Planti taim lain Israel i kaikai mana taim ol i raun long ples wesan nating inap 40 yia. (Kis. 16:35) Na inap tupela taim Jehova i givim pisin kweil long ol long kaikai. (Kis. 16:​12, 13; Nam. 11:31) Tasol lain Israel i gat sampela narapela kaikai tu em ol i save kaikai.

Olsem, sampela taim Jehova i bringim ol manmeri bilong em i go long “ples bilong wokim kem” we i gat wara na kaikai samting bilong ol i ken kisim. (Nam. 10:33) Wanpela bilong ol dispela ples em klostu long ol hulwara bilong Elim, we “i gat 12-pela hulwara na 70 diwai pam”—ating em ol diwai deit. (Kis. 15:27) Wanpela buk (Plants of the Bible) i tok olsem ol diwai deit “i save gro long planti hap, . . . em nambawan diwai we ol man i save kisim kaikai long en long ples drai, em i save kamapim kaikai, oil, na em i stap olsem malur bilong planti milion manmeri.”

Ating ol Israel i wokim kem tu long wanpela hap i gat bikpela wara em nau ol i kolim olsem Feiran, em hap bilong Wadi Feiran. a Wanpela buk (Discovering the World of the Bible) i tok dispela wadi, o ples we planti liklik hanwara i ron, em i “longpela inap 130 kilomita na em i wanpela bilong ol longpela wadi tru, em i luk nais tru, na em i wanpela wadi we planti man i save laikim long Sainai.” Buk i tok moa olsem: “Long dispela wadi, kirap long maus bilong en na i go insait inap 4.8 kilomita, i gat ol naispela pam i raunim dispela Hulwara Bilong Feiran o Feiran Oasis, na em i stap antap long mak bilong solwara inap 610 mita. Em i gaden Iden bilong Sainai. Planti tausen diwai deit i stap long dispela hap na planti man i save go sindaun long dispela hap kirap long bipo yet na i kam inap long nau.”

Taim lain Israel i lusim Isip, ol i karim ol plaua em ol i tanim wantaim wara, ol boul bilong tanim plaua, na ating sampela wit na bali samting, na oil. Tru ol dispela samting i no stap longpela taim. Na tu, ol manmeri i kisim “planti lain sipsip na meme na bulmakau i go wantaim ol.” (Kis. 12:​34-39) Tasol ples wesan nating em i drai na i no gutpela tumas, olsem na ating planti animal bilong ol i dai. Na tu, ating lain Israel i kilim sampela animal bilong kaikai. Sampela narapela ol i givim olsem ofa, ating ol i ofaim tu long ol giaman god bilong ol. b (Apo. 7:​39-43) Maski i olsem, lain Israel i gat sampela animal i stap yet, olsem yumi  lukim long tok Jehova i mekim long ol taim ol i bikhet long em, olsem: “Ol pikinini man bilong yupela bai lukautim ol sipsip long dispela ples nating inap 40 yia.” (Nam. 14:33) So i luk olsem ol i kisim milk long ol animal bilong ol, na sampela taim ol i kilim animal na kaikai mit bilong en, tasol dispela i no inap long olgeta 3 milion manmeri insait long 40 yia. c

Ol animal i kisim kaikai na wara long wanem hap? d Long dispela taim bipo, ating planti taim ren i save pundaun na i gat planti gras samting long ples wesan nating. Buk Insight on the Scriptures, Volium 1, i tok insait long 3,500 yia i go pinis, “i gat planti wara tru long Arebia winim wara i stap long en long nau. I gat planti baret wara i drai i stap em pastaim wara i save ron long ol na dispela i soim olsem sampela taim long bipo i gat planti ren tru i bin pundaun na dispela i bin kamapim ol dispela hanwara.” Maski i olsem, ples wesan nating em i drai na em ples nogut tru. (Lo 8:​14-16) Sapos Jehova i no bin wokim mirakel na givim wara long ol, ating lain Israel na ol animal bilong ol tu bai dai na pinis olgeta.—Kis. 15:​22-25; 17:​1-6; Nam. 20:​2, 11.

Moses i tokim lain Israel olsem Jehova i givim ol mana na “bai [ol] i ken save olsem man i no inap stap laip long bret tasol, nogat. Em i mas bihainim olgeta tok i kamap long maus bilong Jehova.”—Lo 8:3.