1. Olsem wanem tok bilong 2 Korin 3:1-3 i helpim yumi long tingim wok bilong helpim ol Baibel sumatin long kisim baptais? (Lukim fran pes piksa.)

YU SAVE pilim olsem wanem taim yu lukim wanpela Baibel sumatin long kongrigesen bilong yu i kisim baptais? Yu save amamas tru, a? (Mat. 28:19) Na sapos yu bin stadi wantaim dispela nupela disaipel, ating yu bin pilim amamas tru taim yu lukim em i kisim baptais! (1 Tes. 2:19, 20) Ol disaipel i baptais nupela, ol i stap olsem pas i tokaut long gutpela wok ol Baibel tisa bilong ol i mekim, na tu, long wok em kongrigesen i mekim bilong helpim ol.—Ritim 2 Korin 3:1-3.

2. (a) Yumi laik tingim wanem bikpela askim, na bilong wanem? (b) Baibel stadi em wanem samting? (Lukim futnot.)

² Em i gutpela samting tru long lukim olsem insait long 4-pela yia i go pinis, long graun olgeta yumi bin mekim 10,000,000 Baibel stadi * insait long olgeta wan wan mun. Na long dispela haptaim, long olgeta wanpela wanpela yia winim 280,000 manmeri i kisim baptais olsem wanpela Witnes Bilong Jehova na kamap nupela disaipel bilong Jisas Krais. Olsem wanem yumi ken helpim sampela moa long ol dispela planti milion Baibel stadi long kisim baptais? Jehova i no les kwik long ol manmeri na em i larim liklik haptaim i stap yet bilong givim rot long ol long kamap disaipel bilong Krais, olsem na yumi laik mekim olgeta  samting yumi inap mekim bilong helpim ol long winim mak na kisim baptais hariap. Taim i sot pinis!—1 Kor. 7:29a; 1 Pita 4:7.

3. Bai yumi skelim wanem samting long dispela atikol long sait bilong mekim Baibel stadi?

³ Long nau em i bikpela samting tru long yumi mas kamapim ol disaipel, olsem na Gavening Bodi i askim ol brens ofis long mekim wok painimaut long wanem ol samting yumi ken mekim bilong helpim ol Baibel sumatin long winim mak bilong kisim baptais. Long dispela atikol na long atikol i kamap bihain, yumi bai lukim skul yumi ken kisim long ol longtaim painia, ol misineri, na ol wasman sekit. * (Prov. 11:14; 15:22) Dispela tupela atikol i stori long samting ol Baibel tisa na sumatin bilong ol i ken mekim na bai stadi i helpim gut sumatin. Long dispela atikol, bai yumi stori long 5-pela samting ol sumatin i mas mekim bilong winim ol mak na kisim baptais.

4. Sumatin i mas mekim wanem bilong dediket na baptais?

⁴ Planti bratasista bilong yumi i mekim ol Baibel stadi long dua bilong haus bilong man. Maski em gutpela rot bilong kirapim laik bilong man long kisim save long tok bilong Baibel, dispela wei bilong stadi i save kisim sotpela taim tasol na ating yumi no inap mekim olsem long olgeta wik. Bilong helpim man long kisim sampela save moa, sampela bratasista i save askim man long givim fon namba samting na sampela taim ol i ring o salim teks mesis bilong serim sampela tok bilong Baibel wantaim em. Sampela taim kain pasin olsem i save stap inap sampela mun, tasol tru tru man bilong haus i no kamap wanpela Baibel stadi yet. Tingim, sumatin i mas lusim bikpela haptaim na strong long stadi gut long Baibel bambai em inap winim mak bilong dediket na baptais.

5. Olsem Luk 14:27-33 i kamapim, Jisas i tok yumi inap mekim wanem bilong helpim ol Baibel sumatin?

⁵ Wanpela taim Jisas i stori long samting man i mas mekim bilong kamap disaipel bilong em. Em i stori long man i laik wokim taua na long king i laik i go pait. Jisas i tok man bilong wokim taua i mas “sindaun pastaim na skelim gut pe bilong dispela samting” na em i tok long king olsem “pastaim em bai sindaun na kisim tingting bilong ol arapela” bilong save ol soldia bilong em bai winim pait o nogat. (Ritim Luk 14:27-33.) Olsem tasol, Jisas i save olsem man i laik kamap disaipel bilong em, pastaim em i mas skelim gut ol samting em i mas mekim bilong kamap wanpela disaipel.  Em risen na yumi mas tokim sumatin olsem yumi bai stadi wantaim em long olgeta wik. Hau yumi ken mekim olsem?

6. Yumi ken mekim wanem bilong helpim sumatin long kamap strong long bilip?

⁶ Yu inap stat long mekim olsem long rot bilong surikim taim bilong stadi i go longpela liklik. Ating yu ken mekim olsem long rot bilong ritim wanpela o 2-pela moa ves bilong Baibel. Taim man bilong haus i lain pinis olsem yutupela bai stori longpela taim liklik, orait askim em long wanem hap yutupela i ken sindaun bilong mekim olsem. Bekim bilong em bai soim olsem em i siries long stadi long Baibel o nogat. Bihain, bilong helpim em long lain hariap, ating em gutpela yu askim em sapos em orait long yutupela i ken stadi 2-pela taim long wik. Tasol pasin bilong stadi wanpela o 2-pela taim long wik i no inap, i gat sampela samting moa yupela i mas mekim.

7. Olsem wanem tisa i ken redim gut wan wan stadi?

⁷ Yu wanpela tisa, olsem na yu gat wok long redim gut olgeta wan wan stadi. Yu ken stat long ritim ol tok bilong paragraf na skelim ol tok bilong skripsa. Na tingim gut ol bikpela poin bilong stadi. Tingim het tok bilong dispela stadi, ol liklik het tok, ol askim bilong stadi, ol skripsa bilong ritim, ol piksa, na ol vidio we inap eksplenim gut dispela het tok. Orait nau, tingim sumatin bilong yu na tingim tingim long bel hau yu inap eksplenim gut ol dispela tok na bai em i isi na i klia long sumatin i ken kisim gut na bihainim.—Neh. 8:8; Prov. 15:28a.

8. Yumi kisim wanem skul long Kolosi 1:9, 10 long pasin bilong beten long sumatin?

⁸ Taim yu redim stadi, beten na toktok wantaim Jehova long sumatin na ol samting em i mas wok long en. Askim Jehova long helpim yu long skulim sumatin long ol tok bilong Baibel long pasin we sumatin i ken pilim tru long bel. (Ritim Kolosi 1:9, 10.) Traim tingim sampela samting em sumatin inap hatwok long kliagut long en o em i no wanbel long en. Oltaim tingim olsem yu laik helpim sumatin long winim mak bilong kisim baptais.

9. Olsem wanem tisa i ken helpim sumatin long redim stadi? Stori long dispela.

⁹ Yumi bilip olsem taim yumi stadi wantaim sumatin long olgeta wik, dispela bai kirapim em long tingim tru samting Jehova na Jisas i bin mekim na em bai i gat laik long lainim sampela samting moa. (Mat. 5:3, 6) Bilong stadi i ken helpim em, sumatin i mas putim  tingting olgeta long samting em i lainim. Bilong helpim sumatin, eksplenim gut long em olsem em i bikpela samting long em i mas redim gut stadi na tingim hau em yet i ken bihainim ol tok em i lainim. Olsem wanem tisa i ken helpim em? Redim wanpela hap bilong stadi wantaim sumatin bilong soim em hau long redim stadi. * Eksplenim hau em i ken painim stret bekim bilong askim bilong paragraf, na soim em olsem pasin bilong makim tasol ol bikpela tok bai helpim em long holim bekim long tingting. Na askim em long bekim tok long toktok bilong em yet. Taim em i mekim olsem, yu bai luksave olsem sumatin i kliagut long tok bilong dispela stadi o nogat. Tasol i gat narapela samting tu yu ken kirapim sumatin long mekim.

10. (a) Bilong wanem em i bikpela samting long sumatin i mas ritim Baibel long olgeta de? (b) Bilong Baibel ritim i ken helpim sumatin, em i mas mekim wanem?

¹⁰ Tisa i save stadi wantaim sumatin long olgeta wik, tasol i gat sampela samting moa sumatin yet i mas mekim long olgeta de. Em i mas toktok wantaim Jehova. Hau? Em i mas putim yau long Jehova na toktok wantaim em. Em i ken putim yau long Jehova long rot bilong ritim Baibel long olgeta de. (Jos. 1:8; Sng. 1:1-3) Soim em hau long yusim dispela “Baibel Ritim Sediul” i stap long jw.org. * Tru tumas, bilong Baibel ritim i ken helpim em, tokim em long tingim tingim long bel ol tok Baibel i mekim long Jehova na hau em i ken bihainim ol dispela tok long i stap bilong em.—Apo. 17:11; Jems 1:25.

11. (a) Olsem wanem sumatin i ken lain long mekim beten? (b) Bilong wanem em i bikpela samting long em i mas beten long Jehova long olgeta de?

¹¹ Kirapim sumatin long toktok wantaim Jehova long rot bilong beten long olgeta de. Long kirap na pinis bilong stadi, mekim beten em yu pilim tru long bel na tingim sumatin bilong yu long ol dispela beten. Taim sumatin i harim ol beten bilong yu, em bai lain long kolim ol beten we em i pilim tru long bel, na em bai salim beten bilong em i go long Jehova God long rot bilong Jisas Krais. (Mat. 6:9; Jon 15:16) Tingim, pasin bilong ritim Baibel long olgeta de (putim yau long Jehova) na beten (toktok wantaim Jehova) bai helpim sumatin bilong yu long i go klostu moa long God! (Jems 4:8) Taim sumatin i wok long kisim dispela tupela pasin, dispela bai helpim em long kisim narapela pasin we inap helpim em long dediket na baptais.

12. Olsem wanem tisa i ken helpim sumatin long pas gut wantaim Jehova?

¹² Sumatin i mas laikim ol tok em i lainim long stadi bilong em na bikpela samting moa em i mas pilim tru long bel ol dispela tok. Wai? Bikos bel bilong yumi—em ol laik, ol tingting, na ol filings—i save kirapim yumi long mekim samting. Jisas i skulim ol man long ol tok we i kirapim ol long wokim tingting na ol i amamas long kisim skul long em. Tasol ol manmeri i save bihainim em bikos ol i pilim tru long bel ol tok em i skulim ol long en. (Luk 24:15, 27, 32) Sumatin i mas tingim Jehova olsem wanpela Man i stap tru, na em i ken kamap pren bilong Em, na tingim em olsem Papa, God, na Pren bilong em. (Sng. 25:4, 5) Long taim bilong stadi, helpim sumatin long tingim ol gutpela pasin bilong God. (Kis. 34:5, 6; 1 Pita 5:6, 7) Long wanem wanem sapta yutupela i stadi long en, kamapim klia olsem em i bikpela samting long yumi mas save gut long ol tingting na pasin bilong Jehova. Helpim sumatin long tingim tru ol gutpela pasin bilong Jehova em pasin laikim, gutpela pasin, na pasin marimari. Jisas i tok olsem “namba 1 lo . . . i winim ol arapela lo” em “yu mas laikim Jehova, God bilong yu.” (Mat. 22:37, 38) Traim bes long helpim sumatin long laikim tru God long bel olgeta.

13. Stori long olsem wanem yumi ken helpim sumatin long lain long ol pasin bilong Jehova?

¹³ Taim yu stori wantaim sumatin, tokim em long as na yu laikim tru Jehova. Dispela bai helpim em long luksave olsem em yet i mas kamap pren bilong God na laikim em tru. (Sng. 73:28) Olsem wanem? I gat sampela tok long paragraf o long skripsa i stori long pasin laikim, savetingting, stretpela pasin, na strong bilong Jehova we yu pilim tru long bel? Sapos olsem, tokim sumatin bilong yu long dispela samting na helpim em long save olsem dispela em wanpela bilong ol risen i mekim na yu laikim tru Papa bilong yumi long heven. Na i gat sampela samting moa sumatin i mas mekim paslain long em i baptais.

14. Olsem Hibru 10:24, 25 i kamapim, olsem wanem ol miting inap helpim sumatin long winim ol mak?

¹⁴ Yumi olgeta i laik bai ol Baibel sumatin bilong yumi i winim mak na kisim baptais. Em i bikpela samting long kirapim ol long kam long ol miting. Ol tisa i save gut long mekim ol Baibel stadi i tok, taim sumatin i kirap hariap long kam long ol miting, em i save kamap strong hariap  long bilip. (Sng. 111:1) Sampela tisa i tokim ol sumatin olsem ol inap lainim planti samting long ol miting winim ol samting ol i lainim long stadi, olsem na ol i mas kam long ol miting. Ritim Hibru 10:24, 25 wantaim sumatin na tokim em long ol gutpela helpim em inap kisim taim em i kam long ol miting. Soim em vidio Wanem Samting i Save Kamap Long Haus Kingdom? * Helpim sumatin long luksave olsem em i mas kam oltaim long olgeta miting bilong wik.

15. Yumi ken mekim wanem bilong kirapim sumatin long kam oltaim long ol miting?

¹⁵ Yu ken mekim wanem sapos Baibel sumatin bilong yu i no bin kam long wanpela miting o em i no save kam oltaim long ol miting? Stori wantaim em long sampela gutpela samting yu lainim long miting na mekim wantaim amamas. Taim em i lukim amamas bilong yu, ating em bai i gat laik long kam. Givim em Wastaua na Kristen Laip na Wok Autim Tok Miting Wok Buk bilong dispela wik. Soim em long ol samting bai kamap long neks miting na askim em long wanem hap bilong miting em i laikim. Sapos sumatin i kam, orait em bai pilim olsem dispela fes miting em i kam long en i winim tru ol narapela bung bilong lotu em i save go long en. (1 Kor. 14:24, 25) Em inap bungim ol narapela we em i ken bihainim gutpela pasin bilong ol na ol inap helpim em long winim mak bilong kisim baptais.

16. (a) Yumi mas mekim wanem bilong helpim ol Baibel sumatin long winim mak na kisim baptais? (b) Neks atikol bai stori long wanem samting?

¹⁶ Olsem wanem yumi ken helpim ol Baibel sumatin long winim mak na kisim baptais? Yumi ken helpim gut olgeta wan wan sumatin long luksave olsem em i bikpela samting long ol i mas stadi long olgeta wik na redim gut stadi bilong ol. Yumi laik kirapim sumatin long toktok wantaim Jehova long olgeta de na mekim ol samting bilong kamap pren bilong Em. Yumi laik kirapim em tu long kam long ol miting bilong kongrigesen. (Lukim blok “ Samting Sumatin i Mas Mekim Bilong Winim Mak Long Kisim Baptais.”) Neks atikol bai stori long 5-pela samting moa Baibel tisa i mas mekim bilong helpim sumatin long winim mak na kisim baptais.