1. Wanpela ensel i wok long tok wanem, na dispela i mas kirapim yumi long mekim wanem?

 SAPOS wanpela ensel i laik toktok long yu, yu ting yu bai putim yau long tok bilong em? Long nau, wanpela ensel i wok long toktok “long olgeta kantri, long olgeta traib, long olgeta tokples na long olgeta lain pipol.” Em i tok wanem? Em i tok: “Yupela i mas pret long God na givim glori long em, . . . yupela i mas lotuim dispela Man husat i wokim skai na graun.” (Rev. 14:​6, 7) Jehova wanpela tasol em i God tru na olgeta man i mas lotuim em. Yumi tenkyu tru olsem em i givim rot long yumi long lotuim em long bikpela tempel spirit bilong em!

2. Tempel spirit bilong Jehova em i wanem samting? (Lukim tu blok “ Samting Em i No Makim.”)

² Dispela tempel spirit em i wanem samting, na yumi inap kisim helpim we bilong kliagut long en? Dispela tempel spirit em i no wanpela bilding tru tru. Dispela tempel em arensmen Jehova i putim bilong yumi ken lotu long em long pasin em i orait long en long rot bilong ofa bilong Jisas Krais. Aposel Pol i stori gut long dispela arensmen long pas em i raitim i go long ol Kristen Hibru long taim bilong ol aposel long Judia. b

3-4. Pol i tingting planti long wanem samting long ol Kristen Hibru long Judia, na em i helpim ol olsem wanem?

³ Wai na Pol i raitim pas i go long ol Kristen Hibru long Judia?  Ating i gat tupela risen na em i mekim olsem. Namba 1, em bilong strongim ol. Planti bilong ol i kamap bikpela insait long lotu Juda. Ating ol hetman bilong lotu bilong ol long bipo i tok bilas long ol i kamap ol Kristen. Bilong wanem? Bikos ol Kristen i no gat gutpela tempel bilong ol i ken go long en bilong mekim lotu, i no gat alta bilong ol i ken mekim ol ofa i go long God, na i no gat ol pris bilong mekim ol wok lotu bilong ol. Dispela inap mekim na ol disaipel bilong Krais i bel hevi na ol inap kamap slek long bilip. (Hib. 2:1; 3:​12, 14) Ating dispela i traim sampela bilong ol long go bek long lotu Juda.

⁴ Namba 2, Pol i tokim ol dispela Kristen Hibru olsem ol i no wok strong long kliagut long ol nupela o ol strongpela tok i tru, em ol “strongpela kaikai” i stap long Tok Bilong God. (Hib. 5:​11-14) I klia tru olsem, sampela bilong ol i bihainim yet Lo Bilong Moses. Olsem na Pol i stori gut long ol olsem ol ofa ol i mekim olsem Lo i makim, dispela i no inap rausim olgeta sin bilong ol. Em as na God i “rausim dispela lo.” So Pol i kirap long skulim ol long sampela strongpela tok i tru. Em i kirapim ol wanbilip Kristen bilong em long tingim samting “i gutpela moa, em samting [ol i] bilip na wet long en” long rot bilong ofa bilong Jisas, na dispela i ken helpim ol long i go “klostu long God.”—Hib. 7:​18, 19.    

5. Yumi mas kliagut long wanem samting long Baibel buk bilong Hibru, na bilong wanem?

⁵ Pol i stori gut long ol bratasista bilong em long Hibru olsem pasin bilong ol long mekim lotu Kristen, dispela i gutpela moa winim pasin bilong ol long mekim lotu Juda bilong bipo. Pasin bilong lotu em ol Juda i bihainim long bipo “i olsem sedo tasol bilong ol samting bai kamap bihain, tasol Krais em i samting tru.” (Kol. 2:17) Sedo bilong wanpela samting em i sedo nating na em i no dispela samting tru. Olsem tasol, pasin ol Juda i bihainim bilong mekim lotu long bipo, dispela i olsem sedo tasol bilong samting tru bai kamap bihain. Yumi mas kliagut long arensmen em Jehova i putim pinis bilong fogivim ol sin bilong yumi na bai yumi ken mekim lotu we em i orait long en. Yumi ken skelim dispela “sedo tasol” (lotu Juda bilong bipo i olsem sedo tasol) wantaim “samting tru” (lotu Kristen em samting tru), olsem Buk Hibru i stori long en. Taim yumi mekim olsem, yumi bai kliagut long tempel spirit i makim wanem samting, na olsem wanem yumi insait long en.

6. Ol i save yusim haus lotu sel bilong mekim wanem?

⁶ Lotu Juda bilong bipo i olsem sedo tasol. Pol i kirapim tok bilong em na em i stori long haus lotu sel em Moses i bin wokim long 1512 B.C.E. (Lukim sat “Lotu Juda Bilong Bipo i Olsem Sedo Tasol—Lotu Kristen Em Samting Tru.”) Pastaim, ol Israel i save karim haus lotu sel i go wantaim ol long ol hap ol i go long en. Ol i bin yusim dispela haus lotu sel inap 500 yia i go inap long ol i wokim wanpela tempel long Jerusalem. (Kis. 25:​8, 9; Nam. 9:22) Dispela “haus sel bilong bung” em ples we ol Israel i save go bung bilong lotu long God na mekim ol ofa bilong ol. (Kis. 29:​43-46) Tasol dispela haus lotu sel i makim wanpela samting i gutpela moa we bai painim ol Kristen long bihain.

7. Wanem taim dispela tempel spirit i kamap samting tru?

⁷ Lotu Kristen em samting tru. Haus lotu sel bilong bipo em i “sedo tasol bilong ol samting bilong heven,” na em i olsem piksa i makim bikpela tempel spirit bilong Jehova. Pol i tok “dispela haus sel [o, haus lotu sel] em i piksa bilong ol samting i kamap long dispela taim nau.” (Hib. 8:5; 9:9) So taim Pol i raitim pas i go long ol Hibru, dispela tempel spirit i stap pinis olsem samting tru long ol Kristen. Em i kamap samting tru long 29 C.E. Long dispela yia, Jisas i kisim baptais, God i makim em long holi spirit, na em i kirap mekim wok olsem “bikpela hetpris” bilong Jehova long tempel spirit bilong em. c—Hib. 4:14; Apo. 10:​37, 38.

8-9. Olsem Hibru 7:​23-27 i kamapim, wanem samting i no wankain long ol hetpris bilong lain Israel na bikpela Hetpris, Jisas Krais?

⁸ Lotu Juda bilong bipo i olsem sedo tasol. Hetpris i save makim maus bilong ol manmeri long mekim ofa i go long God. Jehova i makim Aron olsem namba wan hetpris bilong lain Israel taim ol i bin dediketim haus lotu sel. Tasol olsem Pol i stori gut, “bipo planti i bin kamap pris, tasol ol i no inap stap pris longpela taim, long wanem, ol i save dai na narapela i mas kisim ples bilong ol.” d (Ritim Hibru 7:​23-27.) Na ol dispela hetpris ol i no gutpela olgeta, olsem na ol i mas mekim ol ofa bilong God i ken tekewe sin bilong ol yet tu. Dispela em samting i no wankain long ol hetpris bilong lain Israel na bikpela Hetpris, Jisas Krais.

⁹ Lotu Kristen em samting tru. Jisas Krais em i Hetpris bilong yumi, na em i “wokman bilong . . . dispela trupela haus sel em Jehova yet i bin sanapim, na i no ol man.” (Hib. 8:​1, 2) Pol i tok “Jisas i stap oltaim oltaim, olsem na i no gat wok long narapela i kisim ples bilong em na mekim wok pris.” Pol i tok moa olsem Jisas em i “klin olgeta, em i narapela kain long ol sinman” na em i no wankain olsem ol hetpris bilong lain Israel em “long olgeta de ol . . . i save ofaim sakrifais bilong tekewe sin bilong ol yet. . . . Tasol Jisas i no gat wok long mekim olsem” bilong tekewe sin bilong em yet. Nau skelim ol samting i no wankain long ol alta na ol ofa bilong lotu Juda bilong bipo na lotu Kristen.

10. Ol ofa ol i save mekim antap long kopa alta i kamapim klia wanem samting?

¹⁰ Lotu Juda bilong bipo i olsem sedo tasol. Ausait long dua bilong haus lotu sel i gat wanpela kopa alta em ol i save ofaim ol animal i go long Jehova long en. (Kis. 27:​1, 2; 40:29) Tasol ol dispela ofa i no inap pinisim tru olgeta sin bilong ol manmeri. (Hib. 10:​1-4) Pasin bilong ol Israel long ofaim animal olgeta taim long haus lotu sel i kamapim klia olsem ol i nidim wanpela  ofa tasol bilong God i ken pinisim tru olgeta sin bilong ol manmeri.

11. Jisas i givim em yet olsem ofa long wanem alta? (Hibru 10:​5-7, 10)

¹¹ Lotu Kristen em samting tru. Jisas i save olsem Jehova i salim em i kam long dispela graun bilong givim laip bilong em olsem ofa bilong baim bek ol man. (Mat. 20:28) Olsem na taim Jisas i kisim baptais, em i givim laip bilong em yet bilong mekim laik bilong Jehova. (Jon 6:38; Gal. 1:4) Jisas i ofaim em yet long wanpela alta, dispela alta em i no alta tru tru, nogat. Dispela alta i makim “laik” bilong God olsem Pikinini bilong em i mas ofaim laip bilong em olsem wanpela man i gutpela olgeta. Jisas i givim laip bilong em “wanpela taim tasol bilong oltaim oltaim” bilong baim bek, o karamapim olgeta, ol sin bilong olgeta manmeri husat i bilip long Krais. (Ritim Hibru 10:​5-7, 10.) Bihain, yumi bai stori long ol samting insait long haus lotu sel i makim wanem samting.

12. Husat inap i go insait long Rum Holi na Rum Holi Tru long haus lotu sel?

¹² Lotu Juda bilong bipo i olsem sedo tasol. Haus lotu sel na ol tempel em bihain ol i wokim long Jerusalem, insait bilong ol i wankain. Long insait i gat tupela rum—“Rum Holi” na “Rum Holi Tru”—na i gat wanpela bikpela keten i seperetim dispela tupela rum. (Hib. 9:​2-5; Kis. 26:​31-33) Insait long Rum Holi i gat wanpela gol lamsten, alta bilong smok i gat gutpela smel, na tebol bilong putim bret i save stap long ai bilong God. Ol pris em ol i bin “anointim,” ol tasol i ken i go insait long Rum Holi bilong mekim ol wok lotu bilong ol. (Nam. 3:​3, 7, 10) Insait long  Rum Holi Tru i gat Bokis Kontrak we i makim olsem Jehova i stap wantaim ol. (Kis. 25:​21, 22) Hetpris tasol i ken i go insait long Rum Holi Tru long De Bilong Karamapim Sin long olgeta yia. (Wkp. 16:​2, 17) Long olgeta wan wan yia, em i save go insait long dispela rum wantaim blut bilong animal bilong karamapim sin bilong em yet na bilong lain Israel. Bihain long rot bilong holi spirit, Jehova i kamapim klia wan wan hap bilong haus lotu sel i makim wanem samting.—Hib. 9:​6-8. e

13. Rum Holi na Rum Holi Tru long haus lotu sel i makim wanem samting long lotu Kristen?

¹³ Lotu Kristen em samting tru. Long rot bilong holi spirit, Jehova i makim sampela disaipel bilong Krais na ol i pas gut tru wantaim Em. Dispela lain 144,000, ol bai mekim wok pris wantaim Jisas long heven. (Rev. 1:6; 14:1) Rum Holi long haus lotu sel i makim olsem God i adoptim ol dispela lain olsem pikinini bilong em taim ol i stap yet long graun. Em i mekim olsem long rot bilong anointim ol long holi spirit. (Rom 8:​15-17) Rum Holi Tru long haus lotu sel i makim heven, em ples Jehova i stap long en. “Dispela keten” i seperetim Rum Holi na Rum Holi Tru i makim bodi bilong Jisas olsem wanpela man long graun we i bin pasim em long go insait long heven olsem bikpela Hetpris bilong tempel spirit. Taim Jisas i givim bodi bilong em long graun olsem ofa bilong baim bek ol man, em i opim rot long olgeta Kristen God i bin makim inap kisim laip long heven. Ol dispela Kristen tu i mas dai bambai ol i ken lusim bodi bilong ol long graun na kisim gutpela pe bilong ol long heven. (Hib. 10:​19, 20; 1 Kor. 15:50) Bihain long Jisas i kirap bek, em i go insait long Rum Holi Tru long tempel spirit, bihain olgeta Kristen God i bin makim i joinim em.

14. Olsem Hibru 9:​12, 24-26 i kamapim, wanem samting i mekim na arensmen bilong tempel spirit bilong Jehova i gutpela moa?

¹⁴ Yumi lukim klia olsem arensmen Jehova i putim bilong mekim lotu i tru long rot bilong ofa bilong baim bek man na wok pris bilong Jisas Krais, dispela i gutpela moa. Hetpris bilong lain Israel i kisim blut bilong animal em ol i bin ofaim i go insait long Rum Holi Tru em ol man i bin wokim long han, tasol Jisas i go “insait long heven stret,” em ples i holi tru, bilong i go kamap long ai bilong Jehova. Long dispela hap em i givim pe bilong gutpela laip bilong em bilong helpim yumi, “em i mekim olsem bilong rausim sin long rot bilong givim em yet olsem sakrifais.” (Ritim Hibru 9:​12, 24-26.) Ofa bilong Jisas em i nambawan ofa tru we i tekewe sin bilong yumi inap oltaim oltaim. Nau yumi bai kisim save olsem, maski yumi bilip long kisim laip long heven o long graun, yumi olgeta i ken lotuim Jehova long tempel spirit bilong em.   

15. Husat i mekim wok long ples bung bilong haus lotu sel?

¹⁵ Lotu Juda bilong bipo i olsem sedo tasol. Haus lotu sel i gat wanpela ples bung—open eria i raunim haus lotu sel na i gat banis, ol pris i save mekim wok lotu bilong ol long dispela hap. Bikpela kopa alta bilong kukim ol ofa i stap insait long ples bung, na i gat wanpela kopa dis i gat wara long en we ol pris i save yusim bilong wasim ol yet paslain long ol i mekim ol wok holi. (Kis. 30:​17-20; 40:​6-8) Tasol ol tempel em ol i bin wokim long bihain, i gat narapela bikpela ples bung ausait long tempel we ol man em ol i no pris i ken sanap na mekim lotu long God.

16. Husat i mekim wok long liklik ples bung na long bikpela ples bung long tempel spirit?

¹⁶ Lotu Kristen em samting tru. Paslain long liklik lain brata bilong Krais i go long heven na mekim wok pris wantaim Jisas, ol i mekim wok  long liklik ples bung long tempel spirit hia long graun. Dispela bikpela dis i gat wara long en, em i bikpela samting bilong kirapim ol dispela liklik lain na olgeta Kristen long tingim olsem ol i mas stap klin long bodi na long sait bilong bilip. Orait “bikpela lain manmeri,” em ol i stap gut long sapotim ol brata bilong Krais em God i bin makim, ol i save mekim lotu bilong ol long wanem hap? Aposel Jon i lukim ol “i sanap i stap long ai bilong sia king,” long graun dispela i makim bikpela ples bung, na “long san na long nait ol i mekim wok bilong [God] long tempel bilong em.” (Rev. 7:​9, 13-15) Yumi amamas tru olsem yumi inap insait long dispela arensmen bilong Jehova long mekim lotu i tru!

17. Yumi amamas tru olsem yumi inap givim wanem ol ofa long Jehova?

¹⁷ Long nau, olgeta Kristen i amamas tru olsem ol inap givim ol ofa i go long Jehova long rot bilong yusim taim, strong, na mani samting bilong ol long mekim bikpela wok moa bilong Kingdom Bilong God. Olsem aposel Pol i tokim ol Kristen Hibru, “oltaim yumi mas givim biknem long God long rot bilong Jisas. Dispela i olsem sakrifais yumi givim long God. Yumi yusim maus bilong yumi long tokaut long nem bilong em.” (Hib. 13:15) Yumi ken soim olsem yumi amamas tru long gutpela blesing yumi kisim bilong lotuim Jehova long rot bilong givim em ol nambawan gutpela ofa.

18. Olsem Hibru 10:​22-25 i kamapim, yumi no ken lusim wanem pasin, na yumi no ken lusim tingting long wanem samting?

¹⁸ Ritim Hibru 10:​22-25. Long pinis bilong pas em Pol i raitim i go long ol Hibru, em i kolim sampela pasin bilong lotu em yumi no ken lusim. Dispela i makim pasin bilong beten long Jehova, autim tok long ol samting yumi bilip na wet long en, bung wantaim long ol miting bilong kongrigesen, na strongim narapela narapela na mekim olsem “moa yet taim yumi lukim dispela de [bilong Jehova] i kam klostu.” Long pinis bilong Buk Revelesen, ensel bilong Jehova i mekim dispela tok tupela taim olsem: “Yu mas lotuim God tasol!” (Rev. 19:10; 22:9) Yumi no ken tru lusim tingting long dispela strongpela tok i tru bilong bikpela tempel spirit bilong Jehova na blesing yumi kisim bilong lotuim nambawan gutpela God bilong yumi!