipela i kamap, ovasia bilong printing dipatmen i lukluk long mipela na tok, ‘Yupela i gat 1 na hap aua long mekim wok paslain long belo taim.’ Em i givim wok long mipela long pusim ol katen bilong ol buk i stap long beismen bilong haus i kam antap.”

Leo i stori long wok mipela i mekim long neks de, na em i tok: “Mipela i gat wok long wasim ol  wol long fes plua bilong dispela haus. Em wanpela wok i doti tru na mi no save mekim kain wok bipo. Tasol em wok bilong Bikpela, olsem na mipela i amamas long mekim.”

Insait long sampela wik tasol, sampela volantia i givim bel tru long prinim nius The Watch Tower. Ol i prinim inap 60,000 kopi bilong nius The Watch Tower bilong Februeri 1, 1920 long printa i stap long namba 2 plua bilong haus. Long wankain taim, ol brata i putim wanpela printa long beismen bilong haus na ol i kolim dispela printa Battleship. Ol i stat long yusim dispela printa na prinim nius The Watch Tower bilong Epril 14, 1920, na ol i prinim tu nius The Golden Age. I klia tru olsem Jehova i blesim hatwok bilong ol dispela wokman.

Lain bilong Jehova husat i stap gut long em ol i amamas long mekim gen ol wok na lotuim Em. Tasol sampela Sumatin Bilong Baibel i lusim oganaisesen long taim bilong hevi kirap long 1917 i go long 1919. Ol brata inap mekim wanem bilong helpim ol?

Nius The Watch Tower bilong Epril 1, 1920, i gat dispela atikol “Yumi Ken Stap Bel Isi.” Em i mekim dispela naispela tok: “Mipela i pilim olsem . . . olgeta manmeri em spirit bilong Bikpela i stap long ol . . . ol i redi long lusim tingting long ol samting i bin kamap, . . . na stap wanbel wantaim na mekim yet ol wok olsem wanpela bodi.”

Planti i bihainim dispela naispela tok. Tupela marit i tok: “Mipela i luksave olsem long ol yia i go pinis mipela i bin mekim popaia long sanap na lukluk tasol taim ol narapela i autim tok. . . . Mipela i tingting strong olsem mipela bai givim bel tru long autim tok na mipela i no inap lusim.” Ol dispela wokman i kisim nupela strong, ol i gat planti wok moa long mekim.

Long Jun 21, 1920, ol Sumatin Bilong Baibel i kirapim wanpela bikpela wok bilong tilim buk “ZG,” em hap bilong dispela buk The Finished Mystery. *  Ol i bin haitim planti bilong ol dispela buk i stap taim gavman i tambuim dispela buk long 1918.

Ol i singautim olgeta pablisa na ol painia long insait long wok bilong tilim dispela buk. “Olgeta pablisa i baptais pinis long olgeta kongrigesen na ol i laik mekim dispela wok, ol i ken amamas long mekim olsem. Larim olgeta wan wan i putim dispela mak olsem: ‘Dispela wanpela samting mi mas mekim’—tilim ZG.” Edmund Hooper i tok dispela wok em fes wok bilong autim tok long ol haus em planti i bin mekim. Em i tok moa olsem: “Mipela i wok long kliagut long dispela wok, tasol mipela i no bin save liklik olsem em bai go bikpela tru long olgeta hap bilong graun.”

Long taim bilong Wol Woa 1, i hatwok long toktok wantaim ol Sumatin Bilong Baibel long ol narapela kantri, olsem na Brata Rutherford i laik strongim ol dispela bratasista na stretim gen wok bilong autim tok. So long Ogas 12, 1920, em wantaim 4-pela narapela brata i kirap raun i go olsem long Briten, Yurop, na Midel Is.

Taim Brata Rutherford i visitim Briten, ol Sumatin Bilong Baibel i mekim 3-pela kibung na 12-pela miting we em i givim tok. Namba bilong ol manmeri i kam bung long ol dispela kibung na ol miting em inap olsem 50,000. Nius The Watch Tower i tok long dispela visit olsem: “Ol pren i kisim nupela strong na ol i amamas. Ol i pas gut wantaim long pasin laikim na long wok autim tok, na planti em pastaim ol i bel hevi, nau ol i amamas.” Long Paris, Brata Rutherford i mekim gen dispela tok “Planti Milion Man i Stap Nau Ol i No Ken i Dai.” Taim tok i kirap, ol manmeri i pulapim tru haus em tok i kamap long en. Inap 300 manmeri i askim long kisim sampela save moa.

Long ol wik bihain, sampela brata i go raun long Atens, Cairo, na Jerusalem. Bilong helpim ol manmeri long ol dispela hap em ol i gat laik long kisim sampela save moa, Brata Rutherford i sanapim wanpela haus bilong saplaim ol buk na nius long taun Ramallah, klostu long Jerusalem. Bihain em i kam bek long Yurop na kamapim Central European Office na stretim rot long ol inap prinim ol buk na nius long hap.

Long Septemba 1920, ol Sumatin Bilong Baibel i rilisim namba 27 bilong nius The Golden Age, em wanpela spesel nius i tokaut long pasin i no stret gavman i mekim bilong kalabusim ol Sumatin Bilong Baibel long yia 1918. Dispela printa Battleship em yumi stori pinis long en, i wok long san na nait long prinim winim 4 milion kopi bilong dispela nius.

 Ol man i ritim dispela nius ol i ritim narakain stori bilong samting i painim Emma Martin. Sista Martin em i wanpela kolpota long San Bernardino, California. Long Mas 17, 1918, Emma wantaim 3-pela brata em E. Hamm, E. J. Sonnenburg, na E. A. Stevens, i go long wanpela liklik bung bilong ol Sumatin Bilong Baibel.

Wanpela man i kam long dispela bung em i no kam bilong kisim save long ol tok bilong Baibel. Bihain em i tok: “Mi bin go long dispela miting . . . bikos ofis bilong Prosekiuta i salim mi go. Mi go long hap bilong kisim evidens.” Em i kisim dispela evidens em i wok long painim—em kopi bilong buk The Finished Mystery. Sampela de bihain, ol i arestim Sista Martin na 3-pela brata. Kot i tok ol i kalapim lo bilong Espionage Act taim ol i tilim dispela buk em gavman i putim tambu long en.

Kot i tok Emma na 3-pela brata i gat asua na ol i makim ol long kalabus inap 3-pela yia. Ol i wok long apil i go inap long i no gat narapela rot moa bilong apil, so long Me 17, 1920, ol i kalabus. Tasol i no longtaim, ol samting i senis na gutpela samting i kamap.

Long Jun 20, 1920, Brata Rutherford i kamapim stori bilong ol long wanpela kibung long San Francisco. Odiens i kirap nogut tru long samting i painim dispela 3-pela Kristen na ol i salim wanpela telegram i go long presiden bilong Amerika. Ol i raitim tok olsem: “Mipela i tingim kot . . . bilong Mrs. Martin . . . aninit long lo bilong Espionage olsem wanpela pasin i no stret . . . Pasin em ol Federal ofisa i mekim long yusim namba bilong ol long . . . trapim . . . Mrs. Martin . . . na bihain sutim tok giaman long em bilong mekim em i luk olsem em i gat asua na bai em i ken go long kalabus, mipela i tokaut olsem . . . dispela pasin i no stret liklik.”

Long de bihain, wantu tasol Presiden Woodrow Wilson i tokaut olsem Sista Martin na Brata Hamm, Sonnenburg, na Stevens i ken lusim kalabus. Pasin i no stret gavman i mekim bilong kalabusim ol i pinis.

Long pinis bilong yia 1920, ol Sumatin Bilong Baibel i luksave olsem i gat planti gutpela samting i bin kamap em ol i ken amamas long en. Wok long hetkota i wok long i go bikpela, na winim olgeta narapela taim bipo, ol Kristen tru i givim bel olgeta long autim tok olsem Kingdom Bilong God tasol em i rot bilong stretim olgeta hevi bilong ol manmeri. (Mat. 24:14) Long yia bihain, 1921, ol bai mekim bikpela wok moa long tokaut long tok i tru bilong Kingdom.