LONG olgeta wan wan yia, planti gutpela sipsip bilong God em pastaim ol i raus, ol i wok long kam bek insait long kongrigesen Kristen. Tingim bikpela “amamas i kamap long heven” taim olgeta wan wan i kam bek! (Luk 15:7, 10) Sapos kongrigesen i bin kisim yu bek, yu ken save tru olsem Jisas, ol ensel, na Jehova i amamas tru long disisen yu mekim bilong kam bek long tok i tru. Tasol taim yu wok long stretim bek pasin pren bilong yu wantaim Jehova, ating yu bai bungim sampela hatwok. Wanem sampela hatwok yu inap bungim? Na wanem samting i ken helpim yu?

Planti bratasista i karim hevi bilong bel hevi taim ol i kam bek long kongrigesen. Ating yu kliagut long samting King Devit i bin pilim. Maski God i bin fogivim ol sin bilong em, em i tok: “Ol sin bilong mi i daunim mi tru.” (Sng. 40:12; 65:3) Bihain long wanpela i kam bek long Jehova, ating em inap pilim sem na bel hevi yet inap planti yia. Isabelle i bin raus winim 20 yia. * Em i tok: “Mi hatwok tru long bilip olsem Jehova inap fogivim mi.” Sapos yu larim bel hevi i daunim yu, dispela inap mekim na pasin pren bilong yu wantaim Jehova inap i go slek gen. (Prov. 24:10) Olsem na wok strong long no ken larim bel hevi i daunim yu.

Sampela i pilim olsem em bai hatwok long ol i mekim olgeta samting ol i mas mekim bilong strongim gen pasin pren bilong ol wantaim Jehova. Taim kongrigesen i kisim bek Antoine, em i tok: “Mi pilim olsem mi lusim tingting long ol samting mi save mekim bipo olsem wanpela Kristen.” Kain tingting inap mekim na sampela i surik long mekim bikpela wok moa bilong God.

Yumi ken tok piksa olsem, sapos strongpela win hariken i bagarapim tru naispela haus bilong wanpela, ating em bai pilim olsem em i bikpela wok tumas long wokim gen haus na bikpela haptaim inap lus long mekim olsem. Olsem tasol, sapos yu bin mekim  bikpela sin na bagarapim pasin pren bilong yu wantaim Jehova, yu inap pilim olsem em bikpela wok tumas long stretim bek dispela pasin pren. Tasol yu no stap wanpis, i gat helpim i stap.

Jehova i singautim yumi na tok: “Yupela kam na yumi stretim tok namel long yumi yet.” (Ais. 1:18) Yu bin wok strong long “stretim tok namel” long yu na God. Jehova i laikim yu bikos long dispela samting yu mekim. Tingim: Yu kam bek long Jehova na dispela i opim rot long em inap bekim tok Satan i sutim long em!​—Prov. 27:11.

Taim yu mekim olsem, yu kam klostu pinis long Jehova, na em i promis long kam klostu long yu. (Jems 4:8) Em gutpela long ol narapela i lukim olsem yu hap bilong kongrigesen gen, tasol i gat sampela samting moa yu mas mekim. Yu mas wok yet long strongim pasin bilong yu long laikim Papa na Pren bilong yu, Jehova. Hau yu ken mekim olsem?

Traim long putim ol mak em yu ken winim. I gutpela ol bikpela tok i tru yu bin lainim i stap strong yet long tingting, olsem save yu gat long Jehova na ol promis bilong em long kamapim Paradais long bihain. Tasol yu mas stretim gen ol sediul bilong yu long sait bilong Kristen laip bilong yu olsem, insait long wok autim tok na planti taim bung wantaim ol bratasista bilong yu. Bilong mekim olsem, skelim ol dispela mak.

Toktok planti taim wantaim Jehova. Papa bilong yu i save olsem bel inap kotim yu long ol rong yu bin mekim bipo, na dispela inap mekim na i hatwok long yu beten long Em. (Rom 8:26) Maski i olsem, “holim strong pasin bilong beten,” na tokim Jehova olsem yu laik tru long kamap pren bilong em. (Rom 12:12) Andrej i tok: “Bel i kotim mi na mi bin pilim sem nogut tru. Tasol olgeta taim mi beten, bihain long en mi save pilim gut. Mi pilim olsem bel i stap isi tru.” Sapos yu no save long wanem tok yu bai kolim long beten bilong yu, lukim tok bilong King Devit i stap long Buk Song 51 na 65—em man husat i bin tanim bel long ol rong em i mekim.

Stadi oltaim long Baibel. Dispela bai strongim bilip bilong yu na strongim pasin bilong yu long laikim Jehova. (Sng. 19:7-11) Wanpela brata nem bilong em Felipe i tok: “Pastaim, mi no gat gutpela sediul bilong ritim Baibel na stadi, olsem na mi kamap slek na mi mekim Jehova i bel hevi. Mi no laik mekim wankain popaia gen, olsem na oltaim mi wok strong long mekim pesenel stadi bilong mi.” Yu tu ken mekim olsem. Sapos yu nidim helpim long makim wanem ol samting yu ken stadi long en, i gutpela yu askim wanpela pren bilong yu husat i stap strong long bilip long helpim yu.

Strongim pasin pren bilong yu wantaim ol bratasista bilong yu. Sampela em ol i kam bek long kongrigesen, ol i wari olsem ol narapela bai tingting nogut long ol. Larissa i tok: “Mi sem nogut tru. Mi pilim olsem mi bin givim baksait long kongrigesen. Mi bin pilim olsem inap longpela taim.” Yu ken save tru olsem ol elda na ol narapela bratasista i gat strongpela bilip i redi long helpim yu long stretim bek pasin pren bilong yu wantaim Jehova. (Lukim blok “ Ol Elda i Ken Mekim Wanem?”) Ol i amamas tru long yu kam bek, na ol i laik bai yu stap amamas!​—Prov. 17:17.

Wanem samting inap helpim yu long pas gut wantaim kongrigesen? Planti taim bung wantaim ol bratasista bilong yu—long ol miting, long taim bilong autim tok, na long ol narapela taim tu. Olsem wanem dispela bai helpim yu? Felix i tok: “Kongrigesen i amamas tru taim mi kam bek. Mi pilim olsem ol i laikim mi tru. Olgeta i helpim mi long pilim olsem mi insait gen long bikpela lain famili bilong mi, na mi pilim olsem Jehova i fogivim mi, na mi ken kirap gen long mekim yet ol wok lotu bilong mi.”—Lukim blok “ Yu Ken Mekim Wanem?”

Satan bai putim planti hevi moa long yu na traim long daunim bilip bilong yu taim yu wok long stretim bek pasin pren bilong yu wantaim Jehova. (Luk 4:13) Oltaim stap redi long rot bilong mekim ol samting bilong strongim bilip bilong yu.

Jehova i tok promis long ol sipsip bilong em olsem: “Mi bai painim sipsip i lus, mi bai bringim bek sipsip i bin lusim lain sipsip, mi bai pasim sua bilong sipsip i kisim bagarap, na mi bai strongim sipsip i no gat strong.” (Ese. 34:16) Jehova i bin helpim planti narapela manmeri long stretim bek pasin pren bilong ol wantaim em. Yu ken save tru olsem em i laik helpim yu na bai yu ken strongim tru pasin pren bilong yu wantaim em.