“MI GAT 15 krismas taim mi kisim baptais, na 6-pela mun bihain mi mekim wok painia haptaim. Bihain long 1-pela yia, mi putim aplikesen bilong kamap painia oltaim. Taim mi grediuet long sekenderi skul, mi tokim ol brata olsem mi laik autim tok long ol hap i sot long ol pablisa. Mi stap wantaim bubu meri long taun bilong mipela, tasol bubu i no wanpela Witnes Bilong Jehova, olsem na mi laik go long narapela hap. Mi bel hevi taim wasman sekit i tokim mi olsem teritori bilong mi em long taun mi bon na stap long en! Mi no laik bai em i luksave olsem mi bel hevi. Olsem na mi daunim het na i go, na mi tingim tok bilong em. Mi tokim sista husat bai poromanim mi long wok painia: ‘Ating mi mekim wankain pasin olsem Jona. Em i no laik i go long Ninive, tasol bihain em i senisim tingting na em i go. Olsem na mi tu bai mekim wok long hap ol i tokim mi long wok long en.’”

“Inap 4-pela yia nau mi mekim wok painia long taun mi bon long en, na mi luksave olsem em savetingting long bihainim tok bilong ol brata. Tingting kranki bilong mi yet i putim hevi long mi. Nau mi kisim bikpela amamas. Insait long wanpela mun, mi mekim Baibel stadi wantaim 24 manmeri. Bipo, bubu meri i birua long mi, tasol mi tenkyu tru long Jehova olsem nau mi inap stadi wantaim em long Baibel.”

Wanpela Baibel sumatin long Fiji i mas mekim disisen olsem em bai go long kibung o em bai go wantaim man bilong em long betde pati bilong wanpela wanblut. Man bilong em i wanbel long em i ken i go long kibung. Baibel sumatin i tok em bai i go bungim man bilong em bihain long kibung. Tasol bihain, em i pilim olsem mobeta em i no ken i go long betde pati bikos dispela inap pundaunim em, olsem na em i no go.

Man bilong em i tokim ol wanblut olsem meri bai i kam joinim ol bihain long “miting bilong ol Witnes.” Tasol ol i tok: “Em i no inap kam; ol Witnes Bilong Jehova i no save selebretim betde!” *

Man bilong dispela Baibel sumatin i amamas tru olsem meri i stap strong long bilip na bihainim maus bilong bel. Olsem na dispela meri inap autim tok long man bilong em na ol narapela. Man bilong dispela Baibel sumatin i stadi long Baibel, na em i go wantaim meri bilong em long ol miting.