LONG 1935 samting, Papa na Mama—James na Jessie Sinclair—i go stap long Bronx, em wanpela taun long New York Siti. Wanpela pren bilong papamama em Willie Sneddon, em wanpela brata i kam long Skotlan. Long namba 1 taim ol i bung, ol i kirap stori long famili bilong ol. Long dispela taim, mi no bon yet.

Mama i tokim Willie olsem bihain tasol long bikpela pait, Papa na bikpela brata bilong Mama i draun taim bot bilong ol i bamim wanpela bom ol i haitim insait long solwara Notsi. Willie i tok, “Papa bilong yu i stap long hel!” Willie em wanpela Witnes Bilong Jehova, na tok em i mekim i opim rot long Mama i harim tok i tru bilong Baibel long namba 1 taim.

Dispela tok i mekim Mama i bel hevi tru bikos papa bilong em i gutpela man. Willie i askim Mama olsem, “Yu bai pilim olsem wanem sapos mi tokim yu olsem Jisas i go long hel?” Mama i tingim wanpela bilip em Misin i skulim em long en, olsem taim Jisas i dai, em i go long hel na long de namba 3 em i kirap bek. Olsem na em i tingting, ‘Sapos hel em ples bilong ol man nogut, bilong wanem Jisas i go long hel?’ Dispela i kirapim Mama long kisim save long tok i tru. Em i kirap bung wantaim Bronx kongrigesen na kisim baptais long 1940.

Long dispela taim, oganaisesen i no kirapim ol papamama long stadi wantaim ol pikinini long Baibel. Taim mi liklik yet, Papa i save lukautim mi taim Mama i go long miting na mekim wok autim tok long ol wiken. Bihain long sampela yia, mi na Papa i kirap long i go long miting wantaim Mama. Mama i givim bel tru long autim gutnius na stadi wantaim ol manmeri i gat laik long kisim save long Baibel. Wanpela taim, Mama i bungim olgeta Baibel stadi bilong em na stadi wantaim ol bikos ol i stap klostu long narapela narapela. Mi save autim tok wantaim Mama long skul holide. Long dispela rot, mi kisim save long tok bilong Baibel na olsem wanem mi inap skulim ol narapela.

Taim mi liklik yet, mi no givim bel tumas long tok i tru. Tasol taim mi gat 12 krismas,  mi kamap pablisa bilong Kingdom na oltaim mi insait long wok autim tok. Long Julai 24, 1954, wanpela kibung i kamap long Toronto long Kanada. Long dispela taim mi gat 16 krismas, na mi dediketim laip bilong mi long Jehova na kisim baptais.

Sampela brata long kongrigesen bilong mipela i wok long Betel na sampela i no wok moa long Betel. Ol i bin kirapim laik bilong mi long i go wok long Betel. Mi kirap nogut long save ol i gat long ol tok i tru bilong Baibel na wok tisa bilong ol. Maski ol tisa long skul i kirapim mi long i go long yunivesiti, mi putim mak long i go long Betel. Olsem na mi putim aplikesen long dispela kibung i bin kamap long Toronto. Long 1955, kibung i kamap long Yankee Stediam long New York Siti, na mi putim gen aplikesen bilong i go long Betel. Taim mi gat 17 krismas, ol i singautim mi long i go wok long Brooklyn Betel long Septemba 19, 1955. Long namba 2 de bilong mi long Betel, mi go long dipatmen bilong wokim ol buk long 117 Adams Strit. I no longtaim, mi wok long masin bilong bungim ol buk i gat 32 pes bambai narapela masin i ken samapim.

Mi wok long dipatmen bilong wokim ol buk inap wanpela mun, na bihain mi wok long Magasin Dipatmen bikos mi save long taip. Long dispela taim, ol bratasista i save yusim ol stensil pepa na taipim atres bilong ol lain i gat laik long ritim nius Wastaua na Kirap! Sampela mun bihain, mi wok long Dipatmen Bilong Salim Ol Buk. Klaus Jensen em ovasia bilong dispela dipatmen, na em i askim mi long i go wantaim brata husat bai kisim ol boks litresa i go long wof bambai sip i ken kisim i go long ol narapela hap. Na tu, i gat sampela beg magasin em ol i mas karim i go long posofis bilong salim i go long olgeta kongrigesen long Amerika.  Weit bilong mi em 57 kilogram na mi bun nating, olsem na Brata Jensen i tok, ol dispela wok bai helpim bodi bilong mi long kamap strong. Tok bilong Brata Jensen i stret!

Magasin Dipatmen i save stretim oda bilong ol kongrigesen. Olsem na mi save long wanem ol tokples em ol i prinim ol magasin long en long Brooklyn na salim i go long olgeta hap bilong graun. Mi no bin save long sampela bilong ol dispela tokples, tasol mi amamas olsem ol i save salim planti tausen magasin long ol longwe ples. Mi no save olsem bihain bai mi visitim planti bilong ol dispela ples.

Long 1961, ol i makim mi long wok long Ofis Bilong Tresari, na brata Grant Suiter i stap ovasia. Mi wok long dispela dipatmen inap sampela yia, na bihain brata Nathan Knorr i singautim mi i go long ofis bilong em. Long dispela taim, em i go pas long lukautim wok autim tok. Em i tokim mi olsem brata i wok long dipatmen bilong em bai i go long Skul Bilong Wok Kingdom inap wanpela mun, na taim em i kam bek, em bai wok long Dipatmen Bilong Wok Autim Tok. Olsem na ol i makim mi long kisim ples bilong dispela brata na wok wantaim Don Adams. Long kibung bilong 1955, mi givim aplikesen bilong i go long Betel long Don. I gat 2-pela brata i wok pinis long dipatmen mi bai wok long en, em brata Robert Wallen na Charles Molohan. Mipela 4-pela i wok wantaim winim 50 yia. Mi amamas tru long wok wantaim ol brata i stap strong long bilip!—Sng. 133:1.

Kirap long ol yia bihain long 1970, ol i makim mi olsem wasman son long visitim ol brens ofis bilong Was Taua Sosaiti. Mi visitim ol Betel famili na ol misineri long olgeta hap na strongim bilip bilong ol na  sekim rekod bilong olgeta brens ofis. Mi amamas tru long bungim ol bratasista husat i grediuet long skul Gileat na ol i wok yet long mekim ol asainmen bilong ol long ol kantri ol i go long en! Na tu, mi amamas long visitim ol bratasista long winim 90 kantri.

Ol memba bilong Betel famili long Brooklyn i save go long ol kongrigesen long New York Siti. Ol i makim mi long i go bung wantaim Bronx kongrigesen. Planti bratasista i bung long dispela kongrigesen, olsem na ol i brukim i go long 2-pela kongrigesen. Ol i kolim dispela fes kongrigesen olsem Upper Bronx, em kongrigesen mi go long en.

Long yia 1965 samting, wanpela Witnes famili long Latvia i bin kisim tok i tru long hap saut bilong Bronx na ol i kam i stap long teritori bilong mipela. Livija em fesbon pikinini meri, na em i kamap painia oltaim bihain tasol long em i pinisim haiskul. Bihain long sampela mun, em i go stap long Massachusetts na helpim wok bilong Kingdom long dispela hap. Mi kirap long raitim pas long em na stori long ol samting i kamap long kongrigesen mi stap long en, na em i save rait bek na stori long ol gutpela samting i kamap long wok autim tok bilong em long Boston.

Bihain long sampela yia, Livija i kamap spesel painia. Em i laik mekim bikpela wok moa bilong Jehova, olsem na em i putim aplikesen bilong wok long Betel na ol invaitim em long 1971. I olsem Jehova i stretim rot long mitupela i ken bung! Long Oktoba 27, 1973, mitupela i marit na mipela i amamas tru olsem Brata Knorr i mekim weding tok. Sindaun 18:22 i tok: “Sapos yu maritim wanpela meri, dispela i gutpela tru. Dispela i soim olsem, God i amamas na i belgut long yu.” Mi na Livija i amamas long wok wantaim long Betel winim 40 yia. Mipela i wok yet long sapotim wanpela kongrigesen long teritori bilong Bronx.

Mi amamas tru long wok wantaim Brata Knorr. Em i givim bel tru long mekim ol wok lotu, na em i amamas long ol gutpela wok ol misineri i mekim long olgeta hap bilong graun. Planti bratasista i mekim wok misineri long ol kantri i no gat Witnes long en. Mi sori tru olsem Brata Knorr i karim hevi bilong sik kensa long 1976. Wanpela taim em i no inap wokabaut na em i slip tasol long bet, olsem na em i askim mi long ritim long em ol pablikesen em ol i laik prinim. Em i tokim mi long ringim Frederick Franz bambai em tu i ken kam na putim yau taim mi ritim ol dispela pablikesen. Bihain, mi kisim save olsem Brata Franz i no inap lukluk gut, olsem na Brata Knorr i save lusim bikpela haptaim long ritim ol pablikesen long em.

Brata Knorr i dai long 1977. Ol lain i save long em na laikim em, ol i stap bel isi bikos ol i save olsem em i stap gut long God i go  inap long em i pinisim asainmen bilong em hia long graun. (Rev. 2:10) Bihain, Brata Franz i go pas long wok bilong yumi.

Long dispela taim, mi mekim wok olsem sekreteri bilong Milton Henschel. Em i wok wantaim Brata Knorr inap planti yia. Brata Henschel i tokim mi olsem namba 1 wok bilong mi em long helpim Brata Franz. Oltaim mi save ritim ol pablikesen long em paslain long ol i prinim. Brata Franz i gat gutpela memori, na em i save putim gut yau long ol tok em i harim. Mi amamas tru long helpim em i go inap long em i pinisim wok bilong em long graun long Disemba 1992!

Mi wok long Betel inap 61 yia, na ol dispela yia i go hariap tru. Papamama bilong mi i stap gut long Jehova i go inap long ol i dai. Mi laik welkamim ol taim ol i kirap bek long nupela taim. (Jon 5:28, 29) Taim yumi wok wantaim ol bratasista i stap gut long God long olgeta hap bilong graun, amamas yumi kisim i winim tru amamas bilong dispela graun. Mi na Livija i mekim wok bilong God fultaim inap planti yia, na mipela i ‘amamas long Bikpela na em i strongim mipela.’—Neh. 8:10.

Olgeta bratasista i wok bung wantaim long sapotim ol wok insait long oganaisesen bilong Jehova, olsem na wok bilong autim tok i tru bilong Kingdom i go long olgeta hap. Mi amamas tru long wok wantaim ol bratasista na sapotim narapela narapela long ol yia mi stap insait long fultaim sevis. Planti bilong ol brata em God i makim na mi bin wok wantaim ol, ol i dai pinis. Mi amamas tru olsem mi inap pas gut wantaim ol brata i stap strong long bilip na mekim wok bilong Jehova.