1. Wanem nambawan gutpela disisen wanpela inap mekim?

SAMPELA taim, ol disisen papamama i mekim i save mekim bikpela samting long laip bilong ol pikinini bilong ol. Sapos papamama i no mekim ol gutpela disisen, ol inap kamapim hevi long pikinini bilong ol. Tasol sapos ol i mekim ol gutpela disisen, ol i opim rot long ol pikinini bilong ol i ken stap amamas, na i gat gutpela laip. Ol pikinini tu i mas mekim ol gutpela disisen. Nambawan gutpela disisen wanpela inap mekim em long mekim wok bilong Papa bilong yumi long heven, Jehova.—Sng. 73:28.

2. Jisas na papamama bilong em i mekim wanem gutpela disisen?

² Tupela papamama bilong Jisas i tingting strong long helpim ol pikinini bilong ol long lotuim Jehova, na disisen tupela i mekim i soim olsem dispela em nambawan mak ol i putim. (Luk 2:40, 41, 52) Olsem tasol, Jisas i mekim gutpela disisen we i helpim em long inapim asainmen bilong em long mekim laik bilong Jehova. (Mat. 4:1-10) Jisas i gat gutpela pasin, pasin bilong stap gut long narapela, na em i gat strongpela bel. Ol papamama husat i laikim Jehova bai amamas long i gat kain pikinini man olsem.

3. Yumi bai skelim wanem ol askim long dispela atikol?

³ Long dispela atikol, yumi bai skelim ol dispela askim: Jehova i mekim wanem ol gutpela disisen bilong Jisas? Ol papamama inap lainim wanem samting long disisen tupela papamama bilong Jisas i mekim? Ol yangpela Kristen inap kisim wanem skul long ol disisen Jisas i bin mekim?

4. Jehova i mekim wanem bikpela disisen bilong Pikinini bilong em?

⁴ Jehova i makim gutpela man na meri long kamap papamama  bilong Jisas. (Mat. 1:18-23; Luk 1:26-38) Ol gutpela tok em Maria i bin mekim i stap long Baibel na i kamapim klia pasin bilong em long laikim tru Jehova na Tok bilong em. (Luk 1:46-55) Na pasin bilong Josep long redi long bihainim tok bilong Jehova i soim olsem em i laikim God na em i laik amamasim Em.—Mat. 1:24.

5-6. Jehova i larim wanem ol samting i painim Pikinini bilong em?

⁵ Jehova i no makim tupela man na meri i gat planti mani kago long kamap papamama bilong Jisas. Ofa em Josep na Maria i givim bihain long Jisas i bon i soim olsem ol i stap rabis. (Luk 2:24) Ating Josep i gat wanpela liklik woksop klostu long haus bilong em long Nasaret we em i save mekim wok olsem kapenta. I luk olsem ol i no gat planti samting long i stap bilong ol, moa yet taim famili i go bikpela na tupela i gat 7-pela pikinini.—Mat. 13:55, 56.

⁶ Jehova i lukautim Jisas long sampela hevi, tasol Em i no pasim Pikinini bilong Em long bungim olgeta hevi i kamap. (Mat. 2:13-15) Olsem, Jisas i gat ol wanblut em ol i no bilip long em. Ating Jisas i bel hevi tru taim ol wanfamili bilong em i no bilip olsem em i Mesaia. (Mak 3:21; Jon 7:5) Na tu, i luk olsem Jisas i bel hevi tru taim waspapa bilong em Josep i dai. Taim Josep i dai, ating dispela i makim olsem Jisas—fes pikinini man—i mas kisim wok bisnis bilong papa. (Mak 6:3) Taim Jisas i go bikpela, em i gat wok long lukautim famili bilong em. Ating em i mas wok hat bilong sapotim ol. So em i save olsem ol man i save pilim taiet tru taim ol i wok long de olgeta.

7. (a) Wanem ol askim inap helpim ol marit long mekim gut wok papamama? (b) Olsem wanem Provep 2:1-6 inap helpim ol papamama long skulim ol pikinini bilong ol?

⁷ Sapos yu marit na yu laik i gat pikinini, askim yu yet: ‘Mipela i gat pasin daun na mipela i save laikim Tok Bilong God? Jehova bai makim mipela long lukautim nupela bebi?’ (Sng. 127:3, 4) Sapos yu gat pikinini pinis, orait askim yu yet: ‘Mi skulim ol pikinini bilong mi long pasin bilong givim bel long mekim wok?’ (Ekl. 3:12, 13) ‘Mi save wok strong long lukautim gut ol pikinini na bai ol tingting na pasin bilong dispela graun em Satan i bosim i no ken bagarapim ol?’ (Prov. 22:3) Yupela i no inap pasim olgeta hevi i painim ol pikinini bilong yupela. Em i hatwok tru long mekim olsem. Tasol yupela i ken redim ol long karim ol hevi we inap painim ol long bihain  taim yupela i skulim ol long bihainim Tok Bilong God. (Ritim Provep 2:1-6.) Olsem, sapos wanpela wanblut i lusim tok i tru, helpim ol pikinini long kisim skul long Tok Bilong God long risen na em i bikpela samting long stap gut long Jehova. (Sng. 31:23) O sapos wanpela yupela i laikim tru i dai, soim ol pikinini long hau ol inap yusim Tok Bilong God long karim hevi bilong krai sori, na kisim bel isi.—2 Kor. 1:3, 4; 2 Tim. 3:16.

8. Olsem Lo 6:6, 7 i kamapim, Josep na Maria i mekim wanem?

⁸ Papamama bilong Jisas long graun i bihainim tok Jehova i givim long ol papamama—ol i helpim Jisas long kamap man em God i amamas long en. (Ritim Lo 6:6, 7.) Josep na Maria i laikim tru Jehova, na nambawan samting ol i mekim em long helpim ol pikinini bilong ol long kisim wankain pasin bilong laikim Jehova.

9. Josep na Maria i mekim wanem ol bikpela disisen?

⁹ Oltaim Josep na Maria i holimpas pasin bilong ol long lotuim Jehova olsem wanpela famili. Long olgeta wik ol i save go long ol miting i kamap long sinagog long Nasaret, na long olgeta yia ol i save go long Pasova i kamap long Jerusalem. (Luk 2:41; 4:16) Taim ol i go long Jerusalem, ating long dispela taim ol i save stori long Jisas na ol bratasista bilong em long histori bilong lain bilong Jehova, na long taim ol i wokabaut long rot, ating ol i visitim ol ples em Ol Rait Holi i stori long en. Taim famili bilong ol i kamap bikpela, ating em i no isi long Josep na Maria long bihainim gutpela sediul long mekim ol samting bilong lotu. Tasol ol i kisim gutpela blesing long mekim olsem! Ol i putim lotu bilong Jehova i stap nambawan, olsem na famili bilong ol i stap gut long sait bilong bilip.

10. Ol papamama Kristen inap kisim wanem skul long Josep na Maria?

¹⁰ Ol papamama Kristen inap kisim wanem skul long Josep na Maria? Bikpela samting yupela i mas mekim em olsem, long rot bilong toktok na pasin bilong yupela, skulim ol pikinini olsem yupela i laikim tru Jehova. Tingim olsem nambawan gutpela presen yupela i ken givim long ol em long helpim ol long laikim Jehova. Na wanpela bikpela samting yupela i ken mekim em long skulim ol long hau ol yet inap bihainim gutpela sediul bilong stadi, beten,  go long ol miting na mekim wok autim tok. (1 Tim. 6:6) Em tru olsem yupela i mas lukautim ol pikinini long ol samting bilong skin. (1 Tim. 5:8) Tasol tingim, pasin bilong ol pikinini long pas gut wantaim Jehova—na i no mani kago—bai helpim ol long abrusim bagarap bilong dispela taim nogut na go insait long nupela taim. *—Ese. 7:19; 1 Tim. 4:8.

11. (a) Tok bilong 1 Timoti 6:17-19 i helpim ol papamama long mekim wanem ol gutpela disisen bilong ol pikinini? (b) Famili bilong yu inap putim wanem ol mak, na wanem gutpela samting inap kamap? (Lukim blok “ Yu Laik Putim Wanem Ol Mak?”)

¹¹ Yumi amamas long lukim planti papamama Kristen i mekim gutpela disisen long sait bilong bilip long helpim famili bilong ol! Oltaim ol i save lotu wantaim. Ol i save go long ol miting bilong kongrigesen na ol kibung. Na ol i insait long wok autim tok. Sampela famili i go autim tok long ol hap we ol pablisa i no save autim tok tumas long en. Sampela narapela famili i save visitim Betel o sapotim ol tiokratik konstraksen projek. Ol famili i mekim ol kain disisen olsem i mas mekim sampela sakrifais long sait bilong mani, na ol inap bungim sampela hevi. Tasol ol i kisim planti gutpela samting long sait bilong bilip. (Ritim 1 Timoti 6:17-19.) Ol pikinini i bikpela insait long kain famili olsem i save bihainim yet ol gutpela pasin ol i lainim, na ol i amamas long papamama i skulim ol olsem! *—Prov. 10:22.

12. Jisas i mas mekim wanem samting taim em i wok long go bikpela?

¹² Oltaim Papa bilong Jisas long heven i save mekim ol gutpela disisen, na papamama bilong em long graun tu i mekim ol gutpela disisen. Tasol taim Jisas i go bikpela, em i mas mekim ol disisen bilong em yet. (Gal. 6:5) Olsem yumi olgeta, em i stap fri long makim ol samting em yet i laik mekim. Em inap mekim disisen long bihainim laik bilong em yet. Tasol nogat, em i mekim disisen olsem em i laik pas gut yet wantaim Jehova. (Jon 8:29) Olsem wanem eksampel bilong em inap helpim ol yangpela long nau?

13. Jisas i mekim wanem bikpela disisen taim em i liklik pikinini yet?

¹³ Taim Jisas i liklik pikinini yet, em i mekim disisen long bihainim tok bilong papamama bilong em. Em i no sakim tok bilong tupela na ting em i save long planti samting moa winim ol. Nogat, “em i stap daun yet long tupela.” (Luk 2:51) Jisas i tingim wok bilong em olsem fes bon pikinini olsem bikpela samting. Em i wok hat long lainim wok kapenta long waspapa bilong em na bai em i ken mekim wok bilong sapotim famili bilong em.

14. Hau yumi save olsem Jisas em i gutpela sumatin bilong Tok Bilong God?

 ¹⁴ Ating papamama bilong Jisas i tokim em olsem em i bon long rot bilong mirakel, na ol i tokim em tu long ol samting ol wokman bilong God i bin tokaut long en. (Luk 2:8-19, 25-38) Jisas i bilip long ol dispela tok, na tu, em yet i stadi long Ol Rait Holi. Hau na yumi save olsem Jisas em i gutpela sumatin bilong Tok Bilong God? Taim em i liklik pikinini, ol tisa long Jerusalem “i kirap nogut long save bilong em na ol tok em i bekim long ol.” (Luk 2:46, 47) Na taim em i gat 12 krismas, tok Jisas i mekim i kamapim klia olsem em i save olsem Jehova em Papa bilong em.—Luk 2:42, 43, 49.

15. Olsem wanem Jisas i soim olsem em i laik mekim laik bilong Jehova?

¹⁵ Taim Jisas i kisim save long wok em bai mekim bilong inapim ol samting Jehova i tingting pinis long mekim, em i amamas long mekim dispela asainmen. (Jon 6:38) Em i save olsem planti man bai heitim em, na ating em i bel hevi tru long tingim dispela. Tasol em i mekim disisen olsem em bai daun long Jehova. Taim Jisas i kisim baptais long 29 C.E., nambawan samting long laip bilong em, em long bihainim laik bilong Jehova. (Hib. 10:5-7) Taim Jisas i hangamap long diwai pos, em i tingting strong yet olsem em bai bihainim laik bilong Papa bilong em.—Jon 19:30.

16. Ol pikinini inap kisim wanem skul long Jisas?

¹⁶ Bihainim tok bilong papamama bilong yu. Olsem Josep na Maria, papamama bilong yu i no gutpela olgeta. Tasol Jehova i givim asainmen long tupela long lukautim, trenim, na stiaim yu. Sapos yu harim tok bilong ol na rispektim namba God i givim long ol, “yu ken i stap gut.”—Efe. 6:1-4.

17. Olsem Josua 24:15 i kamapim, ol yangpela i mas mekim wanem disisen?

¹⁷ Makim husat bai yu lotuim. Yu yet i mas save tru long Jehova em i husat, save long ol samting em i tingting pinis long mekim, na save long laik bilong em na hau yu ken mekim laik bilong em. (Rom 12:2) Long dispela rot yu inap mekim nambawan disisen long laip bilong yu, em long lotuim Jehova. (Ritim Josua 24:15; Ekl. 12:1) Sapos yu bihainim gutpela sediul long ritim Baibel na stadi gut long en, orait pasin bilong yu long laikim Jehova na bilip bilong yu bai kamap strong moa.

18. Ol yangpela i mas mekim wanem disisen, na dispela bai kamapim wanem samting?

¹⁸ Putim laik bilong Jehova i stap namba wan  samting long laip bilong yu. Ol samting long graun Satan i bosim i kamapim olsem taim yu yusim save bilong yu long inapim laik bilong yu yet, bai yu stap amamas. Tasol yumi save, ol man i putim mani kago i stap nambawan samting long laip bilong ol, “i olsem ol i sutim ol yet long ol samting i givim pen long ol.” (1 Tim. 6:9, 10) Tasol sapos yu bihainim tok bilong Jehova na mekim disisen long putim laik bilong em i stap namba wan samting long laip bilong yu, orait laip bilong yu bai i gat as bilong en na “yu bai bihainim savetingting.”—Jos. 1:8.

19. Ol papamama i mas tingim gut wanem samting?

¹⁹ Ol papamama, givim bel long helpim famili bilong yu long lotuim Jehova. Bilip long em, na em bai helpim yu long mekim ol gutpela disisen. (Prov. 3:5, 6) Tingim olsem pikinini bilong yu bai bihainim pasin bilong yu, na planti taim i no ol tok yu mekim. So mekim ol disisen we inap helpim ol pikinini bilong yu long amamasim Jehova.

20. Ol yangpela inap kisim wanem ol blesing sapos ol i mekim disisen long lotuim Jehova?

²⁰ Ol yangpela, papamama bilong yu inap helpim yu long mekim ol gutpela disisen. Tasol yu yet i mas mekim ol samting na bai God i ken amamas long yu. So bihainim pasin bilong Jisas na mekim disisen olsem yu bai lotuim Papa bilong yu long heven. Sapos yu mekim olsem, bai yu bisi long mekim ol gutpela wok, yu bai stap amamas, na laip bilong yu bai i gat as tru bilong en. (1 Tim. 4:16) Na long bihain, yu bai amamas long kisim gutpela laip tru!