1-2. Wanem samting i kamap taim tupela disaipel bilong Jisas i wokabaut i go long Emeus?

 EM NISAN 16, 33 C.E. Ol disaipel bilong Jisas i pilim bikpela bel sori tru na ol i pret tu. Tupela disaipel i lusim Jerusalem na ol i wokabaut i go long Emeus, em wanpela viles i stap 11 kilomita longwe long Jerusalem. Dispela tupela man i bel hevi tru bikos Jisas, em man ol i stap disaipel bilong em, ol man i bin kilim em i dai pinis. Samting ol i bilip long Mesaia bai mekim, i luk olsem em i no inap kamap moa. Tasol tupela bai kirap nogut long samting ol bai lukim.

² Wanpela man i kam bungim ol na wokabaut wantaim ol. Tupela disaipel i stori long dispela man long bel hevi ol i pilim long samting i kamap long Jisas. Dispela man i stori wantaim ol long sampela tok we tupela bai i no inap lusim tingting long en. “Em i stat long ol rait bilong Moses na ol Profet” na em i stori long risen na Mesaia i mas karim pen na hevi na dai. Taim dispela 3-pela man i go kamap long Emeus, man i kam wokabaut wantaim ol i tokaut long em yet i husat—em Jisas husat i kirap bek pinis! Piksaim long tingting bikpela amamas tru em tupela disaipel i pilim taim ol i kisim save olsem Mesaia i stap laip.—Luk 24:​13-35.

3-4. Wanem samting i kamap long ol disaipel bilong Jisas, na yumi bai stori long wanem samting long dispela atikol? (Aposel 1:3)

³ Jisas i kamap long ol disaipel bilong em planti taim insait long dispela laspela 40 de bilong em long graun. (Ritim Aposel 1:3.) Long dispela haptaim, ol disaipel bilong Jisas em pastaim ol i bel sori na pret nogut tru, nau ol i kisim bikpela amamas tru, ol i gat  strongpela bel, na ol i redi long autim gutnius bilong Kingdom na skulim ol man. a

⁴ Yumi ken kisim gutpela helpim long rot bilong stadi long dispela haptaim long laip bilong Jisas. Long dispela atikol, yumi bai stori long hau Jisas i yusim dispela haptaim long (1) strongim ol disaipel bilong em, (2) helpim ol long kliagut moa long Ol Skripsa, na (3) trenim ol long mekim bikpela wok moa. Long olgeta wan wan, yumi bai kisim skul long hau yumi ken bihainim pasin bilong Jisas.

STRONGIM OL NARAPELA

5. Wai na ol disaipel bilong Jisas i mas kisim ol tok bilong strongim ol?

⁵ Ol disaipel bilong Jisas i mas kisim ol tok bilong strongim ol. Wai na yumi tok olsem? Bikos sampela i bin lusim haus bilong ol, famili bilong ol, na wok bisnis bilong ol bilong stap disaipel bilong Jisas fultaim. (Mat. 19:27) Ol narapela em ol man i bin luk daun long ol bikos ol i kamap disaipel bilong Jisas. (Jon 9:22) Ol i mekim ol dispela senis bikos ol i bilip olsem Jisas em dispela Mesaia em God i promis long salim i kam. (Mat. 16:16) Tasol taim ol man i kilim Jisas i dai, i luk olsem samting ol i bilip na wet long en i no inap kamap moa, na nau ol i bel hevi tru.

6. Jisas i mekim wanem bihain long em i kirap bek?

⁶ Jisas i lukim ol disaipel bilong em i stap bel sori, na em i no tingim dispela olsem ol i slek long bilip, nogat, em i kliagut olsem ol i bel hevi long em i dai. So long de stret we em i kirap bek, em i stat long strongim ol dispela pren bilong em. Olsem, em i kamap long Maria Makdala taim Maria i wok long krai i stap long matmat bilong em. (Jon 20:​11, 16) Na em i kamap tu long tupela disaipel em yumi stori long ol long kirap bilong dispela atikol. Na em i kamap long aposel Pita. (Luk 24:34) Yumi inap kisim wanem skul long eksampel bilong Jisas? Skelim samting i kamap taim Jisas i kamap long Maria Makdala.

7. Olsem Jon 20:​11-16 i stori long en, Jisas i lukim Maria i mekim wanem long bikmoning bilong Nisan 16, na dispela i kirapim Jisas long mekim wanem? (Lukim tu piksa.)

⁷ Ritim Jon 20:​11-16. Long bikmoning bilong Nisan 16, sampela meri em ol i stap gut long Jisas, ol i go long matmat bilong em we bodi  bilong em i stap long en. (Luk 24:​1, 10) Yumi ken stori long ekspiriens bilong wanpela bilong ol dispela meri em Maria Makdala. Taim Maria i go kamap long matmat bilong Jisas, em i lukim olsem matmat i emti. Em i ran i go tokim Pita na Jon na em i bihainim tupela taim ol i ran i go bek long matmat. Taim tupela man i lukim olsem matmat i emti, tupela i go bek long haus. Tasol Maria i no go bek. Em i stap long hap na em i wok long krai i stap. Em i no save olsem Jisas i wok long lukluk long em i stap. Jisas i lukim dispela bilipmeri i wok long krai long em i stap na em i pilim sori tru na em i laik mekim gut bel bilong em. So em i kamap long Maria na em i mekim wanpela samting we i strongim em tru. Jisas i toktok wantaim Maria na em i givim wanpela bikpela wok long em—em long go serim nius bilong kirap bek bilong em wantaim ol brata bilong em.—Jon 20:​17, 18.

8. Hau yumi ken bihainim pasin bilong Jisas?

⁸ Hau yumi ken bihainim pasin bilong Jisas? Yumi ken mekim sampela samting bilong kirapim ol bratasista bilong yumi long mekim yet wok bilong Jehova sapos yumi bihainim pasin bilong Jisas long kliagut moa long hevi bilong ol bratasista, na toktok wantaim ol long pasin we yumi pilim tru hevi bilong ol. Tingim stori bilong wanpela sista nem bilong em Jocelyn, susa bilong em i dai long wanpela eksiden. Em i tok: “Inap planti mun, mi bin krai sori na mi bin pilim bikpela bel pen tru.” Tasol wanpela brata na meri bilong em i singautim em i go long haus bilong tupela na ol i putim gut yau long em na helpim em long tingim olsem em i dia tumas long ai bilong God. Jocelyn i tok: “Mi pilim olsem Jehova i yusim tupela long pulim mi i kam ausait long solwara i raf tru na putim mi i go insait long laip bot. Ol i helpim mi long kisim bek amamas bilong mi long mekim wok bilong Jehova.” Yumi tu i ken strongim ol narapela long rot bilong putim gut yau long ol taim ol i kamapim hevi bilong ol, na mekim tok long pasin i soim olsem yumi pilim tru hevi bilong ol. Yumi laik mekim olsem bilong strongim ol na bai ol i ken mekim yet wok bilong God.—Rom 12:15.

HELPIM OL LONG KLIAGUT LONG OL SKRIPSA

9. Ol disaipel bilong Jisas i bungim wanem hevi na hau Jisas i helpim ol?

⁹ Ol disaipel bilong Jisas i kisim Tok Bilong God na ol i wok strong long bihainim long laip bilong ol. (Jon 17:6) Tasol ol i hatwok yet long bilip olsem Jisas i dai olsem wanpela raskol man antap long diwai pos. Jisas i luksave olsem ol i gat tupela tingting bikos ol i no kliagut long tok bilong Ol Skripsa, na i no bikos ol i sot long bilip. (Luk 9:​44, 45; Jon 20:9) So em i skulim ol long kliagut moa long Ol Skripsa. Skelim hau em i mekim olsem long taim em i kamap long tupela disaipel i wokabaut i go long Emeus.

10. Jisas i mekim wanem bilong helpim ol disaipel bilong em long luksave olsem tru tru em i Mesaia? (Luk 24:​18-27)

¹⁰ Ritim Luk 24:​18-27. Jisas i no hariap long tokim tupela disaipel em i bungim olsem em i Jisas. Tasol em i givim ol askim long ol. Wai na em i mekim olsem? Ating em i laik bai ol i tokim em long wanem samting tru i stap long bel na tingting bilong ol. Na ol i mekim olsem. Ol i tokim em olsem ol i ekspektim Jisas long kisim bek ol long han bilong hatpela gavman Rom. Bihain long ol i tokim em long ol samting ol i tingting long en, Jisas i yusim Ol Skripsa bilong helpim ol long kliagut long ol samting i kamap. b Long apinun bilong dispela de, Jisas i yusim dispela haptaim long strongim ol narapela disaipel bilong em long kliagut long ol dispela tok i tru. (Luk 24:​33-48) Yumi inap kisim wanem skul long dispela stori?

11-12. (a) Yumi inap kisim wanem skul long pasin bilong Jisas long skulim ol man long ol tok i tru bilong Baibel? (Lukim tu ol piksa.) (b) Baibel tisa bilong Nortey i helpim em olsem wanem?

 ¹¹ Hau yumi ken bihainim pasin bilong Jisas? Taim yumi skulim ol Baibel sumatin, pastaim yumi mas kamapim ol askim we bai kirapim ol long kamapim bel na tingting bilong ol. (Prov. 20:5) Taim yu kliagut long ol samting ol i pilim, soim ol long hau ol i ken painim ol skripsa bilong Baibel we i stret long ol samting i painim ol. Na sakim dispela laik bilong tokim ol long ol samting ol i mas mekim. Helpim ol long kliagut moa long ol tok bilong Baibel na hau ol i ken bihainim ol stiatok bilong en long laip bilong ol. Skelim ekspiriens bilong wanpela brata long Gana nem bilong em Nortey.

¹² Taim Nortey i gat 16 krismas, em i kirap long stadi long Baibel. Tasol i no longtaim, famili bilong em i birua long em. Wanem samting i helpim em long sanap strong? Baibel tisa bilong em i yusim Matyu sapta 10 bilong eksplenim long em olsem ol man bai mekim nogut long ol Kristen tru. Nortey i tok: “Taim famili bilong mi i birua long mi, dispela i mekim mi bilip tru olsem mi painim pinis tok i tru.” Na tu, tisa bilong em i helpim em long kliagut long tok bilong Matyu 10:16 na bai em i was gut na em i ken bihainim pasin rispek taim em i stori long ol samting bilong lotu long haus. Bihain long Nortey i baptais, em i laik mekim wok painia, tasol papa bilong em i laik em i go long yunivesiti. Tisa bilong Nortey i no tokim em long samting em i mas mekim, nogat, em i yusim ol askim long helpim em long kamapim tingting bilong em na bihain em i helpim em long kliagut long ol stiatok bilong Baibel. Wanem gutpela samting i kamap? Nortey i wokim disisen olsem em bai insait long fultaim sevis. Papa bilong em i rausim em long haus. Nortey i pilim olsem wanem long ol dispela samting i kamap long em? Em i tok: “Mi bilip tru olsem mi bin mekim rait disisen.” Taim yumi tu i lusim haptaim long helpim ol narapela long kliagut moa long ol tok bilong Baibel, dispela inap helpim ol long kamap ol strongpela Kristen.—Efe. 3:​16-19.

HELPIM OL LONG KAMAP “OL MAN OLSEM OL PRESEN”

13. Jisas i mekim wanem na bai i gat ol man bilong mekim yet wok bilong Papa bilong em? (Efesus 4:8)

¹³ Taim Jisas i stap long graun, em i mekim gut wok em Papa bilong em i givim em long mekim. (Jon 17:4) Tasol Jisas i no gat kain tingting  olsem, ‘Sapos yu laik bai wok i kamap gut, orait yu yet i mas mekim,’ nogat. Insait long 3 na hap yia em i autim tok, em i skulim ol narapela long mekim dispela wok. Paslain long Jisas i go bek long heven, em i givim wok long ol disaipel bilong em—sampela bilong ol i gat 20 krismas samting—long lukautim gut ol sipsip bilong Jehova na go pas long autim tok na skulim ol man. (Ritim Efesus 4:8.) Hau Jisas i yusim laspela 40 de bilong em long graun long helpim ol dispela man em ol i givim bel tru long wok, stap gut long em, na wok strong long winim ol mak bilong kamap “ol man olsem ol presen”?—Lukim stadi nout long Efesus 4:​8, NWT-E.

14. Long laspela 40 de bilong Jisas long graun, em i mekim wanem bilong helpim ol disaipel bilong em? (Lukim tu piksa.)

¹⁴ Jisas i givim tok kaunsel bilong stretim ol disaipel bilong em long gutpela pasin. Olsem, em i luksave olsem sampela bilong ol i save kisim tupela tingting long ol samting na em i stretim ol long dispela. (Luk 24:​25-27; Jon 20:27) Em i helpim ol long luksave olsem em i bikpela samting long ol i mas lukautim gut ol manmeri bilong God na ol i no ken tingim tumas ol wok skin bilong ol. (Jon 21:15) Em i tokim ol long no ken tingting tumas long wok bilong Jehova em ol narapela i kisim. (Jon 21:​20-22) Na em i stretim sampela tingting kranki ol i gat long Kingdom na em i helpim ol long putim tingting olgeta long autim gutnius. (Apo. 1:​6-8) Ol elda inap kisim wanem skul long Jisas?

15-16. (a) Hau ol elda i ken bihainim pasin bilong Jisas? Stori long dispela. (b) Olsem wanem tok kaunsel Patrick i kisim i helpim em?

¹⁵ Hau ol elda i ken bihainim pasin bilong Jisas? Ol i mas trenim na helpim ol man, dispela i makim tu ol yangpela man, long winim mak bilong mekim bikpela wok moa. c Ol elda i no gat tingting olsem ol man ol i trenim i mas kamap gutpela olgeta. Ol i mas givim ol gutpela tok kaunsel long ol dispela yangpela brata bambai ol i ken i gat save long mekim wok na ol i ken daunim ol yet, stap gut long God, na redi long helpim ol narapela.—1 Tim. 3:1; 2 Tim. 2:2; 1 Pita 5:5.

¹⁶ Lukim hau wanpela brata nem bilong em Patrick i kisim gutpela helpim long tok kaunsel  em i kisim. Taim em i yangpela man, sampela taim em i save mekim hatpela tok na pasin long ol narapela na ol sista tu. Wanpela elda i luksave long pasin bilong Patrick na long gutpela pasin em i givim em tok kaunsel bilong stretim em. Patrick i tok: “Mi amamas long em i mekim olsem. Mi save bel hevi taim mi lukim ol narapela brata i kisim ol wok insait long kongrigesen em mi tu i gat laik long en. Tasol tok kaunsel bilong elda i helpim mi long luksave olsem mi mas daunim mi yet na wok strong long helpim ol narapela bratasista, na mi no ken tingting tasol long kisim wok o namba insait long kongrigesen.” Gutpela samting i kamap em olsem, ol i makim Patrick long mekim wok elda taim em i gat 23 krismas.—Prov. 27:9.

17. Jisas i mekim wanem bilong soim olsem em i trastim ol disaipel bilong em?

¹⁷ Jisas i givim wok long ol disaipel bilong em long autim tok na skulim ol man. (Lukim “teaching them” stadi nout long Matyu 28:​20, NWT-E.) Ol disaipel inap pilim olsem ol i no gat save inap long mekim dispela wok. Tasol Jisas i no gat tupela tingting, em i save olsem ol inap mekim gut dispela wok, olsem na em i tokim ol long dispela samting. Jisas i bilip tru long ol na em i tok olsem: “Papa i bin salim mi i kam, na olsem tasol mi salim yupela i go.”—Jon 20:21.

18. Hau ol elda i ken bihainim pasin bilong Jisas?

¹⁸ Hau ol elda i ken bihainim pasin bilong Jisas? Ol elda i gat ekspiriens i save givim wok long ol narapela. (Fili. 2:​19-22) Olsem, ol elda i ken askim ol yangpela long klinim Haus Kingdom na mekim meintenens long en. Bihain long ol i givim wok long ol, ol i ken soim olsem ol i trastim ol long mekim dispela wok long rot bilong trenim ol na bilip olsem ol inap mekim gut wok. Wanpela nupela elda nem bilong em Matthew, em i tok em i amamas olsem ol elda i gat save long wok i trenim em gut long mekim wanpela wok na bihain ol i trastim em olsem em inap pinisim gut dispela wok. Em i tok: “Mi kisim gutpela helpim taim ol i lukim ol popaia bilong mi olsem samting bilong lain long en na ol i helpim mi long kamap gutpela moa.” d

19. Yumi mas tingting strong long mekim wanem?

¹⁹ Jisas i yusim laspela 40 de bilong em long graun bilong strongim, skulim, na trenim ol narapela. Yumi tu i ken tingting strong long bihainim gut eksampel bilong em. (1 Pita 2:21) Em bai helpim yumi long mekim olsem. Bikos em yet i promis olsem: “Mi stap wantaim yupela olgeta de i go inap long pinis bilong dispela taim.”—Mat. 28:20.