1, 2. (a) God i makim Solomon long mekim wanem wok? (b) Devit i tingting planti long wanem samting?

SOLOMON i kisim asainmen long mekim wanpela bikpela wok—em i mas sanapim tempel long Jerusalem. Solomon i mas wokim “gutpela haus tru bilong Bikpela, na bai ol manmeri bilong olgeta kantri i ken amamas moa yet long dispela haus na givim biknem long en.” Dispela tempel bai stap olsem “haus bilong God.” Jehova i makim Solomon long i go pas long mekim dispela wok.—1 Sto. 22:1, 5, 9-11.

² King Devit i bilip olsem God bai sapotim dispela wok. Tasol em i tingim tu olsem Solomon em i “yangpela tumas na em i no save long pasin bilong wokim haus.” Yu ting Solomon bai strongim bel na pinisim wok bilong sanapim dispela tempel? O em bai pilim olsem em i yangpela tumas na em i no gat save long mekim dispela wok? Solomon i mas i gat strongpela bel bambai wok bilong em i ken kamap gut.

3. Olsem wanem Devit i stap gutpela piksa long Solomon long pasin bilong strongim bel?

³ Solomon i kisim skul long pasin bilong papa bilong em long  strongim bel. Taim Devit i yangpela man, em i bin pait wantaim ol wel animal taim ol i laik kaikaim ol sipsip bilong papa bilong em. (1 Sml. 17:34, 35) Na tu, Devit i strongim bel na em i pait wantaim Goliat. Maski Goliat em traipela man tru, God i strongim Devit na em i yusim 1-pela liklik ston long kilim Goliat.—1 Sml. 17:45, 49, 50.

4. Bilong wanem Solomon i mas i gat strongpela bel?

⁴ Devit i mekim stretpela pasin taim em i strongim Solomon long wokim tempel! (Ritim 1 Stori 28:20.) Sapos Solomon i no strongim bel, pasin bilong pret bai daunim em na em i no inap pinisim wok bilong sanapim tempel.

5. Bilong wanem yumi mas i gat pasin bilong strongim bel?

⁵ Wankain olsem Solomon, yumi mas larim Jehova i helpim yumi long strongim bel na mekim ol asainmen bilong yumi. Yumi bai stori long sampela lain long bipo husat i gat strongpela bel. Dispela bai helpim yumi long save long olsem wanem yumi inap strongim bel na mekim ol asainmen bilong yumi.

6. Olsem wanem Josep i bin strongim bel?

⁶ Josep i soim olsem em i gat strongpela bel taim em i sakim meri bilong Potifa husat i laik pulim Josep long slip wantaim em. Josep i save olsem bikpela hevi bai painim em sapos em i sakim meri bilong Potifa. Tasol Josep i strongim bel na ranawe long em.—Stt. 39:10, 12.

7. Olsem wanem Rahap i soim olsem em i gat strongpela bel? (Lukim piksa long kirap bilong stadi.)

⁷ Rahap tu i soim olsem em i gat strongpela bel. Taim 2-pela man Israel i go lukstil long Jeriko, em i haitim ol long haus bilong em. Rahap i bilip long Jehova, olsem na em i strongim bel na helpim dispela 2-pela man long ranawe. (Jos. 2:4, 5, 9, 12-16) Em i save olsem Jehova em i God tru, na em bai helpim lain Israel long kisim taun Jeriko. Rahap i no larim pasin bilong pret long ol man na king bilong Jeriko long daunim em, nogat. Pasin bilong em long strongim bel i helpim em na famili bilong em long abrusim bagarap.—Jos. 6:22, 23.

8. Olsem wanem pasin bilong Jisas long strongim bel i helpim ol aposel?

⁸ Jisas i stap gutpela eksampel long pasin bilong strongim bel, olsem na ol aposel i bihainim pasin bilong em. (Mat. 8:28-32; Jon 2:13-17; 18:3-5) Maski ol Sadyusi i birua long ol aposel, ol i strongim bel na wok yet long tokaut long nem bilong Jisas.—Apo. 5:17, 18, 27-29.

9. Olsem tok bilong 2 Timoti 1:7 i kamapim, husat bai strongim yumi?

⁹ Josep, Rahap, Jisas, na ol aposel i gat pasin bilong strongim bel na dispela i kirapim ol long mekim ol gutpela wok. Ol i no bilip long strong bilong ol yet, nogat. Ol i larim Jehova i strongim ol. Yumi tu i save bungim ol hevi, tasol yumi mas strongim bel. Yumi no laik bilip long strong na save bilong yumi yet, nogat. Yumi mas larim Jehova i helpim yumi. (Ritim 2 Timoti 1:7.) Yumi ken skelim olsem wanem yumi inap kamapim pasin bilong strongim bel insait long famili na long kongrigesen.

10. Bilong wanem ol yangpela Kristen i mas strongim bel?

¹⁰ Planti yangpela Kristen i bungim planti hevi, olsem na ol i mas strongim bel na lotuim Jehova. Ol inap kisim skul long stori bilong Solomon. Em i bin strongim bel na mekim gutpela disisen long pinisim wok bilong sanapim tempel. Maski ol papamama i gat wok long skulim ol pikinini, ol pikinini yet i mas mekim disisen long samting ol i laik mekim. (Snd. 27:11) Ol yangpela i mas strongim bel na mekim gutpela disisen long  sait bilong poroman, amamas ol bai kisim, pasin ol i mas bihainim, na mekim disisen bilong kisim baptais. Satan em man i save sutim tok long God, olsem na em i bikpela samting long ol yangpela i mas mekim ol gutpela disisen.

11, 12. (a) Olsem wanem Moses i stap gutpela eksampel long pasin bilong strongim bel? (b) Olsem wanem ol yangpela inap bihainim eksampel bilong Moses?

¹¹ Wanpela bikpela disisen ol yangpela i mas mekim em long ol samting ol i laik mekim long bihain. Long sampela kantri, ol tisa na papamama i putim presa long ol yangpela long go long bikpela skul na kisim wok mani i gat bikpela pe. Long ol narapela kantri, hevi bilong mani i mekim na ol yangpela i pilim olsem ol i mas painim wok mani na helpim famili long sait bilong kaikai na klos samting. Sapos kain samting olsem i kamap long yu, tingim stori bilong Moses. Pikinini meri bilong Fero i mekim bikpela long Moses, olsem na em inap kamap maniman na kisim biknem. Ating famili bilong em long Isip, ol tisa, na ol saveman i putim bikpela presa long em! Tasol Moses i strongim bel na sapotim lotu i tru. Em i sakim mani kago bilong Isip na em i bilip long Jehova. (Hib. 11:24-26) Olsem na Jehova i blesim Moses, na bihain em bai kisim planti moa blesing.

¹² Olsem tasol, Jehova bai blesim ol yangpela husat i strongim bel na putim Kingdom i stap namba 1 na winim ol mak long sait bilong bilip. God bai helpim ol long lukautim famili bilong ol. Long taim bilong ol aposel, yangpela Timoti i winim ol mak long sait bilong bilip, na yu tu inap mekim olsem. *—Ritim Filipai 2:19-22.

13. Bilong wanem wanpela sista i mas strongim bel bambai em inap winim ol mak long sait bilong bilip?

¹³ Wanpela sista long Alabama, Amerika i strongim bel na putim ol mak long sait bilong bilip. Em i tok: “Taim mi wok long kamap bikpela, mi gat pasin bilong sem. Mi pilim hatwok tru long toktok wantaim ol narapela long Haus Kingdom, na nok long dua bilong ol man mi no save long ol.” Papamama bilong em na ol bratasista long kongrigesen i helpim em long winim mak bilong kamap painia oltaim. Em i tok moa: “Satan i kirapim ol man long putim mak long i go long bikpela skul, kisim biknem, bungim mani kago, na ol narapela samting bilong amamasim ol yet. Tasol ol dispela samting i putim presa long ol na ol i bel hevi. Mi mekim wok bilong Jehova na dispela i givim mi bikpela amamas, na mi pilim olsem wok mi mekim i no lus nating.”

14. Wanem sampela samting inap kamap na ol papamama i mas strongim bel?

¹⁴ Ol papamama Kristen i mas strongim bel. Sapos bos i askim yu long wok ovataim long apinun na long ol wiken—ating yu makim ol dispela haptaim long mekim famili lotu, autim tok, na go long ol miting—orait yu mas strongim bel na tokim bos long ol wok lotu yu mas mekim. Dispela bai helpim yu long stap gutpela eksampel long ol pikinini. Ating sampela papamama long kongrigesen i orait long ol pikinini bilong ol i insait long ol amamas em yu yet i no orait long ol pikinini bilong yu i insait long en. Ating ol bai askim yu long risen na yu tok nogat long pikinini. Olsem wanem? Yu bai strongim bel na bihainim savetingting na tokim ol long risen na yu no orait long pikinini i insait long sampela amamas?

15. Olsem wanem tok bilong Song 37:25 na Hibru 13:5 inap helpim ol papamama?

¹⁵ Ol papamama i soim olsem ol i gat strongpela bel taim ol i helpim ol pikinini  long winim ol mak long sait bilong bilip. Sampela papamama i no stiaim ol pikinini long putim mak long mekim wok painia, mekim wok long hap i sot long ol pablisa, wok long Betel, o wok konstraksen. Ating ol i pilim olsem pikinini i no inap lukautim ol taim ol i go lapun o pikinini i no inap lukautim em yet long bihain. Tasol ol papamama i gat savetingting i strongim bel na bilip long ol tok promis bilong Jehova. (Ritim Song 37:25; Hibru 13:5.) Taim ol papamama i mekim olsem, ol inap kirapim ol pikinini long strongim bel na bilip long Jehova.—1 Sml. 1:27, 28; 2 Tim. 3:14, 15.

16. (a) Olsem wanem sampela papamama i helpim ol pikinini long winim ol mak long sait bilong bilip? (b) Olsem wanem dispela i helpim ol pikinini?

¹⁶ Tupela marit long Amerika i helpim ol pikinini long winim ol mak long sait bilong bilip. Papa i tok: “Paslain long ol pikinini i wokabaut na toktok, mipela i save stori wantaim ol long amamas ol inap kisim taim ol i mekim wok painia na ol wok insait long kongrigesen. Dispela i kirapim ol long putim ol mak long sait bilong bilip. Taim ol i winim ol dispela mak, dispela i helpim ol long sakim ol presa bilong dispela graun na putim wok bilong Jehova i stap namba 1.” Wanpela brata husat i gat 2-pela pikinini i tok: “Planti papamama i lusim strong na mani kago bilong ol long helpim ol pikinini long insait long ol spots, ol amamas, na go long ol bikpela skul. Sapos papamama i givim bel long helpim ol pikinini long winim ol mak long sait bilong bilip na i stap gut long Jehova, dispela i gutpela moa. Mipela i kisim bikpela amamas taim mipela i lukim ol pikinini i winim ol mak long sait bilong bilip.” Yu ken bilip tru olsem God bai blesim ol papamama husat i helpim ol pikinini long winim ol mak long sait bilong bilip.

17. Olsem wanem ol bratasista long kongrigesen inap strongim bel?

¹⁷ Yumi mas strongim bel insait long kongrigesen. Ol elda i mas kamapim dispela pasin taim ol i stretim wanpela long kongrigesen o taim ol i helpim ol bratasista husat i  stap long haus sik. Sampela elda i save visitim ol bratasista long kalabus na strongim bilip bilong ol. Olsem wanem ol singel sista inap strongim bel? Long nau, rot i op long ol inap mekim wok painia, go long hap i sot long ol pablisa, helpim wok bilong sanapim ol Haus Kingdom, na go long Skul Bilong Ol Kingdom Evanselis. Na tu, ol inap go long skul Gileat.

18. Olsem wanem ol sista i gat bikpela krismas inap soim olsem ol i gat strongpela bel?

¹⁸ Ol sista i gat bikpela krismas i stap olsem blesing insait long kongrigesen. Yumi laikim ol tru! Sampela sista i no inap mekim wok bilong God olsem long pastaim, tasol ol inap strongim bel na mekim ol narapela wok. (Ritim Taitus 2:3-5.) Ol i mas strongim bel sapos ol brata i askim ol long toktok wantaim ol yangpela sista long pasim ol klos i stret long ol Kristen i mas pasim. Long pasin isi, ol bai kirapim ol yangpela sista long skelim gut klos ol i pasim bambai ol i no pundaunim ol narapela. (1 Tim. 2:9, 10) Long dispela rot, ol yangpela sista bai mekim gutpela disisen long klos ol i laik pasim.

19. (a) Olsem wanem ol brata i baptais pinis inap strongim bel? (b) Olsem wanem tok bilong Filipai 2:13 na 4:13 inap helpim ol brata long kisim pasin bilong strongim bel?

¹⁹ Ol brata i kisim baptais pinis i mas strongim bel na mekim wok. Taim ol i mekim olsem, ol bai stap olsem blesing insait long kongrigesen. (1 Tim. 3:1) Tasol ating sampela brata i pilim olsem ol i no inap mekim sampela wok. Ating brata i mekim sampela rong long bipo, na em i pilim olsem em i no gutpela tumas long kamap kongrigesen sevan o elda. Narapela brata inap pilim olsem em i no inap mekim gut wok. Sapos yu holim kain tingting olsem, Jehova bai helpim yu long kisim pasin bilong strongim bel. (Ritim Filipai 2:13; 4:13.) Moses tu i bin pilim olsem em i no inap mekim wok. (Kis. 3:11) Tasol Jehova i helpim Moses na isi isi em i strongim bel na mekim wok. Brata i baptais pinis inap bihainim eksampel bilong Moses. Em i mas askim God long helpim em, na em i mas ritim Baibel long olgeta de. Na tu, em i mas tingim eksampel bilong ol lain husat i strongim bel na mekim wok bilong God, bambai em tu i kisim pasin bilong strongim bel. Pasin daun bai kirapim em long askim ol elda long trenim em long mekim ol wok, na em i mas redi long mekim ol wok bilong helpim kongrigesen. Mipela i laik kirapim olgeta brata i baptais pinis long strongim bel na mekim ol wok insait long kongrigesen!

20, 21. (a) Devit i mekim wanem tok bilong strongim Solomon? (b) Yumi ken bilip tru long wanem samting?

²⁰ King Devit i tokim Solomon olsem Jehova bai stap wantaim em i go inap long em i pinisim wok bilong sanapim tempel. (1 Sto. 28:20) Solomon i tingim tok bilong papa bilong em, olsem na em i strongim bel na mekim wok, na Jehova i helpim em long sanapim tempel insait long 7 na hap yia.

²¹ Wankain olsem Jehova i bin helpim Solomon, em bai helpim yumi long strongim bel na mekim wok insait long famili na long kongrigesen. (Ais. 41:10, 13) Yumi ken bilip tru olsem taim yumi strongim bel na mekim wok bilong Jehova, em bai blesim yumi long nau na long bihain. Olsem na yumi mas “sanap strong tru na mekim dispela wok.”