“SAPOS wanpela bilong yupela i no laik pait long ol Frans o Inglan, yupela olgeta i mas dai!” Wanpela ofisa bilong lain Natsi i bikmaus na mekim dispela tok long ol Witnes Bilong Jehova long taim bilong Wol Woa 2. Maski wanpela lain polis bilong Hitler ol i kolim SS i sanap i stap klostu na ol i holim ol gan, i no gat wanpela bilong ol dispela brata i wanbel long brukim ol lo bilong Jehova. Ol i strongim bel tru! Dispela eksampel i kamapim klia tingting yumi ol Witnes Bilong Jehova i holim: Yumi no laik insait long ol pait bilong dispela graun. Maski ol i laik kilim yumi i dai, yumi no sapotim ol pait bilong dispela graun.

1. OL MANMERI BILONG GOD I BILONG WANPELA LAIN

Long bipo, Jehova i bungim ol manmeri bilong em i kamap wanpela lain, em lain Israel. Em i tok long ol Israel olsem “spesel lain bilong [em] namel long olgeta lain manmeri.” (Kis. 19:5) Na tu, God i givim ol wanpela graun we em yet i makim. Olsem na taim God i tokim ol Israel long i go pait long ol narapela lain, ol i no pait na kilim i dai ol man i lotuim Jehova, nogat. *

Long nau, ol manmeri i lotuim Jehova “ol i bilong olgeta kantri na olgeta traib na olgeta lain pipol na olgeta tokples.” (Rev. 7:9) Sapos ol manmeri bilong God i insait long ol pait, orait ol inap pait long ol wanbilip bilong ol, na tu, kilim ol i dai.

 2. JEHOVA I TOKIM OL ISRAEL LONG MEKIM PAIT

Long bipo, Jehova i save makim wanem taim na bilong wanem ol Israel i mas mekim pait. Olsem, God i bin tokim ol Israel long i go pait long lain Kenan bilong kamapim kot bilong em bikos ol i save lotuim ol dimon, mekim ol pasin pamuk i nogut tru, na kukim ol pikinini long paia olsem ofa. Jehova i tokim ol Israel long rausim ol dispela manmeri em ol i mekim ol pasin nogut tru long graun em i tok promis long givim long ol. (Wkp. 18:24, 25) Bihain long lain Israel i go sindaun long Graun Bilong Promis, sampela taim God i tokim ol long i go pait long ol birua bilong ol bilong lukautim ol yet. (2 Sml. 5:17-25) Maski i olsem, i no gat wanpela taim Jehova i larim ol Israel yet i mekim disisen long i go long pait. Taim ol i mekim olsem, planti taim dispela i save kamapim bikpela hevi.​—Nam. 14:41-45; 2 Sto. 35:20-24.

Long nau, Jehova i no tokim ol man long i go long pait. Ol kantri i save pait bilong mekim samting ol man i laikim na i no samting God i laikim. Ating ol i kirapim ol pait bikos ol i laik kisim planti hap graun, kisim planti mani, o bilong strongim wanpela tingting bilong politik. Tasol olsem wanem long ol lain em ol i tok ol i mekim pait long nem bilong God bilong lukautim lotu bilong ol o bilong kilim i dai ol birua bilong God? Jehova bai lukautim ol lain i lotu tru long em na em bai bagarapim na pinisim ol birua bilong em long wanpela pait bai kamap bihain, em pait bilong Armagedon. (Rev. 16:14, 16) Ami bilong God long heven bai insait long dispela pait, na i no ol wokman bilong em hia long graun.​—Rev. 19:11-15.

3. OL ISRAEL I NO KILIM I DAI OL MAN I BILIP LONG JEHOVA

Long bipo, planti taim ami bilong Israel i save mekim pasin marimari long ol man i bilip long God na ol i save kilim i dai tasol ol lain em Jehova i tok i stret long ol i mas i dai. Skelim tupela eksampel. Maski Jehova i tokim ol Israel long daunim Jeriko, ol i no kilim i dai Rahap na famili bilong em bikos em i bilip. (Jos. 2:9-16; 6:16, 17)  Bihain, olgeta manmeri long taun Gibeon i abrusim bagarap bikos lain Gibeon i soim olsem ol i pret long God.​—Jos. 9:3-9, 17-19.

Long nau, ol kantri em ol i laik pait long ol narapela kantri, ol i no save marimari long ol lain i soim olsem ol i bilip long God. Na sampela taim, ol sitisen i no gat asua i save dai taim tupela kantri i pait.

4. OL ISRAEL I MAS BIHAINIM OL LO BILONG GOD LONG MEKIM PAIT

Long bipo, Jehova i laik bai ol soldia bilong Israel i bihainim instraksen em i givim long ol long sait bilong mekim pait. Olsem, sampela taim God i tokim ol long tokaut long ol birua lain olsem ol i laik “kamap wanbel wantaim [ol].” (Lo 20:10) Na tu, Jehova i laik bai ol soldia bilong Israel i stap klin long sait bilong bodi na long bel na tingting. (Lo 23:9-14) Taim ol ami bilong ol kantri i stap klostu i go mekim pait, ol i save reipim ol meri bilong ol taun em ol i daunim, tasol Jehova i tambuim ol Israel long mekim olsem. Ol Israel i no ken maritim ol meri em ol i kisim i kam wantaim ol kalabus lain, tasol wanpela mun bihain long ol i bin pait na kisim dispela taun, orait ol i ken maritim ol.​—Lo 21:10-13.

Long nau, planti kantri i sainim ol intenesenel agrimen bilong mekim ol pait we i bihainim sampela lo. Maski ol dispela agrimen i bilong lukautim ol manmeri, sori tru olsem planti taim ol i brukim ol lo bilong dispela agrimen.

5. GOD I MEKIM PAIT BILONG LUKAUTIM LAIN BILONG EM

Long bipo, Jehova i bin mekim pait bilong lukautim ol Israel, planti taim em i wokim ol mirakel bilong helpim ol long winim ol pait. Olsem, hau Jehova i bin helpim ol Israel long daunim taun Jeriko? Jehova i tok na ol Israel “i singaut strong bilong mekim pait, na banis bilong taun i pundaun i kam daun long graun,” dispela i mekim na em isi long ol i kisim taun. (Jos. 6:20) Na hau ol i winim pait long lain Amon? “Jehova i salim bikpela ren ais i kam daun long skai olsem ston na i pundaun antap long ol . . . Namba bilong ol man i dai long dispela ren ais i winim namba bilong ol man em ol Israel i kilim i dai long bainat.”​—Jos. 10:6-11.

OL KRISTEN TRU I SAVE KAMAPIM PASIN WANBEL

Olsem yumi skelim pinis, ol samting long taim bilong yumi i no wankain long taim bilong lain Israel bilong bipo. Tasol ol dispela samting tasol i no as na yumi no save insait long pait. I gat ol narapela risen tu. Olsem, God i tok profet olsem long taim bilong las de, ol man i kisim skul long Em ol bai i no “skul moa long pait,” na ol i no inap insait tu long mekim pait. (Ais. 2:2-4) Na tu, Krais i tok ol disaipel bilong em bai i “no insait long ol samting bilong dispela graun”; ol bai i no inap sapotim ol pait bilong dispela graun.​—Jon 15:19.

Krais i tokim ol disaipel bilong em long mekim sampela samting moa. Em i tokim ol long sakim ol pasin i save kirapim man long bel nogut, belhat, na pait. (Mat. 5:21, 22) Na tu, em i kirapim ol disaipel bilong em long kamap “ol man bilong mekim i dai kros” na laikim ol birua bilong ol.​—Mat. 5:9, 44.

Olsem wanem long yumi wan wan? Tru, yumi no gat laik long insait long ol woa. Tasol olsem wanem? Long bel yumi gat pasin bilong bel nogut we inap mekim yumi kros o brukim lain insait long kongrigesen? Yumi mas wok strong yet long rausim ol dispela kain pasin i stap insait long yumi.​—Jems 4:1, 11.

Yumi no insait long jonim ol kantri long pait, nogat. Yumi strongim pasin wanbel na pasin laikim namel long yumi. (Jon 13:34, 35) Yumi ken tingting strong long no ken insait long ol samting bilong politik taim yumi luk fowed long taim we Jehova bai pinisim tru pasin bilong pait.​—Sng. 46:9.