1. Olsem wanem yumi save olsem wok bilong kamapim disaipel em wok bilong seivim laip bilong ol man?

WOK bilong kamapim disaipel em wok bilong seivim laip bilong ol man! Hau yumi save long dispela? Taim Jisas i mekim tok i stap long Matyu 28:19, 20, em i tok: “Yupela i mas i go na kamapim ol disaipel . . . , na baptaisim ol.” Bilong wanem baptais em i bikpela samting? Baptais i opim rot long God i ken kisim bek yu. Man i laik kisim baptais, em i mas bilip olsem God bai kisim bek em long rot bilong ofa bilong Jisas na kirap bek bilong em. Em as na aposel Pita i tokim ol wanbilip Kristen olsem: “Samting i kisim bek yupela long nau, em baptais yupela i kisim, long wanem, yupela i bilip long Jisas Krais husat i bin kirap bek.” (1 Pita 3:21) So taim wanpela nupela disaipel i kisim baptais, em i stap long rot bilong kisim laip oltaim.

2. Tok bilong 2 Timoti 4:1, 2 i kirapim yumi long mekim wanem kain wok tisa?

² Sapos yumi laik kamapim ol disaipel, yumi mas “mekim gutpela wok tisa.” (Ritim 2 Timoti 4:1, 2.) Wai? Bikos Jisas i tokim yumi olsem, ‘Yupela i mas i go na kamapim ol disaipel na skulim ol.’ Aposel Pol i tok yu mas “wok strong yet” long mekim dispela wok, “na long dispela rot yu bai kisim laip na ol man i harim tok bilong yu, ol tu bai kisim laip.” Olsem na i gat gutpela risen na Pol i tok: “Oltaim yu mas tingim . . . wok tisa bilong yu.” (1 Tim. 4:16) Yumi mas skulim ol man na bai ol i ken kamap disaipel, em as na yumi laik mekim wok tisa bilong yumi i kamap gutpela moa.

3. Long dispela atikol, yumi bai skelim wanem samting?

³ Yumi wok long skulim planti milion manmeri long tok i tru bilong Baibel. Tasol olsem atikol i kamap paslain i stori long en, yumi laik save long hau yumi ken helpim planti manmeri moa  long kisim baptais na kamap disaipel bilong Jisas Krais. Long dispela atikol, yumi bai skelim 5-pela samting moa em olgeta tisa i mas mekim bilong helpim sumatin long winim mak na kisim baptais.

4. Wai na tisa i mas kisim pasin bilong bosim bel taim em i mekim Baibel stadi? (Lukim tu futnot.)

⁴ Yumi laikim ol tok bilong Baibel em yumi skulim ol man long en. So yumi inap mekim planti toktok taim yumi skulim ol narapela. Tasol long taim bilong Wastaua Stadi, Kongrigesen Baibel Stadi, o taim wanpela i mekim Baibel stadi wantaim narapela, stadi kondakta i no ken mekim planti toktok tumas. Bilong larim Baibel i skulim man, tisa i mas lain long bosim bel na no ken traim long stori planti long wanpela ves bilong Baibel o wanpela topik em i save gut long en. * (Jon 16:12) Skelim save bilong Baibel yu gat long taim yu kisim baptais wantaim save yu gat long nau. Ating long pastaim, yu kliagut tasol long ol bikpela tok i tru. (Hib. 6:1) Planti yia i lus na yu kisim save long ol samting em yu save long en long nau, so no ken traim long skulim wanpela nupela sumatin long olgeta samting long wankain taim.

5. (a) Olsem 1 Tesalonaika 2:13 i kamapim, yumi laik bai sumatin i kliagut long wanem samting? (b) Olsem wanem yumi ken kirapim sumatin long stori long ol samting em i lainim?

⁵ Yumi laik bai sumatin i kliagut olsem ol samting em i lainim i kam long Tok Bilong God. (Ritim 1 Tesalonaika 2:13.) Hau yumi ken mekim olsem? Kirapim sumatin long stori long ol samting em i lainim. Abrusim pasin bilong eksplenim ol skripsa long em long olgeta taim; sampela taim yu ken askim em long eksplenim long yu. Helpim sumatin long luksave long hau tok bilong Baibel i stret long em. Kamapim ol askim bilong helpim em long wokim tingting na bekim tok—em i pilim olsem wanem long ol skripsa em i ritim. (Luk 10:25-28) Olsem, yu ken askim em: “Dispela skripsa i helpim yu long tingim wanem pasin bilong Jehova?” “Dispela tok i tru bilong Baibel inap helpim yu olsem wanem?” “Yu pilim olsem wanem long samting yu lainim?” (Prov. 20:5) Bikpela samting em olsem, sumatin i laikim tru na bihainim ol tok em i kisim save long en, na i no hamas save em i kisim.

6. Wai na i gutpela long kisim pablisa i gat save long mekim wok tisa i go wantaim yu long mekim Baibel stadi?

⁶ Taim yu mekim Baibel stadi, yu save kisim wanpela pablisa i gat save long mekim wok tisa i go wantaim yu? Sapos olsem, orait askim em long em i ting olsem wanem long pasin yu bihainim long mekim stadi, na askim em sapos yu yusim gut Baibel long wok tisa bilong yu o  nogat. Pasin daun bai helpim yu long kamap gutpela tisa. (Skelim Aposel 18:24-26.) Bihain, askim dispela pablisa long tingting bilong em, olsem sumatin bilong yu i klia long tok i tru em i lainim o nogat. Yu ken askim seim pablisa long lukautim stadi sapos yu bai i no stap inap wanpela o tupela wik samting. Long dispela rot, sumatin i ken stadi yet na em bai luksave olsem stadi em i bikpela samting. No ken pilim olsem dispela stadi em bilong yu yet na narapela i no ken lukautim. Bikpela samting em olsem yu laik bai sumatin i kisim helpim, na bai em i ken wok yet long lainim tok i tru.

7. Wanem samting inap helpim sumatin long amamas long ol samting em i lainim

⁷ Sumatin i mas luksave olsem yu laikim tru na bilipim ol tok i stap long Baibel. (1 Tes. 1:5) Long dispela rot, em bai amamas long ol samting em i lainim. Sapos inap, tokim em long hau ol tok bilong Baibel i bin helpim yu taim yu bihainim ol dispela tok long i stap bilong yu. Dispela bai helpim em long luksave olsem Baibel i gat ol gutpela stiatok we inap helpim em tu.

8. (a) Yu ken mekim wanem bilong helpim Baibel sumatin bilong yu? (b) Bilong wanem yu ken mekim olsem?

⁸ Taim yu stadi wantaim sumatin, stori long em long eskpiriens bilong ol man em ol i bungim ol wankain hevi olsem em, na ol i bin winim ol dispela hevi. Yu ken kisim wanpela long kongrigesen i go wantaim yu long taim bilong stadi—ekspiriens bilong em inap helpim sumatin. O yu ken painim ol gutpela ekspiriens long ol atikol “Baibel i Save Senisim i Stap Bilong Man” long ol olpela Wastaua na ol wankain ekspiriens long jw.org. * Kain ol atikol na ol vidio inap helpim sumatin long luksave olsem em i savetingting long bihainim ol stiatok bilong Baibel.

9. Olsem wanem yu ken kirapim sumatin long stori wantaim famili na ol pren bilong em long ol samting em i lainim?

⁹ Sapos sumatin i marit, orait olsem wanem long poroman marit bilong em? Em tu i stadi? Sapos nogat, orait invaitim em long sindaun long stadi. Kirapim sumatin bilong yu long stori wantaim ol famili na ol pren bilong em long ol samting em i lainim. (Jon 1:40-45) Hau? Yu ken askim em: “Hau bai yu stori gut long dispela tok i tru long famili bilong yu?” o “Yu bai yusim wanem skripsa long strongim dispela poin taim yu stori wantaim wanpela pren?” Long dispela rot, yu bai trenim sumatin long kamap tisa. Bihain, taim em i winim mak, em i ken insait long wok autim tok olsem wanpela pablisa i no baptais. Yu  ken askim sumatin sapos em i save long wanpela husat i laik stadi long Baibel. Sapos em i save long wanpela, orait yu ken go lukim dispela man o meri kwiktaim na askim long stadi wantaim em. Soim em vidio Mipela i Save Mekim Wanem Long Taim Bilong Baibel Stadi? *

10. Olsem 1 Tesalonaika 2:7, 8 i kamapim, olsem wanem tisa i ken bihainim pasin bilong Pol?

¹⁰ Ol tisa i mas soim olsem ol i tingim tru ol sumatin bilong ol. Tingim olsem ol bai kamap wanbilip brata o sista bilong yu. (Ritim 1 Tesalonaika 2:7, 8.) Em i no isi long ol i lusim ol olpela pren bilong ol na mekim ol senis na bai ol inap lotuim Jehova. Yumi mas helpim ol long kisim ol gutpela pren insait long kongrigesen. Kamap gutpela pren bilong sumatin long rot bilong bung wantaim em long ol narapela taim, na i no long taim bilong stadi tasol. Ringim em, salim teks mesis, o go visitim em long ol narapela de we yupela i no stadi; long dispela rot yu soim olsem yu tingim em tru.

11. Yumi laik bai ol sumatin i pilim olsem wanem insait long kongrigesen, na bilong wanem?

¹¹ I gat wanpela savetok olsem: “Olgeta insait long wanpela viles inap mekim bikpela long wanpela pikinini.” Olsem tasol, yumi ken tok: “Olgeta insait long kongrigesen inap helpim wanpela sumatin long kamap disaipel.” Em risen na ol gutpela tisa i save bringim ol sumatin bilong ol i kam long kongrigesen—ol sumatin inap kisim helpim long ol wanbilip insait long kongrigesen. Ol sumatin i ken amamas long bung wantaim ol manmeri bilong God em ol inap strongim ol long sait bilong bilip, na sambai long ol long taim bilong hevi. Yumi laik bai olgeta wan wan sumatin i pilim olsem em i hap bilong kongrigesen na em i famili bilong yumi long sait bilong bilip. Yumi laik bai em i pilim tru pasin laikim na pasin pren namel long ol bratasista Kristen. Dispela bai mekim na em bai pilim isi moa long lusim pasin bilong bung wantaim ol lain em ol i no laikim Jehova. (Prov. 13:20) Sapos ol olpela pren bilong em i no laik bung moa wantaim em, em bai save olsem em inap kisim ol pren tru insait long oganaisesen bilong Jehova.—Mak 10:29, 30; 1 Pita 4:4.

12. Wai na yumi mas toktok gut wantaim sumatin olsem em i bikpela samting long dediket na baptais?

¹² Toktok gut wantaim sumatin na tokim em olsem em i bikpela samting long dediket na baptais. Nambawan risen na yumi mekim Baibel stadi em long helpim sumatin long kisim baptais na kamap wanpela disaipel. Insait long sampela mun bihain long taim yutupela i kirap stadi long Baibel, na moa yet taim em i stat long kam long ol miting,  helpim sumatin long kliagut olsem as na yu stadi wantaim em long Baibel em bilong helpim em long kamap wanpela Witnes Bilong Jehova.

13. Sumatin i mas mekim wanem ol samting bilong winim mak bilong kisim baptais?

¹³ Baibel sumatin inap mekim sampela samting bilong winim mak bilong kisim baptais! Pastaim, em i mas kisim save long Jehova na laikim em na bilip long em. (Jon 3:16; 17:3) Bihain, em i mas kisim pasin bilong pas gut wantaim Jehova na pas gut wantaim kongrigesen. (Hib. 10:24, 25; Jems 4:8) Na bihain, em i mas lusim ol pasin nogut bilong em na tanim bel long ol rong em i bin mekim bipo. (Apo. 3:19) Na nau, bilip bilong em bai kirapim em long autim tok long ol narapela. (2 Kor. 4:13) Bihain, em bai dediketim em yet long Jehova na kamapim klia dediket bilong em long rot bilong kisim baptais. (1 Pita 3:21; 4:2) Dispela em wanpela de bilong amamas! Taim sumatin i mekim ol dispela samting long winim mak bilong kisim baptais, yu ken tok amamas long em na strongim em long wok yet long bihainim dispela rot.

14. Tisa inap mekim wanem ol askim bilong painimaut sapos sumatin i laik tru long lotuim God Jehova o nogat?

¹⁴ Yumi mas kisim pasin bilong i no les kwik taim yumi laik helpim sumatin long winim mak bilong dediket na baptais. Tasol bihain long sampela haptaim, yumi mas painimaut sapos em i laik tru long lotuim God Jehova o nogat. Olsem wanem? I gat sampela samting sumatin i mekim i soim olsem em i wok long bihainim ol tok bilong Jisas? O em i laik kisim save tasol long ol stori bilong Baibel?

15. Tisa i mas skelim wanem ol askim bilong save sapos sumatin i mekim ol senis o nogat?

¹⁵ Planti taim yu mas skelim sapos sumatin i mekim ol senis o nogat. Olsem, em i kamapim long toktok bilong em olsem em i laikim Jehova? Em i save beten long Jehova? (Sng. 116:1, 2) Em i save amamas long ritim Baibel? (Sng. 119:97) Em i save kam long olgeta miting? (Sng. 22:22) Em i mekim sampela senis long i stap bilong em? (Sng. 119:112) Em i save stori wantaim famili na ol pren bilong em long ol samting em i lainim? (Sng. 9:1) Bikpela samting moa, em i gat laik long kamap wanpela Witnes Bilong Jehova? (Sng. 40:8) Sapos sumatin i no mekim sampela bilong ol dispela samting, orait long pasin isi traim long painimaut wai na em i no mekim olsem, na long gutpela pasin yu ken tok stret long em long dispela samting. *

16. Yu mas skelim wanem ol askim bilong save sapos yu bai stadi yet wantaim sumatin o nogat?

¹⁶  Bihain long sampela haptaim i lus, skelim sapos yu bai stadi yet wantaim sumatin o nogat. Askim yu yet: ‘Sumatin i save redim stadi bilong em? Em i save amamas long kam long ol miting? Em i bihainim yet ol pasin nogut bilong em? Em i stap yet olsem memba bilong olpela lotu bilong em?’ Sapos bekim em yes, na yu wok yet long stadi wantaim em, i olsem yu laik lainim wanpela man long swim, tasol em i no laik bai wara i wetim em! Sapos sumatin i no amamas long ol samting em i lainim na em i no redi long mekim ol senis, orait skelim sapos yu bai stadi yet wantaim em o nogat.

17. Olsem 1 Timoti 4:16 i kamapim, olgeta tisa bilong Baibel i mas mekim wanem?

¹⁷ Wok bilong yumi long kamapim disaipel em i bikpela samting, na yumi laik tru long helpim Baibel sumatin long winim mak bilong dediket na baptais. Em as na yumi mas yusim gut Baibel long skulim sumatin, na yumi mas soim klia long em olsem yumi laikim tru na bilipim ol tok yumi skulim em long en. Na tu, yumi mas kirapim em long kisim ol pren insait long kongrigesen. Na stori gut long em long ol mak em i mas winim bilong dediket na baptais, na bihain long sampela haptaim skelim sapos em i mekim sampela senis o nogat. (Lukim blok “ Samting Ol Tisa i Mas Mekim Bilong Helpim Sumatin Long Kisim Baptais.”) Yumi amamas olsem yumi inap insait long wok bilong seivim laip bilong ol man! Yumi ken tingting strong long givim bel olgeta long helpim ol Baibel sumatin bilong yumi long winim mak na kisim baptais.