1, 2. (a) Wanem samting inap kamap sapos man i no gat pasin bilong bosim bel? (b) Wok painimaut i kamapim klia wanem samting?

PASIN bilong bosim bel em wanpela pasin holi spirit i kamapim. (Gal. 5:22, 23) Jehova i bihainim stretpela pasin taim em i bosim bel. Tasol yumi ol man i no gutpela olgeta, olsem na yumi save wok hat tru long kamapim dispela pasin. Planti hevi i painim ol manmeri bikos ol i no gat pasin bilong bosim bel. Olsem, ol i no mekim gut wok bilong ol long skul o long ples wok. Na tu, ol i mekim tok i bagarapim narapela, dring spak, kros pait, divos, kisim dinau, kalabus long drak, go long kalabus, bel hevi na tingting planti, kisim sik bilong pasin pamuk, kisim bel nating, na ol narapela hevi.—Sng. 34:11-14.

² Ol man i no gat pasin bilong bosim bel i mekim ol pasin we i givim hevi long ol yet na ol narapela. Dispela pasin i go nogut moa. Long ol yia bihain long 1940, ol man i mekim wok painimaut long pasin bilong bosim bel na ol i luksave olsem ol man i no moa kamapim dispela pasin, olsem na ol hevi i go bikpela moa. Ol manmeri bilong God i no kirap nogut long dispela samting bikos Baibel i tokaut olsem long “taim bilong las de,” ol manmeri bai “i no gat pasin bilong bosim bel.”—2 Tim. 3:1-3.

3. Bilong wanem ol Kristen i mas kisim pasin bilong bosim bel?

³ Bilong wanem yu mas kisim pasin bilong bosim bel? Yumi bai stori long 2-pela risen. Namba 1: Ol lain i save bosim bel, ol i no  bungim planti hevi. Ol i stap bel isi, pas gut wantaim ol narapela, na ol i no save belhat kwik na tingting planti taim hevi i kamap. Namba 2: Taim yumi bosim bel na sakim ol traim, dispela bai mekim God i amamas. Adam na Iv i no bin bosim bel, olsem na hevi i painim ol. (Stt. 3:6) Tingim stori bilong ol narapela man husat i karim hevi bikos ol i no gat pasin bilong bosim bel.

4. Husat bai helpim ol lain i wok strong long kamapim pasin bilong bosim bel?

⁴ Yumi gat sin, olsem na i hatwok long kamapim pasin bilong bosim bel. Jehova i save olsem ol wokman bilong em i wok strong long kamapim dispela pasin, na em i laik helpim ol long daunim ol laik nogut. (1 Kin. 8:46-50) God i olsem gutpela Pren na em i redi long helpim ol man husat i laik mekim wok bilong em, na ol i wok strong long kamapim pasin bilong bosim bel. Yumi ken skelim olsem wanem Jehova i stap gutpela eksampel long pasin bilong bosim bel. Bihain, yumi bai stori long ol gutpela eksampel na ol eksampel nogut i stap long Baibel. Na tu, yumi bai stori long ol samting yumi inap mekim bilong kamapim moa yet pasin bilong bosim bel.

5, 6. Olsem wanem Jehova i stap gutpela eksampel long pasin bilong bosim bel?

⁵ Jehova i gutpela olgeta, olsem na em i stap nambawan eksampel long pasin bilong bosim bel. (Lo 32:4) Yumi ol manmeri i no gutpela olgeta. Maski i olsem, yumi mas skelim gut pasin bilong Jehova long bosim bel bambai yumi tu inap kamapim dispela pasin. Olsem wanem Jehova i kamapim klia pasin bilong bosim bel?

⁶ Jehova i kamapim pasin bilong bosim bel taim Satan i bikhet long em. God i mas stretim tok Satan i sutim long em. Tok Satan i sutim long God inap mekim ol ensel i tingting planti, belhat, na i no soim rispek long God. Ating yu pilim wankain taim yu tingim ol pen na hevi Satan i kamapim. Tasol Jehova i skelim gut ol samting na em i no hariap long givim strafe long Satan. God i no belhat kwik na em i bihainim stretpela pasin bilong kotim Satan. (Kis. 34:6; Jop 2:2-6) Jehova i larim haptaim i lus bikos “em i no laik bai wanpela i kisim bagarap. Em i laik bai olgeta i tanim bel.”—2 Pita 3:9.

7. Yumi kisim wanem skul long eksampel bilong Jehova long bosim bel?

⁷ Pasin bilong Jehova long bosim bel i skulim yumi olsem yumi mas skelim gut toktok na pasin yumi laik mekim, na yumi no laik hariap long mekim ol samting. Sapos yu bungim hevi, larim haptaim i lus bambai yu bihainim savetingting na stretim hevi. Beten askim God long givim yu savetingting bambai yu inap mekim gutpela tok na bihainim stretpela pasin. (Sng. 141:3) Taim yu belhat, yu no inap wokim gut tingting long samting yu bai mekim. Planti bilong yumi i rigret long ol tok o pasin i no stret yumi mekim!—Snd. 14:29; 15:28; 19:2.

8. (a) Olsem wanem yumi inap painim stori bilong ol man i stap gutpela eksampel long bosim bel? (b) Wanem samting i helpim Josep long sakim meri bilong Potifa? (Lukim piksa long kirap bilong stadi.)

⁸ Baibel i stori long sampela man husat i stap gutpela eksampel long bosim bel taim hevi i painim ol. Wanpela bilong ol dispela man em Josep, pikinini bilong Jekop. Josep i bosim bel taim em i wok long haus bilong Potifa, em bikman bilong ol ami bilong Fero. Meri bilong Potifa i aigris long Josep bikos em “i gat strongpela bodi na em i luk nais tru,” olsem na em i laik pulim Josep long slip wantaim em. Wanem samting  i helpim Josep long sakim meri bilong Potifa? Ating Josep i tingim hevi bai kamap sapos em i no bosim bel. Taim meri bilong Potifa i pulim saket bilong em, kwiktaim Josep i ranawe. Em i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.”—Stt. 39:6, 9; ritim Sindaun 1:10.

9. Olsem wanem yu inap redim yu yet long sakim ol traim?

⁹ Stori bilong Josep i skulim yumi olsem yumi mas sakim pasin bilong brukim lo bilong God. Sampela bilong ol lain i kamap Witnes i bin wok strong tru long lusim pasin bilong kaikai planti, dring spak, smok, kisim drak, mekim pasin pamuk, na ol narapela pasin nogut. Maski ol i kisim baptais pinis, sampela taim bel inap kirapim ol long mekim gen ol dispela pasin. Sapos traim i kamap na dispela i kirapim yu long brukim wanpela lo bilong Jehova, orait lusim sampela haptaim long tingim tingim olsem wanem pasin bilong bihainim ol laik nogut inap bagarapim yu long sait bilong bilip. Tingim ol samting inap kamap bilong traim yu, na tingim olsem wanem yu inap sakim ol dispela traim. (Sng. 26:4, 5; Snd. 22:3) Sapos traim i kamap, askim Jehova long givim yu savetingting bambai yu inap bosim bel na sakim ol traim.

10, 11. (a) Planti yangpela long skul i bungim wanem traim? (b) Wanem samting inap helpim ol yangpela Kristen long sakim presa bilong mekim pasin i no stret?

¹⁰ Planti yangpela long nau i bungim wankain hevi olsem Josep. Tingim stori bilong wanpela sista, nem bilong em Kim. Planti wanklas bilong em i insait pinis long pasin pamuk, na ol i save stori long dispela taim ol i go long skul. Kim i no gat kain stori olsem bilong mekim. Em i tok em i stap narapela kain long ol wanklas, na sampela taim em i pilim olsem em “i stap wanpis.” Ol wankrismas i tingim em olsem longlong meri bikos em i no gat boipren. Tasol Kim i bihainim savetingting na luksave olsem traim i save painim planti yangpela long mekim pasin pamuk. (2 Tim. 2:22) Planti taim ol wanskul i askim sapos em i slip wantaim wanpela man o nogat. Dispela i opim rot long em inap tokim ol long risen na em i no insait long dispela pasin. Yumi amamas tru olsem ol yangpela Kristen i sanap strong na sakim presa bilong mekim pasin pamuk, na Jehova tu i amamas long ol!

¹¹ Baibel i stori tu long sampela eksampel nogut bilong ol lain husat i no bosim bel na ol i mekim pasin pamuk. Na tu, em i stori long ol hevi i painim ol long pasin bilong i no bosim bel. Ol yangpela husat i bungim wankain hevi olsem Kim i ken tingim stori bilong yangpela man em Buk Sindaun sapta 7 i stori long en. Dispela yangpela man i no bin bihainim savetingting. Tingim tu hevi i kamap long pasin Amnon i mekim. (2 Sml. 13:1, 2, 10-15, 28-32) Ol papamama i ken helpim ol pikinini long bosim bel na bihainim savetingting long sait bilong painim poroman. Long taim bilong famili lotu, ol i ken yusim stori bilong Amnon na yangpela man em Buk Sindaun i stori long en.

12. (a) Bilong wanem Josep i mas bosim bel taim em i toktok wantaim ol brata bilong em? (b) Yumi mas bosim bel long wanem kain taim?

¹² Long narapela taim, Josep i kamapim gen pasin bilong bosim bel. Em i laik kliagut long tingting i stap long bel bilong ol brata bilong em, olsem na em i no tokaut long em i husat taim ol i kam long Isip bilong baim kaikai. Taim em i pilim olsem em i laik krai, em i go long narapela rum na krai. (Stt. 43:30, 31; 45:1) Sapos wanpela Kristen o wanpela yu laikim tumas i no  tingting gut na mekim pasin i no stret, orait bihainim pasin bilong Josep long bosim bel bambai yu no mekim tok o pasin em yu bai rigret long en. (Snd. 16:32; 17:27) Sapos wanpela long famili i raus, yu mas bosim bel bambai yu no painim kain kain rot bilong bung wantaim em. I hatwok long mekim olsem, tasol yumi inap bosim bel taim yumi bihainim eksampel bilong God na bihainim ol stiatok bilong em.

13. Yumi kisim wanem skul long stori bilong King Devit?

¹³ Tingim stori bilong King Devit. Maski em i gat bikpela strong, em i bosim bel na em i no larim pasin bilong belhat i kirapim em long pait long Sol na Simei. (1 Sml. 26:9-11; 2 Sml. 16:5-10) Tasol bihain, Devit i no bosim bel na em i mekim pasin pamuk wantaim Batseba, na tu, em i laik kilim Nabal. (1 Sml. 25:10-13; 2 Sml. 11:2-4) Yumi inap kisim skul long stori bilong Devit. Namba 1: Ol lain i go pas long stiaim ol manmeri bilong God i mas i gat pasin bilong bosim bel bambai ol i no mekim wok nogut long namba bilong ol. Namba 2: Yumi no ken ting olsem yumi no inap pundaun long traim.—1 Kor. 10:12.

14. (a) Wanem hevi i kamap long wanpela brata? (b) Bilong wanem yumi mas bosim bel taim hevi i bungim yumi?

¹⁴ Yu inap mekim wanem bilong bosim bel? Tingim dispela stori. Wanpela kar i bamim kar bilong Luigi. Maski em asua bilong narapela draiva, em i sutim tok long Luigi na i laik pait wantaim em. Luigi i beten askim Jehova long helpim em long stap isi na mekim ol tok bilong mekim isi bel bilong narapela draiva, tasol dispela man i wok yet long kros. Luigi i raitim namba-plet bilong kar na em i lusim dispela man, tasol em i wok yet long bikmaus long Luigi. Wanpela wik bihain, Luigi i mekim gobek long wanpela meri, na em i painimaut olsem man bilong dispela meri em dispela draiva! Dispela man i pilim nogut na em i tok sori long pasin em i mekim. Olsem na em i tokim Luigi olsem em yet bai toktok wantaim insurens kampani na bai ol i hariapim wok bilong stretim kar bilong Luigi. Em i putim yau taim Luigi i kamapim tok bilong Baibel, na em i amamas long ol tok em i harim. Luigi i luksave olsem em i bikpela samting long bosim bel taim hevi i kamap. Sapos em i bin belhat na kros ating hevi bai go bikpela moa.—Ritim 2 Korin 6:3, 4.

15, 16. Olsem wanem pasin bilong stadi long Baibel inap helpim yu na famili bilong yu long kisim pasin bilong bosim bel?

¹⁵ Taim Kristen i givim bel tru long stadi long Baibel, dispela bai helpim em long kisim pasin bilong bosim bel. Tingim tok God i mekim long Josua: “Yu no ken lusim tingting long dispela buk bilong lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo. Sapos yu mekim olsem, orait olgeta arapela samting yu mekim bai i kamap gutpela tasol.” (Jos. 1:8) Olsem wanem pasin bilong stadi long Baibel inap helpim yu long kisim pasin bilong bosim bel?

¹⁶ Baibel i stori long ol gutpela samting i kamap, na tu, long ol hevi i kamap long ol pasin ol man i mekim. I gat risen na Jehova i larim ol dispela stori i stap long Baibel. (Rom 15:4) Olsem na em i bikpela samting long yumi mas ritim Baibel, tingim tingim ol tok bilong en, na stadi gut long ol dispela tok! Tingim olsem wanem yu inap larim ol dispela tok i stiaim yu na famili bilong yu. Askim Jehova long helpim yu long bihainim tok bilong em. Sapos yu pilim olsem yu no inap bosim sampela pasin bilong yu,  orait i gutpela long tokaut long dispela na beten na wok strong long kisim pasin bilong bosim bel. (Jems 1:5) Taim yu mekim wok painimaut long ol pablikesen bilong yumi, yu inap painim ol atikol na ol skripsa we bai helpim yu long kisim pasin bilong bosim bel.

17. Olsem wanem papamama inap helpim ol pikinini long kisim pasin bilong bosim bel?

¹⁷ Olsem wanem yu inap helpim ol pikinini bilong yu long kisim pasin bilong bosim bel? Ol pikinini i no bon wantaim dispela pasin. Olsem na ol papamama i mas kamapim ol gutpela pasin bambai ol pikinini i ken bihainim. (Efe. 6:4) Sapos yu luksave olsem ol pikinini i no inap bosim bel long sampela samting, askim yu yet olsem yu stap gutpela eksampel long ol, o nogat. Sapos yu no gat pasin bilong bosim bel, dispela bai daunim gutpela wok yu mekim olsem wok autim tok, go long ol miting, na mekim famili lotu. Sampela taim i gutpela long tok nogat long sampela samting em pikinini i askim long en! Jehova i putim ol lo bilong stiaim Adam na Iv bambai ol i holim stretpela tingting long wok bos bilong God. Olsem tasol, taim papamama i putim sampela lo na stretim ol pikinini, dispela bai stiaim pikinini long kisim pasin bilong bosim bel. Papamama i mas helpim pikinini long daun long wok bos bilong God na rispektim ol lo bilong em, na dispela bai lukautim gut ol pikinini.—Ritim Sindaun 1:5, 7, 8.

18. Bilong wanem yu mas bung wantaim ol lain i stap strong long bilip?

¹⁸ Em i bikpela samting long yumi olgeta i mas skelim gut ol lain em yumi bung wantaim ol. I gutpela long bung wantaim ol lain husat bai kirapim yu long winim ol mak long sait bilong bilip na abrusim ol hevi. (Snd. 13:20) Sapos yu mekim olsem, dispela bai kirapim yu long bihainim pasin bilong ol long bosim bel. Na tu, gutpela pasin bilong yu bai strongim ol narapela. Pasin bilong bosim bel bai helpim yu long amamas long ol wok yu mekim long olgeta de, na God tu bai amamas long yu. Na tu, yu inap stap amamas wantaim ol lain yu laikim tumas.