1. Wanem samting inap kamap sapos yumi larim tingting bilong dispela graun i bosim yumi?

BILONG WANEM yumi inap pilim hatwok long bihainim ol tok yumi lainim long Baibel? Wanpela risen em yumi mas i gat pasin daun bambai yumi inap mekim olsem. Tasol planti samting i mekim na i hatwok long yumi kamapim pasin daun. Long dispela taim bilong “las de,” yumi stap namel long ol manmeri husat i ‘laikim ol yet tasol, laikim tumas mani, litimapim nem bilong ol yet, ol i gat pasin antap,’ na ‘ol i no gat pasin bilong bosim bel.’ (2 Tim. 3:1-3) Ating wanpela wokman bilong God i lukim ol narapela i bihainim pasin bilong tingim ol yet na ol i kisim biknem. Em i no amamas long dispela pasin, tasol sapos em i no was gut, em inap mangal long ol samting ol dispela man i gat. (Sng. 37:1; 73:3) Wanpela Kristen inap tingting olsem: ‘Wai na mi mas putim laik bilong ol narapela i go pas long laik bilong mi? Sapos mi “daunim [mi] yet,” ating ol manmeri bai i no rispektim mi?’ (Luk 9:48) Sapos yumi larim tingting bilong dispela graun long tingim yumi yet i bosim yumi, dispela inap bagarapim pasin bilong yumi long pas gut wantaim ol wanbilip insait long kongrigesen, na pasin bilong yumi long stap olsem wanpela Kristen. Tasol yumi stap gut taim yumi stadi long ol gutpela eksampel bilong ol bilipman long Baibel na bihainim pasin bilong ol.

2. Olsem wanem stori bilong ol bilipman long bipo inap helpim yumi?

 ² Sapos yumi laik bihainim gutpela pasin bilong ol bilipman long bipo, yumi mas painimaut long ol samting ol i mekim na ol gutpela samting i kamap long dispela. Ol i mekim wanem bilong kamap pren bilong God? Hau ol i lukautim pasin pren bilong ol wantaim em? Olsem wanem ol i kisim strong long mekim laik bilong God? Dispela kain pasin bilong stadi em wanpela gutpela rot bilong helpim yumi long kisim ol kaikai bilong strongim bilip.

3, 4. (a) Yumi kisim ol tok bilong strongim bilip bilong yumi long wanem ol rot? (b) Bilong wanem kaikai bilong strongim bilip i no makim pasin bilong kisim save tasol?

³ Yumi kisim ol gutpela skultok na trening long rot bilong Baibel, ol pablikesen bilong yumi, jw.org Web-sait, JW Brodkasting, ol miting na long ol kibung. Tasol tok bilong Jisas long Jon 4:34 i helpim yumi long save olsem kaikai bilong strongim bilip i no makim pasin bilong kisim save tasol. Jisas i tok: “Kaikai bilong mi em long mekim laik bilong man i bin salim mi i kam na long inapim wok em i givim long mi.”

⁴ Jisas i tingim tu pasin bilong mekim laik bilong God olsem kaikai bilong strongim bilip. Olsem wanem pasin bilong mekim laik bilong God i wankain long kaikai? Taim yumi kisim gutpela kaikai, dispela i givim nupela strong long bodi. Olsem tasol, taim yumi mekim laik bilong God, dispela i strongim bel bilong yumi na yumi holimpas bilip na wet long kisim laip oltaim. Planti taim, yumi bel hevi o yumi pilim taiet taim yumi go autim tok, tasol bihain long autim tok yumi pilim amamas na yumi kisim nupela strong.

5. Yumi inap kisim wanem blesing taim yumi bihainim gutpela tingting?

⁵ Taim yumi kisim save long laik bilong God na mekim laik bilong Em, dispela i soim olsem yumi gat savetingting. (Sng. 107:43, NW ) Yumi bai kisim planti blesing taim yumi bihainim gutpela tingting. Baibel i tok: “Em i winim olgeta arapela samting yu laikim tumas. . . . Gutpela tingting i olsem diwai bilong givim laip. Olsem na ol man i holimpas gutpela tingting, ol i gat laip i gutpela tru na ol i amamas.” (Snd. 3:13-18) Jisas i tok: “Yupela save long ol dispela samting, olsem na yupela bai amamas sapos yupela i mekim ol dispela samting.” (Jon 13:17) Ol disaipel bai amamas tru sapos ol i wok yet long mekim ol samting Jisas i tokim ol long en. I no olsem ol i kirap bihainim tok na pasin bilong em na bihain ol i stop long mekim, nogat. Ol i mekim olsem long laip olgeta bilong ol.

6. Bilong wanem yumi mas wok strong long bihainim savetingting?

⁶ Long nau, em i bikpela samting long yumi mas wok strong long bihainim ol tok i tru yumi lainim. Tingim dispela tok piksa: Wanpela mekenik i gat ol tul, ol pat bilong kar, na em i gat save. Tasol sapos em i no yusim ol dispela samting, orait ol dispela samting i no inap helpim em. Sapos em i mekim wok mekenik long pastaim na em i gat gutpela save long mekim dispela wok, orait em i mas wok yet long yusim dispela save bambai em inap mekim gutpela wok long save em i gat. Olsem tasol, ating festaim yumi ritim Baibel na bihainim ol tok bilong en, dispela i mekim yumi amamas. Tasol amamas bilong yumi inap pinis sapos yumi no bihainim ol tok bilong Jehova long olgeta de.

7. Sapos yumi bihainim savetingting, yumi bai mekim wanem taim yumi kisim save long stori bilong ol bilipman long bipo?

⁷ Yumi ken skelim sampela samting we inap kamap na i traim pasin daun bilong yumi, na olsem wanem ol bilipman long bipo i winim ol wankain traim. Sapos yumi tingim tingim stori bilong ol bilipman, dispela bai strongim bilip bilong yumi, tasol yumi mas  mekim sampela samting moa. Tingim olsem wanem yu inap bihainim eksampel bilong ol, na yu mas mekim hariap.

8, 9. Olsem wanem tok i stap long Aposel 14:8-15 i kamapim klia pasin daun bilong aposel Pol? (Lukim piksa long kirap bilong stadi.)

⁸ Laik bilong God i olsem, “em i laik kisim bek olgeta kain man na em i laik bai ol i kisim stretpela save long tok i tru.” (1 Tim. 2:4) Yu gat wanem tingting long olgeta kain man em ol i no save yet long tok i tru? Maski aposel Pol i painim ol lain Juda long ol sinagog em ol i gat liklik save long God, em i no tingting tasol long helpim ol, nogat. Em i laik helpim tu ol man i lotuim ol narapela god, tasol pasin ol i mekim long em inap traim pasin daun bilong em.

⁹ Long namba 1 misineri raun bilong Pol, ol manmeri long Likonia i ting olsem Pol na Barnabas em ol god ol i save lotuim, em god Sus na Hermes. Olsem wanem? Pol na Barnabas i larim ol manmeri i givim biknem long ol? Paslain long tupela i kam long Likonia, ol man long narapela 2-pela taun i mekim nogut long ol. Yu ting tupela bai amamas tasol long ol manmeri long Likonia i givim biknem long tupela? Yu ting tupela i holim kain tingting olsem ol man i amamas long ol na dispela bai helpim ol long autim gutnius? Nogat tru! Kwiktaim tupela i brukim saket bilong ol na ran i go namel long bikpela lain manmeri na singaut olsem: “Watpo yupela i mekim dispela pasin? Mitupela i man tasol wankain olsem yupela.”—Apo. 14:8-15.

10. Olsem wanem Pol na Barnabas i wankain long ol manmeri long Likonia?

¹⁰ Pol na Barnabas i tokaut olsem tupela tu i gat sin wankain olsem ol. Tasol dispela i no makim olsem pasin bilong tupela long lotu i wankain olsem dispela lain haiden. God i makim tupela long mekim wok misineri. (Apo. 13:2) Na tu, holi spirit i makim tupela na ol i bilip na wet long kisim gutpela pe long heven. Tasol Pol na Barnabas i save olsem ol manmeri long Likonia inap kisim ol dispela blesing tu sapos ol i harim tok bilong gutnius.

11. Taim yumi autim tok, olsem wanem yumi inap bihainim pasin bilong Pol?

¹¹ Olsem wanem yumi inap bihainim pasin daun bilong Pol? Pastaim, yumi mas sakim pasin bilong tingim olsem ol manmeri i mas litimapim nem bilong yumi o yumi no ken amamas taim ol i givim biknem long yumi long ol wok yumi mekim long strong bilong Jehova. I gutpela long yumi wan wan i askim yumi yet olsem: ‘Mi gat wanem tingting long ol manmeri mi autim tok long ol? Mi bihainim pasin bilong ol man long komiuniti long laikim tasol ol man bilong wanpela ples?’ Yumi amamas tru olsem long olgeta hap, ol Witnes Bilong Jehova i traim long painim ol manmeri i mekim ol narapela tokples na ol i stap long teritori. Ol i laik tru long helpim planti manmeri moa long harim gutnius. Sampela taim, dispela i makim olsem ol pablisa i mas lainim wanpela tokples na kastam bilong ol lain em ol narapela i luk daun long ol. Tasol ol dispela pablisa i no ken ting olsem ol i winim ol narapela. Ol i mas save gut long laik na tingting na sindaun bilong olgeta wan wan man bambai ol i ken putim tok bilong Kingdom long bel bilong ol.

12. Olsem wanem Epafras i soim olsem em i tingim tru ol narapela?

¹² Narapela rot bilong soim olsem yumi daunim yumi yet na bihainim tok bilong God em olsem, yumi mas beten long God i ken strongim ol lain “husat i bin kisim bilip i dia tumas wankain olsem bilong [yumi].” (2 Pita 1:1) Epafras i bin mekim olsem. Baibel i stori long Epafras 3-pela taim tasol—em long ol pas Pol i raitim. Taim Pol i kalabus long Rom, em i raitim pas i go long ol  Kristen long Kolosi. Em i tok: “Oltaim [Epafras] i save strong tru long beten askim God long helpim yupela.” (Kol. 4:12) Epafras i save gut long ol na em i tingim tru ol. Em i “wankalabus” bilong Pol, tasol em i tingting long olsem wanem em inap strongim bilip bilong ol. (File. 23) Em i beten bilong helpim ol. Dispela i soim olsem em i tingim ol narapela. Taim yumi beten askim Jehova long strongim ol bratasista, dispela beten i gat strong long helpim ol. Moa yet taim yumi kolim nem bilong ol long beten bilong yumi.—2 Kor. 1:11; Jems 5:16.

13. Olsem wanem yumi inap bihainim eksampel bilong Epafras taim yumi beten?

¹³ Yumi mas tingim ol bratasista em ol i nidim helpim, na kolim nem bilong ol taim yumi beten. Olsem Epafras, planti bratasista i save beten askim God long strongim ol narapela insait long kongrigesen, na ol lain husat i gat bikpela wok long lukautim famili, o ol i mas mekim bikpela disisen o traim i painim ol. Planti bratasista i beten na kolim nem bilong ol wanbilip em ol i stap long kalabus na nem bilong ol i stap long jw.org Web-sait. Na tu, yumi mas tingim ol lain em wanpela ol i laikim tumas i dai, ol lain i abrusim ol disasta na woa, na ol lain i karim hevi bilong mani. Planti bratasista i karim ol hevi, olsem na yumi mas beten long God i ken strongim ol. Taim yumi mekim olsem, yumi soim olsem yumi no tingim yumi yet, nogat. Yumi tingim tru ol narapela. (Fili. 2:4) Jehova i save harim kain beten olsem.

14. Olsem wanem Jehova i soim gutpela eksampel long pasin bilong putim gut yau?

¹⁴ Narapela rot bilong soim olsem yumi gat pasin daun em pasin bilong redi long putim gut yau. Jems 1:19 i tok, yumi mas “putim yau kwik long harim tok.” Jehova i stap nambawan gutpela eksampel long dispela pasin. (Stt. 18:32; Jos. 10:14) Yumi inap kisim skul long pasin bilong God long Kisim Bek 32:11-14. (Ritim.) Maski i no gat wok long Jehova i harim tok bilong Moses, Em i larim Moses i kamapim tingting bilong em. Sapos wanpela man i save holim ol tingting kranki, ol narapela bai i no redi long putim yau long em na bihainim tok bilong em. Tasol Jehova i no save les kwik long putim yau long ol man husat i bilip long em na askim em long helpim ol.

15. Olsem wanem yumi inap bihainim pasin bilong Jehova long rispektim ol narapela?

¹⁵ Yumi olgeta i ken askim yumi yet olsem: ‘Sapos Jehova i daunim em yet na redi long putim yau long Abraham, Resel, Moses, Josua, Manoa, Elaija, na Hesekia, orait olsem wanem long mi? Mi tu inap onarim na rispektim ol bratasista na redi long harim ol gutpela tingting ol i kamapim na bihainim? I gat wanpela long kongrigesen o famili bilong mi em ol i laik kamapim tingting bilong ol na i stret long mi putim yau long ol long nau yet? Mi ken mekim wanem bilong helpim ol?’—Stt. 30:6; Het. 13:9; 1 Kin. 17:22; 2 Sto. 30:20.

16. King Devit i mekim wanem taim Simei i sikirapim bel bilong em?

¹⁶ Narapela rot i soim olsem yumi gat pasin daun em yumi bosim bel taim narapela i sikirapim bel bilong yumi. (Efe. 4:2) Wanpela gutpela eksampel i stap long 2 Samuel 16:5-13. (Ritim.) Devit na ol wokman bilong em i bosim bel na ol i no bekim pait taim Simei, em wanblut bilong King Sol, i tok nogut na tromoi ston long ol. Devit i no bekim rong bilong Simei, maski em i gat namba long mekim olsem. Olsem wanem Devit inap bosim bel? Yumi inap save long bekim bilong dispela askim taim yumi skelim namba 3 sapta bilong Buk Song.

17. (a) Wanem samting i helpim Devit long bosim bel? (b) Olsem wanem yumi inap bihainim pasin bilong Devit?

¹⁷ Tok i go pas long Buk Song sapta 3 i stori  olsem Devit i raitim dispela song taim em i ranawe long pikinini man bilong em, Apsalom. Ves 1 na 2 i stret wantaim ol samting em sapta 16 bilong Namba 2 Samuel i stori long en. Buk Song 3:4 i stori long Devit i bilip, na em i tok: “Mi save singaut long God i helpim mi. Em i stap long maunten bilong em yet na em i harim singaut bilong mi.” Yumi tu i mas beten taim ol narapela i mekim nogut long yumi. Long rot bilong holi spirit, Jehova inap helpim yumi long sanap strong. Yu inap tingim sampela samting we inap kamap na yu mas lain long bosim bel o redi long fogivim wanpela husat i no tingting gut na mekim tok o pasin i sikirapim bel bilong yu? Olsem wanem? Yu bilip tru olsem Jehova i lukim hevi yu karim na em bai blesim yu?

18. Wanem gutpela samting bai kamap sapos yumi wok yet long bihainim tok bilong God?

¹⁸ Taim yumi mekim samting i stret, dispela i kamapim planti blesing. Sindaun 4:7 i tok: “Nambawan samting yu mas kisim, em i gutpela tingting”! Yumi kisim save na dispela i helpim yumi long i gat gutpela tingting. Tasol i no dispela tasol, nogat. Gutpela tingting yumi gat i mas kirapim yumi long mekim gutpela disisen. Tingim, ol anis tu i bihainim gutpela tingting tru na ol i save bungim kaikai long taim bilong san. (Snd. 30:24, 25) Krais i ‘kamapim ples klia savetingting bilong God,’ na oltaim em i mekim ol samting em Papa i orait long en. (1 Kor. 1:24; Jon 8:29) God i luksave long man husat i save long ol samting i stret na em i mekim ol dispela samting. Em i save givim gutpela pe long ol man i gat pasin daun na ol i sanap strong na bihainim stretpela pasin. (Ritim Matyu 7:21-23.) Olsem na yumi mas bihainim pasin daun na mekim wok bilong Jehova insait long kongrigesen. Long dispela rot, yumi bai helpim ol wanbilip insait long kongrigesen long mekim wok bilong Jehova wantaim pasin daun. Sampela haptaim i mas lus na yumi mas i gat pasin bilong i no les kwik bambai yumi inap bihainim ol tok yumi lainim na senisim sampela pasin kranki bilong yumi. Taim yumi mekim olsem, bai yumi stap amamas long nau na i go inap oltaim.