Wok autim tok i wok long i go bikpela na planti manmeri moa i laikim ol litresa. Ol brata long Brooklyn Betel i wokim ol nius, tasol ol i kisim helpim yet long ol bikpela kampani long sait bilong prinim ol buk i gat strongpela karamap. Inap planti mun, ol bratasista i sot tru long ol buk bilong yusim long wok autim tok na dispela i pasim ol long autim tok, so Brata Rutherford i askim Brata Robert Martin, em faktori maneja, sapos em orait long ol yet i ken prinim ol buk.

Brata Martin i tok: “Em gutpela tingting tru, bikos dispela i makim olsem yumi bai i gat faktori bilong wokim ol buk.” Ol brata i rentim wanpela haus long 18 Concord Street long Brooklyn na kisim ol masin bilong mekim wok.

I no olgeta lain i amamas long dispela nupela senis. Presiden bilong wanpela kampani i save prinim ol buk bilong mipela i kam visitim dispela nupela faktori. Em i tok: “Yupela gat ol gutpela tul tru bilong prinim ol buk, tasol i no gat wanpela bilong yupela i save long hau ol dispela masin i wok. Insait long 6-pela mun bihain, ol dispela samting bai kamap hip pipia tasol.”

Brata Martin i tok: “I luk olsem ating dispela tok bai kamap tru, tasol em i no tingim Bikpela, na oltaim Em i save helpim mipela.” Tok bilong Brata Martin i tru. I no longtaim, dispela nupela faktori i wokim 2,000 buk long olgeta wan wan de.   

Lain bilong Jehova i yusim ol buk ol yet i wokim bilong autim gutnius, na tu, ol i yusim narapela nupela rot bilong mekim olsem, em redio brodkas. Long Sande apinun, Februeri 26, 1922, em namba 1 taim Brata Rutherford i mekim toktok long redio. Em i mekim dispela tok, “Planti Milion  Man i Stap Nau Ol i No Ken i Dai”long redio stesin KOG long Los Angeles, California, Amerika.   

Inap olsem 25,000 manmeri i harim dispela tok. Sampela i salim pas i kam na tok tenkyu long dispela brodkas. Wanpela bilong ol dispela pas i kam long Willard Ashford, em i save stap long Santa Ana, California. Em i tok tenkyu long Brata Rutherford i mekim dispela “gutpela tok.” Na em i tok moa olsem: “I gat tripela sik manmeri long haus na em i hatwok tru long lusim haus na kam harim tok bilong yu, maski yu mekim tok klostu long mipela, mipela bai no gat rot long kam harim.”

Long ol wik bihain, i gat planti tok moa i kamap long redio brodkas. Long pinis bilong yia, nius The Watch Tower i tok “klostu 300,000 manmeri i harim ol tok long rot bilong [redio].”

Ol pas na tok ol man i mekim i strongim Ol Sumatin Bilong Baibel na ol i tingting long wokim wanpela redio stesin long eria bilong ol long Staten Ailan, i no longwe tumas long Brooklyn Betel. Long ol yia i kam bihain, Ol Sumatin Bilong Baibel i yusim dispela redio stesin, WBBR, long autim tok bilong Kingdom long planti manmeri tru long planti ples.

Long Jun 15, 1922, nius The Watch Tower i tokaut olsem ol bai mekim wanpela kibung long Sida Poin, Ohio, kirap long Septemba 5 i go 13, 1922. Ol Sumatin Bilong Baibel i amamas tru taim ol i go kamap long Sida Poin.

Brata Rutherford i mekim fes tok na em i tokim odiens: “Mi tingting olsem, na mi bilip tru olsem, Bikpela bai . . . blesim dispela kibung na bikpela wok bilong autim tok bai go long olgeta hap bilong graun winim olgeta taim bipo.” Ol brata i mekim ol tok long dispela kibung i wok long strongim odiens long mekim wok autim tok.   

Long Fraide, Septemba 8, inap olsem 8,000 manmeri i kam pulapim dispela ples bung, na ol i redi long harim tok bilong Brata Rutherford. Ol i ting olsem em bai kamapim insait bilong dispela ol leta “ADV” i stap long invatesen pepa. Taim ol i sindaun, sampela i lukim rol bilong traipela sel antap long het bilong pletfom. Arthur Claus, em i  bilong Tulsa, Oklahoma, Amerika, na em i bin ron i go long kibung, em i painim wanpela sia we em i ken sindaun na putim gut yau, bikos i no gat maikrofon o spika long dispela taim bipo.

Siaman i toksave olsem i tambu long larim ol man i kam leit insait long ples bung taim Brata Rutherford i wok long mekim tok bilong em, bikos ol i no laik bai ol man i distebim tok bilong em. Long 9:30 long moning, Brata Rutherford i kirapim tok bilong em taim em i kolim tok bilong Jisas i stap long Matyu 4:17 olsem: “Kingdom bilong heven i stap klostu.” (King Jems Pisin Baibel) Taim em i stori long hau ol manmeri bai harim tok bilong dispela Kingdom, em i tok: “Jisas yet i tok taim em i kam i stap em bai mekim wok bilong bungim ol manmeri bilong em, na long dispela taim em bai bungim ol manmeri i stap gut long em.”

Brata Claus i bin sindaun insait long ples bung namel long odiens, na em i tok: “Mipela i putim gut yau long olgeta tok.” Wantu tasol, em i pilim sik na em i lusim ples bung. Arthur i les long go, tasol em i go na em i save olsem em i no inap kam bek insait gen.

Sampela minit bihain, em i pilim orait. Em i tok taim em i wokabaut i go long ples bung, em i harim bikpela nois bilong ol manmeri i paitim han. Dispela i mekim na em i amamas tru! Em i tingting olsem sapos em i go antap long rup em bai harim gen dispela naispela tok. So Brata Claus—em i gat 23 krismas long dispela taim—i painim wei long kalap i go antap long rup. Rup long antap i op na taim em i go, em i “harim klia tru ol tok.”

Tasol Arthur i no stap wanpis. Sampela pren bilong em i stap pinis long rup. Wanpela bilong ol, em Frank Johnson, em i kam na askim em: “Yu gat wanpela sap poket naip?”

Arthur i tok: “Yes, mi gat.”

Frank i tok: “Yu bekim bilong beten bilong  mipela. Yu lukim dispela bikpela rol? Em sain, ol i pasim long ol dispela nil. Putim gut yau long Jas. * Taim em i tok: ‘Na yupela i mas autim tok, autim tok,’ orait katim dispela 4-pela rop.”

So Arthur i holim naip long han na em wantaim ol narapela i wetim Brata Rutherford long kolim ol dispela tok. Orait Brata Rutherford i kolim bikpela poin bilong tok bilong em. Brata Rutherford i amamas na i olsem em i bikmaus na i tok: “Yupela i mas stap olsem ol gutpela witnes bilong Bikpela. Yupela i mas go pait inap long Bikpela Babilon i bagarap na pinis olgeta. Autim dispela tok long olgeta hap bilong graun. Olgeta manmeri i mas save olsem Jehova em i God na Krais Jisas em i King bilong olgeta king na em i Bikpela bilong olgeta bikman. Dispela taim em i bikpela taim tru, winim olgeta arapela taim. Lukim! King i kirap pinis long wok! Yupela man bilong autim tok long dispela samting. Olsem na yupela mas autim tok, autim tok, autim tok bilong King na Kingdom bilong em!”

Arthur i tok em wantaim ol narapela brata i katim rop na sain ol i rolim na pasim i op isi isi i go daun. Olsem ol leta “ADV” i makim, em sotpela wei bilong kolim dispela Inglis tok ‘advertise’ na mining bilong en em ‘autim tok,’ so laplap i gat rait olsem: “Autim tok long King na Kingdom.”

Dispela kibung long Sida Poin i bin helpim ol brata long putim tingting long dispela bikpela wok bilong autim gutnius bilong Kingdom, na ol manmeri husat i gat laik long mekim wok autim tok ol i amamas long insait long en. Wanpela kolpota (nau yumi kolim painia) bilong Oklahoma, Amerika, em i raitim pas na i tok: “Distrik mipela wok long en em hap i gat main bilong ston kol, na planti manmeri i stap rabis tru.” Em i tok planti taim ol manmeri i ritim ol tok i stap long nius Golden Age na “ol i [save] krai.” Na em i pinisim tok bilong em olsem: “Em gutpela blesing tru long mekim gut bel bilong ol.”

Ol Sumatin Bilong Baibel i pilim olsem em i bikpela samting tru long tingim gut tok bilong Jisas i stap long Luk 10:2: “Planti kaikai i mau pinis, tasol i no gat planti wokman.” Taim yia i pinis, ol i tingting strong tru long autim gutnius bilong Kingdom i go long olgeta hap bilong graun.