1. Wai na planti man i paul long wanem lotu i tru long nau?

LONG nau i gat planti tausen lotu i tok ol i Kristen, na ol i tok ol i lotuim God long pasin we em i orait long en. Em as na planti man i paul long wanem lotu i tru long nau! Ol i askim olsem, “I gat wanpela lotu i tru long nau, o olgeta lotu i amamasim God?” Olsem wanem? Long tingting bilong yumi, yumi bilip tru olsem yumi skulim ol man long tok i tru? Na God i orait long pasin bilong lotu em yumi Ol Witnes Bilong Jehova i bihainim long nau? Yu ting i hatwok long save long ol dispela samting? Yumi ken skelim ol evidens i soim olsem yumi lotu tru long God.

2. Olsem 1 Tesalonaika 1:5 i kamapim, wai na aposel Pol i bilip tru olsem ol tok em i bilip long en em tok i tru?

² Aposel Pol i bilip tru olsem em i holim tok i tru. (Ritim 1 Tesalonaika 1:5.) Em i no bilip tasol long dispela bikos dispela i amamasim em, nogat. Pol i save stadi gut tru long Tok Bilong God. Em i bilip tru olsem “God em i as bilong olgeta tok i stap long Rait Holi.” (2 Tim. 3:16) Pol i kisim wanem save long ol stadi em i mekim? Long Ol Rait Holi, Pol i luksave long ol samting i kamapim klia olsem Jisas em i dispela promis Mesaia, tasol ol bikman bilong lotu Juda long taim bilong em i no laik bilip long ol dispela samting. Ol dispela bikman bilong lotu i tok ol i lotu tru long God, tasol ol i mekim ol samting em God i heitim. (Tai. 1:16) Pol i no wankain olsem ol. Em i no makim tasol ol tok long Rait Holi em i laik bilipim na ol tok em i no laik bilipim, nogat. Em i redi long skulim ol narapela long ol dispela tok na long bihainim “olgeta laik bilong God.”​—Apo. 20:27.

3. Yumi mas kisim bekim bilong olgeta askim bambai yumi ken bilip tru olsem yumi holim tok i tru? Lukim blok “ Ol Wok na Tingting Bilong Jehova, ‘Ol i Planti Tumas na Yumi No Inap Kaunim.’”

 ³ Sampela manmeri long nau i pilim olsem, lotu i tru i mas bekim olgeta askim, em makim tu ol askim em Baibel yet i no givim bekim bilong ol. Yu ting dispela tingting em i stret? Skelim eksampel bilong Pol. Em i kirapim ol wanbilip Kristen olsem, “skelim olgeta samting, bai yupela i ken save olsem ol i stret o nogat,” tasol em i tokaut tu olsem i gat planti samting we em yet i no kliagut long ol. (1 Tes. 5:21) Em i tok: “Yumi gat hap hap save tasol.” Na em i tok moa: “Yumi no lukim klia ol samting, i olsem yumi lukluk long wanpela metal mira.” (1 Kor. 13:9, 12) Pol i no kliagut long olgeta samting, na yumi tu i no inap kliagut long olgeta samting. Tasol Pol i kisim save long ol bikpela tok i tru long ol samting Jehova i tingting pinis long mekim. Em i kisim save inap long em i ken bilip tru olsem em i holim tok i tru!

4. (a) Yumi ken mekim wanem bilong strongim bilip bilong yumi olsem yumi painim pinis tok i tru? (b) Ol Kristen tru i mas mekim wanem?

⁴ Wanpela samting yumi ken mekim bilong strongim bilip bilong yumi olsem yumi painim pinis tok i tru, em long skelim pasin bilong Jisas long mekim lotu wantaim pasin em Ol Witnes Bilong Jehova i bihainim long nau long mekim lotu. Long dispela atikol, yumi bai skelim olsem ol Kristen tru i mas (1) sakim pasin bilong lotuim imis, (2) rispektim nem bilong Jehova, (3) laikim tok i tru, na (4) laikim tru narapela narapela.

5. (a) Yumi kisim wanem skul long Jisas long stretpela pasin bilong lotuim God? (b) Olsem wanem yumi ken bihainim ol tok Jisas i skulim ol man long en?

⁵ Jisas i laikim tru Jehova, olsem na em i lotuim Jehova wanpela tasol taim em i stap long heven na long graun tu. (Luk 4:8) Em i skulim  ol disaipel bilong em long mekim olsem tu. So Jisas na ol disaipel bilong em wantaim, ol i no save yusim imis long mekim lotu. God em i spirit, olsem na ol imis ol man i wokim i no inap tru long makim glori bilong Jehova! (Ais. 46:5) Olsem wanem long pasin bilong wokim imis bilong ol santuman na beten long ol? Namba 2 Lo long Tenpela Lo, Jehova i tok: “Yupela i no ken wokim wanpela imis o wanpela piksa bilong wanpela samting i stap long ples antap o long graun . . . Yupela i no ken brukim skru long ol na lotu long ol.” (Kis. 20:4, 5) Ol dispela tok i kamapim klia tru olsem ol man i laik lotuim God, ol i no ken lotuim imis.

6. Ol Witnes Bilong Jehova i bihainim wanem pasin bilong mekim lotu long nau?

⁶ Ol saveman i save skelim ol samting i kamap bipo, ol i tok olsem ol Kristen bilong pastaim i save lotuim God wanpela tasol. Olsem, buk History of the Christian Church i tok ol Kristen bilong pastaim “bai heitim tru dispela tingting” bilong yusim imis long mekim lotu. Long nau, Ol Witnes Bilong Jehova i bihainim wankain pasin em ol Kristen bilong pastaim i bin bihainim. Yumi no save beten long ol santuman o ol ensel, na tu, yumi no save beten long Jisas. Na yumi no save brukim skru o lotu long fleg na mak bilong kantri. Maski wanem samting i kamap, yumi tingting strong long bihainim dispela tok bilong Jisas olsem: “Yu mas lotu long Jehova, God bilong yu.”​—Mat. 4:10.

7. Wanem samting i narapela kain long Ol Witnes Bilong Jehova na ol narapela lotu?

⁷ Long nau, planti manmeri i save bihainim ol bikman bilong lotu. Ol i laikim tru ol dispela bikman na i olsem ol i lotuim ol. Planti man i go pulap long ol sios bilong ol, baim ol buk bilong ol, na givim planti mani bilong sapotim wok bilong ol dispela bikman bilong lotu. Na tu, sampela manmeri i save bilip tru long olgeta tok em ol bikman bilong lotu i mekim. Ol i amamas tru long ol dispela bikman bilong lotu, i olsem ol dispela man ol i Jisas! Tasol yumi ol man i lotu tru long Jehova, yumi no gat ol pris pasto. Yumi rispektim ol man i go pas long mekim wok bilong Jehova long nau, tasol yumi no givim biknem long ol bikos yumi tingim tok Jisas i mekim, olsem: “Yupela olgeta i stap brata brata.” (Mat. 23:8-10) Yumi no save lotuim ol man, maski ol i bikman bilong lotu o bikman bilong wok politik. Na tu, yumi no save sapotim ol wok lotu na wok politik ol i mekim. Yumi stap niutrol na yumi no insait long ol samting bilong dispela graun. Tasol long olgeta dispela samting, yumi stap narapela kain long ol lotu bilong dispela graun em ol i holim nating nem Kristen.​—Jon 18:36.

8. I gat wanem as na yumi ken save olsem Jehova i laik litimapim nem bilong em na em i laik olgeta man i save long dispela nem?

⁸ Wanpela taim Jisas i beten olsem: “Papa, litimapim nem bilong yu.” Jehova yet i bekim dispela beten long rot bilong wanpela nek i kamap long heven na i promis olsem em bai litimapim nem bilong em. (Jon 12:28) Long wok autim tok bilong Jisas, em i bin litimapim nem bilong Papa bilong em. (Jon 17:26) So i stret tru ol Kristen long nau i yusim dispela nem bilong God na kamapim dispela nem long ol narapela.

9. Olsem wanem ol Kristen bilong pastaim i bin soim olsem ol i rispektim nem bilong God?

⁹ Long taim bilong ol aposel, bihain tasol long kongrigesen Kristen i bin kamap, Jehova “i bin tingim ol man bilong ol arapela lain . . . na [em] i mekim olsem bilong kisim wanpela lain em nem bilong em i ken stap long ol.” (Apo. 15:14) Ol Kristen long taim bilong ol aposel i bin amamas long yusim nem bilong God na kamapim dispela nem long ol narapela. Ol i yusim nem bilong God planti taim long wok autim tok bilong  ol na long ol buk bilong Baibel ol i raitim. * Ol i kamapim klia olsem ol i lain bilong God na ol i holim nem bilong em.​—Apo. 2:14, 21.

10. I gat wanem evidens i soim olsem Ol Witnes Bilong Jehova tasol i holim nem bilong Jehova?

¹⁰ Ol Witnes Bilong Jehova tasol i holim nem bilong Jehova. Skelim ol evidens. Long nau planti bikman bilong lotu i mekim olgeta samting ol inap mekim bilong haitim nem tru bilong God. Ol i bin rausim nem bilong God long ol Baibel, na sampela i bin tambuim ol man long kolim nem bilong God long taim bilong lotu long sios bilong ol. * Olsem na i klia tru olsem Ol Witnes Bilong Jehova tasol i rispektim na onarim nem bilong God. Yumi tasol i tokaut long nem bilong God long olgeta hap bilong graun winim olgeta narapela lotu! Na yumi givim bel tru long mekim olgeta samting yumi inap mekim bilong inapim nem bilong yumi olsem Ol Witnes Bilong Jehova. (Ais. 43:10-12) Yumi bin wokim winim 240 milion kopi bilong Baibel Nupela Taim Trenslesen Bilong Ol Skripsa Holi. Dispela Baibel tasol i putim nem bilong Jehova i go bek long ples stret bilong en we ol narapela Baibel i bin rausim. Na yumi wokim ol buk na nius bilong Baibel we i yusim nem bilong Jehova long winim 1,000 tokples!

11. Olsem wanem ol Kristen bilong pastaim i soim olsem ol i laikim tok i tru?

¹¹ Jisas i laikim tok i tru, em stretpela save  long God na ol samting God i tingting pinis long mekim. Jisas i bihainim dispela tok i tru long laip bilong em, na tu, em i skulim ol narapela long tok i tru. (Jon 18:37) Ol disaipel tru bilong Jisas, ol i bin laikim tru tok i tru. (Jon 4:23, 24) Em as na aposel Pita i tok long lotu Kristen olsem “rot bilong pasin i tru.” (2 Pita 2:2) Ol Kristen tru long pastaim i laikim tru tok i tru, olsem na ol i sakim olkain tingting bilong ol lotu, ol pasin bilong ples, na ol tingting em ol man i kamapim we i no stret wantaim tok i tru. (Kol. 2:8) Olsem tasol, long nau ol Kristen tru i wok strong long “wokabaut yet long tok i tru” long rot bilong larim ol tok bilong Jehova long Baibel i stap olsem as bilong ol bilip na ol pasin ol i bihainim.—3 Jon 3, 4.

12. (a) Taim ol brata i go pas i luksave olsem i gat sampela senis long ol save yumi holim pinis, ol i save mekim wanem? (b) Wai na ol i mekim ol dispela senis?

¹² Ol Witnes Bilong Jehova i no tok olsem ol i gat olgeta save long ol tok i tru bilong Baibel. Sampela taim ol i mekim ol popaia long ol tok long sait bilong bilip na ol samting bilong stiaim oganaisesen. Yumi no kirap nogut long dispela. Baibel i kamapim klia olsem haptaim i mas lus bambai stretpela save i kamap bikpela moa. (Kol. 1:9, 10) Jehova i save kamapim klia tok i tru bilong em isi isi, olsem na yumi no ken les kwik taim yumi wetim lait bilong tok i tru long kamap strong na i go bikpela moa. (Prov. 4:18) Taim ol brata i go pas i luksave olsem i gat sampela senis long ol save yumi holim pinis, orait ol i no save surik long mekim ol dispela senis. Planti lotu em ol i holim nating nem Kristen, ol i save mekim ol senis bilong amamasim ol lain insait long kongrigesen bilong ol o bilong pulim ol man bilong dispela graun long laikim ol. Tasol senis em oganaisesen bilong Jehova i mekim, em bilong helpim ol man long i go klostu moa long God na bilong helpim ol long bihainim pasin bilong lotu em Jisas i bin bihainim. (Jems 4:4) Yumi kisim sampela nupela save bilong Baibel na dispela em i as na yumi mekim ol senis, na yumi no mekim ol senis bilong amamasim ol man bilong dispela graun. Yumi laikim tru tok i tru!​—1 Tes. 2:3, 4.

13. (a) Wanem nambawan pasin bilong ol Kristen tru? (b) Olsem wanem dispela pasin i stap namel long Ol Witnes Bilong Jehova long nau?

¹³ Ol Kristen bilong pastaim i save mekim planti gutpela pasin, tasol nambawan pasin bilong ol em pasin laikim. Jisas i tok: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:34, 35) Long nau, Ol Witnes Bilong Jehova long olgeta hap i laikim tru narapela narapela na ol i stap wanbel wantaim. Yumi no wankain long olgeta narapela lotu, bikos yumi pas gut wantaim olsem wanpela famili maski yumi bilong narapela narapela kantri, skin kala, na sindaun. Long ol miting bilong yumi, na long ol bikpela na liklik kibung, yumi save lukim olsem pasin laikim i stap strong. Dispela samting i strongim tru bilip bilong yumi olsem Jehova i orait long pasin bilong lotu yumi bihainim long nau.

14. Olsem Kolosi 3:12-14 i kamapim, wanem narapela samting yumi ken mekim bilong soim olsem yumi laikim tru narapela narapela?

¹⁴ Baibel i tok: “Yupela i mas laikim tru ol arapela.” (1 Pita 4:8) Wanpela samting yumi ken mekim bilong soim olsem yumi laikim tru ol narapela em long fogivim narapela narapela na lusim tingting long ol pasin kranki bilong ol. Na yumi painim rot bilong givim samting long ol narapela na helpim ol narapela long kongrigesen, maski sampela taim ol i mekim ol samting i bagarapim bel bilong yumi. (Ritim Kolosi 3:12-14.) Kain pasin laikim olsem em i nambawan rot bilong soim olsem yumi Kristen tru.

15. Wanem ol narapela rot we yumi soim olsem yumi bihainim pasin bilong ol Kristen long pastaim long mekim lotu?

¹⁵ I gat ol narapela rot tu we i soim olsem yumi bihainim pasin bilong ol Kristen bilong pastaim long mekim lotu. Olsem, tingim pasin yumi bihainim bilong mekim ol wok insait long oganaisesen, olsem yumi gat ol wasman raun, ol elda, na ol kongrigesen sevan. Dispela pasin i wankain long pasin ol aposel i bin bihainim long taim bilong ol Kristen bilong pastaim. (Fili. 1:1; Tai. 1:5) Na wankain olsem ol aposel long bipo, yumi rispektim ol lo Jehova i putim long marit na maritpasin, blut em i holi, na tu, yumi lukautim kongrigesen long rot bilong rausim ol man i mekim bikpela sin na i no laik tanim bel.​—Apo. 15:28, 29; 1 Kor. 5:11-13; 6:9, 10; Hib. 13:4.

16. Yumi kisim wanem skul long tok i stap long Efesus 4:4-6?

¹⁶ Jisas i tok olsem planti manmeri bai tok ol i disaipel bilong em, tasol i no olgeta i gat gutpela bel. (Mat. 7:21-23) Na tu, Baibel i givim tok lukaut olsem long taim bilong las de, planti manmeri “bai i luk olsem ol i gat pasin bilong givim bel tru long God,” tasol tru tru, nogat. (2 Tim. 3:1, 5) Maski i olsem, Baibel i tokaut klia olsem i gat wanpela bilip tasol em God i orait long en.​—Ritim Efesus 4:4-6.842

17. Husat long nau i bihainim pasin bilong Jisas na mekim lotu i tru?

¹⁷ Husat i bihainim pasin bilong mekim lotu i tru long nau? Yumi bin skelim pinis ol evidens. Yumi bin stori long pasin Jisas i bihainim bilong mekim lotu i tru na em pasin ol Kristen bilong pastaim tu i bin bihainim. So bekim em olsem, Ol Witnes Bilong Jehova tasol i mekim lotu i tru long nau. Em gutpela blesing tru long stap insait long lain bilong Jehova long nau, na long kisim stretpela save long tok i tru na ol samting God i tingting pinis long mekim! So yumi laik mekim olgeta samting yumi inap mekim bilong bilip tru na holimpas tok i tru.