STADI ATIKOL 43
SINGSING 90 Strongim Bel Bilong Narapela Narapela
Daunim Pasin Bilong Holim Tupela Tingting
“Skelim olgeta samting, bai yupela i ken save olsem ol i stret o nogat.”—1 TES. 5:21.
SKUL YUMI BAI KISIM
Hau yumi ken rausim pasin bilong holim tupela tingting long wok bilong Jehova yumi mekim.
1-2. (a) Wanem sampela samting em ol wokman bilong Jehova inap holim tupela tingting long en? (b) Yumi bai stori long wanem samting long dispela atikol?
YUMI olgeta i save holim tupela tingting a sampela taim. Olsem, piksaim long tingting wanpela yangpela Witnes i holim tupela tingting olsem Jehova i tingim em o nogat. Em inap holim tupela tingting long kisim baptais. O tingim wanpela brata, taim em i yangpela em i putim wok bilong Kingdom i stap nambawan na em i no kisim wanpela wok i gat bikpela pe. Nau em i gat bikpela krismas, na em i gat mani inap tasol bilong lukautim famili bilong em long ol samting ol i nidim. Em inap kisim tupela tingting olsem em i bin mekim gutpela disisen taim em i yangpela, o nogat. Piksaim long tingting wanpela lapun sista husat i no gat bikpela strong. Em inap bel hevi bikos nau em i no inap mekim ol samting em bipo em i bin mekim. Yu bin mekim ol kain askim long yu yet olsem: ‘Tru tru Jehova i tingim mi? Mi bin mekim gutpela disisen long daunim ol laik bilong mi yet long mekim wok bilong Jehova? Jehova inap yusim mi long mekim yet wok bilong em?’
2 Sapos yumi no traim long painim bekim bilong ol kain askim olsem, dispela inap mekim na yumi no bilip moa long Jehova, na tu, yumi inap stop long lotuim em. Long dispela atikol, yumi bai stori long hau pasin bilong skelim ol stiatok bilong Baibel inap helpim yumi sapos yumi holim tupela tingting olsem (1) Jehova i no tingim yumi, (2) ol disisen yumi mekim long bipo ol i gutpela o nogat, na (3) Jehova i no inap yusim yumi moa.
STRETIM PASIN BILONG HOLIM TUPELA TINGTING
3. Wanem wanpela rot yumi ken stretim pasin bilong holim tupela tingting?
3 Wanpela rot yumi ken stretim pasin bilong holim tupela tingting em long ritim Tok Bilong God long painim bekim bilong ol askim bilong yumi. Sapos yumi mekim olsem, pasin bilong yumi long bilip long Jehova na pasin pren bilong yumi wantaim em bai kamap strong moa na yumi bai redi long “sanap strong long bilip.”—1 Kor. 16:13.
4. Olsem wanem yumi ken “skelim olgeta samting, bai [yumi] ken save olsem ol i stret o nogat”? (1 Tesalonaika 5:21)
4 Ritim 1 Tesalonaika 5:21. Baibel i kirapim yumi long “skelim olgeta samting, bai [yumi] ken save olsem ol i stret o nogat.” Hau yumi ken mekim olsem? Yumi ken skelim ol samting yumi bilip long en olsem ol i tru o nogat long rot bilong skelim ol wantaim ol tok Baibel i mekim. Olsem, tingim stori bilong dispela yangpela man husat i holim tupela tingting olsem God i no tingim em. Yu ting em i mas lusim tasol dispela askim i stap na i no kisim bekim bilong en? Nogat, em i mas “skelim olgeta samting, bai [em] i ken save olsem ol i stret o nogat” long rot bilong kisim tingting bilong Jehova long dispela samting.
5. Olsem wanem yumi ken kisim tingting bilong Jehova long ol askim bilong yumi?
5 Taim yumi ritim Tok Bilong God, i olsem yumi harim Jehova i toktok long yumi. Tasol bilong kisim tingting bilong em long wanpela askim yumi gat, yumi yet i mas mekim sampela samting. Yumi mas mekim wok painimaut na stadi long ol skripsa i stori stret long dispela askim yumi gat. Yumi ken mekim wok painimaut long dispela topik long rot bilong yusim ol tul bilong mekim stadi em oganaisesen bilong Jehova i redim. (Prov. 2:3-6) Yumi ken beten askim Jehova long stiaim yumi taim yumi mekim olsem na helpim yumi long luksave long tingting bilong em long askim bilong yumi. Na bihain, yumi ken painim ol stiatok bilong Baibel na sampela moa infomesen em yumi ken bihainim we i stret long askim yumi gat. Na tu, yumi inap kisim helpim taim yumi skelim stori bilong ol man long Baibel em ol tu i bin pilim wankain olsem yumi.
6. Olsem wanem ol miting i save helpim yumi long daunim pasin bilong holim tupela tingting?
6 Long rot bilong ol miting tu, i olsem yumi save harim Jehova i toktok long yumi. Sapos oltaim yumi go long ol miting, yumi inap harim wanpela tok o bekim bilong wanpela long odiens na em samting yumi nidim bilong daunim tupela tingting yumi holim. (Prov. 27:17) Nau yumi ken stori long hau yumi ken daunim pasin bilong holim tupela tingting long sampela samting.
HOLIM TUPELA TINGTING OLSEM JEHOVA I NO TINGIM YU
7. Sampela inap i gat wanem askim?
7 Sampela taim yu bin tingting olsem, ‘Tru tru Jehova i tingim mi?’ Sapos yu pilim olsem yu samting nating, dispela inap mekim yu hatwok long bilip olsem yu inap kamap pren bilong Krieta bilong heven na graun. Ating King Devit tu i bin gat wankain tingting olsem. Em i pilim tru pasin bilong Jehova long tingim ol man nating, na em i askim olsem: “O Jehova, man em i wanem samting na yu save tingim em? Na pikinini bilong man em i wanem samting na yu save lukautim em?” (Sng. 144:3) Yu inap kisim bekim bilong dispela askim long we?
8. Olsem 1 Samuel 16:6, 7, 10-12 i kamapim, Jehova i luksave long wanem samting long ol manmeri?
8 Baibel i skulim yumi olsem Jehova i save luksave long ol man em ol narapela i tingim ol olsem samting nating. Olsem, Jehova i salim Samuel i go long haus bilong Jesi long anointim wanpela pikinini man bilong em long kamap king bilong Israel long bihain. Jesi i gat 8-pela pikinini man, na em i singautim 7-pela i kam bungim Samuel, tasol em i no singautim Devit i kam, em laspela pikinini man bilong em. b Tasol Jehova i makim Devit long kamap king. (Ritim 1 Samuel 16:6, 7, 10-12.) Jehova i lukim bel bilong Devit, em i luksave olsem dispela yangpela man i save tingim tru ol samting bilong bilip.
9. Wai na yu ken bilip tru olsem Jehova i tingim yu? (Lukim tu piksa.)
9 Tingim ol rot we Jehova i kamapim klia pinis olsem em i tingim yu. Em i givim yu ol edvais we i stret tru long ol samting i kamap long laip bilong yu. (Sng. 32:8) Hau em inap mekim olsem sapos em i no save long yu? (Sng. 139:1) Taim yu bihainim edvais bilong Jehova na lukim hau dispela i helpim yu, yu bai bilip tru olsem Jehova i tingim yu. (1 Sto. 28:9; Apo. 17:26, 27) Jehova i luksave long ol hatwok bilong yu. Em i lukim ol pasin tru bilong yu na dispela i kirapim em long kamap Pren bilong yu. (Jer. 17:10) Em i laik yu mekim ol samting bilong kamap pren bilong em.—1 Jon 4:19.
“Sapos yu wok long painim [Jehova], em bai kamapim em yet long yu.”—1 Sto. 28:9 (Lukim paragraf 9) c
HOLIM TUPELA TINGTING LONG OL DISISEN YU MEKIM LONG BIPO
10. Taim yumi tingim ol disisen yumi mekim long bipo, yumi inap i gat wanem ol askim?
10 Sampela taim, sampela inap tingim ol disisen ol i mekim long bipo na kisim tupela tingting olsem ol i bin mekim gutpela disisen, o nogat. Ating ol i bin lusim wanpela gutpela wok mani o gutpela bisnis bilong ol na bai ol i ken givim bel moa long mekim wok bilong Jehova. Na ating ol i bin mekim olsem planti yia i go pinis. Na nau ol i lukim ol lain em ol i save long ol em ol i wok mani na i luk olsem ol i gat planti mani na ol i stap gut. Dispela inap mekim na ol i tingting olsem: ‘Mi bin mekim gutpela disisen long daunim ol laik bilong mi long mekim wok bilong Jehova? O dispela disisen bilong mi i mekim na mi mis-aut long planti samting?’
11. Wanem samting i mekim na man i raitim Buk Song 73 i bel hevi?
11 Sapos wankain ol askim i mekim na yu tingting planti, orait skelim hau man bilong raitim Buk Song 73 i bin pilim. Em i lukim olsem ol lain i no lotuim Jehova i luk olsem ol i stap helti, ol i gat planti mani kago, na ol i no wari long wanpela samting. (Sng. 73:3-5, 12) Taim em i lukim olsem ol i gat gutpela sindaun na ol i stap gut, em i pilim olsem ol hatwok bilong em long mekim wok bilong Jehova i lus nating. Dispela tingting i bagarapim bel bilong em “na long san na long nait, [em i] save kisim hevi.” (Sng. 73:13, 14) Em i mekim wanem long daunim dispela bel hevi bilong em?
12. Olsem Buk Song 73:16-18 i kamapim, hau man bilong raitim song i stretim tingting bilong em?
12 Ritim Buk Song 73:16-18. Man bilong raitim song i go long haus holi bilong Jehova, em ples we i pulap long bel isi. Long dispela hap, em i wokim gut tingting. Em i skelim gut na luksave olsem maski i luk olsem laip bilong sampela i no gat hatwok bilong en, ol i no bilip na wetim gutpela samting bai painim ol long bihain. Dispela stretpela tingting i mekim bel na tingting bilong em i stap isi, long wanem, em i save olsem em i bin mekim gutpela disisen tru long putim ol samting bilong lotu i stap nambawan. Olsem na em i strongim gen tingting bilong em long wok yet long mekim wok bilong Jehova.—Sng. 73:23-28.
13. Yu ken mekim wanem na bai bel na tingting bilong yu i stap isi sapos yu holim tupela tingting long ol disisen yu mekim long bipo? (Lukim tu piksa.)
13 Tok Bilong God i ken mekim isi bel na tingting bilong yu. Hau? Tingim ol gutpela blesing yu kisim, dispela i makim tu pasin bilong God long orait long yu, na skelim dispela wantaim samting bai painim ol man em ol i kisim amamas bilong sotpela taim tasol. Ating ol i bilip tru long wok mani, namba, na gutpela sindaun bilong ol long nau bikos ol i no wetim gutpela samting bai painim ol long bihain. Tasol yu no wankain olsem ol, Jehova i promis long givim yu ol blesing long bihain we i winim tru ol samting yu tingting long en. (Sng. 145:16) Na tu, tingim dispela: Yu ting tru tru yumi inap save long laip bilong yumi bai olsem wanem sapos yumi bin mekim ol narapela disisen long bipo? Yumi ken save tru olsem: Ol lain em ol i mekim ol disisen bikos ol i laikim God na laikim ol narapela, tru tru ol i no mis-aut long wanpela gutpela samting.
Lukluk i go long ol blesing em Jehova i tok promis long givim long yu long bihain (Lukim paragraf 13) d
HOLIM TUPELA TINGTING OLSEM JEHOVA I NO INAP YUSIM YU MOA
14. Sampela i bungim wanem ol hevi, na ol inap i gat wanem askim?
14 Sampela wokman bilong Jehova i karim hevi bilong i go lapun, no gat gutpela helt, o ol i gat wanpela bagarap long bodi. Dispela inap mekim na ol i pilim olsem ol i no gutpela inap long ai bilong Jehova. Ol inap askim olsem, ‘Jehova inap yusim mi long mekim yet wok bilong em?’
15. Man bilong raitim Buk Song 71 i bilip long wanem samting?
15 Man bilong raitim Buk Song 71 i kamapim wankain tingting olsem. Em i beten olsem: “Taim strong bilong mi i pinis, yu no ken givim baksait long mi.” (Sng. 71:9, 18) Maski em i gat dispela tingting, em i bilip yet olsem sapos em i stap gut long God na mekim wok bilong em, Jehova bai stiaim em na lukautim em. Em i lainim olsem Jehova i save amamas long ol man em ol i givim bes bilong ol long mekim wok bilong Em, maski ol i bungim sampela hatwok.—Sng. 37:23-25.
16. Long wanem ol rot Jehova inap yusim ol lapun bratasista? (Buk Song 92:12-15)
16 Ol lapun bratasista, holim wankain tingting olsem Jehova i gat long yupela. Em inap helpim yupela long kamap strong long bilip, maski yupela i gat sik o yupela i no gat strong long mekim planti samting. (Ritim Buk Song 92:12-15.) Putim tingting long ol samting yupela inap long mekim, na no ken tingting tumas long ol samting yupela i no inap long mekim. Olsem, yupela i ken strongim ol narapela long rot bilong ol gutpela eksampel bilong yupela na pasin bilong yupela long tingim ol. Yupela i ken stori long hau Jehova i helpim yupela long stap gut long em long ol yia i go pinis na strongpela bilip yupela i gat olsem Jehova bai inapim ol tok promis bilong em long bihain. Na tu, tingim olsem ol beten yupela i mekim bilong tingim ol narapela, dispela i gat bikpela strong. (1 Pita 3:12) Maski yumi gat wanem kain sindaun, yumi olgeta i ken mekim wok bilong Jehova na mekim ol samting bilong helpim ol narapela.
17. Wai na yumi mas sakim pasin bilong skelim yumi yet wantaim ol narapela?
17 Sapos yu bel hevi olsem yu no inap mekim planti samting moa long wok bilong Jehova, orait yu ken bilip tru olsem em i amamas long wanem ol wok em yu inap long mekim. Ating yu inap traim long skelim wok yu mekim wantaim wok ol narapela inap long mekim. Sakim dispela pasin! Bilong wanem? Bikos Jehova i no save skelim yumi wantaim ol narapela. (Gal. 6:4) Olsem, Maria i givim wanpela presen long Jisas, em sanda i gat bikpela pe. (Jon 12:3-5) Tasol wido meri husat i sot long ol samting, em i putim tupela liklik koin i gat liklik pe tru long boks mani long tempel. (Luk 21:1-4) Maski i olsem, Jisas i lukim olsem presen dispela tupela meri wantaim i givim i kamapim klia olsem ol i gat bilip. Papa bilong em Jehova, em i tingim tru ol samting yu mekim bikos yu bilip long em na yu laikim em, maski yu pilim olsem em liklik samting tasol.
18. Wanem samting bai helpim yumi long daunim pasin bilong holim tupela tingting? (Lukim tu blok “ Tok Bilong Jehova i Ken Helpim Yu Long Daunim Pasin Bilong Holim Tupela Tingting.”)
18 Sampela taim yumi olgeta i save holim tupela tingting. Tasol olsem yumi bin lainim, tok i tru bilong God long Baibel inap helpim yumi long daunim ol kain tingting olsem. So wok strong long painim bekim bilong ol askim yu gat, na taim yu mekim olsem yu bai no inap holim tupela tingting na wari long wanpela samting. Jehova i tingim tru yu. Em i amamas olsem yu daunim ol laik bilong yu long mekim wok bilong em na em bai inapim promis bilong em long givim gutpela pe long yu. Yu ken bilip tru olsem Jehova i tingim olgeta gutpela wokman bilong em na em i laikim ol tru.
SINGSING 111 Ol Samting Yumi Amamas Long En
a MINING BILONG TOK: Long dispela atikol, yumi bai stori long tupela tingting em yumi save kisim taim yumi tingim olsem yumi no gutpela long ai bilong Jehova, o yumi pilim olsem yumi no mekim ol gutpela disisen long bipo. Na em i no makim pasin bilong holim tupela tingting em Baibel i stori long en, we i soim olsem man i no bilip long Jehova na ol tok promis bilong em.
b Baibel i no kolim stret Devit i gat hamas krismas taim Jehova i makim em, tasol i luk olsem long dispela taim em i tineja.—Lukim Wastaua bilong Septemba 1, 2011, p. 29, par. 2.
